1, 2. Ka uagu moun lumuti lubéi wíchuguni duru luagun Heowá luagu turóbuli le ubouagubei? Ru humá aban hénpulu.

SAMINA humá barühadün lan saragu irumu maríeiñu ani gúndaatün. Aban weyu, dan le hachülürün lídangiñe huadigimari, aba hadarirunu muna garabagu. Günrinwagua haláü, abouhoua sun asiedu ani bóuagua funedera. Anihán aban óunwenbu chagaguaü tidan tubuidun huban. Maguarahanbadün hamuga ariñaga, “Ka san uagu tadügei nani weiriou le?”. Álügüdaharügübadün hamuga: “Ka san adügübalin le?”. Ka uagu? Lugundun subudi humuti madügünboun lan hani weiriou aban katei ítarati mébunaüga.

² Uguñe weyu, ariha wamuti fulasu le ñein lubéi hawinwanda gürigia günrinwaguañu ladüga hawiyeduni gürigia ubóu, ladüga anarimeni luma magíaguni. Keisi aturiahatiña Bíbülia, subudi wamuti mama lan Heowá adügübei lun ñein lan turóbuli, lugundun ligía adügübalin ubóu lun yebe ábanbei lan paraísu (Agu. 2:8, 15). Aban Bungiu lánina ínsiñeni Heowá (1 Huan 4:8). Íderagua láadiwa waturiahanu Bíbülia lun warihini Satanási lan, “le agumadihabei lidan ubóu le”, lébunabei saragu lídangiñe lénrengunga le gádanbaliwa (Huan 14:30; 2 Ko. 4:4).

3. Ida liña gayara lan lagumeserun wasaminan agadeira?

³ Le linarün aban katei, siñati wíchuguni sun duru luagun Satanási luagu sun gádantiwa. Ka uagu? Lugundun anihein dan wasufuriruñein lan lani wachara resultóu (aliiha huméi 2 Lúrudu 32:4-6). Gama lumoun, íbini ánhawa ánhara lun katei le, gayarati ladügün wafigoun lun wasaminarun wuriba ani lun lanügüniwa lidoun lémeri chagaguaü (Ari. 14:12). Ka uagu wayanuha? Gayarati lubaragiñe lan wíchuguni duru luagun Satanási o wawouguoun luagu waturóbulin, gayarati wagumeserun íchigei duru luagun Heowá, gayarati íbini wagañidun luma (Ari. 19:3).

4, 5. Ida liña gayara lan wagañidun luma Heowá?

⁴ Inarüni san gayara lan wagañidun luma Heowá?  Furanguti meseriwinbei lan hamuga le lun ni kata (Isa. 41:11). Ka gayarabei wibihini lau lira? Aban weyu, aba lariñagun aban poeta: “Chátiyati barüna lun bageindagun luma Bungiu”. Íbini maweiyasunbadiwa lan ayanuha wuriba luagu Bungiu, gayarati wagañidun luma tidan wanigi. Ariñagati Ariñawagúni 19:3: “Féridigüda lumuti libidiounigan lau gürigia üma lun, lárigiñeti líchigei duru luagun Bungiu [tidan lanigi]”. Gayarati láfuachun igaburi ligía sin larihín furangu. Dan le wareidun igarihabu lubá Heowá tidan wanigi, gayarabei wadisedun luéi damuriguaü o mídehan wamá lidan sun aransehani le adügǘbei lidan damuriguaü.

⁵ Ka gayarabei ladügün lun wagañidun luma Heowá? Ida luba méiguadun wamá tidoun sádara to? Súdiniti wóunabuni álügüdahani burí le, lugundun ligíaba íderaguawa lun wakipuruni wamadagua luma Bungiu.

6, 7. Ka uagu hekehara ísüraelina luagu Heowá lidan lidaani Moisesi?

⁶ Ka gayarabei ladügün lun lagumeserun aban lubúein Heowá le úaraguati ekehara luagu Heowá tidan lanigi? Ariha wamá seingü katei ani akutiha wagíame hénpulu burí tídangiñeti Bíbülia le arufudubalin ida liña lan héiguadun fiú tidoun sádara to lidan binadu dan (1 Ko. 10:11, 12).

⁷ Hererun amu le míchugunti gurasu gayarati gani lan efekütu wawagu (aliiha huméi 2 Lúrudu 1:26-28). Séfuwaña meha lumutuniña Bungiu lídangiñe amudirawaguni Ehiptu. Óunahaali meha Heowá 10 íñanaü hawagun lílana néchaani gamudihaditi ligía ani ñaraguagüda laali meha faraón hama lisudaranigu lidan barana Funati (Afu. 12:29-32, 51; 14:29-31; Sal. 136:15). Lidan lóurate aranseeña lan ísüraelina lun hebelurun lidoun Fulasu Füramasewati ligía, hagumeserun ekehera luagu Heowá. Ka uagu lalouguada hafiñen? Aba hanufudedagun dan le haganbuni luriban ñunsu le hanügübei ha ounahóubaña aríaahei fulasu (1 Lur. 14:1-4). Ka resultóubei? Sun ha awinwandubaña lidan dan ligía féridi hamuti chansi lun hebelurun lidoun “múa buiti” (2 Lur. 1:34, 35). Agia wagía? Anihein san dan ígira wamá lun ladügün hererun amu lun ledebilidun wafiñen luma lun wagumeserun ekehera luagu ligaburi lóuseruniwa Heowá?

8. Lidan meha lidaani Isaíasi, ka adügübei lun híchuguni ísüraelina duru luagun Heowá luagu haturóbulin?

⁸ Gayarati ladügün idiheri luma asufuriruni lun weferidiruni waguraasun (Isaíasi 8:21, 22, TNM). Lidan meha lidaani Isaíasi, dariguatiña huríu houngua lidan aban turóbuli hénrenguti. Geyegu haña meha hau áganiñu. Késiti meha éigini. Gíbetiña meha ásügürütiña ilamaü. Ani ligibuagun lira, hasufuriruña meha lumutuniña Bungiu ilamaü ladüga lúan subudi lúmagiñeti Bungiu (Amos. 8:11). Lubaragiñe hamuga meha háluahani Heowá lidan lénrengunga ligía, aba hagumeserun “íñaraguei harúeite luma Habungiute”. Ru hamuti meha duru luagun Heowá luagu haturóbulin. Anhein asusereda somu turóbuli woun le wéiriti, gayarati wéiguadun tidoun tuguyaméme sádara kei hagía ani ábame wariñagun tidan wanigi: “Haliañein san Heowá dan le nemegeirunbalin?”.

9. Ka uagu aba lubéi hagumeserun ísüraelina asaminara wuriba luagun Heowá lidan lidaani Esekiéli?

⁹ Ibidiñeti sun le asuseredubei woun. Kei meha le ibidiñe lan sun sügǘ houn, lidan lidaani Esekiéli aba hasaminarun ísüraelina luagu “maricha lan” le ladügübei Heowá (Ese. 18:29). Ítara liña meha kamá busentiña lun hagíaba lan ariñagei anhein richá lubéi lilurudun Heowá, aba hamuga híchuguni halurudun guánarügü le lánina irichaü lóugiñe lilurudun Heowá ani aba hamuga hakutihani según murusun katei le hasubudirubei luagu somu sügǘ. Anhein achülüra dan lun ua lan gunfuranda wamá somu abahüdaguni tidan Bíbülia o ka lan uagu lasusereda somu katei  woun, gayarati san wasaminarun tidan wanigi luagu “maricha lan” lémeri Heowá? (Hob. 35:2.)

10. Ida liña gayara lan lasigiruni somu gürigia luriban lani Adán hénpulu?

¹⁰ Háfuga wíchuguña duru luagun Bungiu luagu wafigoun luma wachara. Dan le hagumeserunbei furumiñetiña gürigia awinwanda ubouagu, ru lumuti Adán duru luagun Bungiu luagu lifigoun guánarügü (Agu. 3:12). Íbini dürügua lani lilurudun Bungiu lau lugundan guánarügü ani subudiñuléi kaba lan buga lani katei ligía resultóu, ru lumuti duru luagun Heowá lau lariñagun lidan amu dimurei luagu wuriba tan würi to líchuguboun Heowá lun lun lánime weiriou. Lúmagiñe dan ligía, gíbeeña asigiruti luriban lani Adán hénpulu ani aba híchuguni duru luagun Heowá luagu hachara. Buiti lun wálügüdagun woungua: “Gayarati san ladügün magundani luma idiheri le nasandirubei dan le nachararun lun magundan nan lau lilurudun Heowá?”.

11. Ka leksióun gayarabei wafurendeiruni lídangiñe abahüdaguni luáguti Honasi?

¹¹ Gayarati wasandiragun woungua súdini wamá. Aba meha lagañidun profeta Honasi dan le gudemehabu lubéi Heowá houn níniwena (Hon. 4:1-3). Ka uagu? Genegeti aba lan ladiheridun saragu luagu magunfulirunbei lan buga dimurei le lariñagubei luáguti lagünrinchawagun Níniwe. Wéiriti lasaminarun luagu kaba lan hariñaga gürigia luagu darí lun masandirun lan ni murusun gudemehabu hawagu níniwena ha asakürihabaña. Ítara kei ligía, gayarati giñe san wagañidun luma Heowá ladüga manügün lágili lan lagumuchagüle ubóu? Háfuga barühadiwa saragu irumu apurichiha luagu yarafaali lan luéyuri Heowá. Gayarati san wagumeserun eferidirei waguraasun dan le hachuraguniwa gürigia ladüga machülügili lan weyu ligía? (2 Fe. 3:3, 4, 9.)

12, 13. Ánhawa agumesera asaminara wuriba tidan wanigi luagun ligaburi lóuserun Heowá, ka lunbei wakipuruni súnwandan?

¹² Kei le anihein lubéi figóu tidan wanigi, ka gayarabei wadügüni anhoun agumesera adüga lun wasaminarun mabuidun lan le ladügübei Heowá o le lígirubei lun  lasuseredun? Haritagua huméi mabuidun lan wasaminarun ítara. Ariñagatu Lererun Bungiu lidan Ariñawagúni 19:3: “Féridigüda lumuti libidiounigan lau gürigia üma lun, lárigiñeti líchigei duru luagun Bungiu”. Lau le lidan wasaminan, ariha wamá seingü katei le lunbei líderaguniwa lun mígirun wamá lun ladügün idiheri le lánina ibagari lun wíchuguni duru luagun Heowá.

¹³ Mígira wamá lun lagadeirun wamadagua luma Heowá. Dan le wakipurun aban lubuidun umadaguaü luma Bungiu, íderagua lumutiwa lun magañidun wamá luma (aliiha huméi Ariñawagúni 3:5, 6). Mosu wafiñerun luagu Heowá ani lun masaminarun wamá chu lan wau luéi o wasaminarun súdini wamá (Ari. 3:7; Apur. 7:16). Ítarati, hénrengutimabei wíchuguni duru luagun Bungiu dan le lasuseredun somu katei wuribati woun.

14, 15. Ka gayarabei wadügüni lun madügün lan luriban hayanun amu dañu woun?

¹⁴ Mígira wamá lun ladügün dimurei le míchugunti gurasu lun weferidiruni waguraasun. Gíbeti meha resun le uágubei gayara lan hafiñerun ísüraelina lebelaagüdübaña lan Heowá lidoun Fulasu Füramasewati (Sal. 78:43-53). Gama lumoun, dan le haganbuni lagübüri ñunsu le hanügübei 10 aríaahatiña fulasu, “maritaguntiña luagu [...] lubafu” (Sal. 78:42). Ánhawa araramagua asaminara luagun sun katei buiti le adüga láalibei Heowá wawagu, laheredatimaba wamadagua luma. Kei resultóu, mígirunbadiwa lun ladügün luriban hasaminan amu lun wadisedun luéi Heowá (Sal. 77:11, 12).

¹⁵ Luagu amu oubaü, ánhawa asaminara wuriba hawagun wíbirigu kristiánu, lagadeiruba wamadagua luma Heowá (1 Huan 4:20). Dan le hayanuhanbei ísüraelina wuriba luagu liridún Aarón, ariha lumuti Heowá kamá luagu hayanuha (1 Lur. 17:10). Ítarameme, ánhawa agumesera agülülüha o ayanuha wuriba hawagu wügüriña ha layusurubaña Heowá lun hadundehan lidan fánreinti le ubouagubei tani lóundarun, ítara liña kamá wayanuhaña wuriba luagu Heowá (Ebü. 13:7, 17).

16, 17. Ka lunbei waritaguni ánhawa agagibudagua luma turóbuli?

¹⁶ Haritagua wamá mama lan Heowá adügübei lun wasufurirun. Íbini aba lan meha hadisedun ísüraelina luéi Heowá lidan lidaani Isaíasi, busenmémegili meha Heowá líderaguniña (Isa. 1:16-19). Meberesenga ka lan turóbuli gádanbaliwa, ruti dǘgüdaguaü woun wasubudiruni bereseti lan giñe Heowá wau ani busenti lan líderaguniwa (1 Fe. 5:7). Le linarün katei, füramaseti woun líchugubei lan erei le wemegeirubei woun lun wasigirun awanda (1 Ko. 10:13).

¹⁷ Ánhawa asufurira somu marichaü kei meha Hobu, lunti waritaguni mama lan ladüga Heowá. Iyereeguti marichaü lun ani hínsiñeti úaraguni lun (Sal. 33:5). Ítarala wagaburi kei Eliú, le lumada Hobu, le ariñagubei: “Maritagua humá luagu adüga lan Bungiu Suntigabafu wuribani odi marichaü!” (Hob. 34:10). Lubaragiñe Heowá lan lébuna waturóbulin, lúmagiñe liabin “sun buiti le ichugúbei woun” (Sant. 1:13, 17).

18, 19. Ka uagu moun lumuti lubéi weferidiruni wafiñen luagu Heowá? Ru humá aban hénpulu.

¹⁸ Maweiyasun wamá eferidirei ichouruni le wasandirubei luagu Heowá. Mafigounti Bungiu, ani íñutimati lisaminan luéi wasaminan (Isa. 55:8, 9). Ligíati, líderagubadiwa ǘnabuguni luma wasubudiruni siñá wamani sun katei adüga lun wasubudiruni ibidiñe lan sun katei woun (Rom. 9:20). Libe-agei dan úati sun dátosu wama luagu somu sügǘ. Chóuruti ariha humaali lan hungua inarüni lan dimurei le lídanbei ariñawagúni le: “Ha furumiñetiña abuyeihatiña haweigiñegua henege garichatiña darí hachülürün háganiñu ariñaga luagu maricha hamá” (Ari. 18:17).

¹⁹ Lun hamuga ladügün aban wamada le uáguti wafiñera aban katei le úati gunfuranda wamani furumiñe, wafuresehaña hamuga san ariñaga adügaali lan aban katei wuribati? Ánhein subudi wamaali lubéi  luagu saragu irumu, wíchuguña hamuga san chansi lun lun lafuranguagüdüni katei? Anhein ítara liña lubéi wóuserun hama wamadagu ha gafigountiña, ma aniheintima resun lun wafiñerun luagu Wáguchi le siélubei, le íñutimabei lémeri luma lisaminan sügǘ wau?

20, 21. Ka uagu súdini lubéi wíchuguni duru luagun le gadurunbei?

²⁰ Ru waméi duru luagun le gadurunbei. Háfuga wagía gadurunbei luagu fiú lídangiñe waturóbulin. Anhein ítara liña lubéi, lunti wánharun lun wadurun (Gal. 6:7). Ka uagu mabuidun lubéi wíchuguni duru luagun Bungiu? Ariha wamá aban hénpulu. Háfuga gayarati téibaagun aban karü óufu. Samina humá aba lan léibaaguagüdünu aban gürigia karü lóugiñe kilometuru le indikaruabei lidan aban óunwenbu egeyeduni ani aba labuguchun. Le funa san adügübarun karü gadurunbei? Uá! Ítarameme, rúhali Heowá chansi woun lun wanúadahan. Gama lumoun, ruti giñe adundehani woun lun desidírü wamá buidu. Lunti san wíchuguni duru luagun Bungiu, le adügübaliwa, luagu wachara?

²¹ Inarüni mama lan wachara o wafigoun lébunabei sun waturóbulin. Anihein katei asusereduti lidan ‘menren lan ladüga lidan wamá aban fulasu lidan lóurate lasuseredun somu katei wuribati’ (Apur. 9:11, TNM). Gama lumoun, mabulieida waméi luagu Satanási lan gadurunbei luagu saragu wuribani (1 Huan 5:19; Aruf. 12:9). Ligía áganibei, mama Heowá! (1 Fe. 5:8.)

22, 23. Ka lunbei waritaguni anhein achülüra dan lun weferidiruni waguraasun ladüga turóbuli?

²² Danme le hagagibudagun luma asufuriruni luma lénrengunga, haritagua huméi hénpulu lani Hosué luma Kalebü. Mítarantiña kei ha híbiri aríaahatiña fulasu, rútiña ñunsu buiti le íchuguti gurasu (1 Lur. 14:6-9). Arufudatiña aban óunwenbu afiñeni luagu Heowá. Lau sun luwuyeri, mosu meha herederun éibugañahadügü lidan fulasu mageirawati luagu bián-wein irumu úara hama ha híbiri ísüraelina. Lubaragiñe hekeherun o hírudun, aban hafiñerun luagu Heowá, ani biní lumutiña luagu le hadügübei. Hilatiña sun ha híbiri lidan fulasu mageirawati, ánheinti bián wügüriña úaraguatiña ha belutiña lidoun Fulasu Füramasewati (1 Lur. 14:30). Labinirubadiwa giñe Heowá anhein ‘mabuchadun wawagu’ adügei lugundan (Gal. 6:9; Ebü. 6:10).

²³ Anhein heferidiruñein lubéi huguraasun ladüga turóbuli, o luagu hichara o hachara amu gürigia, ka lunbei hadügüni? Samina humá luagun lubuidun burí ligaburi Heowá luma luagun emenigini le líchugubei hun. Ani álügüdagua humá hungua: “Haliañadina hamuga san guentó lun hamuga masubudirun nani Heowá?”. Redei humá yarafa lun súnwandan, ani magañida humá luma tidan hanigi.