“AYUMAHATINA aban katei.” Anihán dimurei burí le lariñagubei aban merigana le ageindagubei luagu haricha lílana lageira, gíriti Martin Luther King, isaani, lidan yanu famosuti le líchugubei weyu 28 lidan widü-hati irumu 1963. Águyuguagüda lumuti dimurei burí le lun ladimurehan libügürü ayumaha lan lachülürün aban dan lun úaaña lanme gürigia asaminarutiña wuriba hawagu amu luéigiñe harasan. Íbini houn lan merigana lariñagei, gíbetiña gürigia lídangiñetiña sun ubóu úaradutiña luma lidan le layumahabei.

Weyu 20 lidan unsu-hati, irumu 1963, ǘrüwa hati lárigiñe líchuguni Luther King liyanun, aba lánharun lóugiñe 100 ageiraü tun Dugumedu to tadügagüdüboun Óundaruni hani Néchanigu libügürü Ladügǘniwa lun Mouserúniwa hamá gürigia ha lídangiñetiña amu Rasa Wuriba. Saragu irumu lárigiñe, adügǘwati amu burí áfaaguni ítarati lidan sun ubóu. Sügühali dimí-san irumu lúmagiñe lasuseredun le, ligíati wálügüdagunbei woungua, kati resultóu ibihúbei lau burí lubuidun áfaaguni le?

Lidan weyu 21 lidan irumu 2012, ariñagati Ban Ki-moon, aban wügüri nadagimeinti kei seküretariu tidan Óundaruni hani Néchanigu: “Adügǘwaali saragu daradu gebegiti ani rua ligía sun le mégeiwabei lidan saragu fulasu ubouagu lun lagidarúniwa iyereehabúni houn lílana amu rasa, lun mouserúniwa hamá wuriba, lun ua lan iyereehabúni houn terencha luma burí katei le adügübei lun ua lan gürí hamá gürigia houngua hama amu. Gama lumoun, lidan sun ubóu añahagua saragu míñunu gürigia asufurira houserúniwa wuriba ladüga amu lan harasan”.

Íbini lidan burí ageiraü le ídanbei buíduhali lan lidin houn lidan hageindagun luma iyereehabúni houn lílana amu rasa o ladüga amu burí luwuyeri resun, gayarati wálügüdagun woungua: le san lúgubu ibihaaña lan hagidaruni iyereehabúni le hasandirubei gürigia tidan hanigi hawéi, odi eredeharügü hamutiña luéi harufuduni furangu anihein lan iyereehabúni ligía hawagu? Añahein afiñetiña ídeharügü lan burí aransehani le lun hararamuni houserúniwa gürigia wuriba, gama lumoun mabafutiña lun hadügün lun masaminarun hamá gürigia wuriba hawagu amu. Ka uagu? Lugundun gayarati labeichuniña lúrudu gürigia ha óuserubaña amu wuriba gama lumoun, siñaguabei hamuga lungua lun labeichuniña gürigia luagu katei wuribati le hasandirubei hawagu amu, ladüga lídanñein hasaminan luma tidan hanigi katei le.

Úati buídurügü lan heredehóuniwa gürigia luéi hóuserun amu wuriba lun gayara lan híderawagun lun masaminarun hamá wuriba hawagu amu; mosu híderawagun asansirei ligaburi hasaminan luma le hasandirubei. Gayarati san lasuseredun le? Anhein ítara liña lubéi, ida? Ariha wamá fiú sügǘ inarüniti le lunbei líderaguniwa arihei gayara lan hasansirun gürigia luma ka lan íderagubaliña asansira.

Linda: Luéigiñe Suru libiti Áfürika nasirua nan ani harutina. Saminatina meha ǘnabutima hamá lílana amu rasa hawéi harutiña, ani ariha numutiña meha kei gürigia maleskuelantiña, ha uágubaña siñá lan lafiñerúniwa, ani húutiña lúnrügü heseriwidun kei idamuni houn harutiña. Sin níchugun fe, sigitina lau ligaburi saminaü le. Gama lumoun, gumeseti nigaburi asansira lúmagiñebei nagumeserun aturiahoun Bíbülia. Furendeitina tídangiñe “úati lan himei lan Bungiu aban gürigia luéi aban” ani súdinitima tan wanigi sügǘ lau wakolorun o iñeñein le wadimurehabei (Adügaü 10:34, 35; Ariñawagúni 17:3). Íderagua lumutina le ariñawagúbei lidan Filipuna 2:3 arihei ánhana lan arihaña sun gürigia kei buídutimatiña nuéi masaminarúnhadina lanme wuriba hawagu. Íderagua lumutina nawinwandun según adundehani le tídanbei Bíbülia, kéiburi le, lun nebereserun hau amu gürigia meberesenga ka lan hakolorunbei. Guenlé masaminarúnhadina wuriba hawagu amu.

Michael: Australiana au. Lidan meha aban fulasu le ídanbei gíbetima hamá harutiña naweirida, ani adügati katei le lun haminsiñedun ásiana nun,  hátima cheiní. Danha le narihin aban ásiana dan nabuguhaña lan aban karü, ábaha nadaaruni tufunederan lun nagúaragun ariñaga dimurei kéiburi: “Beiba bageiroun, ásiana!”. Dan lárigiñe, aba nagumeserun aturiahoun Bíbülia aba gunfurandanani ida liña lan larihiniña Bungiu gürigia. Hínsiñetiña gürigia lun meberesenga halíana lan o ida liña lan haríawagun. Dagati katei le tidoun nanigi, ábati marihin naaña lan gürigia lau iyereehabúni, aba nagumeserun arihaña lau ínsiñeni. Ma lanarime asansiruni le nadügübei. Guentó, wéiriti nugundan dan le nóudaragun hama gürigia ha lídangiñetiña sun ageiraü meberesenga halíana lan, adügaali katei le lun ladaaragun nisaminan ani barühali saragu ugundani nun.

Sandra: Lídangiñetu meha aüdü le gíribei Umunede lidan departamentu le gíribei Delta ageiraü Nigeria núguchu, ánhañati liduheñu núguchi lídangiñetiña meha departamentu le gíribei Edo le ñein lubéi ladimurehóua iñeñein le gíribei esán. Ladügarügü katei burí le, wuribati meha harihinu liduheñu núguchi núguchu darí weyu le tóunwenbei. Ligíati füramase nubéi núniwagua maweiyasunbadina lan ádaragua nungua hadoun gürigia ha ayanuhatiña esán ani mamarieidun nuguyame luma aban eyeri le lídangiñeti departamentu Edo. Gama lumoun, dan le naturiahanbarun Bíbülia, aba lasansirun ligaburi narihini katei. Anhein ariñaga tubéi Bíbülia ua lan himei lan Bungiu aban gürigia luéi aban ani resibi lániña sun ha inebehabubaña lun, kátañadinagia lun heyereeguduba lan gürigia nun ladüga amu lan hani türibu o hañeñe? Sansi numuti ligaburi nisaminan ani aba narandarun hama liduheñu núguchi. Adügati nafalaruni adundehani le tídanbei Bíbülia lun darangilu lan naritagun luma lun gunda nan. Íderagua lumutina giñe lun buidu lan nanaagun nungua hama amu meberesenga halíana lan, ka lan harasanbei o hererun. Angia eyeri le úmabei namarieida? Lídangiñeti departamentu Edo ani iñeñein esán layanuhabei.

Ka uagu íderagua taaña lubéi Bíbülia gürigia ha, hámaya saragu amu, lun hagidaruni lanarime iyereehabúni le meha tídanbei hanigi habá gürigia ha mítaranbaña kei hagía luma lun masaminarun hamá wuriba hawagu? Ladüga Lererun lan Bungiu. Ani gabafutu lun tasansiruni ligaburi hasaminan gürigia luma le hasandirubei hawagun amu. Ani lóugiñe lira, arufuda  tumuti ka lan amu katei mégeiwabei ladügǘn lun úaaña lanme asaminarutiña wuriba hawagu amu.

Lau sun gayara lan tíderaguniwa Bíbülia lun wárügüdagun woungua luma lun wasagaruni katei wuribati le wasandirubei tidan wanigi, aniheingua biama katei le mégeiwabei laransehóun lubaragiñe ladügǘn lun úaaña lanme gürigia asaminarutiña wuriba hawagu amu. Furumiñe, gafigountiwa ani charatiwa. Ariñaga tumuti Bíbülia furangu: “Úati [gürigia] mafigounhanti” (1 Urúeigu 8:46). Ligíati, mosu lubéi wageindagun luma wagaburi guánarügü, ítara kei meha lasuseredun lun apostolu Pábulu le abürüdübalin dimurei burí le: “Dan [...] le busén nan nadügüni le buídubei, wuribatirügüñein [...] nadüga” (Rómana 7:21). Ligíati ñeinbei lubéi dan tadügün wanigi to uáguboun gabafu lan figóu lun liábingua “lagübüri saminaü” wábulugun le gayarabei lanügüniwa asaminara wuriba hawagu amu (Márükosu 7:21).

Libiaman, lubafu Satanási le Mafia. Ariñagatu Bíbülia luagu “gáfarahadigubeiñein” lan ani ligía lan “eyeehabalin sun ubóu” (Arufudúni [Apocalipsis] 12:9; Huan 8:44). Afuranguagüda lumuti katei le ka lan uagu híbebei gürigia asaminarutiña wuriba hawagu amu luma ka lan uagu genege lubéi siñabei lan lagidarúniwa lumahanwa houn sun hawuyeri gürigia, houserúniwa wuriba, háfarawagun saragu gürigia lidan aban, luma burí máhawa lan houn gürigia ha lídangiñetiña amu rasa, relihión, o somu sétanu gürigia.

Ligíati, lun ladügǘn lun úaaña lanme asaminarutiña wuriba hawagu amu, furumiñe mosu lagidarúniwa figóu hawéi gürigia luma lubafu Satanási le Mafia ubouagugiñe. Arufudatu Bíbülia ligíaba lan ladüga Larúeihan Bungiu ámuñegü.

Arufudahati meha Hesukrístu houn lani disipulugu lun hafurieidun lun Bungiu ítara: “Ñǘbuinla barúeihan; adügüwalá bugundan ya ubouagu kei ladügǘniwa sielu” (Matéu 6:10). Lagidarubei Larúeihan Bungiu sun marichaü, kéiburi máhawa lan houn somu sétanu gürigia luma lasaminarúniwa wuriba hawagu.

Danme liabin Larúeihan Bungiu, ligíaalime ariha lau sun le asusereduti ubouagu, ‘lagürawaguba’ Satanási, mini lan lira, siñaali lanme ladügün ni kata, ani “meyeehandigia laaña[me] néchanigu” (Arufudúni 20:2, 3). “Iseri[halime] ubóu”, o ámuhañame hawuyeri gürigia lidan, ani “richagua[bei]” sun katei ñein (2 Féduru 3:13). *

Lagidarúba figóu hawéi sun gürigia ha lúnbaña hawinwandun lídanme iseri ubóu richaguati le (Rómana 8:21). “Úabei adügüti wuribati” hádangiñe sun gürigia ha lúnbaña hawinwandun lábugiñe Larúeihan Bungiu. Ka uagu? “Ladüga ítara kei labuinchagüdüni duna barana ítara luba labuinchun sun fulasu lau lasubudirúniwa luéirigun [Heowá].” (Isaíasi 11:9.) Lídanme dan ligía, sunme gürigia hafurendeirubei lémeri Heowá ani háyeihabei línsiñehabu. Mini lan lira, úaaña lanme asaminarutiña wuriba hawagu amu, lugundun “aban [...] lanügüniña Bungiu sun gürigia” (Rómana 2:11).