Ariñagatu Silwia, aban würi to nadagimeinboun óunigira gürigia wéiyaaña: “Dan meha le naturiahaña lan tidan luban liñun furendei gíbetiña meha nánigu paaná ariñagutiña gani hamá relihión, gama lumoun akopiahatiña meha lidan egüsámini yusu hagía düroga. Mabafuti meha relihión ni murusun lidan habagari”.

Ariñagati aban wügüri gíriti Lionel: “Anihein dan midin hamá nupanaagu awadigimarida ladüga nege sándiñanu lan ani masanditiña. Ítara liña relihión houn kei aban lubuidun haláü le eseriwidubei lúnrügü larufudún houn amu”.

Murusunrügüñein lubafu relihión luagu habagari gürigia. Gíbetiña afamurutiña kamá ‘gúnfulitiña luma hani relihión, gama lumoun, [arufuda hamuti] mabafu lan relihión lau burí katei le hadügübei’ (2 Timotéu 3:5, Dios habla hoy, 1994). Míchuguntiña alidihatiña relihión aban buiti hénpulu houn, míchugun haméi adundehani tídangiñeti Bíbülia le hemegeirubei houn lun haruma lan hanügüni habagari. Ligía hasaminarunbei hibe-agei gürigia meberesen lan lun Bungiu ida liña lan hanügüni habagari.

Arufudahatu Bíbülia sandí lan Bungiu ani berese lan lau ligaburi wóuserun. Lau meha hamabuchahan ísüraelina adügatiña meha lun ‘lírudagun’ (Sálumu 78:40, 41). Gama lumoun, súnwandan ‘weiri lan ugundani sielu’ dan le lasakürihan aban gürigia tídangiñe sun lanigi ani aba lasansirun (Lúkasi 15:7). Dan le warihini lubuidun burí ligaburi Wáguchi le siélubei, ábatima laganwoundun wínsiñehabu lun ani ádaha lumutiwa lira asandira ínsiñeni luagu le hínsiñebei lun luma iyereehabúni luagu le iyereegubei lun (Amosu 5:15).

Ariñagatu aban periodiku luagu adügatiña lan gefentiña luagu Heowá “lun buidu lan hanaagun lílana familia hámagua ani íderagua hamutiña gürigia lun lílana hamá ageiraü ha benefatiña ani úaraguatiña” (The Deseret News, de Salt Lake City, Utah, Meriga). Ariñagatu giñe: “Íñuburiti lúrudu le hafalarubei lílana relihión le lidan ligaburi hanügüni habagari. Afiñetiña adüga lan iyuri, átaguni, düroga, lahurerúniwa luagu seinsu, magíaguni luma lagamaridun wügüri wügüri líledi o würi würi tíledi lun lañawarihan hamadagua luma Bungiu”.

Ida liña líderaguniña hasubudiruni gefentiña luagu Heowá ligaburi Bungiu? “Kamaniti íweru lidan luáguti agaranihani —tiña Silwia—. Ménrengunbei hamuga náyeihani igaburi le. Gama lumoun, íderagua lumutina nasubudiruni ida liña lan larihini Heowá * échuni le adiseda luéi. Gayarati nariñagun gúndaatina lan ani darangilu lan nisaminan”. Chouru tumuti Silwia íderagua laaru lan tafiñen lun buídutima lan tanügüni tibagari.