ARIÑAGATU Bíbülia: “Wasaanigu ha wágurahabaña, aban abiniruni rísiti hagía lun Aburemei” (Sal. 127:3). Ligía hagundaarunbei agübürigu kristiánugu luagu lágurahoun aban iseri irahü!

Gama lumoun, úara luma ugundani, ñǘbüinti giñe buligasion. Lun gayara lan laweiridun irahü héreñu luma lau lubuidun átuadi, mégeiti leigin buidu ani lidan lóurate. Ítarameme, lun here lan lafiñen, mégeibei subudi le lúmagiñeti Bungiu luma hadundehan lagübürigu. Mosu háfaagun agübürigu lun hebelaagüdüni adundehani le tídanbei Bíbülia tidoun hanigi hasaanigu (Ari. 1:8). Gama lumoun, ídaba san hagumesera arufudaha houn, ani ida luba gayara lan hadügüni?

Akutiha waméi le asuseredubei lun Manóa, aban wügüri lídangiñeti lani Dan türibu ani Sorá meha lawinwanda, aban uburugu lidan binadu Ísüraeli. Aban weyu, aba liabin aban lani Heowá ánheli awisaha tun lani weiriou luagu gasaaniboun lan íbini maraüheitu lan meha (Ali. 13:2, 3). Chóuruti aba lan hagundaarun saragu luagu agübürigubaña lan, gama lumoun, nidiheritiña meha giñe. Ligía lamuriahanbei Manóa luma Bungiu: “Amuriahatina buma Nabureme lunya bóunahani wügüri ligía woun, ariñaga láamugei woun kaba lan wadüga lau irahü le lunbei lágurahoun” (Ali. 13:8). Dandu ligía kei lani weiriou agüriaha hamuti hasaani buidu. Chóuruti adüga hamani sun hayaraati lun harufudahani lilurudun Heowá lun Sansón le hasaani, ani biniwati áfaaguni le hadügübei, lugundun ariñagatu Bíbülia: “Luagu aban weyu [...] aba lagumeserun lani Wabureme [s]ífiri arufudagua lungua lidan”. Seremei lani Bungiu sífiri, Sansón, aban hádangiñe alidihatiña Ísüraeli, adügati saragu katei le wéiriguti (Ali. 13:25; 14:5, 6; 15:14, 15).

Ka san dan buídubei lun hagumeserun agübürigu arufudaha houn hasaanigu? Ariñagatu Bíbülia ‘lúmagiñe lan liñüraü’ Timotéu, lúmagiñe figigili, arufudaha tumuti Eunise to lúguchu tuma Loida to lagütu “Lererun Bungiu” lun (2 Tim. 1:5; 3:15). Ítara liña, gumeseti Timotéu afurendeira luagu Bungiu lúmagiñe liñüraü.

Buiti lun hamuriahani agübürigu kristiánugu ladundehan Heowá ani adüga hagíame buiti aransehani lau dan lun hagumeserun arufudaha houn hasaanigu lúmagiñe nasirua hamá. Ariñagati Ariñawagúni 21:5: “Aransehani le saminawati buidu, buiti lasalirun”. Lúmagiñe lubaragiñe nasirua lan irahü, lunti hagumeserun agübürigu aransera. Gayarati hadügün aban lísüta lau burí katei le lunbei lemegeiruni hasaani ani samina hagíame luagun ida luba lan harufudahan lun. Lunti hasaminarun hagumeserun arufudaha luagu Heowá lun lúmagiñe figigili.

Ariñagati aban ariñahani tídangiñeti Unesco aba lan “lagumeserun sélula le lídanbei sesu le hani irahüñü agibedagua kéiburi lóugiñe 20 wéiyaasu lidan furumiñeti burí hati lidan habagari,” le adügübei lun “labuidurun sesu” ani adügati lun gayara lan hafurendeirun (El desarrollo del niño en la primera infancia: echar los cimientos del aprendizaje). Súdiniti lun hayusuruni agübürigu murusun dan ligía lun hagumeserun arufudahei lilurudun Bungiu houn hasaanigu!

Ariñagatu aban prekursora to adügütu ǘrüwa-wein diisi oura luagu hati tuagu tisaani: “Aban hati lúmagiñe nasirua tan ligía nanügünu númagua apurichiha. Furanguti míchutu lan fe luagu le meha asuseredubei, gama lumoun afiñetina buidu lan lani katei ligía resultóu. Láurügü bián irumu tau, aba tagumesrun ederegeha tratadu houn gürigia tábuguarügü”.

Buiti resultóu le lanügübei larufudahóun houn isaanigu lúmagiñe hañüraü. Gama lumoun, ariñagatiña saragu agübürigu hénrenguraüti lan larufudahóun houn luagu Bungiu.

Mederaguagüdüntiña irahüñü ani ménrengunti hígiruni hetenirun lun somu katei. Adügati le lun hénrengu lan hawadigimari agübürigu. Dan le letenirun irahü lun aban katei, ábaya letenirun lun amu lidan murusun oura. Ani moun lumuti taweiridun wanigi, lugundun lasubudiruñein ubóu le geyegubei lau. Ka gayarabei hadügüni lun híderaguni hisaani lun letenirun lun le harufudahabei lun?

Ariha huméi le lariñagubei Moisesi. Lidan 2 Lúrudu 6:6, 7 aliihatiwa: “Areidabei sun katei le ariñaga náalibei bun lidan bisaminan, arufudahabei houn birahüñü súnwandan; adimurehabá houn luagu, dandu búbiñe kei lidan béibuguniwagu, danme le barounrun luma danme le básaarun”. Arufudahati bérusu le lunti lan háguyuguagüdüni agüburigu ligiaméme arufudahani houn hasaanigu. Ítara haña irahüñü kei aban tídibu wewe le emegeirubei lun láturawagun. Ani anhein hu lubéi águyuguagüdüni lun haritagun gürigia wéinamuhaña katei le súdiniti, huutimati houn irahüñü!

Lun harufudahani inarüni le tídanbei Bíbülia houn hisaanigu, mosu hásügürün dan hama. Lidan ubóu le ídanbei wawinwanda lau saragu beresegu, hénrenguti katei le. Gama lumoun, ariñagati apostolu Pábulu woun lun ‘wayusuruni sun wadaani’ lidan weseriwidun keisi kristiánugu (Efe. 5:15, 16). Ida luba wibihini? Hénrenguti meha lun aban wéiyaali lidan afiñeni lagunfulirun lau sun lani buligasion keisi kristiánu luma lau lagüriahanu lisaani. Beresegutu meha giñe lani weiriou lugundun teseriwiduña  meha kei prekursora to adügüboun 70 oura luagu hati. Halíagiñe hasagara dan lun harufudahan tun hasaani? Aba lariñagun: “Sagü weyu lubaragiñe nidin nadagimei, aba nañuurun tuma nani weiriou lun waliihan somu katei tun tídangiñe Niliburun lánina abahüdaguni tídangiñeti Bíbülia o tídangiñe garüdia Examinando las Escrituras diariamente. Guñoun, lubaragiñe tarumugun, ábaya waliihan murusun tun. Ani dan le wáfuridun apurichiha, barǘ wamutu wámagua. Mabusenruntiwa wewesiruni furumiñeti burí irumu le lidan tibagari”.

Chóuruti súngubei lan wagía busentiwa lun gayara lan lafiñerúniwa hawagu wasaanigu. Gama lumoun, létima wabusenrubei lun línsiñedun Heowá houn tídangiñe sun hanigi (Mar. 12:28-30).

Lidan Sálumu 127:4 ariñagati: “Wasaanigu ha wágurahabaña dan le nibureingidiwa, ítara haña kei gimara lúhaburugu aban wuriburuguna”. Inarüni ítara haña lan isaanigu kei gimara lúhaburugu aban wuriburuguna. Lunti laseiniruni buidu halíaba lan tadagara lubaragiñe lachüürünu, lugundun chülaaru ligía siñahali lararamunu. Meredetiña isaanigu hama hagübürigu luagu saragu dan. Ligía lunti lubéi hayusuruni dan buidu lun hebelaagüdüni lilurudun Bungiu lidoun hasaminan luma tidoun hanigi.

Dan le layanuhanbei apostolu Huan hawagu kristiánugu ha meha larihibaña kei lisaanigu, abürühati: “Úati amu katei agundaaraguagüdütina keisi dan le naganbun luagu habagariduña lan nirahüñü úaragua luma inarüni” (3 Huan 4). Gúndaatiña giñe agübürigu kristiánugu dan le harihiniña hasaanigu hasigiruña lan “úaragua luma inarüni”.