1, 2. Ka igaburi lunbei warufuduni lun lagundaarun Bungiu wau?

HIBE-AGEI gürigia beresetiwa lau le hasaminarubei amu wawagu. Gama lumoun, keisi kristiánugu, le lunbei súdinitima lan woun ida liña lan larihiniwa Heowá. Lau sun luwuyeri, ligía Laburemebei sun katei ani ligía ‘lubuñabei ibagari’ (Sal. 36:9).

² Lun gayara lan lagundaarun Heowá wau lunti wasigiruni ladundehan apostolu Féduru, le ariñagubei: “Lunti lubeiti haruma lan habagaridun, deregeguañu hungua lun Bungiu sunsuinagubei” (aliiha huméi 2 Féduru 3:11). Lun gunda lan Bungiu wau, lunti haruma lan wóuserun, lidan amu dimurei, lunti haruma lan wabagaridun haruma ligíame wasaminan luma wamadagua luma Bungiu. Ani lunti giñe ‘deregeguañu wamá woungua lun Bungiu sunsuinagubei’ lun warufuduni lanarime ínsiñeni luma inebesei le wasandirubei luagu. Ligíati, lun lagundaarun Bungiu wau úati buídurügü lan le wadügübei, ariha lumuti giñe ka lan hawuyeri gürigia wagía. Kei le Heowá lubéi ‘aríaahabalin saminaü’ o anigi, subudi lumuti anhein sandu lubéi wagaburi ani anhein deregeguaadiwa lubéi woungua lun sunsuinagubei (1 Kro. 29:17).

3. Ka burí álügüdahani súdinibei lun wádügüni wóuniwagua?

³ Mabusenrunti Satanási lun wáfaagun lun wagundaaragüdüni Heowá. Adüga lumuti sun liyaraati lun lagünrinchaguni wamadagua luma Bungiu. Ani lun ladügüni, yúsuti iyeeni. Busenti lun wéiguadun lidoun liyeeni lun wadisedun luéi Bungiu (Huan 8:44; 2 Ko. 11:13-15). Ligía súdini lubéi lun wálügüdagun woungua: “Ida liña san labusenrun Satanási leyeedunina? Ida luba nóunigiruni numadagua luma Heowá?”.

4. Haliñoun san lagayuaha Satanási lun lagünrinchaguni wamadagua luma Bungiu, ani ka uagu?

⁴ Abürühati disípulu Santiagu: “Dan le lachawahani luriban layumahan gürigia, ligía lábürühan lidoun ladügǘn le wuribabei. Lídangiñe burí luriban ayumahani le, liabin figóu; danti le laweiridun figóu barüti óunweni” (Sant. 1:14, 15). Lidan láfaagun Satanási lun lagünrinchaguni wamadagua luma Bungiu, aba lagayuahan tidoun wanigi, ñéingiñe lubéi liabin sun ayumahani.

5, 6. a) Ida liña lagayuahan Mafia tuagu wanigi? b) Ka burí sádara layusuruboun Mafia lun ládarun luriban ayumahani tidoun wanigi, ani átirihali dan lau ayusuroun?

⁵ Ida liña lagayuahan Satanási tidoun wanigi? Ariñagatu Bíbülia “luagu lábugiñeñanu lan lubafu Mafia sun ha lánigubaña ubóu” (1 Huan 5:19). Ligíati, yusu lumuti Satanási “katei le líchugubei ubóu” lun lárumateme (aliiha huméi 1 Huan 2:15, 16). Barühali Mafia saragu milu irumu aransehei sun katei wuribati le geyegubei wau. Kei le ligibuagu lubéi ubóu le wawinwanda, lunti góunigi wamá luéi lisumadin Mafia tau lisadaran (Huan 17:15).

⁶ Yúsuti Satanási sádara lun ladügün lun wayumahan katei wuribati tidan wanigi. Íridati apostolu Huan ǘrüwa tídangiñe: 1) “luriban hayumahan gürigia”, 2) “háfaagun lun habihini katei le harihibei” luma 3) “pantaü luagu irisini”. Yusu lumuti Mafia ǘrüwagubei lun lóuchaguni Hesusu lidan fulasu mageirawati. Kei le barühali lubéi saragu irumu ayusuroun sádara burí to, subudi laali kaba lan tídangiñe layusura según lidebilin kada gürigia. Lubaragiñe wakutihani kaba lan wadüga lun wóunigiragun woungua, ariha waméi ida liña lan layusurunu tuma Ewa luma luma Liráü Bungiu, luma ámuñegueinarügü ligaburi hóunabun kada aban.

7. Ida liña meha layusuruni Satanási “luriban hayumahan gürigia” lun lóuchagunu Ewa?

⁷ Sun gürigia mégeitiwa aban katei súdiniti: éigini. Ligía ladügünbalin Bungiu Múa lun lalubahóun saragu éigini. Gama lumoun, gayarati layusuruni Satanási ayumahani naturaliti le lun ladisedagüdüniwa lun madügün wamani lugundan Bungiu. Ariha waméi ida liña lan ladügüni tun Ewa (aliiha huméi Agumesehani 3:1-6). Aba lariñagun Mafia tun Ewa gayarati lan teigin tídangiñe tin “wewe to lánina lasubudirúniwa buiti lumoun wuribati” ani móunwenboun lan (Agu. 2:9). Ariñagati giñe tun lau ichouruni danme lan teigin tídangiñe, ítara tuba lan kei Bungiu. Lau dimurei burí le, ariñagati Satanási memegeirun tan Ewa gaganbadi tan lun Heowá lun tasigirun awinwanda. Ma lanarime iyeeni! Ida liña tóunabun Ewa? Gayarati meha tadügün bián katei: tamahadun lun saminaü ligía, o tasigirun asaminara luagun darí lun tígirun lun lagürün ayumahani ligía tidan tanigi. Híruti, lugundun íbini anuhein lan meha  saragu amu furuda ñein lun teigin, aba tasigirun asaminara luagun le lariñagubei Mafia tun tuagu tídibu wewe to lamidanguaboun fuluri-agei. Ka resultóubei? “Aba lubeiti tátügürün aban tídangiñe, aba téiginu”. Adügaali meha Satanási lun tayumahani Ewa katei le uéigiñebei leweridiroun Bungiu.

8. Ida liña lálugun Satanási lóuchaguni Hesusu lau “luriban hayumahan gürigia”, ani ka uagu méiguadun lubéi Hesusu tidoun lisadaran?

⁸ Tuguyaméme sádara layusuruboun Satanási lun lóuchaguni Hesusu lidan fulasu mageirawati. Kei le barühali lubéi Hesusu bián-wein weyu luma bián-wein áriebu méiginga, aba louchun Mafia lun lóuchaguni ladüga lamaali lan. Aba lariñagun lun: “Anhein Liráü bubéi Bungiu, saliguagüdabéi dübü le feinme” (Luk. 4:1-3). Biámañein meha katei gayarati ladügüni Hesusu: ladügün aban milaguru lun lagalumaruni lilama o madügün lani. Subudi lumuti meha moun lumuti lan layusuruni lubafu lun lubuidun guánarügü. Íbini lamaali lan, súdinitimati lumadagua luma Heowá. Ligía lóunabunbei: “Tariñahare Lererun Bungiu: ‘Mámarügüba tau fein habagarida gürigia; habagariduba giñe lau hagunfuliruni dimurei le lariñagubei Bungiu’” (Luk. 4:4).

9. Ka mini lubéi dimurei “háfaagun lun habihini katei le harihibei”, ani ka ladügübei Satanási lun tayumahan Ewa téiginu furuda?

⁹ Ayanuhati giñe apostolu Huan tuagu amu sádara: “háfaagun lun habihini katei le harihibei”. Arufudati dimurei le gayara lan hagumeserun gürigia ayumaha aban katei láurügü harihini. Kéiburi Ewa, ítara liña léiguagüdünu Satanási dan le lariñagunbei tun: “Léfegechuba [...] hagu”. Eibu meha taríagunu furuda tuguya, ábatima busén tan téiginu. Ítara liña, “aba tawamadun tun lun téiginu”.

10. Ida liña meha layusuruni Satanási “luriban hayumahan gürigia” lun lóuchaguni Hesusu, ani ida liña lóunabun Hesusu?

¹⁰ Ida liña meha layusurunu Satanási sádara to lun lóuchaguni Hesusu? “Aba larufuduni fulasu [“sun arúeihani”, TNM] le ubouagubei lun lidan aban. Aba lariñagun [Mafia] lun: ‘Níchugubei sun ubafu luma sun uéiriguni le bun’” (Luk. 4:5, 6.) Furanguti marihin lani Hesusu sun arúeihani luma uéiriguni le ubouagubei lau lagu. Adügarügüti Satanási lun larihini lidan aban arufudúni, saminati yebe Satanási busenbei lan Hesusu larihini sun uéiriguni le lúmabei. Aba lariñagun lun: “Ánhabu lubeiti áhuduragua nigibugiñe bánibei súngubei” (Luk. 4:7). Gama lumoun, mabusenrunti meha Hesusu lóuserun kei labusenrun Satanási. Ligía lóunabunbei: “Tariñahare Lererun Bungiu: ‘Lúnrügüba Bungiu le Babureme báhuduragua; ani lúnrügüba giñe beseriwida’” (Luk. 4:8).

11. Ida liña leyeedunu Satanási Ewa?

 ¹¹ Laganagua katei le ubouagubei, ayanuhati Huan luagu “pantaü luagu irisini”. Dan le meha Adánrügügili tuma Ewa awinwanda ubouagu, siñati meha hapantahan houn amu luagu sun katei le hámabei. Gama lumoun, arufudamémetiña barüguaü unguaü. Ida? Dan le lóuchagunbalun Satanási Ewa, adügati lun tasaminarun luagu leredehañoun lan Heowá luéi saragu katei buiti. Ariñagati weyu lan teigin tídangiñe tin “wewe to lánina lasubudirúniwa le buídubei lumoun le wuribabei” ‘léfegechuba lan tagu lun tasubudiruni le buídubei luma le wuribabei, ábameti ítara tan kei Bungiu’ (Agu. 2:17; 3:5). Lau dimurei burí le, adügati lun tasaminarun Ewa gayara lan tawinwandun sin Heowá. Genegeti barüguaü lan unguaü adügübei lun tafiñeruni iyeeni ligía. Aba tasaminarun móunwenboun lan, aba teigin tídangiñe furuda. Ma lanarime bulíeiguaü!

12. Ka amu sádara layusurun Satanási lun lóuchaguni Hesusu, ani ida liña lóunabun Hesusu?

¹² Mitaranti meha Hesusu kei Ewa, ruti aban buiti hénpulu woun lánina ǘnabuguni. Álugati meha Satanási lóuchaguni ábanya wéiyaasu lun ladügün somu katei lun taweiridun hanigi gürigia luma lun lóuchaguni Heowá, gama lumoun, subudi lumuti meha Hesusu larufuduña lanme barüguaü unguaü ítara. Ligía lóunabunbei furangu: “Tariñahare Lererun Bungiu: ‘Móuchaguabei Aburemei le Bubungiute’” (aliiha huméi Lúkasi 4:9-12).

13, 14. Ida liña layusurunu Satanási lisadaran uguñe weyu?

¹³ Uguñe weyu, yúsuti Satanási sádara tibeméme to layusuruboun lun leyeedunu Ewa luma lun lóuchaguni Hesusu. Yusu lumuti “luriban hayumahan gürigia” lun lawanseragüdüni magíaguni, aliluani luma átaguni. Yúsuti giñe iyawaü burí luma bidéu lánina agamariduni, lídantima Internet, lun laganwoundagüdüni hayumahan gürigia lídangiñe ‘katei le harihibei’ lun gayara lan haríaguni sun ha úabei agagudúañu hamá. Áluahati giñe ladügün lun hayumahan gürigia uéiriguni, ubafu luma irisini lun íñugu lan hasandiragun gürigia houngua ani lun busén hamá ‘hapantahan’ lau le hámabei.

¹⁴ Gayarati konpararua lan “burí katei le líchugubei ubóu” luma emei le hayusurubei óuchahatiña. Semeeti laríawagun, gama lumoun, anihein aban günwuri lanagangiñe. Yusu lumuti Satanási katei burí le harihibei gürigia kamá megei hamuti lun ladügün  lun hayumahani katei burí le uéibei leweridiha Bungiu. Lau sumadi ladügei óuchawaguni ligía ani aranse lumuti lun ladügün lun lebelurun luriban ayumahani tidoun wanigi. Adügati Satanási lun wafiñerun luagu súdinitima lan wadügüni le wayumahabei sügǘ lau gaganbadi wamá lun Heowá. Wagüürübei san emei ligía?

15. Ida liña líderaguniwa lani Hesusu hénpulu lun wawanduni óuchawaguni?

¹⁵ Héiguatu meha Ewa tidoun lisadaran Mafia, ánheinti Hesusu kíputi úaraguni. Dan le layanuhan tuagu Lererun Bungiu, ábaha lariñagun: “Tariñahare Lererun Bungiu”. Anhoun waturiaha Bíbülia buidu ani subudi wamóun buidu, gabafubadiwa giñe lun waritagun bérusu burí le lunbei líderaguniwa danme ñein lan óuchawaguni (Sal.1:1, 2). Ítarameme, dan le wasaminarun luagun burí hénpulu lánina úaraguni le harufudubei lubúeingu Bungiu lidan tidaani Bíbülia busenbadiwa wáyeihaniña (Rom. 15:4). Chóuruti líderagubadiwa lan inebesei luagu Heowá, línsiñedun le hínsiñebei lun woun ani iyereegu ligíame le iyereegubei lun woun (Sal. 97:10).

16, 17. Ka lánibei ‘wasaminan’ efekütu lidan ligaburi wóuserun?

¹⁶ Ínchaha lumutiwa apostolu Pábulu lun wayusuruni ‘wasaminan’ lun wasaminarun kei Bungiu, mama kei lílana ubóu (Rom 12:1, 2). Lun láguyuguagüdüni megei wamá wóunigiruni wasaminan, abürühati Pábulu: “Günringua wamuti sun aritaguni le múaranbei luma linarün Bungiu, luma sun katei le abusenrubei lerederuni lasubudirúniwa Bungiu. Sun giñe hasaminan gürigia ubouagu ru wamuti lábugiñoun lubafu Kristu lun lúaraduba lan lau le lubeibei” (2 Ko. 10:5). Le wasaminarubei ligía aban lídangiñe katei le asubudiragüdübalin ka lan hawuyeri gürigia wagía; ligía lunti lubéi wayusuruni wasaminan lidan katei buiti (Fili. 4:8).

¹⁷ Anhein busén wabéi haruma wamá mosu wagidaruni saminaü luma ayumahani le wuribati wawariua. Agurabati Heowá lun línsiñedun woun tau aban ‘anigi harumatu’ (1 Tim. 1:5). Gama lumoun, mabulieida waméi geyeedaguaditu lan anigi; háfuga míchugun wamá fe luagu ida liña lan gani lan “katei le líchugubei ubóu” efekütu wawagu (Her. 7:9). Súdiniti lun gaganbadi wamá lun ladundehan Pábulu le: “Aríagua humá hungua anhein derebuguñu hiña lubéi lidan hafiñen; hóuchagua humá hungua” (2 Ko. 13:5). Danme le waturiahanu Bíbülia, álügüdagua wamá woungua: “Gúndaati san Bungiu lau le nasaminarubei luma le nayumahabei?”.

18, 19. Ka uagu lunti lubéi wáfaagun lun wóuserun kei lagurabuni Heowá wámagiñe?

¹⁸ Ábanya katei le lunbei líderaguniwa lun wadisedun luéi “katei le líchugubei ubóu”, wasaminarun luagun dimurei le lariñagubei Huan: “Ani ubóu, agumucheina liña lau burí sun luriban hayumahan gürigia; ánheinti le adügüti lugundan Bungiu, labagariduba lun sun dan” (1 Huan 2:17). Arihúati ubóu le lani Satanási kamá hamuga inarüniti ani laduraruba lan, gama lumoun, lachülürüba dan lun lábürühan. Mígira wamá lun leyeeduniwa: úati ni kata lídangiñe le gayarabei wibihini ya ubouagu lunti ladurarun.

¹⁹ Amisuraha lumutiwa apostolu Féduru lun hádangiñe wamá hawuyeri gürigia ha hínsiñebaña lun Bungiu, ani ariñagati giñe woun: “Agurabañu huméi lachülürün luéyuri Bungiu, adügañu huméi le huáraati lun hóufudahani. Lídanme weyu ligía, lagünrinchawaguba sielu lau watu gemeti, ábame larürüdagun sun katei le ubouagubei” (2 Fe. 3:12). Yarafaali luéyuri lagünrinchaguni Heowá ubóu wuribati le. Gama lumoun, lubaragiñe lasuseredun, lasigiruba Satanási ayusurei “katei le líchugubei ubóu” lun lóuchaguniwa kei meha ladügün tun Ewa luma lun Hesusu. Mítaran wamá kei Ewa, ladüga aba tasaminarun tuouguounrügü lun tibihini le tayumahabei. Anhein wadüga, ítara liña kamá weresibiruñein Satanási keisi wabungiute. Lubaragiñe lira, áyeiha waméi Hesusu ani mánhara wamá lun ni aban óuchawaguni, buidu lan yebe laríawagun. Áfaagua wamá lun hádangiñe wamá hawuyeri gürigia ha hínsiñebaña lun Heowá.