1, 2. a) Ka uagu gebegi habéi umadagu ha úaraguabaña woun ani aranseñu hagía lun híchugun ferudun? b) Kaba burí álügüdahani wóunaba?

SEGÚN hisaminan, ka luwuyeri umadaü uágubei gayara lan lariñawagún le lan lúgubu umadaü lan? Ariñagatu aban kristiána gíritu Ashley: “Afiñetina le lan lúgubu bumada lan aban gürigia dan le búmañein lan súnwandan ani feruduna lumutibu dan le bachararun lun lidan somu katei”. Houn sun gürigia gebegitiña umadagu ha úaraguatiña ani gíchigaditiña ferudun. Adügatiña lun chouru lan wasandiragun woungua luma lun wasandirun añahein lan hínsiñehabutiña woun (Ari. 17:17).

² Heowá ligía Umadaü le úaraguatimabei ani gíchigaditimabei ferudun hádangiñe sun umadagu ha gayarabei gamada wamaniña. Ariñaga lumuti abürühati Sálumu ítara: “Buguya Nabureme [Heowá], buítibu ani gíchigadi buguya ferudun; buítibu [o óuseratibu lau ínsiñehabuni úaraguati] hama sun ha ayumuragubaña bun” (Sal. 86:5). Ka mini lubéi úaragua lan aban gürigia ani gudemehabu ligía? Ida liña larufuduni Heowá lubuidun burí igaburi le? Ida luba wáyeihani lani hénpulu? Línchahabadiwa óunabagülei lun burí álügüdahani le lun línsiñeduntima Heowá woun, Wamada le buídutimabei, ani ladügüba lun buídutima lan wamadagua hama wíbirigu (1 Huan 4:7, 8).

3. Ka mini lubéi úaragua lan aban gürigia?

³ Aban igaburi le arufudúbei lau ederegeraguni unguaü luma gúnfuli le madüraawagúaditi, ligía úaragunibei. Aban gürigia úaraguati mama anihán buma uguñe haruga dise buéi, lubaragiñe lira badületi lau ínsiñeni luagun aban gürigia o katei, ani madisedunti luéi ni íbini lidan lénrengunga. ‘Úaraguati’ Heowá, ligía úaraguatimabei hádangiñe sun gabagaritiña (Aruf. 16:5).

4, 5. a) Ida liña larufuduni Heowá luagu úaragua lan? b) Ida liña ladügün wasaminarun luagu lúaragun Bungiu lun wibihin iderebugu?

⁴ Ida liña larufuduni Heowá úaragua lan? Mágurun lumutiña lubúeingu ha úaraguabaña lun. Urúei Dawidi, ligía  aban hádangiñe, ani ruti fe luagu ítara liña lan (aliiha huméi 2 Samueli 22:26). Ariha lumuti lungua mama lan ariñagarügüti Bungiu úaragua lan, lugundun adundeha lumuti meha, góunigi lumuti ani sefu lumuti dan le lóuchawagun (2 Sam. 22:1). Ka meha uagu úaragua lubéi Heowá luma Dawidi? Ladüga meha giñe ‘úaragua’ lan Dawidi. Gebegiti húaragun lubúeingu Bungiu lun ani ruti hafayeiruaha lau giñe úaragua lan houn (Ari. 2:6-8).

⁵ Resibitiwa iderebugu dan le wasaminarun luagun katei burí le ladügübei Heowá ladüga lúaragun. Ariñagati aban íbiri úaraguati gíriti Reed: “Ruti iderebugu nun naliihani ida liña lan meha líderaguni Heowá Dawidi dan le lásügürün lídangiñe lénrengunga. Súnwandan meha lágüdahani, íbini dan meha le laramudaguña lan lagadábugiñe burí dübü dan le lanurahaña lubéi. Ma lueirin iderebugu le nibihubei! Haritaguagüda lumutina luagu meberesenga lan lanarime lirun násügürün, númabei lan Heowá ánhana úaragua lun”. Chóuruti súngubei lan wagía sandí wamuti ligiaméme (Rom. 8:38, 39).

6. a) Ka burí amu manera aubei larufudei Heowá lúaragun? b) Ka buiti lanügübei lúaragun Heowá houn lubúeingu?

⁶ Ka burí amu manera aubei larufudei Heowá lúaragun? Úaragua lan lun guánarügü lilurudun ligía aban lídangiñe. Ariñagati woun: “Ítarameme nuba huma danme haweiyadun” (Isa. 46:4). Lilurudun luáguti le buídubei luma le wuribabei ligía lébunabei sun le desidírü lubéi ani masansiraguaditi lilurudun (Mal. 3:6). Súnwandan giñe lagunfulirun lau lererun, mini lan lira, gúnfuli lani sun le füramase lubéi (Isa. 55:11). Barüti lúaragun Heowá buiti houn sun lubúeingu ha úaraguabaña, lugundun dan le wadügüni sun wayaraati lun gaganbadi wamá lun lilurudun, gayarati wachoururuni lagunfulirubei lan füramasei le adüga láalibei libügürü labinirubadiwa lan (Isa. 48:17, 18).

7. Írida humá aban lídangiñe katei le gayarabei wadügüni lun wáyeihani lúaragun Bungiu.

 ⁷ Ida luba wáyeihani lúaragun Heowá? Wadügün somu katei hawagu ha ásügürübaña lídangiñe lénrengunga ligía aban manera (Ari. 3:27). Másiñati ru wamá fe luagu somu íbiri le féridi laali luguraasun ladüga sandi lan, o ladüga maha hamá liduheñu lun leseriwidun lun Heowá o ladüga guánarügü lichara. Ma buiti hamuga wóufudahan íchiga dǘgüdaguaü lun lau burí “dimurei buiti”? (Sak. 1:13.) * Ítara warufudubei umadagu wamá ha inarünitiña ani ‘úaraguatiña sügǘ lau aban íbiri’ (Ari. 18:24).

8. Ida luba wáyeihani lúaragun Heowá lidan wabagari kei maríeitiña luma lidan wanaagun woungua hama amu?

⁸ Áyeiha wamuti giñe lúaragun Heowá lau úaragua wamá houn gürigia ha hínsiñebaña woun. Anhein maríeihadiwa lubéi, subudi wamuti lunti lan úaraguameme wamá tun o lun gürigia le úmabei wamarieida (Ari. 5:15-18). Ligíati, míchugun wabalin nírügü furumiñeti pasu le gayarabei lanügüniwa agabaraha (Mat. 5:28). Arufudatiwa giñe úaragua wamá houn wíbirigu, dan le maburuchaguagüdün wamá iyeeni hawagu, machuragun wamaña ani maha wagíame nírügü lun waganbahani lagübüri ayanuhani le (Ari. 12:18).

9, 10. a) Kátima un busén wamá úaragu wamá? b) Ka uagu ñeinbei lubéi dan hénrengu lan gaganbadiwa lan lun lilurudun Heowá?

⁹ Gama lumoun, lóugiñe sun katei, busentiwa úaragua wamá lun Heowá. Lun wibihini lira, mosu wáfaagun lun warihini katei kei larihini, lidan amu dimurei, mosu línsiñedun le hínsiñebei lun woun iyereegu ligíame le iyereegubei lun woun, úaragua ligíame ligaburi wawinwandun luma le wasubudirubei (aliiha huméi Sálumu 97:10). Éibume úaragua lan ligaburi wasaminarun luma le wasandirubei luma ligaburi lisaminan Heowá luma le lasandirubei, busentimabadiwa gaganbadi wamá lun lugumadin (Sal. 119:104).

¹⁰ Inarüni ñeinbei lan dan hénrengu lan woun gaganbadi wamá lun lugumadin Bungiu. Háfuga mósume wáfaagun lun úaraguameme  wamá. Ligía asuseredubei houn fiú kristiánugu ha busentiña hamarieidun, gama lumoun, madarigiña aban adari buitu o buiti haganagua lubúeingu Heowá (1 Ko. 7:39). Másiñati sandí tan aban íbiri hadügüdaruña lan tupanaagu lidan wadagimanu ha meseriwidunbaña lun Heowá tuagu lun tamarieidun ladüga sun lan oura hau áluaha adari tun. Lau sun anihein lan dan tasandiragun tungua tábugua, desidírüharu úaraguamemeboun lan lun Bungiu. Ma inarüni gebegi hamá íbirigu ha íchugubaña lubuidun hénpulu lánina úaraguni kei le woun? Chóuruti labinirubaña lan Heowá sun ha úaraguamemebaña lun íbini hagagibudagun luma burí óuchawaguni (Ebü. 11:6).

11. Ka mini lubéi líchigadi Heowá ferudun?

¹¹ Líchigadi Heowá ferudun ligía aban lídangiñe igaburi le buídutimabei luagu. Ka mini lubéi igaburi le? Iarani lun ferudunawa lan gürigia le achararubei, gébunarügaali ligía ferudunawa lan. Mama adügarügüti kamá hamuga marihin lumuti charati o lamahadun luagu adügǘwaali lan, lubaragiñe lira, mini lan, magüragun lan wuribani tidan lanigi lubá le achararubei. Ariñagatu Bíbülia ‘gíchigadi lan Heowá ferudun’ (Sal. 86:5).

12. a) Ida liña larufuduni Heowá gíchigadi lan ferudun? b) Ka mini lubéi ‘lachibún lifigoun’ aban gürigia?

¹² Ida liña larufuduni Heowá le lan lúgubu gíchigadi lan ferudun? Dan le feruduna lan adüga lumuti lau ‘mángini’; mini lan lira, aba lan feruduna lan sunsuinagubei ani lun sun dan (Isa. 55:7). Ida liña wasubudiruni feruduna lan Heowá sunsuinagubei? Samina wamá luagu le lachoururagüdübei dimurei burí le bürüwañubei lidan Adügaü 3:19 woun (aliiha huméi). Ariñagati apostolu Féduru houn ha aganbubalin: “Ligía lubeiti, asaküriha humá; giribu huguyame lun Bungiu”. Dan le asakürihaali lan aban gürigia tídangiñe sun lanigi, sarí lumuti wuribati le ladügübei, ábati desidírü lan madügündigia laali lan (2 Ko. 7:10, 11). Aba giñe desidírü lan lagiribudun, mini lan lira, aba lan lígiruni luriban üma le meha lárügüdübei lun lárügüdüni üma le aubei lagundaara Bungiu. Ánhaña meha arufuda gürigia ha aganbubalin Féduru luagu asakürihaaña lan, ka meha gayarabei  habihini? Según lariñaguni Féduru, habihiba meha ‘lachibún’ hafigoun. Dimurei burí le, lídangiñeti aban dimurei güriegu le mínibei “áhurudagueina lun lagidarun”. Ligíati, dan le feruduna lan Heowá bulíei lumuti figóu le adügǘbei. Ferudunati sunsuinagubei (Ebü. 10:22; 1 Huan 1:7).

13. Ka katei lachoururagüdübei burí dimurei “maritagundigiaadiname luagun hafigoun” woun?

¹³ Ida liña wasubudiruni luagu dan le lan feruduna lan Heowá adüga lumuti lan lun sun dan? Akutiha waméi profesía le labürüdübei Heremíasi libügürü iseri daradu le adügǘbei hama kristiánugu anuadirúaaña, daradu le lunbei ladaaruni üma lun ferudunawa lan hafigoun sun ha íchugutiña hafiñen luagu lebegi asalbaruni (aliiha huméi Heremíasi 31:34). Füramaseti Heowá: “Feruduna nubéi hariban, maritagundigiaadiname luagun hafigoun”. Kei warihini, chóurugüda lumuti woun dan le lan feruduna laali lan somu figóu, maritagundigia láalime ámuñegü lun labeichuniwa luéigiñe. Mayusurun lumuti ligiaméme figóu lun líchugun wadurun o lun labeichuniwa saragu wéiyaasu. Lubaragiñe lira, dan le ferudunalani figóu aba labulieidagun luéi lun súnwandan (Rom. 4:7, 8).

14. Ida liña wibihin dǘgüdaguaü dan le wasaminarun luagu líchigadi Heowá ferudun? Ru humá aban hénpulu.

¹⁴ Ruti saragu dǘgüdaguaü woun wararamagun asaminara luagun líchigadi Heowá ferudun. Wayusuraali iri Elena lun wadimurehan tuagu aban íbiri to meha abugúboun lídangiñe damuriguaü saragu dan lubaragiñe le, gama lumoun saragu irumu lárigiñe ábaya lanharúniwa tun lidan damuriguaü. Ariñagatu: “Ábaha nariñagun núniwagua luma houn amu afiñetina lan luagu feruduna láadina lan Heowá, gama lumoun, le linarün katei díseti meha nasandiragun nungua luéi ani saminatina meha yarafatima lan ani inarünitimati lan meha houn amu”. Gama lumoun, aba meha tadarirun Elena awalidaguni lárigiñe taliihan ani akutihatéi hénpulu burí le ayusurúbei tidan Bíbülia lun konpararua lan ligaburi líchigadi Heowá ferudun. Ani ariñagatu: “Aba nasandiruni línsiñehabu kéihaña masandirun nágili lan”. Lidan aban igaburi espechaliti, ñuluguagüda lumutu saminaü le tanigi: “Dan le feruduna láadiwa lan [Heowá], moun lumuti wasaminarun laduraruba lan dáseiti le lanügübei wafigoun lun sun wabagari”. * Lagumuhóun, aba tariñagun Elena: “Aba níchugun fe luagu le lan linarün katei mafiñeegidina lan meha luagu gayara lan feruduna lánina Heowá sunsuinagubei; saminatina yebe mosu lan nanügüni ihürügu le lun sun nibagari. Subudi numuti mégeibadina lan dan, gama lumoun gumeseedina asandira gayara lan nayarafadun lun Heowá, ani ítara liña lira nun kamá hamuga gidaadina aban lanarime ihürügu nuáriua”. Ma lueirin lugudemehabu luma línsiñehabu Bungiu le unbei weseriwida! (Sal. 103:9.)

15. Ida luba feruduna wamá kei ladügüni Heowá?

¹⁵ Gayarati wáyeihani Heowá lau desidírü wamá ferudunagua wamá wámagua dan le gébuna lan wadügüni (aliiha huméi Lúkasi 17:3, 4). Haritagua waméi dan le lan feruduna lániwa Heowá aba lan labulieiduni wafigoun, mini lan lira, mabeichun láadiwa lanme luéigiñe. Gayarati giñe wabulieiduni charati le hadügübei amu woun ánhawa masigirun ayanuha luagu.

16. a) Afuranguagüda huméi ka lan uagu mama lubéi ligiaméme feruduna wamani hachara amu luma wadügün kamá hamuga madügǘngili ni kata wuribati woun ni wígiraguagüdün woungua lun hásurun amu adüga wau. b) Ka lunbei wadügüni anhein busén wabéi lun feruduna lániwa Heowá?

 ¹⁶ Feruduna wamani hachara amu úati mini lan wadügün kamá hamuga madügǘngili ni kata wuribati woun ni wígiraguagüdün woungua lun hásurun amu adüga wau. Mini lan, magüragunbadiwa lan wuribani tidan wanigi habá amu. Súdiniti waritaguni mosu lan feruduna wamaniña ha achararubaña woun, lun gayara lan feruduna lániwa Bungiu (Mat. 6:14, 15). Gunfuranda  lumutiwa Heowá ani mabulieidun lumuti luagu “múa lan wabuñabei” (Sal. 103:14). Ma lunti hamuga giñe gunfuranda wamaniña amu dan le hachararun woun ani feruduna wamañame tídangiñe sun wanigi? (Efe. 4:32; Kol. 3:13.)

17. Anhein acharara aban íbiri woun, kaba íderaguawa lun magüragun wamá wuribani tidan wanigi lubá?

 ¹⁷ Anihein dan gürewei lan woun feruduna wamaniña amu. Íbini meha houn fiú hádangiñe kristiánugu anuadirúaaña ha awinwandubaña lidan furumiñeti sígulu güreweiti meha houn haransehani haturóbulin hámagua (Fili. 4:2). Anhein adügaali lubéi somu íbiri dañu woun, kaba íderaguawa lun magüragun wamá wuribani tidan wanigi lubá? Akutiha waméi le asuseredubei lun Hobu. Wéiriti meha ligari lun líchugun Elifási, Bilidádü luma Sofarü lidurun mébunouga (Hobu. 10:1; 19:2). Lidan lagumuhóun oura, adeinhati Heowá houn umadagu nege hagía ani aba lariñagun houn lun houdin arihei Hobu lun hadagaragüdün lun Heowá ferudunawa láamuga hafigoun (Hob. 42:7-9). Gama lumoun, mosu meha ladügün Hobu aban katei: mosu meha lafurieidun hawagu. Dan le ladügünbalin Hobu katei le, aba labiniruni Heowá ladüga lánharun feruduna lániña (aliiha huméi Hobu 42:10, 12, 16, 17). Ka wafurendeirubei lídangiñe le? Ánhawa lan afurieida tídangiñe sun wanigi luagu somu gürigia le achararuti woun líderagubadiwa lun masigirun wamá gáñiñu luma.

18, 19. Ida luba aganwoundeinatima lan ínsiñeni le wasandirubei luagu lubuidun burí ligaburi Heowá?

¹⁸ Chóuruti resibihadiwa lan saragu dǘgüdaguaü lárigiñe wakutihan fiú lídangiñe lubuidun ligaburi Heowá. Furendeihadiwa ménrengunti lan layarafadúniwa lun, ua lan himei lan aban gürigia luéi aban, gíchigadi lan, richá lan, úaraguati ani gíchigaditi ferudun. Le linarün katei, gíbegili lunti wafurendeiruni luagu ligaburi Heowá. Wasigiramémeba afurendeira, lau saragu ugundani, luagu ligaburi gumugua dan (Apur. 3:11). Úaratiwa luma dimurei le lariñagubei apostolu Pábulu: “[Ma] lueirin lareini Bungiu, [lisubudin TNM] luma lichú lau!”. Ani le linarün katei, hínsiñeti giñe sun le líbiri lubuidun ligaburi Heowá woun, kéiburi ínsiñeni luma sisi igaburi le akutiha wamaalibei (Rom. 11:33).

¹⁹ Agurabatiwa aganwoundeina lan ínsiñeni le wasandirubei luagu lubuidun burí ligaburi Heowá. Ani ligíaba asusereda ánhawa akutihei sun ligaburi, ráramagua wagíame asaminara luagu ani áyeiha wameime lidan wabagari (Efe. 5:1). Ítara luba úaratima wamá luma le leremuhabei abürühati Sálumu: “Nayarafahóuba lun Bungiu, ladüga anihán lubuidun-ágeibei katei nun” (Sal. 73:28).