SAMINA humá lun hamuga ladügün aban humada le suamei humuti aban katei le úati gunfuranda humani. Añahein achuraguti luagu le ladügübei ani ariñaga hagía ladüga lan furunde lan ladügünbalin. Hídinña hamuga san lau lóufudagun luéigiñe hóubadina gürigia hagía, o hagurabahaña hamuga darí haganbuni kaba lan lariñaga humada? Lun hamuga ua lan ñein lun lariñaguni ka lan uagu ladügei, gaguraasunñadün hamuga san lun hagurabahan darí liabin lun lariñaguni lébuna hun?

Lubaragiñe furumiñeguarügü katei, buiti hamuga lun hálügüdagun hungua: “Subudi numuti san numada buidu? Ka san uagu suamei nubalin?”. Richabei hamuga katei le, adian? Ma buiti hamuga lun wadügüni ligiaméme dan le wakutihani anhein furunde lubéi Bungiu?

Háfuga hénrengubei hun gunfuranda humá fiú katei le adüga láalibei Bungiu o le lígirubei lun lasuseredun. Gíbebaña ariñagutiña hun luagu furunde lan Bungiu ani hafosurubadün lun hasaminarun wuriba luagun kei hagía. Hagurabahaba san laganwoundun hisubudin lubaragiñe híchuguni duru luagun Bungiu? Ítara luba anhein subudi hubalin Bungiu buidu. Álügüdagua humá hungua: “Ka san luwuyeri umadaü Bungiu nun?”.

Anhein hénrengu lubéi hibagari, háfuga hasaminarun mama lan humada Bungiu. Gama lumoun, samina humá murusun: Bungiu san gadurunbei luagu sun turóbuli le sügǘ humaalibei, o ligía íchugubei abinirúni hun? Kei aubei warihei, Mafia “agumadihabei lidan ubóu le” (Huan 12:31). Ligía lubeiti gadurunbei luagu saragu lídangiñe asufuriruni le ubouagubei. Ani, ma inarüni gadan lániwa saragu turóbuli ladüga wafigoun guánarügü o ladüga somu katei le magurabun wamuti lidan wabagari?

Ka ladügübei Bungiu? Ariñagatu Bíbülia ligía lan Adügübalin sielu, Ubóu luma lubuidun wágubu. Ani lúhaburuguñein lan Bungiu wabagari (Sálumu 124:8; Salmo 139:14, TNM; Danieli 5:23). Ka mini lubéi sun le?

Mini lan luagu seremei lan Bungiu gabagari wabéi (Adügaü 17:28). Luagu sun lan katei buiti le geyegubei wau lidan ubóu le, ínsiñeni hama umadagu, ubafu lun wasandiruni lisemén éigini, lun wasandiruni laguurun luagu wara, waganbun, wirimichun..., sun katei le idewesei lúmagiñe Bungiu (Santiagu 1:17). Ma adügati sun abinirúni le lun warihini kei aban Umadaü le unbei yu lan wíchuguni wínsiñehabu luma wafiñen?

Íbini ítara, háfuga hénrengubei lan hun hafiñerun luagu Bungiu. Háfuga hasaminarun ibidiñegili lan hun buidu, ani gunfurandawati lira. Lidan liraüraü arütíkulu le siñati wakutihani sun resun le uágubei hasaminara fiú gürigia luagu furunde lan Bungiu. Gama lumoun, ma buiti hamuga lun wáfaagun lun wasubudirunitima buidu? * Chouru wamuti anhein lan hadüga, hasubudirubei lan inarüni luagu. Úati furunde lan Bungiu. “Ínsiñeni Bungiu” (1 Huan 4: 8).