1, 2. Ida liña laganwoundun wafiñen dan le wasaminarun tuagun lóundarun Heowá to lídanboun sun ubóu luma sielu?

GÚNDAATIWA lau wachoururuni tídanñadiwa lan aban óundaruni to anuheinboun lidan sun ubóu. Lidan burí arufudúni le lídanbei Esekiéli kapítulu 1 luma lidan Danieli kapítulu 7, furanguti warihini Heowá adundehei sun katei lidoun aban lubuidun agumuchagülei. Hesusu adundehabalin fánreinti tánina lóundarun Heowá le yáabei ubouagu lun tetenirun lun lapurichihóun uganu buiti, lun hóunigiruni hamadagua apurichihatiña luma Heowá luma lun lawanserun áhuduraguni inarüniti. Ligía chouru wabalin gayara lan wafiñerun tuagu lóundarun Heowá (Mat. 24:45).

² Gayarati san lariñagun kada aban wádangiñe lasigiruñein lan tupasun lóundarun Heowá? Gánwounhali san ubebeni le wasandirubei luagu inarüni, o murusuntimarügali? Dan le wasaminarun luagun álügüdahani burí le, háfuga wíchugun fe luagu bucharaühali lan wawagu o máfaagunhadiwa lan saragu kei meha furumiñe. Le linarün katei, gayarati lasuseredun le woun sungua luagu. Lidan furumiñeti sígulu, mosu meha lamisurahaniña apostolu Pábulu líbirigu lun hetenirun lun lani Hesusu hénpulu. Ka uagu? Aba lariñagun: ‘lun mabuchadun lan huagu, meferidirun humeime huguraasun’ (Ebü. 12:3). Ítarameme, waturiahani arütíkulu le lubaragiñebei le —le arufudubalin woun sun le tadügübei lóundarun Heowá— lunti líderaguniwa lun wakipurun ubebeni ani sigí wagíame awanda.

3. Ka lunbei wadügüni lun mabuchadun lan wawagu, ani kaba wariha lidan arütíkulu le?

³ Gama lumoun, ariñagati Pábulu mégeigidiwa lan ámuya katei lun mabuchadun lan wawagu: mosu wáfaagun lun wadügüni “le buídubei” (Gal. 6:9). Ligíati, súngubei wagía mosu wadügüni le wayaraati. Ariha wamá seingü katei le lunbei líderaguniwa lun úaragua wamá ani awanse wagía úara tuma lóundarun Heowá. Líderagubadiwa le lun wasubudiruni anhein anihein lubéi katei le lunbei wetenirun lun wawougua o hawagu wafamilian.

4. Ka arufudubalin luagu súdini lan adamuridaguni lidan áhuduraguni le inarüniti?

⁴ Súnwandan aban lan katei súdiniti adamuridaguni hadan lubúeingu Heowá. Sielu, anihein giñe dan hamisurahóun sífirigu ha ñéinbaña lun hadamuridagun ligibugiñe Bungiu (1 Uru. 22:19; Hob. 1:6; 2:1; Dan. 7:10). Lidan meha binadu Ísüraeli, mosu meha hadamuridagun ísüraelina lun haganbun ani furendei hagía (2 Lur. 31:10-12). Huríu ha meha awinwandubaña lidan furumiñeti sígulu héchutiña meha ñüdün tidan burí haligilisin lun haliihanu Lererun Bungiu (Luk. 4:16; Adü. 15:21). Ani dan le lagumeserunbei damuriguaü kristiánu, aba hasigirun arihei adamuridaguni kei aban katei súdiniti. Ani uguñe weyu, ligía aban fánreinti súdiniti lidan wáhuduragun lun Heowá. Keisi kristiánugu inarünitiña, damuriguatiwa lun “wíderaguniña wíbirigu lun hínsiñehabu hamá, luma lun hadügüni le buídubei”. Mégeitiwa wasigirun “íchiga gurasu houn wíbirigu, guentotima lau ariha wamani yarafaali lan luéyuri [Heowá]” (Heb. 10:24, 25, TNM).

5. Ida liña gayara lan wíchugun dǘgüdaguaü wóuniwagua lidan adamuridaguni?

⁵ Gani wamá somu fánreinti lidan adamuridaguni ligía aban manera buiti lun wíchugun gurasu houn wíbirigu. Arufuda wamuti wafiñen lau wóunabun somu álügüdahani, dan le wariñaguni ida luba lan lahuudun somu bérusu woun o lau wabahüdahan somu sügǘ le arufuduti buidu lan resultóu le lanügübei wasigiruni adundehani le tídanbei Bíbülia (Sal. 22:22; 40:9). Chóuruti úara wamá súngubei luagu meberesenga lan átirihali lan irumu wau abasiiha lidan adamuridaguni, óunabagülei le híchugubei wíbirigu dandu nibureingiña kei derebuguhaña ruti gurasu woun.

6. Ida liña líderaguniwa wadamuridagun lun wakipuruni wamadagua luma Heowá?

⁶ Ka amu resun uágubei lamahada Heowá lun weferidiruni adamuridaguni? Lugundun íderagua lumutiwa adamuridaguni luma burí adamurini wéinamuti lun wasigirun apurichiha lau ganigi luma lun wararamun lun ebedaaguni o dan le mabusenrun hamá gürigia haganbuni uganu buiti (Adü. 4:23, 31). Héregüda lumuti giñe lakutihóun tema burí tídangiñeti Bíbülia wafiñen (Adü. 15:32; Rom. 1:11, 12). Dandu arufudahani le wibihibei luma gurasu le wíchugubei ani ibiha waméi hámagiñe wíbirigu lidan adamuridaguni ruti saragu ugundani woun luma darangilaü dan le “liabin luriban dan” (Sal. 94:12, 13). Lidan Sétanu le arihibei lau hawadigimari gefentiña luagu Heowá lidan sun ubóu, anihein aban sétanu le gíribei Sétanu lánina Arufudahani, ligía arihibei lau laransehóun sun programa lánina arufudahani le hibihibei lumutuniña Heowá lidan sun ubóu. Wéiriti weteingiradi luagu arufudahani le weresibirubei kada dimaasu lidan sun irumu!

7, 8. a) Ka resun súdinitimati le uágubei woudin adamuridagua? b) Ida liña líderagunün adamuridaguni?

⁷ Gama lumoun, mídintiwa adamuridagua luágurügü buiti le wibihibei, damuriguatiwa luagu aban resun súdinitimati, wáhuduragun lun Heowá (aliihoualá Sálumu 95:6). Aban lubuidun chansi gayara lan walawahani Heowá! (Kol. 3:16.) Yuuti lun Heowá lun walawahani súnwandan, ani adüga wamuti dan le woudin adamuridagua ani ru wagía óunabagülei lidan (Aruf. 4:11). Ligía maweiridun tubéi wanigi lau lamisurahaniwa Heowá lun mafalarun wamaniña “ha héchubaña lun midin hamá lidan wadamuridagun” (Ebü. 10:25).

⁸ Gunfuranda wamuti san íderagua lumutiwa lan adamuridaguni lun wawandun darí lagumuchun Heowá lau ubóu wuribati le? Anhein ítara liña lubéi, ligíaba aban lídangiñe “katei le buídubei” o le súdinitimabei woun ani wáluahaba manera lun meferidirun wamani íbini gibe lan weberesegun (Fili. 1:10). Ábanrügübei katei le wéiriti adüga lun weferidirun aban chansi lun wáhuduragun lun Heowá úara hama wíbirigu.

9. Ka arufudubalin luagu súdini lan apurichihani?

⁹ Wayusuruni sun were lidan apurichihani íderagua lumutiwa lun wasigiruni tupasun  lóundarun Heowá. Gumese lumuti meha Hesusu wadagimanu le dan le ya lubéi ubouagu (Mat. 28:19, 20). Lúmagiñe dan ligía, lapurichihóun Larúeihan Bungiu luma hadügǘn disipulugu ligía wadagimanu súdinitimabei tun lóundarun Heowá. Gíbeti sügǘ lánina wadaani arufuduti woun hídehaña lan ánheligu lidan wadagimanu le ani adundeha hamutiwa hamoun gürigia ha “lúntiñabaña [o ‘ha aransebaña lun hibihini’ TNM] ibagari magumuchaditi” (Adü. 13:48; Aruf. 14:6, 7). Anihein aban fánreinti tánina lóundarun Heowá ya ubouagu ani adügati aransehani lun ladügǘn wadagimanu súdiniti le. Súdiniti giñe san ministeriu hun?

10. a) Arufuda huméi lau aban hénpulu ida luba lan wakipuruni ubebeni le wasandirubei luagu inarüni. b) Ida liña líderagunün ministeriu lun mabuchadun lan huagu?

¹⁰ Wapurichihan lau ubebeni íderagua lumutiwa lun wakipurun ínsiñeni luagu inarüni. Ariha waméi le lariñagubei Mitchel, aban íbiri seriwihali luagu saragu irumu kei wéiyaali lidan afiñeni ani kei prekursoru le adügübei 70 oura luagu hati: “Hínsiñeti nun nayanuhan houn gürigia luagu inarüni. Dan le nasaminarun luagu somu arütíkulu iseri tidan Garüdia Atalaya o ¡Despertad!, aba taweiridun nanigi luagu lichú aau, duari luma úaraguni le tídanbei wani garüdia. Busentina nidin apurichiha lun narihini ida luba lan hóunabun gürigia luma lun náluahani manera ida luba lan nadügün lun busén hamá haliihanu. Ruti apurichihani iderebugu nun lidan nibagari. Anhein anihein lubéi amu katei lunti nadügüni, fósuguatina nungua lun nadügüni lubaragiñe o lárigiñe napurichihan”. Le linarün katei, wakipuragun woungua beresegu lidan weseriwidun lun Bungiu líderagubadiwa giñe lun úaragua wamá lidan  lagumuhóun burí dan le (aliihoualá 1 Korintuna 15:58).

11. Ka uagu lunti lubéi wasagarun buiti lídangiñe ariñahani le líchugubei Heowá woun?

¹¹ Lun derebugu wamá, rúhali Heowá saragu ariñahani bürüwarügüti woun. Chóuruti haritagua wamá lidan somu ókaasion lárigiñe lan waliihanu wani agumeiraguagüdüni aba wariñagun: “Anihán ariñahani le nemegeirubei! Ítara liña kamá hamuga óunaharügüti Heowá abürüdei nun!”. Mama ítaraguarügüti lira, lugundun arufudahati Heowá woun ani adundehalawa tau burí agumeiraguagüdüni kristiánu. Füramase haali: “Níchuguba dimurei buíduti bun; narufudubei üma le lunbei bafalaruni bun” (Sal. 32:8). Áfaaguatiwa san lun wasagarun buiti lídangiñe sun ariñahani le weresibirubei lúmagiñe Bungiu? Ráramaguatiwa san asaminara luagun? Anhein wadüga ítara, wasigiruba íchiga furuda buitu lidan lagumuhóun burí dan le ani medebilidunbei wafiñen (aliihoualá Sálumu 1:1-3; 35:28 luma 119:97).

12. Kaba íderaguawa lun marihin wamani ariñahani le wibihibei lúmagiñe Heowá kei ni kata?

¹² Buiti lun wasaminarun luagun wadagimanu le lanügübei laransehóun sun ariñahani lúmagiñeti Bungiu le weresibirubei sun dan. Lidan Sétanu le arihibei lau hawadigimari gefentiña luagu Heowá lidan sun ubóu, anihein aban Sétanu lánina Abürühani, hagía arihibaña lau wadagimanu lánina láluahoun ariñahani, labürühóun, lachekühóun, lanuadahóun dibuhu luma lásügürawagüdün sun ariñahani le lidoun amu burí iñeñein lun imprimírua lan o lun lichugún lidan wani páhina lidan Internet. Sukursali burí to imprimírübalun agumeiraguagüdüni tuguya óunahabarun lidoun sun damuriguaü, dandu le yarafabei kei le dísebei. Ka san un ladügǘwa lanarime wadagimanu le? Lun hibihini lumutuniña Heowá sun éigini o ariñahani le hemegeirubei lun derebugu lan hamadagua luma Heowá (Isa. 65:13). Ligíati, yusu waméi sun ariñahani le tíchugubei lóundarun Heowá woun (Sal. 119:27).

13, 14. Kátaña san ha ídehabaña sielu lidan aransehani le adüga láalibei Heowá, ani ida luba wáyeihani hani hénpulu?

¹³ Lidan aban arufudúni, ariha lumuti apostolu Huan Hesusu agalufeha aban gabayu haruti lun lagañeiruniña ha ebedaagubaña kóntüra Heowá (Aruf. 19:11-15). Ma aba léredun wafiñen dan le wasubudiruni añahein lan giñe ánheligu úaraguatiña lárigi lárigi Hesusu ani añahein lan giñe kristiánugu anuadirúaaña luma? Kristiánugu anuadirúaaña ha meha ubouagubaña ani guentó resibi hamaali ibagari sielu keisi alagan (Aruf. 2:26, 27). Aban buiti hénpulu luagu lagunfulirúniwa ladundehan Bungiu!

¹⁴ Ítarameme liña híchuguni saragu gürigia ha lúnbaña hawinwandun ubouagu hídehan houn kristiánugu anuadirúaaña ha añaheinguabaña ya ubouagu ani hagía adundehabalin fánreinti le arihíbei tánina lóundarun Heowá (aliihoualá Sakaríasi 8:23). Ida luba san larufuduni kada aban wádangiñe luéigiñeñein lan lóubadina aransehani le ladügübei Heowá? Lau gaganbadi wamá houn ha adundehabaliwa, ligía aban manera (Ebü. 13:7, 17). Mosu wagumeserun lídangiñe damuriguaü le ñein wabéi. Dan le wayanuhan hawagu wéiyaaña lidan afiñeni, adügatiwa san lun inebewa hamá inebewa ligíame wadagimanu le hadügübei? Ariñagatiwa san houn wasaanigu lun inebe hamá íbirigu ha houn ani lun hamuriahan adundehani hama tuagu Bíbülia? Ayanuhatiwa san wábiñe luagu ida luba lan wídehan lau wámati lun lawanserun apurichihani lidan sun ubóu? (Ari. 3:9; 1 Ko. 16:2; 2 Ko. 8:12.) Súdiniti san woun wídehan lidan tounigirún Luban Wadamuridagun? Nadagimeinti lani Heowá sífiri buidu ñein lubéi anihein lan inebesei luma úarani. Íderagua lumutiwa sífiri ligía sun dan lun mabuchadun lan wawagu lidan lagumuhóun dan le (Isa. 40:29-31).

15. Ka uagu lunti lubéi wasigirun áfaagua sin wararamagun lun wawinwandun úara luma lisuuni Heowá?

¹⁵ Lagumuhóun, lun wawandun ani sigí wagíame awansera úara tuma lóundarun Heowá, mosu úara lan wabagari luma le wapurichihabei. Lun lasuseredun le mosu wachoururuni wadügüñein lan katei le “hínsiñebei lun Wabureme” (Efe. 5:10, 11). Ladüga wafigoun luma burí lóuchaguniwa Satanási luma ubóu wuribati le, ageindaguatiwa sun oura kóntüra luriban échuni. Saragu hídangiñe, íbirigu hínsiñewatiña, háfaaguña sagü weyu lun hakipuruni humadagua luma Heowá, ani ligía weiri lubéi hínsiñe lun. Mabuchadalá huagu! Dan le wawinwandun según lisuuni Heowá, gúndaatiwa ani chouru wamuti luagu gebegi lan wáhuduragun (1 Ko. 9:24-27).

16, 17. a) Ka lunbei wadügüni ánhawa éiguada lidoun aban figóu wéiriti? b) Ka wafurendeirubei lídangiñe tani Anne hénpulu?

¹⁶ Kábati wadüga ánhawa éiguada lidoun aban figóu wéiriti? Mosu wamuriahan ídemuei lau lóufudagun. Wéiriguatimarügüti katei dan le laramudún figóu. Kéiburi Dawidi dan le laramudunbalin le ladügübei, ariñagati: “Sun meha dan le naubei magufeserunga nifigoun, aba meha nayahuahan sagü weyu” (Sal. 32:3). Adügati figóu le aramudúti lun heferidiruni gürigia haguraasun luma lun mabuidun lan hamadagua luma Heowá, “ánhaña ha agufeserútiña hafigoun, aba hígiruni, feruduna lubaña Bungiu” (Ari. 28:13).

¹⁷ Samina humá luagun hénpulu tani Anne, * aban meha apurichihatu hádangiñe ha adügübaña 70 oura luagu hati dan le aweirideina tubéi. Aba tagumeserun awinwanda aban ibagari dóbuliti ani wuribati lidin tun. Aba tariñagun: “Murusunraü fánreinti le nadagimeingilibei buidu lidan nisaminan adügati meha lun nasandiragun nungua lau duru. Súnwandan meha hiru lan nasandiragun nungua ani lau maguraasuni”. Ida liña táfuridun lídangiñe katei ligía? Lidan aban adamuridaguni aba layanuhóun luagu Santiagu 5:14, 15, aba gunfuranda tan luagu megei tan ídemuei, aba tayanuhan hama wéiyaaña lidan afiñeni. Aba tariñagun: “Heowá íchugubalin bérusu burí le keisi árani lun lareidaguagüdüniwa o lun waransehani wamadagua luma. Hénrenguti laatún, gama lumoun, areidaguagüdati. Aba nasigiruni adundehani le lídanbei bérusu burí ligía, aba nareidagun”. Sügühali fiú irumu, ani guentó teseriwiduña Anne lun Heowá lau iseri erei luma aban lubuidun saminaü.

18. Ka lunbei desidírü wamá wadügüni?

¹⁸ Aban óunwenbu chansi gayara lan wawinwandun lidan lagumuhóun dan ani lun tidan wamá lóundarun Heowá. Mabulieida waméi. Nadagimeinrügü wamá úara hama wafamilian lun meferidirun wamani adamuridaguni, lun wáluahaniña gürigia ha harumabaña anigi ani yusu wameime ariñahani le wíbihibei lúmagiñe Bungiu buidu. Íderagua wamaña giñe ha adundehabaliwa ani winwan wamá úara luma uganu le wapurichihabei. Anhein wadüga ítara, wasigiruba awansera úara tuma lóundarun Heowá ani mabuchadunbei wawagu adügei le buídubei.