1. a) Ida liña hóunabun gürigia dan le hibihin adundehani, ani ka uagu? b) Ka lánibei barüguaü unguaü efekütu lidan ligaburi hóunabun gürigia dan le heresibirun adundehani?

ÁMUÑEGUEINARÜGÜTI ligaburi hóunabun gürigia dan le hibihin adundehani. Gayarati heresibiruni lugumadin aban gürigia le íñuti lubara hawéi sin hagülülühan, gama lumoun, gayarabei maha hamá lun adundehani le líchugun aban hani paaná o aban gürigia le lábugiñebei lererehan aban iyubudiri. Ámuñegueinarügüti giñe ligaburi hasandiragun houngua: gayarati hasandirun íruni, busiganu o gayarati línchahaniña adundehani ligía lun buídutima lan hawadigimaridun. Ka lébunabei ámuñegueinarügü óunabagülei le? Barügüaü unguaü aban lídangiñe. Ítara liña, gayarati ladügün íñuguni lun móuserun hamá gürigia lau lichú aau, lun hamahadun heresibirun adundehani ani lun heferidirun aban lubuidun arufudahani (Ari. 16:18).

2. Ka uagu weteingirei Bungiu luagu adundehani le tídanbei Lererun?

² Ánheinti kristiánugu ha inarünitiña, rútiwa seremei dan le wibihin adundehani le buiti, dántima le tídangiñeti lan Lererun Bungiu. Íderagua lumutiwa ladundehan Heowá, lugundun arufudahati woun ani íderagua lumutiwa lun méiguadun wamá tidoun sádara lánina láluahoun saragu umegeguni, lun méiguadun wamá lidoun magíaguni, lidoun átaguni o tidoun duroga (Ari. 20:1; 2 Ko. 7:1; 1 Tesa. 4:3-5; 1 Tim. 6:6-11). Ani anihein giñe ‘ugundani tidan wanigi’ ladüga gaganbadi wamá lun lugumadin Bungiu (Isa. 65:14).

3. Ka ligaburi abürühati Sálumu lunbei wáyeihani?

³ Lun wakipuruni lubuidun wamadagua luma Wáguchi le siélubei, mosu wasigirun agunfulirei lubuidun ladundehan. Lunti warufuduni igaburi le larufudubei abürühati Sálumu, le abürühabei: “Bugumadin nalagantebei lun súnwandan, ladüga ligía agundaaragüdübarun  nanigi” (Sal. 119:111). Hínsiñeti giñe san lilurudun Heowá woun kei lun Dawidi, o anihein dan hénrengu lan woun gaganbadi wamá lun? Íbini anhein achülüra oura lun hénrengu lan woun wánharun lun somu adundehani, meferidira waméi waguraasun. Gayarati wéredagüdüni wafiñen luagu le lan lamuriahabei Heowá wámagiñe ligía lan buídutimabei woun. Ariha wamá ǘrüwa manera lun wadügüni.

4. Ka íderagubalin Dawidi lun lawandun lidan libagari?

⁴ Gíbeti meha dan buiti luma wuribati lidan libagari urúei Dawidi, gama lumoun afiñeni le lasandirubei luagu Lubungiute súnwandan ligía íderagubalin lun lawandun. Ariñagati: “Nabureme, buntia niñuroun nuani; Nubungiute, buagu nafiñera” (Sal. 25:1, 2). Ka íderagubalin Dawidi íchigei sun lafiñen luagu Lúguchi le siélubei?

5, 6. Ka tarufudahabei Bíbülia luagu lumadagua Dawidi luma Heowá?

⁵ Gíbetiña gürigia afurieidutiña lun Bungiu dánrügü le gaturobulin hamá. Samina humá lun hamuga lagúarun aban humada hun dánrügü le megei lan seinsu o amu fulesei. Lachülürüña hamuga aban oura lun hasaminarun mama lan ínsiñeni lébunabei humadagua. Ánheinti Dawidi mítaranti meha. Arufuda lumuti lidan sun libagari luagu hínsiñe lan Heowá lun ani afiñeti lan luagu, dandu lidan dan buiti kei lidan wuribati (Sal. 40:8).

⁶ Ariha huméi dimurei burí lánina alawahani luma eteingiruni le layusurubei Dawidi: “Aburemei, Warúeite sungua luagu, ma lanarime luéirigun biri lidan sun ubóu! Chülüti buéirigun yagürounmeme luéi sielu” (Sal. 8:1). Ariha humuti san lubuidun lumadagua Dawidi luma Lúguchi le siélubei? Wéiritu lanigi Dawidi luagu lanarime luéirigun Heowá darí lun aba lan lalawahani “sun weyu” (Sal. 35:28).

7. Ida liña líderaguniwa furíei?

⁷ Ítara kei Dawidi, mosu wayanuhan luma Heowá súnwandan lun leheredun wafiñen luagu. Ariñagatu Bíbülia: “Yarafa humá lun Bungiu, ábame giñe layarafadun hun” (Sant. 4:8). Yarafagüda lumutiwa furíei lun Bungiu ani ligía giñe aban lídangiñe manera súdiniti lun wibihini lani sífiri sandu (aliiha huméi 1 Huan 3:22).

8. Ka uagu moun lumuti lubéi wáguyuguagüdüni ligiaméme dimurei dan le wafurieidun?

⁸ Dan le hafurieidun lun Bungiu, héchutün san águyuguagüdei ligiaméme burí dimurei? Anhein ítara liña lubéi, ragǘ humá fiú minutu lubaragiñe hafurieidun lun hasaminarun luagun le habusenrubei hariñagun. Lun hamuga wayanuhan luagu ligiaméme katei lun aban wamada sagü warihini, gúndaabei hamuga san? Chóuruti lachülürüña lan hamuga dan lun maganbun lániwa. Inarüni mígirun lubéi lan Heowá laganbuni lafurieidun aban lubúein le úaraguati lun, gama lumoun súdiniti lun máguyuguagüdün wamani ligiaméme dan le wayanuhan luma.

9, 10. a) Ka burí katei gayarabei wayanuhan luagu lidan furíei? b) Kaba íderaguawa lun wafurieidun lun Heowá tídangiñeti wanigi?

⁹ Anhein busén wabéi wayarafadun lun Heowá, furanguti mayanuhanbadiwa lan lun luágurügü katei le úati súdini lan. Eibu wadaarunu wanigi lun, wayarafadatimaba lun ani wafiñeratimaba luagu. Ka gayarabei wariñaguni lidan wafurieidun? Ariñagatu Bíbülia: “Ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun” (Fili. 4:6). Ítara liña, gayarati wayanuhan lun Heowá luagu furumiñeguarügü katei le gayarati gani lan efekütu lidan wabagari o lidan wamadagua luma.

¹⁰ Líderagubadiwa wakutihani furíei le meha hadügübei lubúeingu Bungiu ha úaraguatiña le burí bürüwañubei tidan Bíbülia (1 Sam. 1:10, 11; Adü. 4:24-31). Lidan burí Sálumu anihein saragu furíei luma uremu lun  Heowá. Ñein arihúati ida liña lan meha hasandiragun abürühatiña houngua, lúmagiñe lanarime idiheri darí lumoun lanarime ugundani. Gayarati líderaguniwa waturiahani furíei burí ligía lun gasuunitima lan dimurei le wariñagubei lun Heowá.

11. Ka uagu lunti lubéi wasaminarun luagun adundehani burí le líchugubei Bungiu?

¹¹ Ariñagati Dawidi: “Úaraguati lugumadin Aburemei, ladüga chúgüdati hau gürigia ha ǘnabugubaña” (Sal. 19:7). Íbini maweirin lan wasubudin, gayarati lachuudun wau ánhawa gaganbadi lun lugumadin Bungiu. Gama lumoun, aniheinbei dan mosu lan wasaminarun buidu luagun somu adundehani lun wasagarun buiti lídangiñe. Ka uagu? Ladüga íderagua lumutiwa wararamagun asaminara lun waranserun lubá katei hénrenguti le gayarabei lasuseredun. Kei hénpulu, íderagua lumutiwa lun wawanduni óuchawaguni leskuelarugu o lidan wadagimanu, lun inebe lan lisaminan Bungiu woun luagu hitaü, lun mádaragun wamá woungua lidoun polítika luma lun wafalaruni adundehani le tídanbei Bíbülia lidan lóurate waranseragun woungua o wasansiragun. Gunfuranda wamani lisaminan Bungiu luagu katei burí le íderagua lumutiwa lun gabaroun wamani turóbuli ani desidírü wagíame kaba lan wadüga anhein asusereda. Wararamagun asaminara luagun katei burí le ídehati lun méiguadun wamá lidoun saragu turóbuli (Ari. 15:28).

12. Ka burí álügüdahani lunbei wasaminarun luagu lun gaganbadi wamá lun lugumadin Bungiu?

¹² Lidan awanha lan agurabahei lagunfuliruni Bungiu le füramase lubéi, arufuda wamuti san luagu afiñe wamá luagu ani agagudúañu waña lan lidan weseriwidun? Kei hénpulu, afiñetiwa san madiseeli lan tagünrinchawagun Babilónia to Wéiriboun? Arihaméme wamagili san abinirúni burí le lunbei wibihini, kéiburi lawinwandúniwa lidan aban paraísu ubouagu keisi füramasei inarüniti kei meha warihini furumiñe? Awanhagua san apurichiha lau ubebeni ani migiruntiwa lun ñein lan somu katei adarasahatiwa lidan weseriwidun lun Bungiu? Ariha wamagili san emenigini lánina águyuguni, inebewa lan liri Heowá, luma larumadahóun liricha kei aban katei gebegiti kei meha warihini furumiñe? Wasaminarun luagu álügüdahani burí le líderagubadiwa lun wakipuruni lugumadin Bungiu keisi ‘walagante lun súnwandan’ (Sal. 119:111).

13. Ka uagu ua lubéi gunfuranda hamani disipulugu fiú katei lidan furumiñeti sígulu? Ru humá aban hénpulu.

¹³ Háfuga waliihan katei burí tidan Bíbülia le úati gunfuranda wamani buidu lugundun machülügili lan lóurate lafuranguagüdüni Heowá. Ariñagati meha Hesusu houn lani disipulugu mosu lan lasufurirun ani hilá ligíame (aliiha huméi Matéu 12:40 luma 16:21). Ani ibidiñeti meha houn ka lan mini lubéi dimurei burí ligía. Darí lárigiñe lounwen Hesusu ani águyugua ligía ani lárigiñe larufudagun lungua houn lani disipulugu aba “ladaaruni hasaminan lun gunfuranda hamanu Lererun Bungiu” (Luk. 24:44-46; Adü. 1:3). Ítarameme, darí dan le hanuadirúnwabei lánigu Kristu disipulu lau sífiri sandu lidan Pentekosutesi irumu 33 ligíaali gunfuranda hamani luagu lagumeseruba lan meha Larúeihan Bungiu agumadiha sielu (Adü. 1:6-8).

14. Lidan lagumeseha sígulu XX, ka buiti hénpulu hígirubei saragu íbirigu woun dan le meha masuseredun lubéi le hagurabahabei libügürü lagumuhóun dan?

¹⁴ Ítarameme, lidan lagumeseha sígulu XX, charati meha hasaminan kristiánugu luagu le lunbei buga lasuseredun lidan ‘lagumuhóun burí dan le’ (2 Tim. 3:1). Kei hénpulu, lidan irumu 1914, saminatiña fiú madiseeli lan meha hanügǘn sielun. Dan le magunfulirun lubéi le hagurabubei, ábaya haturiahanu Lererun Bungiu buidu buidu ani aba híchugun  fe luagu mosu lan buga ladügǘn aban óunwenbu wadagimanu lánina apurichihani (Mar. 13:10). Ligíati, lidan irumu 1922 lidan aban adamurini adügǘti Cedar Point (Ohio, Meriga), le ídanbei hadamuridagua íbirigu lídangiñetiña saragu ageiraü, aba lariñagun Joseph F. Rutherford, le meha arihibei lau wadagimanu lidan dan ligía: “Ariha humá, lagumadihaña Urúei! Huguya lunbei hasubudiragüdüni. Ligíati, awisaha, awisaha, awisaha humá luagu Urúei luma luagu larúeihan!”. Lúmagiñe weyu ligía lun lubaruaguóun, subudiwatiña lubúeingu Heowá luagu hapurichihani “uganu buiti le luáguti larúeihan Bungiu” (Mat. 4:23; 24:14).

15. Ida liña líderaguniwa wasaminarun luagun le adüga láalibei Heowá hawagu lumutuniña?

¹⁵ Wasaminarun luagun sun le adüga láalibei Heowá hawagu lumutuniña lidan dan le sügühalibei luma guentó héregüda lumuti wafiñen luagu lagunfulirubei lan lugundan lubá ámuñegü. Íderagua lumutiwa giñe ladundehan Heowá lun súnwandan lan wabusenrun warihini lagunfulirun lani profesía ani íderagua lumutiwa lun wafiñerun sunsuinagubei luagu lani füramasei.

16. Ka burí abinirúni wibihibei luagu wagunfuliruni wani ministeriu lau ubebeni?

¹⁶ Heowá, le adügübadiwa, aban Bungiu chubaluguti. Ariñagati abürühati Sálumu: “Úati ni aban kei buguya!”. Ábaya lariñagun: “Héreti búhabu le bóunwenren ani gagañeiraditi” (Sal. 89:8, 13). Kei le aban lubéi Bungiu hínsiñeti wadagimanu lun, sun áfaaguni le wadügübei luagu lufulesein Larúeihan gebegiti lun ani biní lumuti. Ariha lumuti luagu ‘meigin hamuti lan lubúeingu le magañeirun habéi’, ni wügüriña ni würiña ni nibureintiña ni ha derebuguhaña, meredetiña chagu harüna (Ari. 31:27). Áyeiharügü hamuti Habungiute ani beresegutiña lidan heseriwidun lun. Gúndaatiña lau heseriwidun lun tau sun  hanigi, ani hínsiñeti lun Heowá labiniruniña lidan hani ministeriu (aliiha huméi Sálumu 62:12).

17, 18. Ka uagu gayara lubéi wariñagun dan le lan wíchuguni wafiñen luagu Heowá lidan somu sügǘ aba lántima léredun wafiñen luagu? Ru humá aban hénpulu.

¹⁷ Ida liña laganwoundun wafiñen luagu Heowá sagü wíchuguni wafiñen luagu? Samina wamá luagun habagari ísüraelina dan le hebelurunbei lidoun Fulasu Füramasewati. Ariñagati meha Heowá houn fádirigu ha anügübalun bágüsi lánina daradu lun hebelurun lidoun duna Hordán. Gama lumoun, dan le hachülürünbei ñein aba harihin hanarime lan léibaagun duna lárigi huya. Ka hadügübei? Aba san desidírü hama herederun laru duna lun hagurabahan fiú dimaasu darí lararirun duna? Uá, afiñetiña luagu Heowá ani sigí hamuti ladundehan. Ka resultóubei? Ariñagati abahüdaguni: “Danti le hebelurunbei fádirigu dúnarugun, [...], aba lerederun léibaagun duna le ñǘbuinbei íñugiñe [...]. Hiñugua hamuti sun Ísüraelina Hordán mábeiñu, sun añaha lan fádirigu ha táubaña lubagüsina lidaradun Bungiu rara lamidan Hordán lidan fulasu mábeiti” (Hos. 3:12-17). Ma funa hagundan dan le harihini lararamun léibaagun duna! Chóuruti aba lan laweiriduntima hafiñen luagu Heowá! Ani sun le susereti ladüga hafiñerun luagu ladundehan Heowá.

¹⁸ Inarüni madügün lan Heowá milaguru burí libe le wawagu uguñe weyu, gama lumoun, biní lumutiwa ladüga wafiñerun luagu ani gaganbadi wagía lun. Yusu lumuti lani sífiri sandu lun líderaguniwa lun gayara lan wapurichihani uganu luáguti Larúeihan lidan sun ubóu. Ani Hesukrístu, gefenti luagu Heowá le méinitimabei, füramaseti houn lani disipulugu luagu líderagubaña lan lidan wadagimanu súdiniti le. Lárigiñe láguyugun aba lariñagun houn: “Heiba lubeiti habügürü gürigia ha lílana sun fulasu [...]. Subudi huméi luagu anahein lan huma sagü weyu darime lagumuchun ubóu” (Mat. 28:19, 20). Saragu gefentiña luagu Heowá ha hanufudetiña hayanuhan hagibugiñe amu ariha hamaali ida liña lan líderaguniña sífiri sandu lun ganigi hamá lun hayanuhan houn gürigia ha ibidiñetiña houn (aliiha huméi Sálumu 119:46 luma 2 Korintuna 4:7).

19. Ka lunbei wachoururuni lau sun gibe lan katei wásiñarun adüga?

¹⁹ Añahein íbirigu siñati hadügün saragu ladüga hasandi o ladüga aweiyaduni. Gama lumoun gayarati hachoururuni luagu gunfuranda lani ‘Wáguchi le gudemehabubei woun; ani aranseñu liña lun líchugun gurasu woun’ ka lan lásügürünbei kada gürigia (2 Ko. 1:3). Sun le wadügübei lun weseriwidun lun, wéiriti lebegi ligibugiñe. Moun lumuti wabulieiduni mosu lan wafiñerun luagu lani Kristu sákürifisiu lun gayara lan wasalbarun ani awanhame adügei sun le wayaraati lidan weseriwidun (Ebü. 10:39).

20, 21. Ida luba warufuduni wafiñen luagu Heowá?

²⁰ Wáhuduragun lun Heowá, mini lan wadügüni sun wayaraati lun wayusuruni wadaani, were luma waseinsun o wemegen lun weseriwidun lun. Tídangiñe sun wanigi busentiwa ‘wíchaagun woungua lun apurichihani’ (2 Tim. 4:5). Gunda wabéi ladüga íderagua wamá amu gürigia lun “hayabin lun hasubudiruni inarüni” (1 Tim. 2:4). Wíchugun inebesei lun Heowá ani alawaha waméi buídugüda lumuti wamadagua luma (Ari. 10:22). Ani íderagua lumutiwa giñe lun wederebudagüdüni wafiñen luagu Bungiu le Adügübaliwa (Rom. 8:35-39).

²¹ Kei warihini, mama ítaraguarügü libihíwa afiñeni luagu lilurudun Heowá. Ligíati, héregüda huméi hafiñen lau hafurieidun lun Bungiu, lau hararamagun asaminara luagu ida liña lan lagunfuliruni lugundan lidan binadu dan ani ítara luba lan ladügüni ámuñegü, luma lau hadügüni katei lau afiñeni. Ánhadün gaganbadi lun lilurudun Heowá, ligíaba ‘halagante lun súnwandan’, lugundun hawinwanduba lun súnwandan.