Yúsuti Hesusu fiú lun léigagüdün saragu
“Ábati lagubachagunu [Hesusu] fein, aba líchugunu houn lani disipulugu, aba hafanreinhanu hadan gürigia.” (MAT. 14:19)
1-3. Ida liña léigagüdün Hesusu saragu gürigia yarafa lun uburugu Betüsáida? (Ariha huméi dibuhu le lídanbei páhina le.)
DIRÁ huméi sügǘ le hichüguagu (aliiha huméi Matéu 14:14-21). Chülümémeeli lidaani lefeduhóuniwa Luéyuri Esefuruni lidan irumu 32. Añahein kéiburi seingü milu wügüriña hámaya saragu würiña hama irahüñü geyegu lau Hesusu luma hau lánigu disipulu lidan aban fulasu mageirawati yarafa lun Betüsáida, aban aüdü luagun nórute libiti lagunu le gíribei Galiléa.
2 Dan larihiniña Hesusu gürigia ha aba hagudemedagun lun, ábati larufudahan saragu katei houn luagu Larúeihan Bungiu ani aba lareidaguagüdüniña ha sándibaña. Dan le latarüdüña lan, aba hariñagun lani Hesusu disipulugu lun lun lóunahaniña gürigia lun houdin lidan aüdü le yarafabei agañeiha éigini. Gama lumoun, aba lóunabuniña Hesusu: “Ru humá éigini houn”. Chóuruti adüga lan dimurei burí le lun hálügüdagun houngua kaba lan hadüga, lugundun lóuguati éigini le hámabei: séingürüñoun fein hama bián harahüñü úduraü.
3 Ínchaha lumuti lugudemehabu Hesusu adüga aban milaguru —milagururügüñein le iridúa lidan gádürügubei ewanhéliu (Mar. 6:35-44; Luk. 9:10-17; Huan 6:1-13). Ariñagati Hesusu houn lani disipulugu lun hariñagun houn saragu gürigia hagía lun hañuurun luagu sagadi lidan burí sétanu le ñein hamuti 50 o 100 gürigia. Lárigiñe, aba leteingiruni Bungiu tuagu, aba lagubachagunu fein amurusuhaláña úduraü. Lubaragiñeti ligía lan íchigei éigini houn gürigia lungua, ‘aba líchuguni houn lani disipulugu lun hafanreinhani hadan gürigia hagía’. Aba giñe milaguru hou hamá súngubei ani ígiraguati éigini! Guentó samina humá luagun le: Yúsuti Hesusu fiú [lani disipulugu] lun léigagüdün saragu milu gürigia. *
4. a) Ka meha luwuyeri éigini súdinitimabei lun Hesusu, ani ka uagu? b) Kaba wariha lidan arütíkulu le, lúmaya le asigirubei?
4 Gama lumoun, súdinitimati meha lun Hesusu líchugun éigini le tídangiñeti Lererun Bungiu houn ha afalarubalin. Subuditi meha lun adüga lan lafurendeirúniwa inarüni le tídanbei Lererun Bungiu lun libihíniwa ibagari magumuchaditi (Huan 6:26, 27; 17:3). Adügati gudemehabu le ínchahabalin Hesusu éigagüdaña saragu gürigia tau fein hama úduraü lun giñe lásügürün saragu dan arufudaha houn lani disipulugu (Mar. 6:34). Subuditi meha lun málübei lan buga ubouagu ani mosu lan buga lagiribudun sielun (Mat. 16:21; Huan 14:12). Dánmeti buga siéluhali, ida luba buga ladüga lun líchuguni éigini nófuti le tídangiñeti Lererun Bungiu houn? Ladügübei buga ligiaméme: layusurun fiú gürigia lun léigagüdün saragu. Kátañabaña bugati fiú ha? Akutiha wamá ida liña lan meha layusurun fiú lun larufudahan tídangiñe Lererun Bungiu houn saragu kristiánugu anuadirúaaña lidan furumiñeti sígulu. Lárigiñeme, wakutihaba lidan arütíkulu le asigirubei aban álügüdahani le wéiriti lisudinin woun: ida luba wasubudiruniña fiú gürigia ha layusurubaña Kristu lun larufudahan woun uguñe weyu?
Yúsuatiña fiú lun héigagüdüniwa saragu (Ariha huméi párafu 4)
LANÚADIRUN HESUSU FIÚ
5, 6. a) Ka katei súdiniti desidírü lubéi Hesusu lun lachoururuni hasigiruba lan buga ha afalarubalin derebugu lidan hamadagua luma Bungiu lárigiñe lounwen? b) Ida liña laranseruniña Hesusu apostolugu lun hagunfulirun lau lisudinin wadagimanu le lunbei lígiruni houn lárigiñe buga lounwen?
5 Aban lichügüdina familia le gúnfuliti lau lani buligasion, adügati aransehani lun ua lan hemegeirun liduheñu lárigiñeme lounwen. Ítarameme, adügati giñe Hesusu —le meha lunbei Lichügüdinabei lan damuriguaü kristiánu— aransehani lun lachoururuni lárigiñe lanme lounwen úabei lan hemegeirun lánigu disipulu lidan hamadagua luma Bungiu (Efe. 1:22). Aban hénpulu, yarafa lun bián irumu lubaragiñe lounwen, desidírüti Hesusu lagunfulirun lau dasi dǘgüdati lánina lanúadirun fiú gürigia hádangiñe furumiñetiña ha lúnbaña layusuruniña lun léigagüdün saragu gürigia. Akutiha waméi le asuseredubei.
6 Lárigiñebei lafurieidun Hesusu sun áriebu, aba lóundaraguniña lani disipulugu, ábati lanúadirun duusu apostolugu hádangiñe (Luk. 6:12-16). Lidan bián irumu le asigirubei, hámatima apostolugu ha lanügagua Hesusu lungua, ani arufudahati houn dandu lau dimurei kei lau lani hénpulu. Subudi lumuti meha Hesusu gíbegili lan lunti hafurendeiruni; ligía subudimémewa habéi kei “disipulugu” (Mat. 11:1; 20:17). Ruti meha Hesusu eweridihani súdiniti houn, aransehaláña buidu buidu lubá hagunfuliruni hani ministeriu (Mat. 10:1-42; 20:20-23; Luk. 8:1; 9:52-55). Menefánti laranseruñanu lan meha buidu lun hagunfulirun lau aban wadagimanu súdiniti le lunbei hadügüni lárigiñe lounwen luma láguyugun lun lidin sielun.
7. Ka ladügübei Hesusu lun furangu lan larihíniwa kaba lan meha katei súdinitima houn lani apostolugu?
7 Kaba meha gárada hagunfulira apostolugu? Eibu meha layarafadun Pentekosutesi lidan irumu 33, aba furangu lan larihín luagu súdinibei lan buga habara. Gama lumoun, kábati buga katei súdinitima houn? Lárigiñe láguyugun Hesusu, subudigüda lumuti ka lan óunabagüleibei lau burí dimurei le lariñagubei lun Féduru (aliiha huméi Huan 21:1, 2, 15-17). Hagibugiñe amu apostolugu, aba lariñagun lun: “Góunigibaña nánigu”. Ítara liña larufuduni añaheinbaña lan buga lani apostolugu haganagua fiú ha lúnbaña layusuruniña lun líchugun éigini tídangiñeti Lererun Bungiu houn saragu. Ma lueirin tañuludagun wanigi lau warihini larufuduni Hesusu ínsiñeni le lasandirubei hawagu ‘lánigu’! *
LÚMAGIÑE PENTEKOSUTESI LUN LUBARUAGUÓUN HÓUGÜDAWATIÑA SARAGU
8. Ida liña harufuduni ha afiñerubaña lidan fedu Pentekosutesi luagu furangu lan hasubudiruni kátaña lan layusurubaña Hesusu lun léigagüdüniña?
8 Lúmagiñe Pentekosutesi irumu 33, layusuruñanu Kristu le águyuguaalibei lani apostolugu lun léigagüdüniña kristiánugu ha anúadira láañabaña, ha añahaguabaña ubouagu (aliiha huméi Adügaü 2:41, 42). Furanguti meha dandu houn huríu kei houn mama huríu ha achülürübaña lun kristiánugu hamá ha anuadirúaaña apostolugu lan layusurubaña Hesusu lun léigagüdüniña. Sin hasaminaruni bián wéiyaasu, aba “hederegeragun houngua lun hafurendeiruni le harufudahabei apostolugu houn”. Wéiriti meha habusenrun iseri afiñetiña ha habihini subudi tídangiñeti Bíbülia ani subudi hamuti meha halíaba lan hadarirei. Lau úaraguni le gumuti, aganba hamutiña meha apostolugu dan le hafuranguagüdünbalin le lariñagubei luma le ladügübei Hesusu ani afuranguagüda hamuti giñe le mini lubéi bérusu burí tídangiñeti Bíbülia le adimurehabei luagu houn (Adü. 2:22-36). *
9. Ida liña harufuduni apostolugu gabaroun hamani hani buligasion lánina héigagüdüniña lánigu Hesusu mudún?
9 Gúnfulitiña apostolugu lau hani buligasion lidan héigagüdüniña lánigu Hesusu mudún. Arihúati lira, lidan ligaburi haranseruni turóbuli le meha gayarabei ladügün lun ua lan úarani haganagua lílana iseri damuriguaü kristiánu. Luáguti meha lafanreinhóun éigini le mégeiwabei lun úgubu turóbuli le. Rédeitiña meha würiña hilaaña úmari ha adimurehabaña güriegu mibihinga éigini dan le lafanreinhóuniwa sagü weyu, ánhañati würiña hilaaña úmari ha adimurehabaña ebüréu ibiha hamuti meha heigin. Ida lubati buga haransehani apostolugu turóbuli hénrenguti le? Aba hanúadirun “duusu apostolugu” sedü íbirigu ha gafiñerúati hawagu lun harihin lau “wadagimanu” lánina lafanreinhóun éigini. Ariha hamuti apostolugu —ha meha másuhanbaña lun hídehan lidan lafanreinhóun éigini dan le léigagüdünbei Hesusu saragu gürigia— súdinitima lan letenirún lun híchugun ariñahani lúmagiñeti Bungiu houn hábirigu. Ligíati hayusurunbalin hadaani lun “[h]apurichihani lererun Bungiu” (Adü. 6:1-6).
10. Ida liña meha layusuruniña Kristu apostolugu hama wéiyaaña lidan afiñeni ha Herusalénbaña?
10 Lidoun burí irumu 49, aba hóundarun amu wéiyaaña lidan afiñeni hamoun apostolugu ha meha wínwangiñabaña lidoun dan ligía (aliiha huméi Adügaü 15:1, 2). Dandu “apostolugu hama tábutigu ligilisi [wéiyaaña lidan afiñeni]”, aba hadügün aban sétanu lun meha larihin lau damuriguaü kristiánu. Kei lichügüdina damuriguaü yusu lumuti Kristu sétanu le lun lafuranguagüdün arufudahani, ariha ligíame lau wadagimanu lánina apurichihani luma lau larufudahóuniwa uganu buiti luáguti Larúeihan Bungiu (Adü. 15:6-29; 21:17-19; Kol. 1:18).
11, 12. a) Ka katei arufudubei biní lániña Heowá gürigia ha layusurubaña Liráü lun híchuguni ariñahani le hemegeirubei lánigu disipulu lidan furumiñeti sígulu houn? b) Ka meha uagu ménrengun lubéi lasubudirúniwa kátaña lan layusurubaña Hesusu lun léigagüdüniña lani disipulugu?
11 Biní lumutiña san Heowá gürigia ha layusurubaña Liráü lun híchuguni ariñahani le hemegeirubei lánigu disipulu ha awinwandubaña lidan furumiñeti sígulu houn? Chóuruti biní lániña! Ariñagatu líburu Adügaü: “Sunti fulasu le ñéingiñe lumuti [l]ásügüra [apostolu Pábulu hama lupanaagu], hasubudiragüdüni katei le hariñagubei apostolugu hama tábutigu ligilisi ha Herusalénbaña houn afiñetiña, aba héredun hawagu lun hagunfulirun luma hagumadin. Aba lubeiti hederebugudún tílana ligilisi lidan hafiñen, aba haganwoundun afiñetiña sagü weyu” (Adü. 16:4, 5). Ariha huméi adüga lan hídehan lílana damuriguaü lau úaraguni lidan le desidírü lubéi liraüraü sétanu le meha arihubei lau damuriguaü Herusaléngiñe lun lawanserun burí damuriguaü. Ma furanguti larufuduni katei le luagu biní lumuti lan meha Heowá aransehani le layusurubei Liráü lun líchugun ariñahani houn lílana burí damuriguaü? Ítara liña, lugundun dánrügüñein labinihan Heowá libihúa awanseruni lidan katei lánina leseriwidúniwa lun (Ari. 10:22; 1 Ko. 3:6, 7).
12 Akutihaadiwa yusu lan meha Hesusu fiú lun léigagüdün saragu hádangiñe ha afalarubalin. Ménrengunti meha lasubudirúniwa kátaña lan layusurubaña. Lau sun luwuyeri, gayarati meha harufuduni apostolugu —ha meha furumiñetiña lílana sétanu le arihubei lau damuriguaü le meha Herusalénbei— anihein lan Bungiu hama. Ariñagati Adügaü 5:12: “Adügatiña apostolugu saragu seini luma milaguru hadan gürigia”. * Ligíati, mébunati meha hálügüdagun kristiánugu houngua: “Kátaña san layusurubaña Kristu lun léigagüdüniña lilügüniña mudún?”. Gama lumoun, sánsiti katei lidan lagumuchun furumiñeti sígulu.
Furanguti meha larihíniwa lidan furumiñeti sígulu kátaña lan meha layusurubaña Hesusu lun léigagüdüniña lílana damuriguaü (Ariha huméi párafu 12)
SARAGU HÍDURU WURIBATI LUMA MURUSUN TÜRIGU
13, 14. a) Ka katei lariñagubei Hesusu lasusereduba lan, ani ídabuga lagunfulira le lariñagubei? b) Kaba meha bián oubaü ñéingiñeba lubéi liabin ábürühani? (Ariha huméi abürüdǘni númeru 5 lidoun lagumuchun arütíkulu.)
13 Ariñagati Hesusu lidan aban profesía, lábürühouba lan buga luagun damuriguaü saragu wéiyaasu. Haritagua huméi eweridiha lan lidan aban hénpulu lánina profesía luagu lábunawaguba lan buga híduru würibati (kristiánugu ha mama inarünitiña) lidan aban ichari iseri lárigiñe lábunawagun türigu (kristiánugu inarünitiña). Ábati lariñagun ligirúba lan buga biángubei lun laweinamudun úara darí lidaani alubahani, danme lachülürün ‘lagumuchun ubóu’ (Mat. 13:24-30, 36-43). Másügürünti saragu dan lubaragiñe lagunfulirun le lariñagubei. *
14 Lidan furumiñeti sígulu, ñéinñanu meha fiú gürigia agarabaagutiña lun Bungiu lidan damuriguaü kristiánu, gama lumoun ‘eredeha hamutiña’ meha lani Hesusu apostolugu gürigia hagía luéi harufudahan iyeeni houn lílana damuriguaü (2 Tesa. 2:3, 6, 7). Gama lumoun, lárigiñebei lounwen lagumuhóun apostolu, ábatima laganwoundun arufudahani mama inarüniti darí lun laburuchagun luagu saragu sígulu. Ani lidan meha dan ligía aba lagibedagun híduru wuribati, gama lumoun murusunrügüñein meha türigu. Úati meha kaba lan íchiga ariñahani tídangiñeti Lererun Bungiu estodi. Lachülürüba buga aban dan lun lasansiragun katei le. Ídabati buga?
KABA BUGA ÉIGAGÜDAÑA MUDÚN LIDAN LIDAANI ALUBAHANI?
15, 16. Ka buiti resultóu habihibei Aturiahatiña Bíbülia ladüga aturiaha hamanu Bíbülia hulili, ani ka álügüdahani adügǘbei?
15 Eibu ayarafadeina lan lidaani lásurun laweinamudun türigu luma híduru wuribati, ítara liña aganwoundeina lan habusenruntima gürigia hasubudiruni inarüni le tídanbei Bíbülia. Lidoun burí irumu 1870, aba lagumeserun aban liraüraü sétanu gürigia ha áluahabalin inarüni aturiahoun Bíbülia díseñu luéi híduru wuribati, o hawéi kristiánugu mama inarünitiña ha tídanbaña ligilisi burí le ídanbei hariñaga lílana hawougua kristiánugu hamá. Lau ǘnabuguni ani lau madouragun lan hasaminan, aba hederegeragun Aturiahatiña Bíbülia hagía houngua —iri le híchugubei hawougua— lun hakutihanu Lererun Bungiu lau ubebeni (Mat. 11:25).
16 Ruti aturiahani huliliti le hadügübei saragu resultóu buiti. Aba harufuduni gürigia haruma tanigi hagía ka lan burí arufudahani mámabei inarüniti ani subudigüda hamuti inarüni luagu Bungiu lau hadügün ani afanreinha hagía agumeiraguagüdüni tídangiñetu Bíbülia houn gürigia lidan saragu fulasu. Chülüti wadagimanu le hadügübei tidoun hanigi luma lidoun hasaminan saragu gürigia ha meha wéiribei habusenrun hafurendeiruni inarüni. Ligía ladügǘnbei álügüdahani súdiniti le: Aturiahatiña san Bíbülia ha meha awinwandubaña lubaragiñe irumu 1914 layusurubaña Hesusu lun léigagüdüniña lilügüniña mudún? Uá, mama meha hagía. Lídangiña meha lidaani laweinamudun nadü, ani lagumeseruña meha aransehani le meha lunbei layusuruni Hesusu lun líchugun éigini tídangiñeti Bíbülia houn. Machülügili meha dan lun hafanreinragún kristiánugu mama inarünitiña ha ítarabaña kei híduru wuribati hawéi kristiánugu inarünitiña ha ítarabaña kei türigu.
17. Ka burí sügǘ súdiniti agumeserubei lidan irumu 1914?
17 Kei wafurendeiruni lidan arütíkulu le lubaragiñebei le, gumeseti lidaani alubahani lidan irumu 1914. Lidan irumu le lagumesera saragu sügǘ súdiniti. Aba lañuuragüdüniwa Hesusu arúeiha ani aba lagumeserun lagumuhóun dan (Aruf. 11:15). Lúmagiñe irumu 1914 darí lagumeseha irumu 1919, ñǘbuinti Hesusu luma Lúguchi arihei ida liña lan léibugun katei lidan áhuduraguni inarüniti ani arumadahaléi (Mal. 3:1-4). * Lárigiñe, lúmagiñe irumu 1919, mosu meha lagumeserúniwa labudahóun türigu. Anati dan ligía, chülüdüga meha dan lun líriduniña Kristu gürigia ha lúnbaña layusuruniña lun líchugun éigini le tídangiñeti Lererun Bungiu.
18. Según lariñaguni Hesusu lidan aban profesía kaba buga lírida, ani kaba meha álügüdahani súdiniti adügǘwa lidan lagumeserun lagumuhóun dan?
18 Lidan lani Hesusu profesía luáguti lagumuhóun dan, ariñagati líriduba lan buga fiú gürigia lun ‘híchugun éigini lidan dan’ houn lánigu (Mat. 24:45-47). Kátañabaña buga gürigia ha? Ítara kei meha ladügüni lidan furumiñeti sígulu, layusuruyaba buga fiú lun léigagüdün saragu. Ligíati, ladügǘba lubéi buga álügüdahani súdiniti libügürü kátaña lan fiú hagía, dan le lagumeserunbei lagumuhóun dan. Warihibei lóunabagüle álügüdahani le lúmaya amu luáguti lani Hesusu profesía lidan arütíkulu le asigirubei.
^ par. 3 Párafu 3): Lidan amu ókaasion, adügayati giñe Hesusu aban milaguru lun léigagüdün gádürü-milu wügüriña bóugudin hawéi würiña hama irahüñü, ani ruya lumutu giñe fein “houn lani disipulugu [...] [lun] hafanreinhanu houn gürigia” (Mat. 15:32-38).
^ par. 7 Párafu 7: Dan meha le wínwangili Féduru, sun meha “mudún” ha lúnbaña héigagüdüniwa hemenigitiña meha hawinwandun sielu.
^ par. 8 Párafu 8: Arufuda lumuti “hederegeragun [iseri afiñetiña] houngua lun hafurendeiruni le harufudahabei apostolugu houn”, luagu arufudaha hamá meha apostolugu houn estodi. Dariwati fiú lídangiñe harufudahan tidan líburu to abürüdǘboun lau ladundehan Bungiu to tídangiñetu Abürüdǘni Güriegu.
^ par. 12 Párafu 12: Íbini añahein lan meha amu disipulugu bóugudin hawéi apostolugu ha eresibirubaña ubafu burí lúmagiñe sífiri lun hadügün milaguru, genegeti libe-agei lan meha dan hagibugiñe lan apostolugu ladügǘwa somu milaguru o apostolugu guánarügü lan adügübalin (Adü. 8:14-18; 10:44, 45).
^ par. 13 Párafu 13: Dimurei le lariñagubei apostolu Pábulu lidan Adügaü 20:29, 30, arufudati lídangiñe lan buga bián oubaü lábürühoua luagun damuriguaü. Lidan furumiñeti lúgaaru, hebeluruba buga kristiánugu mama inarünitiña (“híduru wuribati”) haganaguóun kristiánugu inarünitiña. Ani lidan libiaman lúgaaru, ‘ñéinbaña buga hádangiñe’ kristiánugu inarünitiña agarabaagutiña lun Bungiu ani hayanuhaba meha “iyeeni”.
