GÍBETIÑA gürigia mínsiñeti álügüdahani le luágubei tidáü garüdia to houn. Gama lumoun, eibu dan gíbetimahaña gürigia adügüti álügüdahani le hóuniwagua o aba lan hasaminarun luagu furunde lan Bungiu.

Fiú hádangiñe gürigia ha ásügürübaña lídangiñe liñawan dan álügüdaguatiña houngua: “Ka san uagu lígira Bungiu lun lasuseredun le? Le funa san meberesen lan wau o ladüga furunde lan?”.

Áñahein amu aba hagañidun dan le haliihan fiú abahüdaguni tidan Bíbülia, kéiburi le luáguti Guran le lánina lidaani Noé. Aba hálügüdagun houngua: “Ida liña san gayara lan láfaragun aban Bungiu hínsiñehabuti saragu gürigia? Ladüga funa san furunde lan?”.

Adügañaha humaali san álügüdahani burí le húniwagua? Ibidiñeti san hun kaba lan hariñaga houn gürigia ha álügüdagubaña houngua anhein furunde lubéi Bungiu? Ka lan yebe hásügürünbei, huubei lun hakutihani ariñahani le asigirubei.

Ladüga mítaran wamá kei animaalugu, subudi wamuti le buídubei luma le wuribabei. ‘Lenege guánarügü Bungiu ladügawa’ (Agumesehani 1:27). Mini lan le luagu ru lan ubafu woun lun wasubudiruni le buídubei luma le wuribabei kei ligía, lun wáyeihani ligaburi luma lilurudun le harumabei. Ligíati, anhein mínsiñe lubéi wuribani woun, mínsiñetimabei giñe lun Bungiu.

Úarati saminaü le luma le lariñagubei Bungiu luougua tidan Bíbülia: “Ítara kei lóugiñeñein lan múa sielu, ítara giñe lóugiñeñein lan hisaminan luma hóuserun nisaminan luma nóuserun” (Isaíasi 55:9). Ánhawa ariñaga furunde lan Bungiu, kóntürañadiwa luagu dimurei burí le, lugundun wariñaguña hamuga luagu íñutima lan wasaminan luéi Bungiu. Lubaragiñe wasaminarun ítara, buítimati wáluahan amu ariñahani. Lubaragiñe wálügüdagun woungua anhein furunde lubéi Bungiu, gayarati wálügüdagun woungua ka lan uagu genege lubéi luagu óusera lan lau furundei lidan somu kesi. Gumese wamá arihei ka lan mini lubéi furunde lan aban gürigia.

Dan le wariñagun furunde lan aban gürigia, wayanuhaña luagu lébuna ladügüni katei. Aban gürigia furundeti gúndaati lau hasufurirun amu ani mañuludaguntu lanigi dan larihiniña asufurira. Kéiburi anhein erereha aban úguchili lun lisaani o labeichuni lúnrügü ladügün lun lasandiragun lungua wuriba, lóuseruña lau furundei. Gama lumoun, anhein ladügüñein lubéi lun larufudahan lun o luéi lasuseredun somu katei wuribati lun, buiti ladügübei. Ménrengunti wasaminarun wuriba luagu lébuna hadügün somu gürigia aban katei, ani gayarati gunfuranda humani buidu anhein chülühali lubéi dan lun hasaminarun amu wuriba huagu.

Akutiha wamá murusunraüya luagu bián resun le uágubei wayanuha furumiñe, le adügübei lun hasaminarun gürigia furunde lan Bungiu: chagaguaü lánina liñawan dan luma burí abeichúni lúmagiñeti Bungiu le uágubei layanuhóua tidan Bíbülia. Wadariruba funa san somu katei le arufuduti furunde lan Bungiu?