“Dan le hagumadihan wuribatiña, súfuritiña gürigia.” (Ariñawagúni 29:2.)

Lidan sun dan le sügühalibei gíbeeña urúeigu wuribatiña ha íchugubaña lúrudu le hanarimeti lun hasufuriragüdüniña gürigia. Inarüni mama lan ítara liña hóuserun sun urúeigu: añahein hagía hóuchatiña híderaguniña gürigia lau sun taruman hanigi. Gama lumoun, aba híchugun fe íbini lan gabafu hamá luagu ageiraü, mibihin hamuti le habusenrubei ladüga wuribu le burí lídanbei ageiraü luma ageindaguni luagu ubafu. Añahein amu aba hayusuruni ubafu lun habuidun guánarügü íbini hasufurirun lílana ageiraü. Ariñagati Henry Kissinger, aban meha sekretariu Meriga: “Sun sügǘ le ásügürübei aban lárigi aban, ábanrügüñein áfaaguni le mánibei aban resultóu buiti luma burí emenigini le magunfulirunti”.

Ariñagatu Bíbülia: “Mama wügüri laburemebei lémeri siñá lumuti giñe wügüri le éibugubei lupasun ásururagüda” (Jeremías 10:23, Reina Valera Actualizada). Anhein siñagua lubéi aban gürigia lungua lun ladundehani lupasun guánarügü, siñaguatimabei lungua lun ladundehaniña sun lílana aban ageiraü. Ariha humaali guentó ka lan uagu wariñaga siñabei lan hagumuchun gumadimatiña lau asufuriruni? Le linarün katei, libe-agei dan hagía guánarügü lébunabaña turóbuli.

“Anhaün hínsiñegua húmagua, hasubudirubei sun gürigia luagu nani humá disipulugu.” (Huan 13:35.)

Ayanuhatiña lábutigu relihión ha lídanbaña sun ubóu luagu ínsiñeni luma úarani. Ani le linarün katei, siñaguagiña houngua lun híderaguniña tílana haligilisin lun harufudun ínsiñeni hámagua ani lun hínsiñedun lílana amu burí néchani houn. Lubaragiñe harufudahan ínsiñeni, adügarügüti relihión lun hageindagun gürigia luagu hani relihión luma lun ñein lan fánreinguaü haganagua gürigia luma burí lidan aban néchani luma amu. Abürühati Hans Küng, aban aturiahati luagu relihión, lidan tagumuchagüle liliburun to gíriboun El cristianismo y las grandes religiones: “Wuribu burí lánina polítika le ídanbei anihein lan háhabu lábutigu relihión ligía burí wuribu le hanarimetimabei”.

 Ani ligibuagun lira, ánhaaña saragu lábutigu relihión lun agamariduni mamarieidunga, ánhatiña giñe lun haganoun o hamarieidun bián wügüriña hámagua o bián würiña hámagua. Adügati katei le lun laganwoundun sandi, haragahóun irahüñü, dageinaü le mabusenrúnwati, magundani lidan familia luma lanarime igarigu luma idiheri.

“Dan le lachawahani luriban layumahan gürigia, ligía lábürühan lidoun ladügǘn le wuribabei. Lídangiñe burí luriban ayumahani le, liabin figóu.” (Santiagu 1:14, 15.)

Ladüga figóu le galagante wabéi, sun wagía gayarati wachararun. Ani wáfaaguña lun mígiraguagüdün wamá woungua lun wadügüni le wayumahabei (Éfesuna 2:3). Dan le wayumahan aban katei ani aba wadarirun chansi lun wadügüni, hénrengutimati katei, gama lumoun, anhein wadüga le wayumahabei, gayarabei weiri lan luriban resultóu lárigiñe.

Abürühati aban sásaamu gíriti P. D. Mehta: “Libe-agei wasufurirun wálugun woungua ladüga igaadua wamá, ladüga lanarime wáluahan wadügüni le layumahabei wágürügü o ladüga wasaminarun mosu lan wadügüni le wabusenrubei, ani ladüga giñe wafuudun áluaha lanwoun le aniheinhalibei wama”. Lanarime burí ayumahani luma bisiu luagu saragu katei kéiburi, binu, duroga, áhureruni luagu seinsu, agamariduni luma amu burí katei, ligía agadeirubalin habagari saragu gürigia ha meha inebewatiña ani barüti saragu asufuriruni houn haduheñu hama hamadagu. Kei le gafigoun habéi gürigia, lunti úara wamá luma dimurei tídangiñeti Bíbülia le: “Subudi wamuti luagu chülǘ lan lumoun dan le, sun ubóu le ladügübei Bungiu ayahuati lau igarigu” (Rómana 8:22).

Ariñagatu Bíbülia Satanási lan ‘lubungiutebei ubóu le’ ani resibi lan ídemuei hámagiñe sífirigu wuribatiña ani gabafutiña ha subudiwabaña kei máfianu (2 Korintuna 4:4; Arufudúni 12:9).

Ítara kei Satanási, busentiña máfianu lun hagía lan gamanihari hau gürigia ani lun heferidiraguagüdüniña. Subudi lumuti meha apostolu Pábulu inarüni le, ligía aba lubéi lariñagun: “Lugundun mama hama gürigia ha láutiña ǘgürügü luma abun wageindagua, hama burí sífirigu gabafutiña ha lánina wuribani yágüta iñu wageindagua, luma hama gumadi, lúrudugu luma ubafu lánina luburiga lidan ubóu le” (Éfesuna 6:12).

Íbini hínsiñe lan houn máfianu hasufuriragüdüniña gürigia, mama ligía súdinitimabei houn. Le habusenrubei, hadisedagüdüniña gürigia luéi Heowá, Bungiu le Íñugutimabei (Salmo 83:18, TNM). Taganagua fiú tídangiñe sádara to hayusuruboun lun heyeeduniña gürigia luma lun hagumadiruniña anihein taliihóun waruguma, abiñarahani luma aríaagüdüni. Ligía leweridirunbaliwa Heowá luéi burí peliguru le ani góunigi lumutiña sun ha busenbaña hebedaagun houn sífirigu wuribatiña (Santiagu 4:7).

Kéiburi bián-milu irumu guentó, ariñagatu Bíbülia “liábinburiba lan weyu hénrenguti lídounme lagumuhóun dan”.

Ani aba tafuranguagüdüni ka lan uagu: “Ladüga hóunguarügübei burí gürigia habusenra buiti, hínsiñebei seinsu houn, panta hagíame, barüguabaña houngua. [...] Mínsiñehabubaña, magudemehabu, marasualugubaña, siñabei hárügüdagun houngua, hanarimebaña, láganibaña sun le buídubei. Halugurubaña hamadagu, hadügüba burí katei mabuidunti meberesenga hagía kaba lan asusereda lárigiñe, hanarimebei hanaagun houngua, háluahabei hagundan guánarügü lubaragiñe hamuga háluahani Bungiu”. Chóuruti wawinwanduña lan lidan “lagumuhóun dan” ligía líbebei asufuriruni (2 Timotéu 3:1-4).

Según le akutiha wamaalibei ya, ma furanguti warihini siñabei lan lagumuchun wügüri lau sun asufuriruni, íbini busén lan ladügüni lau sun lugundan? Kábati uma wamuriaha ídemuei? Luma Bungiu le adügübaliwa. Füramasehaali “lagünrinchaguni luadigimari Mafia” hau sun lánigu (1 Huan 3:8). Layanuhaba le aban arütíkulu luagu le lunbei ladügüni Bungiu lun lagumuchun lau lébuna asufuriruni.