Wínwanti meha Adán, le furumiñeti wügüri, saragu san irumu, gama lumoun, aba laweiyadun aba lounwen. Ligíati lúmagiñe dan ligía, áluahaaña gürigia lun hararamuni lasuseredun katei le, gama lumoun siñaguagiña houngua lun hadügüni. Ka uagu? Ladüga figóu. Hilati Adán ladüga lafigounhan kóntüra Bungiu luma ladüga maganbadi lan lun, ani kei giñe galagante wabalin figóu, susereti ligiaméme woun. (Aliiha huméi Agumesehani 5:5 luma Rómana 5:12.)

Lun gayara lan wawinwandun lun súnwandan mégeitiwa lafayeiruni somu gürigia lebegi wesefurun (Hobu 33:24, 25). Lebegi asalbaruni, ebegi le afayeirúbei lun lalibürerún aban gürigia, lidan wakesin lun walibürerun luéi óunweni (Áfuriduni 21:29, 30). Fayei lumuti Hesusu ebegi le lau líchuguni libagari wawagu. (Aliiha huméi Huan 3:16.)

Mámaba sun gürigia esefurúa luéi sandi luma óunweni. Ítara kei meha Adán, heferidirubei gürigia ha maganbadibaña lun Bungiu habagari. Gürigiarügübaña ha úntiña ferudunawa lan hafigoun awinwanda lun súnwandan. (Aliiha huméi Isaíasi 33:24 luma 35:3-6.)

Lun gayarabei lan ferudunawa wamá, mosu wadügün aban katei. Mosu wafurendeirun luagu Bungiu lau waturiahanu Lererun. Íderagua tumutiwa Bíbülia awinwanda lau aban lubuidun ibagari lun weresibiruni lufulesein Bungiu luma lun wawinwandun lun súnwandan. (Aliiha huméi Huan 17:3 luma Adügaü 3:19.)