1, 2. Ka profesía luáguti lagumuhóun dan adügübei lun habusenrun lánigu Hesusu disipulu lun hasubudirun amu katei, ani ka uagu?

CHÜLÜDÜGA buga oura lun herederun Féduru, Santiagu, Huan luma Andürési hábuguarügü luma Hamaisturun. Añahagua meha asaminara luagun le lariñagubei Hesusu luagu tagünrinchawagun ténpulu (Mar. 13:1-4). Aba lubeiti hálügüdüni: “Busentiwa lun bariñaguni woun ídaba lan lasusereda sun le ani kaba lan liseinin bagiribudun ubouagun, luma lagumuchagüle ubóu?” (Mat. 24:1-3). Aba layanuhan Hesusu houn luagu katei burí le lunbei lasansiruni habagari gürigia ani arufudaleime luagu wawinwanduña lan lidan lagumuhóun dan lidan ubóu lani Satanási. Ayanuhati meha Hesusu luagu aban sügǘ súdiniti, háfuga ligía adügübei lun habusenrun disipulugu hasubudirun amu katei. Lárigiñebei layanuhan luagu turóbuli híruti kéiburi wuribu, ilamaü o laganwoundun wuribani, ariñagati Hesusu lasusereduba lan aban katei buiti lídanme lagumuhóun dan: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Mat. 24:7-14).

² Ñǘdünhaña meha disipulugu luma Hesusu apurichihei “uganu buiti luagu larúeihan Bungiu” (Luk. 8:1; 9:1, 2). Háfuga lidan oura ligía aba haritaguni lererun Hamaisturun le: “Inarüni, gíbeti nadü le lunbei lalubahóuniwa, ani lóuguatiña nadagimeintiña. Ligía lunti lubéi hamuriahan luma Bungiu lun lóunahan nadagimeintiña haganaguóun” (Luk. 10:2). Gama lumoun, ida luba meha san hapurichihan “lidan sun ubóu” luma “lun lasubudirúniwa lidan sun fulasu”? Halíagiñeba meha hayabin hanwoun nadagimeintiña? Lun hamuga meha gayarati harihini le lunbei lasuseredun saragu dan lárigiñe, ménrengunti hamuga gunfuranda hamani le lariñagubei Hesusu houn. Chóuruti taweiriduña lan hamuga hanigi  dan le harihini lagunfulirun fiú dimurei le waliihabei guentó lidan Matéu 24:14.

3. Ida liña lagunfulirun Lúkasi 21:34 uguñe weyu, ani ka álügüdahani lunbei wadügüni wóuniwagua?

³ Lagunfuliruña lani Hesusu profesía lidan wadaani, lugundun añahein saragu míñunu wügüriña hama würiña ligibuagu Ubóu nadagimein úara lidan lapurichihóun uganu buiti luáguti Larúeihan Bungiu (Isa. 60:22). Gama lumoun, lidan dimurei le lariñagubei Hesusu, ariñagati hénrengubei lan houn fiú kristiánugu hetenirun lun apurichihani lídounme lagumuhóun dan, lidan amu dimurei, hadireiruba lan o ‘tabuinchuba lan hanigi lau katei málati’ (aliihoualá Lúkasi 21:34). Uguñe weyu warihiñein lagunfulirun dimurei burí le. Añahein lubúeingu Bungiu ádaragutiña houngua lidoun amu burí katei. Arihúati le lidan le desidírü habéi lidan luáguti wadagimanu, aturiahani tidan luban furendei íñuti, umegeguni luma dan le hásügürübei lidan somu isebáhari. Añahein kristiánugu labuchaduña hawagu ladüga óuchawaguni o idiheri le lánina ibagari. Ligía buidu lubéi lun wálügüdagun woungua: “Ida liña san lidin nun? Ka larufudubei le desidírü nubéi luagu le súdinitimabei lidan nibagari?”.

4. a) Ka meha lamuriahabei Pábulu lidan furíei hawagu kristiánugu filipuna, ani ka uagu? b) Kaba wakutiha lidan arütíkulu le luma lidan leweñegua, ani kaba uagu wadügei?

⁴ Lidan furumiñeti sígulu, hibe-agei kristiánugu “ragühaña [meha] anigi lun hapurichihanimeme uganu ligía manufudeuga”, ítara kei Pábulu (Fili. 1:12-14). Gama lumoun, mosu meha háfaagun lun hasigirun íchigei heseriwidun lun Bungiu lidan furumiñeti lúgaaru. Ligía lafurieidunbei apostolu lun hasigirun íbirigu ha Filipubaña achoururei “katei le súdinitimabei” (Fili 1:9-11, TNM). Ani lasusereduña aban katei ítarati uguñe weyu. Hibe-agei wádangiñe wapurichihañein Lererun Bungiu lau ganigi. Íbini ítara, gayarati san lídehan wakutihani le tadügübei lóundarun Heowá lun wederegeragun woungua buidu lun apurichihani? Anha. Líderagubadiwa arütíkulu le lun wasaminarun luagu sun le ladügübei Heowá lun lagunfulirun profesía le lídanbei Matéu 24:14. Ka tisuunibei lóundarun Bungiu? Ida luba líderaguniwa ani íderagua láñame waduheñu wasubudiruni ka lan tisuunibei lóundarun Bungiu? Lidan leweñegua arütíkulu wakutihaba kaba lan íderaguawa lun wawandun ani sigí wameime tupasun lóundarun Heowá.

5, 6. a) Ka uagu lígira Heowá lun wasubudirun saragu katei luagu fánreinti le siélubei tánina lóundarun? b) Ka arufudúni larihibei Esekiéli?

⁵ Gíbeti katei mabürüdagüdün lumuti Heowá tidan Bíbülia. Kei hénpulu, íbini buídubei lan hamuga lafuranguagüdüni ida liña lan luadigimaridun wani sesu o ubóu, madügün lumuti. Rúrügüti ariñahani woun le wemegeirubei lun gunfuranda wamani ani winwan wagíame según lisuuni (2 Tim. 3:16, 17). Ani ma lisudinin ariñahani le tíchugubei Bíbülia luagu fánreinti le marihínwabei tánina lóundarun Heowá! Wéiriti ugundani le lanügübei waliihani le habürühabei Isaíasi, Esekiéli, Danieli luma Huan luagu ligaburi laransehani Heowá katei sielu (Isa. 6:1-4; Ese. 1:4-14, 22-24; Dan. 7:9-14; Aruf. 4:1-11). Ítara liña kamá hamuga aba ladaraagunu Heowá korütina ani aba lerederun sielu furangu ligibugiñe wagu. Ka uagu labusenra Heowá lun ñein lan ariñahani le tidan Lererun?

⁶ Ladüga busenti lun waritaguni súnwandan lídangiñetiwa lan aban óundaruni to anuheinboun lidan sun ubóu. Lasusereduña saragu katei lun lagunfulirun lisuuni Heowá, lóugiñe le gayarabei warihini. Kei hénpulu, ariha lumuti profeta Esekiéli fánreinti le marihínwabei tánina lóundarun Bungiu, ítara liña larihini kamá aban  óunwenbu karü siéluna. Fureseti meha téibaagun karü tuguya ani gayarati tawanserun luagun furumiñeguarügü oubaü mararamagunga (Ese. 1:15-21). Sagü lagararaagun tubalabala tawanserun lau lóufudagun. Arihati giñe Esekiéli fiú katei luáguti Abugahati: “Aba narihin aban katei lenege watu gemeti. Ñeinñein aban larugounga geyegu lau [...]. Ítara liña ligaburi larufudagun luéirigun Aburemei lungua nun” (Ese. 1:25-28). Chóuruti aba lan taweiridun lanigi profeta le. Ariha lumuti Bungiu adundehoun lóundarun buidu, adundehei sun katei lau lani sífiri sandu. Ma lanarime arufudúni luagu fánreinti le siélubei tánina lóundarun Heowá lidan tuadigimariña lan!

7. Ida liña líchugun arufudúni le larihibei Danieli ichouruni woun?

⁷ Arihati giñe Danieli saragu katei le íchugubei ichouruni woun. Ibihati chansi lun larihini Heowá lidan aban arufudúni keisi aban “Weiriei Mutu” ñun luagu aban lálana arúeihani lauti watu gemeti, gabalabalati haláü ligía (Dan. 7:9). Busenti meha Heowá lun larihini Danieli tawanseruña lan lóundarun, tagunfuliruñein lan lisuuni. Arihati giñe profeta le aban gürigia “kamá liráü wügüri”, Hesusu, le unbei lichugúa wadagimanu lun larihin lau fánreinti tánina lóundarun Heowá ya ubouagu. Mámarügübei fiú irumu lidura larúeihan Hesusu, lugundun “masansiragunbei lubafu, magünrinchawagunbei giñe larúeihan” (Dan. 7:13, 14). Ma adügati le lun wafiñerun luagu Heowá luma lun gebegi lan le ladügübei woun? Ruti “ubafu luma uéiriguni luma arúeihani” lun Liráü, le óuchawagubei ani arufudati úaraguni. Furanguti afiñe lan Heowá luagu Liráü. Ani wagía, gayarati giñe wafiñerun luagu Hesusu, le alidihabaliwa.

8. Ka efekütu lánibei luagu Esekiéli luma Isaíasi arufudúni burí le heresibirubei lúmagiñe Heowá, ani ka efekütu lunbei gani lani wawagu?

 ⁸ Ida liña líderaguniwa wasubudiruni buidu fánreinti tánina lóundarun Heowá le marihínwabei? Ítara kei Esekiéli, chóuruti weiri tan wanigi ani ǘnabugutimatiwa dan le gunfuranda wamani le ladügübei Heowá (Ese. 1:28). Dan le wasaminarun tuagun lóundarun Heowá íderagua lumutiwa lun warihin kaba lan wadüga, ítara kei Isaíasi. Dan le libihinbalin chansi lun labahüdaguni houn gürigia le ladügübei Heowá, masaminarun lumuti bián wéiyaasu (aliihoualá Isaíasi 6:5, 8). Chouru lumuti meha gayara lan liñuragun lídangiñe furumiñeguarügü lénrengunga lau lídehan Heowá. Wéiriti giñe dǘgüdaguaü le wibihibei dan le warihini fánreinti le siélubei tánina lóundarun Heowá, to mararamagunboun ani deregeguañu tiña tungua lun tagunfuliruni lisuuni!

9, 10. Ka uagu mégeiwa lubéi aban fánreinti tánina lóundarun Heowá le gayarati larihín?

⁹ Yusu lumuti Heowá Liráü lun ladügün aban aransehani ubouagu le úarati luma fánreinti marihínwati le tánina lóundarun. Ka uagu mégeiwa lubéi aban aransehani le arihíwati lun gayara lan ladügǘn wadagimanu le uágubei layanuhóua lidan Matéu 24:14? Ariha wamá ǘrüwa resun.

¹⁰ Lidan furumiñeti lúgaaru, ariñagati Hesusu luagu hapurichihaba lan lani disipulugu “chülǘ lumoun lidise-agei fulasu ubouagu” (Adü. 1:8). Lidan libiaman lúgaaru, mégeiwati aban buiti aransehani lun lafanreinhóun ariñahani le lúmagiñeti Bungiu, le ítarabei kei éigini luma lun hounigirún apurichihatiña (Huan 21:15-17). Lagumuhóun, mosu giñe ladügǘn aransehani lun gayara lan hadamuridagun ha apurichihabalin uganu buiti lun háhuduragun lun Heowá ani resibi hagíame adundehani lubá hapurichihan (Ebü. 10:24, 25). Siñabei hamuga ladügǘn sun katei le lun hamuga ua lan aransehani buiti. Lun hibihin lánigu Kristu buiti resultóu, mosu ñein lan aransehani buiti lubá apurichihani.

11. Ida luba wídehan lidan aransehani le tadügübei lóundarun Heowá?

¹¹ Ida luba wídehan lidan aransehani le tadügübei lóundarun Heowá? Aban manera súdiniti lun wadügüni, wafiñerun hawagu gürigia ha uágubaña lafiñera Heowá luma Hesusu lun hadundehani apurichihani. Anihein saragu katei ubouagu le gayarabei ladügün lun hadireirun íbirigu luéi le súdinitimabei. Gama lumoun, ka un letenira fánreinti tánina lóundarun Heowá le gayarabei larihín?

12, 13. Ida liña hagunfulirun wéiyaaña lidan afiñeni ha alidihabalin apurichihani lidan fulasu le ñein lubéi hawinwanda lau hani buligasion, ani ka uagu líchiga le dǘgüdaguaü hun?

¹² Iridúatiña wéiyaaña lidan afiñeni lidan sun ubóu lun hadundehani lapurichihóun Larúeihan Bungiu lidan burí ageiraü le ñein lubéi haganawa. Lidan lóurate desidírü hamá, áluahatiña adundehani tidan Lererun Bungiu, lugundun ariha hamutu keisi ‘igemeri lun hagudi luma larugounga lun hémeri’ (Sal. 119:105). Ayumuraguatiña giñe lun Heowá lun ladundehaniña (Mat. 7:7, 8).

¹³ Ítara kei ha alidihabalin apurichihani lidan furumiñeti sígulu, wéiyaaña lidan afiñeni ha alidihabalin apurichihani uguñe weyu deregeguatiña houngua lun ‘harufudahani lererun Bungiu’ (Adü. 6:4). Wéiriti hagundan lau harihini lawanserun uganu buiti lidan sun ubóu, mámarügü lidan fulasu le aubei hariha (Adü. 21:19, 20). Dan le hadügün somu aransehani le mégeiwati lun lawanserun apurichihani, ténitiña lun le tariñagubei Lererun Bungiu luma ladundehan lani Bungiu sífiri, mama fidirügü hamuti halurudun guánarügü (aliihoualá Adügaü 15:28). Ítara  liña híchugun íbirigu ha aban buiti hénpulu lun burí damuriguaü (Efe. 4:11, 12).

14, 15. a) Ka burí wadagimanu adügǘbei lun lawanserun wadagimanu lánina apurichihani lidan sun ubóu? b) Ida liña hasandiragun hungua luagu hibihini chansi lun hídehan lidan lapurichihóun Larúeihan Bungiu?

¹⁴ Marihin hamuti saragu gürigia áfaaguni le hadügübei ha aransehabalin sun ariñahani le weresibirubei tidan wani agumeiraguagüdüni, lidan adamuridaguni luma lidan burí adamurini wéinamuti. Gíbetiña íbirigu nadagimeintiña lau hagundan ani sin labuchadun hawagu lidan lásügürawagüdün ariñahani le lidoun lóugiñe sisi-san iñeñein lun gayara lan hafurendeirun sun gürigia ha wayaraatiña luagu “luéirigun Bungiu” lidan hererun guánarügü (Adü. 2:7-11). Añahein íbirigu wügüriña hama würiña nibureingiña nadagimeintiña tau burí máhina to fureseti tuadigimaridun, to burí ñein lubéi imprimírua tan tuma to ídanboun tadügǘwa líburu lun gayara lan haransehanu agumeiraguagüdüni to weresibiruboun. Lárigiñe, aba tafanreinhóun agumeiraguagüdüni to chülǘ lidoun fulasu le dísetimaburibei ubouagu.

¹⁵ Ladügǘña saragu programa lun gayara lan wetenirun apurichihei uganu buiti hama lílana damuriguaü le ñein wabéi. Kei hénpulu, gíbetiña íbirigu ídehatiña lidan tábunawagun Luban Wadamuridagun tuma burí Muna lun Adamurini Wéinamuti, lidan burí híderawagun ha asufurirubaña ladüga somu chagaguaü lánina liñawan dan o ha sándibaña, o lidan lan laransehóun adamurini o leskuela burí to ñein lubéi haransehóua kristiánugu lubá hani ministeriu. Anihán fiú lídangiñe wadagimanu le gayarabei marihin wamani. Ani kame funa san saragu wadagimanu? Lun lawanserun lapurichihóun uganu buiti, lúntima labuidurun hamadagua íbirigu ha apurichihabaña luma Heowá luma lun lasigirun relihión le inarünibei awansera. Téniti san fánreinti tánina lóundarun Heowá le yáabei ubouagu lun katei le súdinitimabei? Chóuruti ítara liña lan.

16. Ka burí aransehani lubá aturiahani gayarabei líderaguniwa ani íderagua láñame wafamilian?

¹⁶ Chülüti san oura lun wígirun dan lun wasaminarun luagu wadagimanu le tadügübei lóundarun Heowá? Añahein íbirigu yúsutiña dan lídangiñe guñoun lánina áhuduraguni lidan familia o lídangiñe lidaani haturiahanu Bíbülia hábuguarügü lun hakutihani katei burí le ani samina hagía luagu. Ruti saragu ugundani wakutihani arufudúni le burí larihibei Isaíasi, Esekiéli, Danieli luma Huan. Dandu líburu Los testigos de Jehová, proclamadores del Reino de Dios kei amu burí agumeiraguagüdüni luma DVD le aniheinbei lidan iñeñein le gunfuranda wamuti, íderagua lumutiwa lun wasubudirunu lóundarun Heowá buidu.

17, 18. a) Ida liña líderagunün aturiahani le? b) Ka burí álügüdahani lunbei wadügüni wóuniwagua?

¹⁷ Huuti woun saragu wasaminarun luagun sun le ladügübei Heowá tidan lóundarun. Úara tuma tubuidun óundaruni to, teni wamá lun katei le súdinitimabei. Ítara luba wáyeihani Pábulu, le abürühabei: “Mábürühala lubeiti warüna, lugundun ru laali Bungiu wadagimanu le labun waríaahan, lau lareini” (2 Ko. 4:1). Ruti dǘgüdaguaü houn lánigu paaná lau dimurei burí le: “Moun lumuti lubeiti labuchadun wawagu adügei katei le buídubei, lugundun ánhawa ítarameme, walubahaba buiti danme le lachülürün dan lun weresibiruni” (Gal. 6:9).

¹⁸ Anihein san katei lunti waransehani lidan wabagari —dandu kada aban wádangiñe o kei iduheñu— lun wachoururuni katei le súdinitimabei? Gayarati san sensiyutima lan wabagari o wígirun fiú lídangiñe katei le adarasahabaliwa lun gayara lan waganwoundagüdüni weseriwidun lidan wadagimanu súdiniti le lánina apurichihani? Lidan leweñegua arütíkulu warihiba seingü katei le lunbei líderaguniwa lun wawanserun úara tuma lóundarun Heowá.