YÓNATAN, aban wügüri nasiruati Meriga ani koreana lagübürigu, súfuriti meha dan le ñǘraügili luéigiñe lirasan. Dan le laweiridunbei, aba láluahan aban fulasu le ñein lumuti mouserúniwa lan wuriba luagu ligaburi laríawagun luma lirasan. Aba laturiahan lun surusia lan, ábati láguyun awinwanda lidan aban aüdü luagun nórute libiti Alaska (Meriga), le ñein lubéi genegegua lan hama gürigia ha únbaña lagaraniha. Según yebe ligía ladariruba lan awalidaguni lídangiñe louserúniwa wuriba luéigiñe lirasan lidan lidili fulasu ligía.

Ma lirun, féridi lani lemenigin dan le meha aniha lan agaraniha tun aban nibureintu to 25 irumu tau ani ibidiñeguaaru meha tungua. Dan le tasubudiragunbei tungua ani aba tarihini ligibu Yónatan, aba tariñagun aban lagütü dimurei lun. Ka uagu tadügei? Ladüga iyereegu hamá koreana tun. Adügati lanarime sügǘ le lun larihini Yónatan luagu meseriwín lan lanurahan luéi louserúniwa wuriba luéigiñe lirasan.

Arufudati lásügürün Yónatan aban inarüni híruti: añahein gürigia arihúatiña wuriba íbini lidan lagumuhóun larigeirugu ubóu. Genegeti ñein hamuti lan gürigia añahein lan giñe uágutiña lasaminarúa wuriba.

 Lau sun buruguaali lan igaburi le hadan gürigia, gíbetiña úntiña laminsiñeda. Ma lámuñe aban katei! Ida luba san kamani lan aban igaburi le iyereegubei houn saragu gürigia? Furanguti besafu lan hádangiñe gürigia ha únbaña laminsiñeda igaburi le míchutiña fe gagaburi hamani giñe. Gayarati funa san susere lan ligiaméme hun?

Hénrenguti houn gürigia híchugun fe anihein lan katei wuribati hasandirun hawagu amu tidan hanigi. Ka uagu? Afuranguagüda tumuti Bíbülia: “Úati ni kata geyeedaguaditi [...] kei hanigi gürigia” (Heremíasi 17:9). Le linarün katei, gayarati weyeedagun woungua asaminara luagu anha wamá houn sun hawuyeri gürigia o wasaminarun anihein lan buiti resun wama lun mafiñerun wamá hawagu ítaga gürigia.

Lun warihini gürewei lan wíchugun fe samina wamá wuriba hawagu amu, samina humá luagun sügǘ le: éibugeina hiña guñoun luéigiñe aban üma búriti ani úatiña gürigia ñein. Sódini, aba harihin bián nibureintiña ibidiñetiña hun éibugeina hubaroun. Wéinamutiña ani genegeti barüina liña lan aban hádangiñe somu katei lúhaburugu.

Hasaminaruña hamuga san lídanñadün lan denchaü? Háfuga arufuda haali ibagari hun lun duari humá, gama lumoun, anihein san buiti resun huma lun hafiñerun peliguru hamá bián nibureintiña ha? Akutiha wamá lóugiñe lira: según hisaminan, ka harasanbei wügüriña ha? Gayarati lafuranguagüdüni hóunabagüle ka lan tídanbei hanigi. Gayarati larufuduni hun luagu samina humá wuriba hawagu amu gürigia íbini ibidiñe hamá hun.

Anhein furangu wabéi wóuniwagua, mosu wánharun luagu sun lan wagía sanditiwa somu katei wuribati hawagu amu tidan wanigi. Adimurehatu Bíbülia luagu aban ligaburi saminaü kamaniti. Ariñagatu: “Según le larihibei gürigia ligibugiñe lagu ítara liña líchugun hadurun amu” (1 Samueli 16:7, La Biblia, mensaje vivo). Inarüni sun lan wagía héchutiwa adügei katei le, ani anihein dan hanarime lan luriban resultóu le lanügübei igaburi le. Gayarabei funa san wagidaruni wawariua? Lachülürüba funa san dan lun marihíniwa lan igaburi le ubouagu?