1, 2. a) Ida liña desidírü humá heseriwidun lun Bungiu? b) Ka álügüdahani gayarabei wadügüni wóuniwagua luagu walagante lúmagiñe Bungiu?

SARAGU míñunu gürigia desidírühadiwa weseriwidun lun Heowá luma lun wasigiruni lupasun Hesukrístu lau duari (Mat. 16:24; 1 Fe. 2:21). Marihin wamuti wederegeragun woungua lun Bungiu kei aban katei mebegiti. Le linarün katei, dan le desidírü wabéi wadügüni, mama ladüga wafurendeirun fiúraü bérusu tídangiñe Bíbülia, aturiaha wamutu Lererun Bungiu buidu buidu. Seremei aturiahani ligía, furendeitiwa saragu katei le ederebudagüdübalin wafiñen, kéiburi luáguti alagan le lunbei líchuguni Heowá houn ha ibihibaña subudi luagu luma luagu Hesukrístu, le lóunahabei (Huan 17:3; Rom. 12:2).

² Lun kristiánugumeme wamá ha buítiña, mosu desidírü wamá según lugundan Wáguchi le siélubei. Ligíati, lidan arütíkulu le wakutihabei álügüdahani súdiniburiti le: Ka san walagantebei? Ida liña lunti lan warihini? Kaba wadüga lun wibihini lau ichouruni? Kaba íderaguawa lun desidírü wamá lau lichú aau?

3. Ka alagan hagurabahabei a) kristiánugu anuadirúaaña? b) “amu mudún”?

³ Añahein fiú kristiánugu ha agurabahabaña hibihin “aban alagan le lunbei ladurarun lun sun dan, le siñabei ladaseirun, siñá ligía leferidiruni lubuidun”, aban alagan móubawati lun harúeihan luma Kristu sielu (1 Fe. 1:3, 4). Lun hibihini ‘mósuya hágurahoun’ (Huan 3:1-3). Kábati halagante saragu míñunu “amu mudún” ha lánigu Hesusu, ha íderagubaliña kristiánugu anuadirúaaña lidan lapurichihóun uganu buiti luáguti Larúeihan Bungiu?  (Huan 10:16.) Alagan le meha meresibirun habéi Adán tuma Ewa ladüga hafigoun: ibagari magumuchaditi lidan paraísu ubouagu sin asufuriruni, óunweni ni igarigu (Aruf. 21:1-4). Ligía gayara lubéi meha ladügüni Hesusu füramasei le: “Fuleseiwatiña ha ǘnabugubaña ani mabafu hagía, ladüga heresibirubei múa keisi alagan” (Mat. 5:5).

4. Ka burí abinirúni ibiha wamaalibei guentó?

⁴ Íbini guentó, resibihadiwa fiú katei lídangiñeti walagante. Furumiñe, sanditiwa darangilaü ani gúndaatiwa lau aban lubuidun umadaguaü luma Bungiu ladüga warufudun afiñeni luagu ‘afayeihaali lan Kristu luagu wafigoun’ (Rom. 3:23-25). Gunfuranda wamuti giñe lubuidun burí füramasei le tídanbei Lererun Bungiu. Ani wéiriti giñe wagundan ladüga úarañadiwa lan hama wíbirigu ha añaheinbaña lidan sun ubóu. Ani aban óunwenbu chansi gefentiña wamá luagu Heowá. Ligía weiri lubéi lebegi walagante lúmagiñeti Bungiu woun!

5. Ka lóuchubei Satanási ladügün houn lubúeingu Bungiu, ani ka gayarabei líderaguniwa lun méiguadun wamá tidoun lisadaran?

⁵ Gama lumoun, lun wakipuruni lubuidun walagante, mosu wóunigiragun woungua tuéi lisadaran Satanási. Súnwandan louchun lun desidírü hamá lubúeingu Bungiu wuriba lun heferidiruni halagante (1 Lur. 25:1-3, 9). Ani lidan dan le, kei subudi lubalin murusunrügaali lan lidaani, dóbulihali láfaagun lun leferidiraguagüdüniwa (aliihoualá Arufudúni 12:12, 17). Anhein busén wabéi ‘deregüdagu wamá luéi leyeeduniwa Mafia’, mosu wasigirun arihei walagante kei aban katei gebegiti (Efe. 6:11). Lidan katei le, anihein fiú leksióun súdiniti woun lidan abahüdaguni luáguti Esaú, le liráü Isaakü.

6, 7. Ka meha Esaúbei, ani ka meha alagan yuubei lun?

⁶ Kéiburi gádürü-milu irumu guentó, aba meha gasaani hamá Isaakü tuma Rebeka aban feru mádounu: Esaú luma Hakobu. Eibu aweinamudeina hamá, aba ámuñegueinarügü lan hagaburi. Ani ámuti meha giñe ligaburi hayusuruni hadaani. Ariñagatu Bíbülia: “Áraabu lifisiutebei Esaú luma éibaahani, ánheinti Hakobu, aban wügüri darangiluti, hínsiñeti lun lun lerederun tidan kianpu” (Agu. 25:27). Ariñawagúati luagu Hakobu darangiluti lan ladüga úaragua lan ani madan lumuti figóu.

⁷ Keinsi irumu hau mádounu hagía ligía lounwen Abüraámü le háruguti. Gama lumoun, füramasei le meha ladügübei Heowá lun magumuchunti ñein. Dan lárigiñe, aba lasaliragun Heowá lun Isaakü, aba lariñagun lun habinirúba lan sun néchanigu ubouagu hádangiñe ladügawagun Abüraámü (aliihoualá Agumesehani 26:3-5). Mini lan meha le hádangiñeba lan ladügawagun Abüraámü liabin Mesíasi, ‘adügawaguni’ le uágubei layanuhóua lidan Agumesehani 3:15. Kei Esaú lubéi furumiñetibei liráü Isaakü, lun meha yu lan libihini füramasei keisi alagan. Ariha lumuti meha san lubuidun alagan ligía kei aban katei gebegiti?

8, 9. a) Ka desidírü lubéi Esaú luagu lalagante? b) Ka uagu líchiga Esaú fe irumu burí lárigiñe, ani ka ladügübei?

⁸ Aban weyu, dan le lagiribudun Esaú áraabugiñe, aba larihini Hakobu ábougua “gisóu”, aba lariñagun lun: “Adügabá fulesei nun, ruba murusun lídangiñe gisóu funati le búmabei ñein nun, ladüga láfaraadina ilamaü”. Aba lariñagun Hakobu lun: “Furumiñe ru yebebéi biricha nun keisi íbugañaü”. Ka desidírü lubéi Esaú? Íbini mafiñe humá, aba lariñagun: “Kati hu lan liricha íbugañaü nun?”. Ítara liña, himei lumuti aban asiedu lenteha lubaragiñe liricha keisi íbugañaü. Lun hachoururuni bísinisi ligía, aba lariñagun Hakobu lun: “Fiñuba”. Sin lasaminaruni Esaú bián wéiyaasu, aba láfiñurun. Ábati “líchugun Hakobu fein luma lenteha gisóu lun Esaú. Lásurun leigin, gurá  ligía, aba lásaarun aba lidin. Ítara liña líchugun mebereseni luagu liricha keisi íbugañaü” (Agu. 25:29-34).

⁹ Fiú irumu lárigiñe, dan le lasaminarunbei Isaakü málühali lan ounwe, aba tiabin Rebeka, aba táluahan manera lun tachoururuni leresibiruni Hakobu liricha íbugañaü le lalugurubei Esaú. Dan le líchugunbei Esaú fe luagu wuriba lan buga le desidírü lubéi, tárühali, ábati lidin ayumuragua lun Isaakü: “Rubei giñe babinirun nun núguchi! [...] Ábanrügüñein san abiniruni gayara bíchuguni, núguchi? Binibana giñe!”. Aba lariñagun lúguchi lun luagu siñati lan lasansiruni abinirúni le ru láalibei lun Hakobu; “ábaya lagúaragun [Esaú] ayahua” (Agu. 27:30-38).

10. Ka meha lasaminarubei Heowá luagu Esaú luma luagu Hakobu, ani ka uagu?

¹⁰ Ka tarufudubei Bíbülia luagu ligaburi Esaú? Luagu súdinitima lan lun lagunfuliruni le layumahabei sügǘ lau libihini abinirúni le yebe lunbei libihini keisi alagan. Marihin lumuti meha liricha keisi íbugañaü keisi aban katei gebegiti, ani le linarün katei, mínsiñeti meha Heowá lun. Ani masaminarunti giñe kaba lan lani le desidírü lubéi efekütu hawagu ladügawagun. Mítaranti meha Hakobu! Gebegiti meha lalagante lun. Kei hénpulu, arufuda lumuti dan le lasigirunbalin ladundehan lúguchi lun láluahan lani weiriou (Agu. 27:46–28:3). Ladüga ladügün aban wadagimanu le mégeiti gurasu luma sákürifisiu, aba meha ligía lan aban hádangiñe lagüchagu Mesíasi. Ka meha lasaminarubei Heowá luagu Esaú luma luagu Hakobu? Ariñagati liyumulugugiñe profeta Malakíasi: “Hínsiñeti meha Hakobu nun, leyereeguda Esaú nun” (Mal. 1:2, 3).

11. a) Ka uagu weiri lubéi lisudinin abahüdaguni luáguti Esaú houn kristiánugu uguñe weyu? b) Ka uagu layanuha Pábulu luagu le ladügübei Esaú úara luma agamariduni mamarieidunga?

¹¹ Ka uagu weiri lubéi lisudinin abahüdaguni luáguti Esaú houn kristiánugu uguñe weyu? Wéridi lumutiña apostolu Pábulu líbirigu: “Ualá ni aban hídangiñe agamariduti mamarieidunga, míchugun ligíame mebereseni luagu katei luáguti Bungiu, kei ladüga Esaú, aba laluguruni liricha keisi íbugañaü luagu aban asiedu éigini” (Ebü. 12:16). Súdiniti giñe eweridihani le woun uguñe weyu. Lunti wasigirun arihei katei le sagüráubei keisi gebegiti lun magumadirun lániwa wayumahan ani adüga ligíame lun weferidiruni alagan. Ka san uagu layanuha Pábulu luagu le ladügübei Esaú úara luma agamariduni mamarieidunga? Lugundun ítara kei Esaú, anhein ígira somu gürigia lun lagumadiruni layumahan, ménrenguntimabei lasansiruni katei le sagüráubei luagu figóu, kéiburi agamariduni mamarieidunga.

12. a) Ida liña lóuchaguniwa Satanási? b) Írida humá hénpulu burí tídangiñeti Bíbülia le íderagubaliwa dan le lunti lan desidírü wamá luagu somu katei hénrenguti.

¹² Furanguti mama lan wáluahaña óuchawaguni le gayarati ladügün lun wéiguadun lidoun magíaguni. Amuriaharügütiwa luma Heowá lun mígirun lan lun wéiguadun danme le ñein hamá óuchagutiwa lun maganbadi wamá lun (Mat. 6:13). Gama lumoun, anihagua Satanási áluaha ladügün lun ledebilidun wafiñen lidan awanha lan áfaagua lun wakipurun úaraguni lidan ubóu wíyeti le (Efe. 6:12). Kei ligía lubéi lubungiutebei ubóu le, subudi lumuti ida luba lan layusuruni figóu le wádanbei lun líchugun lidan wémeri óuchawaguni le hínsiñeti houn gürigia gafigountiña (1 Ko. 10:8, 13). Samina humá lun hamuga hadarirun chansi lun hagalumaruni hayumahan lidan magíaguni. Kaba hamuga desidírü humá? Hóuseruña hamuga san kei Esaú ani aba hamuga hariñagun: “Furesebá, rubei nun!”, o hawanduñein hamuga óuchawaguni ani aba hamuga hanurahan ñéingiñe, ítara kei ladüga Hosé, le lisaani Hakobu, dan le tóuchagunbalin lúmari Potifárü? (Aliihoualá Agumesehani 39:10-12.)

13. a) Ida liña hóuserun saragu kristiánugu uguñe weyu kei Hosé? Ani ida liña háyeihani fiú hádangiñe Esaú? b) Ka lunbei wadügüni lun masigirun wamani luriban lani Esaú hénpulu?

¹³ Gíbeeña wíbirigu óuserutiña lau lichú aau ani gúndaagüda hamaaru lanigi Heowá lidan burí sügǘ le ídanbei mosu lan desidírü hamá hóuserun kei Esaú o kei Hosé (Ari. 27:11). Gama lumoun, añahein desidírühaña kei Esaú ani ru hamaali halagante lúmagiñeti Bungiu lidan peliguru. Le linarün katei, sagü irumu añahein saragu Gefentiña resibitiña ererehóuni o bugawatiña lídangiñe damuriguaü ladüga héiguadun lidoun magíaguni. Ligía súdini lubéi lun waranserunu wanigi guentó, lubaragiñe lóuchawagun úaraguni le warufudubei lun Heowá (Sal. 78:8). Gayarati wadügün íbini biama katei le lunbei lóunigiruniwa luéi óuchawaguni ani íderagua láwame lun desidírü wamá buidu danme le lachülürün oura lun wadügüni.

14. Ka burí álügüdahani lunbei wasaminarun luagun lun líderaguniwa lun ‘liyereegudun wuribani woun’ ani lun wasigirun adügei “le buídubei”?

¹⁴ Furumiñeti katei le lunbei wadügüni, wasaminarun luagun resultóu le lunbei lanügüni ligaburi wóuserun. Eibu laweiridun ínsiñeni le wasandirubei luagu Heowá, le Lébuna walagante, wéiritimabei línsiñe walagante woun. Le linarün katei, dan le hínsiñe lan aban gürigia woun, mabusenruntiwa wagañidagüdüni. Áfaaguarügütiwa lun lagundaarun wau. Ligía buidu lubéi lun wasaminarun luagun dañu le gayarabei wadügüni wóuniwagua luma houn ha geyegubaña wau ánhawa ígiraguagüda woungua lun luriban wayumahan. Lunti wálügüdagun woungua: “Ánhana asaminara nuouguounrügü dan le desidírü nan, kaba lani efekütu lidan numadagua luma Heowá? Kaba lani efekütu hawagu nufamilian luma hawagu íbirigu lidan damuriguaü? Nadügüba san lun hachugeragun amu?” (Fili. 1:10). Gayarati giñe wasaminarun: “Gebegi lumuti san busiganu nagundaarun murusun dan lidan figóu, lárigiñe, ábame nasufuriruni resultóu le lunbei lanügüni le desidírü nubéi? Busentina san nagumuchun ítara kei meha Esaú, ayahuaha ani asaküriha luagu le nadügübei?” (Ebü. 12:17). Wasaminarun luagun álügüdahani burí le líderagubadiwa lun ‘liyereegudun wuribani woun’ ani lun wasigirun adügei “le buídubei” (Rom. 12:9). Ligibuagun sun katei, línchahabadiwa ínsiñeni luagu Heowá lun madisedun wamá luéi walagante (Sal. 73:28).

15. Kaba éredagüdei wafiñen kóntüra katei burí le gayarabei lagadeiruni wamadagua luma Heowá?

¹⁵ Libiaman katei le lunbei wadügüni, wéredagüdüni wafiñen. Rúhali Heowá saragu  katei woun lun wéredagüdüni wafiñen kóntüra katei burí le gayarabei lagadeiruni wamadagua luma. Laganagua katei burí le anihein taturiahóun Bíbülia, adamuridaguni kristiánu, apurichihani luma furíei (1 Ko. 15:58). Sagü wadaarunu wanigi lun Heowá lidan furíei o dan le lidan wamá wani ministeriu kristiánu, aba héretima wamá kóntüra óuchawaguni (aliihoualá 1 Timotéu 6:12, 19). Lóugiñe sun katei, héretimabei wafiñen ánhawa áfaagua (Gal. 6:7). Afuranguagüdawati puntu le lidan Ariñawagúni kapítulu 2.

16, 17. Ida luba gayara lan wafurendeirun desidírü buidu?

¹⁶ Íderagua lumutiwa kapítulu 2 lidan Ariñawagúni lun wibihin subudi luma lun gayara lan wasaminarun. Íderagua lumutiwa idewesei burí le lun wanúadahani le buídubei o le wuribabei, lun wererehan wóuniwagua o lun wígiraguagüdün woungua lun wadügüni le wayumahabei. Gama lumoun lun desidírü wamá buidu, mosu wáfaagun. Ítara liña tarufuduni Bíbülia inarüni méiniti le: “Niráü, furendeibéi le narufudahabei bun, mabulieidabei nugumadin. Ruba arigei lun lichú aau, deregebéi bisaminan lun lualin ichügü. Bamuriaha lichú aau luma lubuidun ichügü lau sun bere. Rúguaba bungua lun báluahani, kamá hamuga báluahaña pülata o aban lan irisini le aramudaguati. Ítara luba basubudiruni lanichigu lichugún inebesei lun Bungiu; ítara luba basubudiruni lanichigu lasubudirúniwa Bungiu! Ladüga Bungiu íchugubalin lichú aau, ani lúmagiñe liabin subudi luma gunfurandaü” (Ari. 2:1-6).

¹⁷ Furanguti lubeiti, mosu lan wagunfuliruni adundehani le lídanbei Ariñawagúni lun wafurendeirun desidírü buidu. Wakipuruba úaraguni lidan lénrengunga ánhawa ígira lun laranseruni lererun Heowá wagaburi, ánhawa afurieida amuriahei ladundehan Bungiu súnwandan luma ánhawa asigira áluahei subudi lúmagiñeti Bungiu kamá hamuga wáluahaña somu irisini le aramudaguati.

18. Ka desidírü hubéi hadügün, ani ka uagu?

¹⁸ Ruti Heowá subudi, gunfurandaü luma lichú aau houn ha áfaagubaña lun hibihini. Eibu wáfaagun lun wáluahani ani kipu wameime, yarafatimabadiwa lun Heowá. Ani leseriwiduba umadaguaü ligía woun danme le wagagibudagun luma óuchawaguni. Wayarafadun lun Heowá ani sandí wagíame inebesei luagu ligíaba íderaguawa lun wadisedun luéi figóu (Sal. 25:14; Sant. 4:8). Ánhawa agundaara lau wamadagua luma Bungiu ani winwan wagíame según ladundehan, gayarabei wagundaaragüdünu lanigi lau le desidírü wabéi ani gounigileime walagante.