1, 2. a) Hínsiñeti san houn sun gürigia lun desidírü hamá? b) Ida liña hasandiragun hungua dan le hasaminarun luagu fiú katei le desidírü humaalibei lidan hibagari?

SAGÜ weyu mosu desidírü wamá somu katei. Hínsiñeti san hun hadügüni? Añahein fiú gürigia hínsiñeti houn lun hagía lan desidírü luagu sun katei. Ariñagatiña luagu garicha hamá lun hagía lan desidírü houngua ani magundantiña lun desidírü lan somu gürigia hawagu. Gama lumoun, añahein amu gürigia, aba hadadagarun dan le mosu lan desidírü hamá somu katei súdiniti ani aba háluahan líburu o somu gürigia lun ladundehaniña, háfuga aba hafayeirun saragu seinsu luagu adundehani le hemegeirubei.

² Saragu wádangiñe lídanñadiwa aban puntu labadinagua bián saminaü le. Subudi wamuti anihein lan katei le mama wagía lun desidírü wamani ladüga mámañein lan lábugiñe wererehan, gama lumoun, subudi wamuti anihein lan saragu amu katei lidan wabagari le uágubei gayara lan desidírü wamá según le wabusenrubei (Gal. 6:5). Ani gayarati giñe warihini mama lan sun katei le lunbei desidírü wamani lun buídubei lan.

3. a) Ka adundehani lunbei wasigiruni lun buidu lan desidírü wamá b) Ka uagu anihein lubéi dan hénrengu lan wasubudiruni kaba lan wadüga?

³ Gayarati wagundaarun, wagía lubúeingu Heowá, luagu líchugun adundehani woun luagu saragu katei súdiniti le lánina ibagari. Subudi wamuti anhein lan wasigira ladundehan lidan le desidírü wabéi, lahuuduba lan woun ani wagundaaragüdübei lan Heowá. Gama lumoun, mama súnwandan tayanuhan Bíbülia furangu luagu somu sügǘ o turóbuli lánina ibagari. Ida luba san desidírü wamani kaba lan wadüga? Aba hénpulu, subudi wamuti luagu wuriba lan íweruhani (Efe. 4:28). Kátima san íweruhanibei? Gayarati san larihín kei íweru según lebegi katei le íweruhoubei o luagu lébuna lanügüni gürigia aban katei le mama lani? Kaba íderaguawa desidírü buidu dan le añahein lan asaminarutiña luagu anihein lan somu katei le úati furangu lan? Ka gayarabei leseriwidun woun kei adundehani lidan burí kesi le?

4. Ka adundehani resibi wamaalibei lidan lóurate desidírü wamá?

⁴ Ánhawa adimureha luma aban íbiri lidan afiñeni luagu mosu lan desidírü wamá somu katei súdiniti, háfuga lariñaguba woun lun lan wasaminaruni buidu. Anha, buiti adundehani le. Rutu Bíbülia eweridihani woun lun ua lan desidírü wamá lau lóufudagun. Ariñagatu: “[Aransehani] le adügǘbei lau furesei, barüti günringuaü” (Ari. 21:5). Ka mini lubéi desidírü wamá buidu? Mini lan san mosu lan wadügüni lau dan, wasaminaruni katei buidu ani áfaagua wagía lun gunfuranda wamani le asuseredubei buidu? Sun katei le huuti lun gayara lan desidírü wamá buidu, gama lumoun úati buídurügü lan lun wóuserun lau lichú aau (Rom. 12:3; 1 Fe. 4:7).

5. Ka uagu ua lubéi aban lichú aau le dayarüti wawagu?

⁵ Mosu wasubudiruni úati lan ni aban gürigia nasiruati lau lichú aau le dayarüti. Sun wagía gafigountiwa, ani dísetiwa luéi aban úgubu luma aban saminaü úaraguati sunsuinagubei (Sal. 51:5; Rom. 3:23). Ani ligibuagun lira, darugu liña meha Satanási lau wasaminan; ibidiñeti meha Heowá woun ni lilurudun le richabei (2 Ko. 4:4; Titu 3:3). Ligíati, anhein wadüga katei le buídubei según wasaminan o le richabei según wagía, gayarabei weyeedagun woungua, íbini anhein samina wamaali lubéi katei buidu (Ari. 14:12).

6. Ka gayarabei líderaguniwa asaminara lau lichú aau?

⁶ Úati ni aban wádangiñe gawaguti aban saminaü luma aban úgubu le úaraguati sunsuinagubei, ánheinti Heowá, Wáguchi le siélubei, úaraguati lidan sun katei (2 Lur. 32:4). Gúndaatiwa lau wasubudiruni adüga laali lan aransehani lun gayarabei lan wasansiruni ligaburi wasaminan luma lun wadügüni katei keisi lubudubu (aliiha huméi 2 Timotéu 1:7). Wagía kristiánugu busentiwa wasaminarun luma lun wadügüni katei lau lichú aau. Lun wibihini, mégeitiwa wafurendeirun agumadirei wasaminan, le wasandirubei luma lun wáyeihani ligaburi lisaminan Heowá, le lasandirubei luma le ladügübei.

7, 8. Ru humá aban hénpulu le arufudubalin gayara lan desidírü hamá gürigia buidu íbini laganagua lénrengunga o lidan añaha lan amu adüga erei hawagu lun hadügün amu katei.

⁷ Ariha wamá aban hénpulu. Añahein saragu gürigia ha ñǘdünbaña awinwanda lidan amu ageiraü, aba hóunahaniña hasaanigu hamoun haduheñu hageiroun lun hetenirun houn, gayara láamuga hawadigimaridun lun hasirigirun agañeira seinsu. * Aba gasaani tan aban würi aban wügüri irahü. Lidan dan ligía tagumeseruña würi tugía aturiahoun Bíbülia darí lun tawanserun lidan tafiñen. Aba hagumeserun tiduheñu hama tumadagu éreda tuagu luma luagu tani weiriei lun hóunahani hasaani hageiroun lun hagüriahani lárugutinu. Gama lumoun, tugíatima, aba gunfuranda tani houn lan agübürigu líchigei Heowá buligasion lun hetenirun houn isaanigu (Sal. 127:3; Efe. 6:4). Mosu meha san tasigiruni échuni le harihibei sun gürigia kei buiti? O mosu meha tawinwanduni le tafurendeirubei íbini tásügürün lénrengunga ladüga lilouguan seinsu ani awandateime hachuragunu fiú gürigia? Lun hamuga huguya lan lídanbei turóbuli ligía, kaba hamuga hadüga?

⁸ Lidan libidiñedun tun nibureintu to kaba lan tadüga, aba tadaarunu tanigi lun Heowá ani aba tamuriahan ídemuei luma. Dan le tayanuhan tuma íbiri to úmaboun taturiahóun Bíbülia luma hama amu íbirigu lidan damuriguaü, aba gunfuranda tani ka lan lisaminanbei Heowá luagu katei le. Saminatu giñe luagun dañu le hasufurirubei irahüñü dan le haweinamudun dise hawéi hagübürigu. Lárigiñe takutihani katei lau tídehan Bíbülia, aba tasaminarun luagu mabuidun  lan lun tóunahani tisaani tageiroun. Dan le larihinbei tani weiriei hóundaragun lílana damuriguaü lun hídehan luma lubuidun laweiridun irahü lau ugundani luma lubuidun átuadi, aba lánharun lun laturiahanu Bíbülia ani aba lagumeserun ñüdün adamuridagua úara tuma lani weiriou.

9, 10. a) Ka mini lubéi lubuidun ichügü? b) Ida luba wibihin lubuidun ichügü?

⁹ Anihán ábanrügü hénpulu le arufudubalin le mini lubéi wóuserun lau lubuidun ichügü, úati buídurügü lan wadügüni le buídubei según wasaminan o según hasaminan amu lun wóuserun lau lichú aau. Gayarati konpararua lan lisaminan tuma lanigi aban gürigia gafigounti luma aban wachi le fureseti léibugun o le darasati léibugun. Ánhawa afiñera luagu wasaminan luma tuagu wanigi, gayarabei wéiguadun lidoun turóbuli le wéinamuti (Her. 17:9). Ligía lunti lubéi waranserunu wanigi luma wasaminan lun úara lan luma lilurudun Bungiu (aliiha huméi Isaíasi 55:8, 9).

¹⁰ Ligía tariñagunbei Bíbülia woun: “Afiñebá luagu Bungiu tau sun banigi, mamalá luagu lualin bichügü. Haritaguabá luagu Bungiu lidan sun le badügübei, ábame lanügünibu luéigiñe üma le surubei” (Ari. 3:5, 6). Teni wamá lun dimurei “mamalá luagu lualin bichügü [bafiñera]”, ani lárigiñe aba lariñagun “haritaguabá luagu [Heowá] lidan sun le badügübei”. Le linarün katei, ligíarügüñein buidu ichügü. Ligía buidu lubéi danme lan le desidírü wamá luagu somu kesi, lunti wáluahanu Bíbülia lun warihini ka lan lisaminanbei Heowá ani desidírü wagíame según lugundan. Le mini lubéi lubuidun ichügü, wasaminarun kei lasaminarun Heowá.

11. Kaba wadüga lun wafurendeirun desidírü lau lichú aau?

¹¹ Hénrenguti hafurendeirun gürigia desidírü lau lichú aau ani adüga hameime le desidírü habéi. Ani inarüni katei le lídantima hakesin ha málügilibei habadiseirun hama ha agumeserubaña awansera lidan hasubudiruni inarüni. Gama lumoun, gürigia ha ítarabaña kei irahüñü lidan lasubudirúniwa inarüni, según tagúahan Bíbülia houn, gayarati hawanserun saragu. Samina humá ida liña lan lafurendeirun aban irahü éibuga sin léiguadun. Lun ladügüni, mosu ládarun  pasu ñǘbüriti saragu wéiyaasu. Ligiaméme asuseredubei lun aban gürigia le lagumeseruña afurendeira desidírü buidu. Haritagua humá ayanuha lan apostolu Pábulu hawagu gürigia ha wéinamuhañabaña lidan hafiñen kei “ha subudihabúbaña tun Lererun Bungiu buidu, subudi haméi arufudahani le buídubei lumoun le wuribabei”. Lun hádangiñe wamá hawuyeri gürigia hagía, mégeiwati dan luma áfaaguni. Anihán le lunbei hadügüni ha iserigiñabaña lidan inarüni (aliiha huméi Ebüréu 5:13, 14).

12. Ru humá aban hénpulu le arufudubalin ida luba lan wafurendeirun desidírü buidu?

¹² Sagü weyu mosu desidírü wamá saragu katei, súdini lan yebe o masudini lan. Según aban aturiahani, lóugiñe 40 lídangiñe kada 100 katei le wadügübei masaminarun wamuti lubaragiñe wadügüni, adügarügü wamuti ladüga ligía lan wéchunbei. Kei hénpulu, chóuruti sagü lan binaafin desidírü humá kaba lan hadaüra. Háfuga hasaminarun mama lan aban katei súdiniti lira ani masaminaruntün saragu lun hadügüni lídantima fureseedün lan. Gama lumoun súdiniti hasaminarun anhein hasansiraguba lubéi kei lasansiragun aban lubúein Heowá (2 Ko. 6:3, 4). Dan le hagañeihan daüguaü háfuga aba hasaminarun luagu estaili le iseritimaabei, gama lumoun mosu hasaminarun luagu tebegi luma anhein gadünama tubéi lun aban kristiánu. Dan le desidírü wamá buidu lidan katei burí le, gayarabei wabuiduragüdüni wasaminan, ani líderagubadiwa le lun desidírü wamá buidu lidan katei le hanarimeti lisudinin (Luk. 16:10; 1 Ko. 10:31).

13. Ka wemegeirubei lun wagunfuliruni le desidírü wamaalibei?

¹³ Súngubei wagía subudi wamuti mama lan ligiaméme desidírü wamá buidu lumoun wadügüni le desidírü wabéi. Kei hénpulu, saragu agumulahatiña saminatiña hígiruni échuni le ani siñá hamuti ígira lugundun ua lan erei hawagu lun hadügüni. Mégeitiña gürigia desidírü hamani tidan hanigi kaba lan hadüga ani ábame háfaagun lun hadügüni. Kábati íderaguawa lun wagunfuliruni le desidírü wamaalibei tidan wanigi? Lunti wáluahani ladundehan Heowá (aliiha huméi Filipuna 2:13).

14. Halíagiñe meha san lasagara Pábulu erei lun ladügüni le lasubudirubei luagu lunti lan ladügüni?

¹⁴ Subuditi meha le lun Pábulu. Aba meha lariñagun: “Lau sun busén nan nadügüni le buídubei, siñá numuti adüga”. Subudi lumuti meha le lunbei ladügüni, gama lumoun anihein meha somu katei adügüti lun madügün lani. Aba lariñagun: “Lidan nisaminan, hínsiñeti lilurudun Bungiu nun; gama lumoun arihatina luagu anihein lan ábanya lúrudu lidan núgubu, ageindaguati luma nisaminan; katei ligía, igaburi lánina figóu le nídanbei, le gámabalina dáüwañu”. Máraninati meha san luáguti? Gáraninati meha, ligía guánarügü ariñagubei: “Búngiugubeirügü, lídangiñe Wabureme Hesukrístu. Teinki niña lun Bungiu!” (Rom. 7:18, 22-25).

15. Ka efekütu gayarabei gani lani wawagu wadügüni katei le desidírü wabéi o madügün wamani?

¹⁵ Furanguti lun lan wagundaaragüdüni Bungiu lunti lan wadügüni le desidírü wabéi. Haritagua huméi dimurei le lariñagubei Elíasi houn ha áhuduragubaña lun Baali luma houn ísüraelina ha kóntürabaña luagu Bungiu luagu wübü Karümélu: “Ídaba san hígirei huraraü biánguati le? Anhein Aburemei [Heowá] lubéi Búngiubei le tímatimaati, falá huméi, anhein Baali lubéi, ligialá hafalara” (1 Uru. 18:21). Subudi hamuti meha ísüraelina ka lan lunbei hadügüni, gama lumoun úati meha desidírü hamani kaba lan hadüga. Ánheinti Hosué, rúhali meha aban lubuidun hénpulu fiú irumu lubaragiñe dan ligía dan le lariñagunbei houn ísüraelina ha awinwandubaña lidan lidaani: “Anhein mabuserun hubéi heseriwidun lun  Wabureme, anúadaha humá uguñe kaba lan un heseriwida [...]. Ánheinti au hau tílana nuban lunba Wabureme [Heowá] weseriwida” (Hos. 24:15). Ka lánibei le desidírü habéi resultóu? Dandu Hosué kei ha afalarubalin belutiña lidoun Fulasu Füramasewati, aban “múa rísiti” (Hos. 5:6).

16, 17. Arufuda huméi lau aban hénpulu dan le lan desidírü wamá según lugundan Bungiu ibihatiwa lan abinirúni?

¹⁶ Samina wamá luagun aban sügǘ lidan wadaani. Aban íbiri le málügili labadiseirun maríeihali ani ǘrüwañanu lisaanigu ñǘbürigiña. Aban weyu, aba lariñagun aban lani paaná lidan wadagimanu lun lun houdin nadagimein tidan amu kónpeni to fáyeitimatu ani gíbetimaati katei tíchugun houn nadagimeintiña. Aba lasaminarun wíbiri luagu katei le ani aba lamuriahan luma Heowá lun ladundehani. Inarüni luagu magañeirun lan meha saragu lidan luadigimari, gama lumoun lanuadirúnbalin ladüga mawadigimaridun lan samudi luma dimaasu ani gayarati lidin apurichiha luma adamuridagua hama lufamilian. Aba lasaminarun anhein lan asansira wadagimanu, úaalime líbüre lan samudi luma dimaasu, íbini luagu fiú dan. Kaba hamuga hadüga?

¹⁷ Dan le líchuguni bián katei le lidan balansu lun larihini kátima lan lídangiñe anügübei resultóu buiti, leseriwidun lun Bungiu o aban wadagimanu le fáyeiti, aba desidírü lan mánharun lan lun wadagimanu ligía. Afiñetün san aba lan lasakürihan luagu le desidírü lubéi? Uá. Saminati buídutimati lan abinirúni le leresibirubei lúmagiñe Bungiu lungua luma houn lufamilian sügǘ lau aban wadagimanu fáyeiti. Gúndaati tuma lani weiriou dan le tariñagunbei hasaani to íbugañaü, 10 irumu tau, luagu hínsiñe hamá tun ani hínsiñe hagía íbirigu tun luma Heowá ani busén tan tederegeragun tungua lun ani badisei tuguyame. Chóuruti aban lan hénpulu buiti úguchili le tun lau líchuguni áhuduraguni lun Heowá lidan furumiñeti lúgaaru, wéiriti lani katei le efekütu tuagu.

18. Ka uagu súdini lubéi sun lan katei le lunbei desidírü wamani lidan wabagari lun úara lan luma lugundan Heowá?

¹⁸ Hesukrístu, Moisesi le Wéirigutimabei, barühali saragu irumu adundehaña lubúeingu Heowá lídangiñe ubóu le lani Satanási, le ítarabei kei aban fulasu mageirawati. Lidan luadigimari keisi Hosué le Wéirigutimabei, gumumémeeli lau ubóu lani Satanási ábame ladundehaniña ha asigirubalin lidoun iseri ubóu richati le füramase wáalibei (2 Fe. 3:13). Guentó, mama lidaani wagiribudun lidoun binadu wasaminan, wechun, wousan o le burí meha wabusenrubei wadügün, guentó lidaani wasubudirunitima buidu ka lan lugundanbei Heowá woun (Rom. 12:2; 2 Ko. 13:5). Ligíati, arufuda waméi lau le desidírü wabéi luagu gadüna wamani weresibiruni labinihan Bungiu lun súnwandan (aliiha huméi Ebüréu 10:38, 39).