Ouserúaadün san wuriba somu dan ladüga lasaminarúniwa wuriba huagu? Susereeli san hun michugúniwa lan le hamuriahabei hun o madügǘniwa lan gasu hau ladügarügü hikolorun, hinasiñun o ladüga maseinsun humá? Anhein ítara liña lubéi, anihein uganu buiti wama hun: íbini kamani lan igaburi le haganagua gürigia, móuserun lumutiwa Bungiu ítara. Ariñagati apostolu Féduru lau ichouruni: “Úati [...] himei lan Bungiu aban gürigia luéi aban”. (Aliiha huméi Adügaü 10:34, 35.)

Lúbiñe aban wügüri gíriti Korunéliu lariñagei Féduru dimurei le. Súdiniti katei le ladüga huríu lan Féduru, ánheinti Korunéliu mama meha huríu. Lidan meha dan ligía wíyeti meha hanügüniña huríu gürigia ha mámabaña huríu ani máhatiña meha hóundaragun hama. Kati uagu aniha lubéi Féduru lúbiñe Korunéliu? Lidan murusun dimurei, ladüga lariñaguni Heowá lun. Málügili lúmagiñe larihin Féduru aban arufudúni le ídanbei lariñawagúa lun: “Le katei le larumadagüdübei Bungiu, mariñagabá luagu wiye lan”. Aban weyu lubaragiñe, sin líchugun Féduru fe arihati Korunéliu aban arufudúni le ídanbei lariñaga aban ánheli lun lun lóunaagüdün luagu Féduru (Adügaü 10:1-15). Aba líchugun apostolu le fe Heowá lan adügübei lun hóundaragun.

Ariñagati Féduru: “Subudi naali guentó luagu úati lan himei lan Bungiu aban gürigia luéi aban” (Adügaü 10:34). Dimurei güriegu le ásügürawagüdübei ya kei “himei lan [...] aban gürigia”’, mini lan, lidan lúgubu dimurei, “aban le ánharuti lun aban igibu” (Nueva Concordancia Strong Exhaustiva). Afuranguagüda lumuti aban akutihati Bíbülia dimurei le ítara: “Ladimurehaña luagu aguseragüdüti le arihibei ligibuagun aban wügüri le lunbei laguseragüdüni ani buídurügüti lira lun lun lariñagun anhein gadurun lubéi wügüri ligía o madurun lan. Según ligaburi léiguadun lun laguseragüdei, meberesenga ligía lun lakutihan libügürü le asuseredubei”. Ánheinti Bungiu mítaranti, úati himei lániña gürigia luagu harasan, hanechanin, gaseinsun o maseinsun hamá o amu katei líbeina lira.

Lubaragiñe lira, ariha lumutu Heowá hanigi gürigia (1 Samueli 16:7; Ariñawagúni 21:2). Aba lariñagun Féduru: “Resibirügü lumutiña [Bungiu] sun ha inebehabubaña lun ani adüga haméi le buídubei, lídangiñe hamá yebe furumiñeguarügü néchani” (Adügaü 10:35). Inebehabu wamá lun Bungiu, mini lan wafiñerun luagu dise wagíame luéi le mínsiñebei lun. Wadügüni le buídubei, mini lan wadügüni le súrubei ligibugiñe lagu lau sun wagundan. Hínsiñehabuti houn gürigia ha adügübalin le buídubei ladüga ínchaha lániña ínsiñeni luma inebehabu le hasandirubei luagu (2 Lúrudu 10:12, 13).

Anhein ouserúaadün lubéi lau luriban somu dan ladüga lasaminarúniwa wuriba huagu, chóuruti líchuguba lan dimurei le lariñagubei Féduru dǘgüdaguaü hun. Barǘ lumutiña Heowá gürigia ha lídangiñetiña sun néchani lumoun lun heseriwidun lun (Huan 6:44; Adügaü 17:26, 27). Aganba lumuti ani óunaba lumuti hafurieidun ha áhuduragubaña lun meberesenga ka lan harasanbei, hanechanin o anhein gaseinsun o maseinsun habéi (1 Urúeigu 8:41-43). Gayarati wachoururuni dan lan le larihiniwa Heowá siélugiñe, ábanrügüñein lan rasa larihin: harasan gürigia. Ma adügati katei le lun busén humá hafurendeiruntima luagu Heowá, Bungiu le úabei himei lan aban gürigia luéi aban?