INARÜNI san gasuuniti lan meha libagari Hesusu? Kei wasubudiruni, mama meha lidan aban familia rísiti laweirida Hesusu ani míbeti meha lumegegun lidan sun libagari; le linarün katei, madariti meha ‘ni halíaba lan labalachagüdei lichügü’ (Lúkasi 9:57, 58). Iyereeguti meha giñe houn láganiñu, ayanuhatiña wuriba luagu ani lagumuhóun aba háfaruni hilagubei.

Háfuga lariñagun somu gürigia: “mama lun le nagúara aban ibagari gasuuniti”. Gama lumoun, anihein amu burí katei súdiniti lun wakutihani luagu libagari Hesusu. Ariha wamá gádürü lídangiñe.

“Nadügüni lugundan le óunahabalina, [...] ligía néiginbei” (Huan 4:34.)

Áfaaguati Hesusu lun lagunfuliruni lugundan Lúguchi le siélubei, Heowá, dandu lidan le lariñagubei kei lau le ladügübei. * Según larufuduni bérusu le, gúndaati lau ladügüni lugundan Lúguchi, ítara liña lun kamá hamuga éigini. Ariha waméi ka lan gádanbalin dan le lariñagunbalin dimurei burí le.

Amidihali weyu ligía dan le lariñagunbalin Hesusu dimurei burí ligía (Huan 4:6). Éibugaali sun binaafin awariragua wübü Samaria ani chóuruti lamaali lan. Darí lun hariñagun lani disipulugu lun “lun leigin” (Huan 4:31). Lau lóunabagüle, arufuda lumuti Hesusu lagunfuliruni lan wadagimanu le líchugubei Bungiu lun ligía lan léiginbei le íchugubei iderebugu lun. Ma arufudati le gasuuni lan meha libagari Hesusu?

‘Hínsiñeti Núguchi nun’ (Huan 14:31.)

Buiti meha lanaagun Hesusu lungua luma Lúguchi dan le sielu lubéi. Lanarime ínsiñeni le lasandirubei luagu ligía adügübei lun lasubudiragüdüni liri, lisuuni luma ligaburi. Lau ligaburi layanuhan, le ladügübei luma lóuserun, arufuda lumuti Hesusu ligaburi Lúguchi buidu. Le linarün katei, wéiriti lenegegua luma Lúguchi. Ligíati, dan le lariñagunbei Felipe lun: “Arufudabéi Úguchili woun”, aba lariñagun Hesusu lun: “Le arihitina, larihiñein giñe Bungiu Úguchili” (Huan 14:8, 9).

Wéiriti meha línsiñe Lúguchi Hesusu lun darí lun gaganbadi lan lun darí lounwen (Filipuna 2:7, 8; 1 Huan 5:3). Ínsiñeni le lasandirubei luagu Bungiu ligía íchugubei isuuni lun libagari.

“Lueirin-agei ínsiñeni le gayaraabei gani lani gürigia, lun líchuguni libagari hawagu lumadagu” (Huan 15:13.)

Manügünti wemenigin luagun ibagari keisi gürigia gafigountiña saragu gurasu. Ariñagatu Bíbülia: “Ítara kei lídangiñe lan meha aban wügüri [Adán] lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (Rómana 5:12). Siñati wanurahan lau wabafu guánarügü luéi lani figóu efekütu, kéiburi óunweni (Rómana 6:23).

Seremei Heowá, lidan línsiñehabu, ladarira lárani turóbuli le. Lun lesefuruniwa lídangiñe figóu luma óunweni, aba lígirun lun liabin Liráü —le mafigounbei— lun lasufurirun ani hilá ligía wawagu. Ladüga ínsiñeni le lasandirubei Hesusu luagu Lúguchi luma hawagu gürigia ubouagu, aba lagunfulirun lau wadagimanu ligía lau ugundani ani derege lumuti libagari sin figóu luagu wafulesein (Rómana 5:6-8). Lanarime ínsiñeni le lasandirubei ligía íchugubei isuuni lun libagari. *

“Anihán niráü le hínsiñebei nun, le aubei óunwenbu lan nugundan.” (Matéu 3:17.)

Anihán dimurei le aganbúbei siélugiñe dan le labadiseirunbei Hesusu, ani lau dimurei le larufudei Heowá furangu luagu hínsiñe lan Liráü lun ani gunda lan lau; ligía gayara lubéi meha lariñagun Hesusu lau ichouruni: “Hínsiñetina lun Núguchi” (Huan 10:17). Kei subudi lani luagu hínsiñe lan lun Lúguchi ani gunda lan lau, ráramati Hesusu lau ganigi lun hebedaagun luma hachuraguni láganiñu. Íbini dan le larihinbalin lounwe lan meferidirun lumuti Hesusu liguraasun ani kipu lumuti sun katei lidan lilugaarun (Huan 10:18). Ichouruni le luágubei luagu hínsiñe lan lun Lúguchi ani gunda ligía lau ligíatima íchugubei isuuni lun libagari.

Chóuruti winwan lan Hesusu aban ibagari gasuuniti. Ani gayarati wafurendeirun saragu katei lúmagiñe. Lidan leweñegua arütíkulu akutihóuati saragu adundehani furanguti le líchugubei houn lani disipulugu luagu ida luba lan gasuuni lan habagari.