“Lídanme lidaani harúeihan urúeigu ha, ladügüba Bungiu le siélubei aban arúeihani le siñabei lagünrinchaguni ni lagumadiruni ni aban néchani, günringuarügü lubéi arúeihani ligía sun le líbiri arúeihani sunsuinagubei, ábame ladurarun lun súnwandan” (Danieli 2:44).

Aban arúeihani siéluna Larúeihan Bungiu, ani Hesukrístu urúeibei. Lárügüdübei halugaarun urúeigu ha guentobaña lun lachoururuni ladügǘn lugundan Bungiu ya ubouagu kei ladügǘniwa sielu (Matéu 6:9, 10). Úabei arúeihani ubouaguna agumuchuti lau Arúeihani ligía lugundun ligía “larúeihan[bei] Wabureme Wasalbaragüle Hesukrístu, le magumuchadibei”. Chóuruhali lubeiti ñeinbei lan darangilaü (2 Féduru 1:11).

“Arufudaguati Mafia guánarügü lungua kei ánheli le íchugubalin larugounga; ligía giñeti hafamarunbei ha eseriwidubaña lun keisi gürigia ha adügütiña buiti. Gama lumoun lachülürüba weyu lun heresibiruni le hadünabei luagu wuribani le hadügübei.” (2 Korintuna 11:14, 15.)

Lasubudirúaba luadigimari lan Mafia sun relihión mama inarüniti. Ani lagumuchaguba súngubei ubouagugiñe, úara luma ageindaguni burí luagu relihión luma burí lawiyurún hitaü. Ítarati, ha hínsiñehabubaña lun “Bungiu wínwanti ani inarüniti” gayarabei háhuduragun lun lau “aban afiñeni” luma “lau sífiri luma inarüni”. Chülüdügame dan lun ñein lan darangilaü luma úarani! (1 Tesalónikana 1:9; Éfesuna 4:5; Huan 4:23.)

“Búngiumemeba hama lun ligía lan Habungiute. Laragahabei sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei” (Arufudúni 21:3, 4.)

Lun ladügüni sun katei le, layusurubei Heowá Liráü, le íchugubalin libagari hawagu sun gürigia ubouagu (Huan 3:16). Lábugiñe lagumadihan Hesukrístu, ábame mafigounhaña lan gürigia.  Úaalime asufuriruni, lugundun ‘hámabei Bungiu’ ani laragahabei “sun háguira”. Yarafa madise, úabei figóu luma asufuriruni. “Galangantehabei gürigia buítiña múa, haganóuba giñe lidan súnwandan.” (Sálumu 37:29.)

“Aba lárügüdüni [Hesukrístu] düragón, le binadu hewe, le Máfiabei le Satanási, aba lagüraguni luagu milu irumu. Aba láguruni lidoun fusu le mébehabei le ñein lubéi ladaürei. Aba líchugun aban seyu luagu bena lun meyeehandigia laaña lan néchanigu darí lásügürün milu irumu.” (Arufudúni 20:2, 3.)

Lagumuchaguba habafu máfianu lugundun hagurúba lidoun “fusu le mébehabei”, le ñein lubéi siñabei lan hadügün ni kata. Siñabei hasigirun gamanihari hau gürigia. Wéiribei lubuidun ibagari lidan aban ubóu sin lubafu Satanási hama lumafianu!

Lagumuchuba lagumuhóun dan” lidan dan le unbei lagúara Hesusu “saragu asufuriruni”. Ariñagati: “Ladüga ñeinbei saragu asufuriruni le úagili libe lúmagiñe lagumeserun ubóu, úabei giñe lárigiñe” (Matéu 24:21).

Hanarimebei lidaani saragu asufuriruni lugundun lasusereduba katei le masuseredunñahagili, le lunbei lanügün lidoun “wuribu le lánina óunwenbu luéyuri Bungiu le Suntigabafu”, le hasubudirubei saragu gürigia kei “Arümahedón” (Arufudúni 16:14, 16).

Gürigia ha hínsiñehabubaña lun irichaü memeniha hanigi lagumuchun ubóu wuribati le. Ariha wamá fiúrügü lídangiñe saragu abinirúni le lunbei heresibiruni lábugiñe Larúeihan Bungiu.

Hawinwanduba “saragu gürigia” lidan aban iseri ubóu buin lau darangilaü: Ariñagatu Lererun Bungiu lau ichouruni ñéinbaña lan “saragu gürigia” darí lun siñabei lan habahüdǘn ha lúnbaña hásügürün lau ibagari lídangiñe “óunwenbu asufuriruni” ani hawinwanduba lidan iseri ubóu le richabei (Arufudúni 7:9, 10, 14; 2 Féduru 3:13). Sun lílana iseri ubóu ligía híchugubei uéiriguni luagu hasalbarun lun Hesukrístu, “[M]udún le lóunahabei Bungiu lun lagidaruni hafigoun gürigia” (Huan 1:29).

Lanügüba larufudahan Bungiu saragu buiti: Lídanme iseri ubóu ‘labuinchuba sun fulasu lau lasubudirúniwa luéirigun Bungiu’ (Isaíasi 11:9). Lidan arufudahani lúmagiñeti Bungiu ligía ñeinbei adundehani lun gayara lan hawinwandun gürigia lidan darangilaü hámagua íbini giñe luma líbiri katei le ladügübei Bungiu. Füramaseti Bungiu: “Au Aburemeibei le Bubungiute; arufudaha numuti le buídubei bun, adundeha numutibu luéigiñe üma le lunbei bafalaruni” (Isaíasi 48:17).

Habagaridayaba waduheñu hama wamadagu ha hilaguaañabaña: Dan le meha ya lubéi Hesusu ubouagu, saragüda lumuti Lásaru, le lumada (Huan 11:1, 5, 38-44). Arufuda lumuti katei le sun le lunbei ladügüni keisi urúei lidan Larúeihan Bungiu (Huan 5:28, 29).

Ñeinbei darangilaü luma irichaü lun súnwandan: Lábugiñe lagumadihan Kristu, lagumuchaguba marichaü. Ida liña wasubudiruni? Lugudun gabafuti Hesusu lun larihini ka lan tídanbei hanigi gürigia, ani gayarabei lasubudirúniña gürigia ha richabaña hama ha wuribabaña. Hame mabusenruntiña hígiruni luriban hémeri siñabei hawinwandun lidan iseri ubóu le lani Bungiu (Sálumu 37:9, 10; Isaíasi 11:3, 4; 65:20; Matéu 9:4).

Le warihibei dagá ya ligía fiúrügü lídangiñe saragu profesía tídangiñeti Bíbülia le arufudubalin sun katei buiti le lunbei liabin ámuñegü. Danme le lagumadihan Larúeihan Bungiu ligibuagu Ubóu, ñeinbei “darangilaü le dayarüti” súnwandan (Sálumu 37:11, 29). Ani sun katei le asufuriragüdübaliña gürigia lagumuchuba. Ru laali Bungiu lererun: “Arihabá, adüga numuti sun katei iserime. [...] inarüniti dimurei burí le, ani gayaraati lafiñerúniwa luagu” (Arufudúni 21:5).