1, 2. Ka efekütu lánibei ligaburi wagüriarúniwa luma le geyegubei wau wawagu?

LIGABURI wagüriarún luma sun le geyegubei wau wéiriti lani efekütu wawagu. Sánsiguatiwa lidan somu manera, hínsiñeti somu burí éigini woun ani óuseratiwa lidan somu manera. Susereti katei le libe-agei dan ladüga housan gürigia ha geyegubaña wau luma le asuseredubei lidan wabagari.

² Gama lumoun, anihein saragu katei lidan wabagari súdinitimati sügǘ lau éigini le hínsiñebei woun o ligaburi wasansiragun. Kei hénpulu, lúmagiñe ñǘbürigidiwa larufudahóun woun anihein lan katei buiti ani anihein lan giñe le moun lumuti wadügüni ladüga wuriba lan ani mabuidunti larihín. Saragu lídangiñe lunti desidírü hamani kada gürigia lidan habagari, lidan saragu kesi ámuñegueinarügüti hasaminan gürigia hawariuagua. Gayarati íbini desidírü wamá wadügün somu katei ladüga ligía lan lariñagubei wasaminan woun. Ariñagatu Bíbülia ‘íbini lan ha ibidiñehabubaña lun lilurudun Moisesi, adüga hamuti le lubeibei Bungiu láurügü lariñaguni haritagun guánarügü houn’ (Rom. 2:14). Mini lan san le dan le lan míchugun lan Bungiu aban lúrudu le ariñaguti lun madügün wamá somu katei, gayarati lan wasigiruni échuni luma katei burí le wafurendeirubei dan le ñǘbürigidiwa ani le kamanibei lidan fulasu le ñein lubéi weredera?

3. Ka bián resun uágubei mígiraguagüdün hamá kristiánugu houngua lun échuni luma lilurudun ubóu?

³ Tidan Bíbülia daritiwa íbini biama resun súdiniti le uágubei moun lumuti lan harihini kristiánugu katei ítara. Anihán le furumiñeti: “Anihein burí üma laganóun kamá suruti, gama lumoun óunweni lébehabei” (Ari. 16:25). Ladüga wafigoun, siñaguatiwa woungua lun wadundehani wémeri sin wachararun (Ari. 28:26; Jer. 10:23, TNM). Libiaman, ladüga Satanási lan, le “lubungiute ubóu le”, íchugubalin lilurudun ubouagu luagu le buídubei luma le wuribabei (2 Ko. 4:4; 1 Huan 5:19). Ligíati, anhein busén wabéi labiniruniwa Bungiu ani gunda ligíame wau, mosu wasigiruni adundehani le lídanbei Rómana 12:2 (aliiha huméi).

4. Kaba wakutiha lidan arütíkulu le?

 ⁴ Lidan arütíkulu le warihiba ǘrüwa katei súdiniti lídangiñe Rómana 12:2. 1) Ka uagu mosu lubéi wasansirun? 2) Ka mini lubéi asansiruni ligía? 3) Ida liña gayara lan wasansirun?

5. Kátima san un espechali lan dimurei le lídanbei Rómana 12:2?

⁵ Tidan ligaradan Pábulu houn Rómana, mama meha layanuhaña houn ha mafiñenbaña ni houn sun gürigia, layanuhaña meha houn kristiánugu anuadirúaaña (Rom. 1:7). Houn meha lariñaga lun hasansirun luma lun “hebé [lan] habagaridun keisi lirahüñü ubóu le”. Houn kristiánugu rómana ha awinwandubaña lidan dan ligía, lidoun burí irumu 56 lidan wadaani, mini lan meha dimurei “ubóu”, sun lúrudu, échuni, usa luma asansiraguni le uágubei hasubudirúa rómana. Lau lariñagun Pábulu “hebé habagaridun” mini lan lira añahein lan fiú kristiánugu óunserutiña ani saminatiña kei gürigia ha geyegubaña hau. Ida liña meha gani lan igaburi ligía efekütu hawagu?

6, 7. Dan le labürühanbarun Pábulu ligaradan houn kristiánugu, ka burí meha óuchawaguni úmabei hagagibudagua ladüga relihión luma ligaburi hawinwandun gürigia Roma?

⁶ Uguñe weyu, dan le houdin gürigia ebeluha Roma gayarati harihini dübü burí le erederubei lárigi binadu ábunaguni —fiú lídangiñe lúmagiñeti furumiñeti sígulu— kéiburi ténpulu, umuahaü, guáriua, fulasu le lánina huraraü tuma burí tiáturu. Dan le warihini lárigirugu katei burí le, íderagua lumutiwa lun gunfuranda wamani ligaburi hawinwandun luma háhuduragun binadu rómana. Ani tidan burí líburu to lánina sügǘ, adimurehóuati luagu lanarime burí wuribu le meha adügǘbei Roma, ásügüraguni tau burí karü lánina wuribu, drama luma burí músika luagu ámuñegueinarügü tema, anihein ligía nibusigaridünati. Aban meha giñe uburugu awanseti Roma ani ménrengunti meha hadarirun gürigia chansi ñein lun hagañeirun seinsu (Rom. 6:21; 1 Fe. 4:3, 4).

⁷ Lau sun gibe tan meha hatenpulun rómana ani gibe hagía habungiutegu, máfaaguntiña meha lun hadügün umadaguaü buiti hama búngiugu hagía. Ariha hamuti meha relihión kéirügü somu kultu le hadügübei dan le nasirua lan somu gürigia, lidan maríei luma lidan óunweni, kultu burí ligía adüga hamuti lidan habagari sagü weyu. Aban meha lanarime óuchawaguni katei le houn kristiánugu rómana. Saragu hádangiñe lidan meha katei ligía haweinamuda, ligíati, mégeitiña meha hasansirun lun kristiánugu hamá ha inarünitiña. Ani magumuti meha asansiruni ligía lidan luéyuri habadiseirun.

8. Ka uagu peliguru lubéi ubóu le houn kristiánugu?

⁸ Uguñe weyu, aban giñe peliguru ubóu le houn kristiánugu. Ka uagu? Lugundun anihein lani ubóu le sífiri lidan sun fulasu (aliiha huméi Éfesuna 2:2, 3 luma 1 Huan 2:16). Wawinwanduña sagü weyu laganagua  ayumahani, saminaü, lúrudu luma igaburi le lídanbei ubóu le, peligurutiwa lubeiti luéi wagumeserun óusera o asaminara kei lílana ubóu. Ligíati mosu lubéi wasigiruni ladundehan Pábulu lun wasansiruni ligaburi wóuserun luma lun mígiraguagüdün wamá woungua lun lubafu “ubóu le”. Ida luba wadügüni?

9. Ka asansiruni adüga hamaalibei saragu gürigia lubaragiñe habadiseirun?

⁹ Dan le laturiahani aban gürigia arufudahani le tídanbei Bíbülia ani winwanlei, aba lagumeserun adüga umadaguaü luma Bungiu. Arihíwati awanseruni ligía lidan asansiruni le ladügübei lidan libagari, kéiburi dan le lígiruni relihión mama inarüniti luma lau larufudun igaburi buiti kei meha ligaburi Kristu (Efe. 4:22-24). Sagü irumu gúndaatiwa lau warihin saragu milu gürigia ha adüga hamaali le lamuriahabei Bungiu hámagiñe lun gayara lan habadiseirun keisi gürigia deregeguaña houngua lun. Chóuruti gunda lan Heowá lau katei le (Ari. 27:11). Gama lumoun, súdiniti lun wasaminaruni le: anihán san sun asansiruni le mégeiwabei?

10. Ka uagu mama lubéi ligiaméme lasansirun aban gürigia lumoun labuiduragüdüni libagari?

¹⁰ Le linarün katei, dan le wayanuhan luagu asansiruni mama wayanuhaña luagu awanseruni o labuiduruntima aban katei. Kei hénpulu, gayarati lawisahóun luagu somu ebegidinaü luagu “buídutimahali” lan o labürüdǘn luagu lagei, gama lumoun ligiamémegili múnadagiñe, gayarati rúaarügü lan aban iseri aganagu lidoun o sánsiwarügü lan lagei. Ariñagatu aban líburu-agei luagu dimurei “sansi huméi ligaburi hisaminan” le lídanbei Rómana 12:2 mama lan ligiaméme lúaradun aban gürigia luma saminaü le lídanbei ubóu lumoun aban asansiruni múnadagiñe lun gürigia lau lubafu sífiri sandu. Ligíati, asansiruni le lunbei ladügüni aban kristiánu úati buídurügü lan lígiruni luriban échuni, layanuhóun bulagiadi luma magíaguni. Gíbetiña gürigia ibidiñeti tuáguti Bíbülia houn ani áfaaguatiña lun madügün hamani katei burí le. Kati mini lubéi asansiruni le lunbei ladügüni aban kristiánu?

11. Según lariñaguni Pábulu, ida liña ladügǘn asansiruni?

¹¹ Abürühati apostolu Pábulu: “Sansi huméi ligaburi hisaminan”. Dan le layanuhóun luagu saminaü gayarati wasaminarun luagun ubafu le wawagubei lun wasaminarun, gama lumoun, tidan Bíbülia yúsuati giñe dimurei le lun layanuhóun luagu katei burí le lídanbei hasaminan gürigia, luagu igaburi luma ubafu le hawagubei lun hasaminarun buidu. Tidan ligaradan houn rómana adimurehaali meha Pábulu hawagu gürigia ha arufudubaña ‘lagübüri saminaü, lun hadügüni le moun lubéi hadügüni’ ani ha gagaburibalin “salufuri, wuribani, [...] gimugaü, gáfarahadi, lanigiwa wuribu, eyeeraguni, ibibuni, marasualugu” luma amu burí katei wuribati (Rom. 1:28-31). Gunfurandawati lébuna lariñagun Pábulu houn gürigia ha aweinamudubaña lidan igaburi ligía ani lárigiñe aba heseriwidun lun Bungiu lun hasansiruni ligaburi hasaminan.

12. Ka hasaminanbei gürigia uguñe weyu? b) Ka uagu peliguru lubéi igaburi le houn kristiánugu?

 ¹² Híruti wawinwanduña lan haganagua hibe gürigia ha uágubaña ladimureha Pábulu. Háfuga saminatiña aban lan katei binaduhali gaganbadiwa lan lun lúrudu. Gíbetiña máisturugu hama agübürigu saminatiña gayara lan hadügüni gürigia le habusenrun ani ariñagatiña lunti lan “líbüre” lan saminaü. Según hagía, úati katei buiti ni wuribati, gayarati lan buidu lan o wuriba lan según ligaburi harihini. Íbini saragu hádangiñe ha ariñagubaña afiñe hamá luagu Bungiu ariñagatiña gayara lan hadügüni le habusenrun, mama lan mosu gaganbadi hamá lun lilurudun Bungiu (Sal. 14:1). Aban óunwenbu peliguru igaburi le woun, wagía kristiánugu inarünitiña. Mosu agagudúañu wamá, lugundun gayarati ladügün saminaü le lun maganbadi wamá lun adundehani le tíchugubei lóundarun Bungiu ani gayarati íbini ladügün lun wagumeserun ekehera luagu furumiñeguarügü katei le mínsiñebei woun. Gayarati íbini wagumeserun asaminara mabuidun lan adundehani tídangiñeti Bíbülia le weresibirubei luagu isebáhari, Internet o aturiahani tidan luban furendei íñuti.

13. Ka uagu lunti lubéi wakutihani lau taruman wanigi ka lan wagaburibei?

¹³ Ligíati, lun madügün lan ubóu le efekütu wawagu, mosu wakutihani lau sun wanarün ka lan wagaburibei, le wasandirubei, le wabuserunbei wadügün luma ka lan lúrudu wasigirubei. Háfuga marihínti katei le furangu. Másiñati ñéinbaña lan ariñagutiña woun aban wamá lubúein Bungiu buiti. Gama lumoun wagíarügüñein asubudirei anhein sansi láadiwa lubéi subudi le tídangiñeti Bíbülia o anhein awanhagua lubéi asansira lidan katei súdiniti le (aliiha huméi Santiagu 1:23-25).

14. Ka íderagubaliwa arihei ka lan asansiruni lunbei wadügüni?

¹⁴ Lunti lasuseredun asansiruni le múnadagiñe woun, ani lun wadügüni lanarime asansiruni le, mégeitiwa somu katei le gayarati lebelurun lidoun tulilin-agei wanigi. Kaba íderaguawa? Dan le wafurendeiruni ka lan lagurabubei Heowá wámagiñe según le bürüwañubei tidan Bíbülia, arufuda lumuti ligaburi wóunabun ka lan tídanbei wanigi ani adügati lun wasaminarun luagun asansiruni le lunbei wadügüni ‘lun wagunfulirun lau lugundan Bungiu’ (Rom. 12:2; Ebü. 4:12).

15. Ka luwuyeri asansiruni wibihibei dan le Heowá lan asansirubadiwa?

¹⁵ (Aliiha huméi Isaíasi 64:8.) Dimurei le layusurubei profeta Isaíasi arufudati aban katei le lunti wasaminarun luagun. Keisi múa, ida liña laransehaniwa Heowá, le nadagimeinbalin múa? Masansirun lumuti ligaburi warihín, háfuga lun buídutima lan warihín. Mama bóugudigiñe woun lasansirawa, múnadagiñe lasansirawa. Ánhawa ígiraguagüda woungua lun, lasansirubadiwa múnadagiñe wabiti, lidan amu dimurei, ligaburi wasandiragun woungua luma ligaburi wasaminan. Anihán le wabusenrubei lun mafalarun wamani igaburi le lídanbei ubóu le. Ida liña lasansiruniwa Heowá?

16, 17. a) Afuranguagüda huméi le ladügübei aban nadagimeinti múa lun ladügün aban gíndili le buiti? b) Ida liña tíderaguniwa Lererun Bungiu lun gebegi wamá ligibugiñe Heowá?

¹⁶ Lun ladügǘn aban gíndili le buiti, lunti buidu lan múa. Gama lumoun lunti ladügün nadagimeinti múa bián katei. Furumiñe, lunti lachibuni múa lun lagidaruni sun katei le mabuidunbei lidan. Ñéingiñe mosu lamigisiruni lau duna ani ñóugualeime lun buidu lan lesetirun lárigiñe ladügüni.

¹⁷ Ariha waméi luagu yusua lan duna dandu lun lachibúniwa múa kei lun lañoundawagún gayara láamuga lasalirun aban gíndili le gayarabei lahuudun. Ítara kei lasansiruni duna ligaburi larihín múa, ítara liña tasansiruniwa Lererun Bungiu. Íderagua tumutiwa lun masaminarun wamá kei meha wasaminarun dan le ibidiñegili Bungiu woun, ani  íderagua tumutiwa giñe lun gebegi wamá ligibugiñe Bungiu (Efe. 5:26). Ariha wamuti san ka lan uagu lariñawagúa woun saragu wéiyaasu lun waliihanu Bíbülia sagü weyu luma lun meferidirun wamani adamuridaguni le ñein lubéi taturiahóua Lererun Bungiu? Lugundun ítara liña wígirun lun lasansiruniwa Heowá (Sal. 1:2; Adü. 17:11; Ebü. 10:24, 25).

18. a) Ka uagu lunti lubéi wasaminarun anhein busén wabéi lun tasansiruniwa Lererun Bungiu? b) Ka burí álügüdahani lunbei wasaminarun luagu?

¹⁸ Úati buídurügü lan waliihanu Bíbülia ani furendei wagíame tídangiñe lun tasansiruniwa. Añahein saragu gürigia aliiha hamutu Bíbülia ani subuditi tuáguti houn buidu. Háfuga darihadün gürigia ítaratiña lidan fulasu le ñein lubéi hapurichiha. Añahein hádangiñe ariñaga hamuti bérusu tídangiñeti Bíbülia lídangiñe hachügü. * Lau sun lira, mániti subudi le ni murusun efekütu lidan ligaburi hawinwandun. Ka hemegeirubei? Lun gayara lan tasansiruni Lererun Bungiu aban gürigia, mosu lígirun lun tachülürün tidoun lanigi. Lun gayara lan lasuseredun le mosu wasaminarun luagu le wafurendeirubei tídangiñe Bíbülia. Súdiniti wálügüdagun woungua: “Chouru numuti san súdinitima lan le nafurendeirubei luéi burí saragu arufudahani málati le larufudahabei relihión? Marihin nágili san lidan nibagari ligía lan inarünibei? Ariha numuti san ida luba lan gayara lan nayusuruni lugumadin Bungiu lidan nibagari, o ariharügü numuti kei aban katei le lunbei narufudahani houn amu gürigia? Sanditina san layanuhaña lan Heowá nun?”. Ánhawa asaminara luagu álügüdahani burí le, laganwounduba ínsiñeni le wasandirubei luagu Heowá. Danme le wasandiruni ínsiñeni ligía tidan wanigi tínchahabadiwa lun wadügüni asansiruni le wemegeirubei (Ari. 4:23; Luk. 6:45).

19, 20. Ka adundehani tídangiñeti Bíbülia lunbei wasigiruni lun lanügün saragu abinirúni woun?

¹⁹ Línchahabadiwa waliihanu Lererun Bungiu súnwandan luma wasaminarun luagun le waliihabei lun wasigiruni ladundehan Pábulu le: “Kei ígira humaali lan binadu higaburi luma le burí meha hadügübei. Iserihali higaburi le iserideinábei keimeme ligaburi Bungiu guánarügü le adügübalin” (Kol. 3:9, 10). Anhein gunfuranda wamá sun le tarufudahabei Bíbülia ani adüga wameime le wafurendeirubei, wasansirubei wagaburi, le lunbei líderaguniwa lun méiguadun wamá tidoun lisadaran Satanási.

²⁰ Haritaguagüda lumutiwa apostolu Féduru: “Keisi isaanigu gaganbaditiña, mabagarida humá kei meha ligaburi habagaridun lubaragiñe hasubudiruni Bungiu”. Ani lárigiñe, aba lasigirun ariñaga woun lunti lan haruma lan wóuserun (1 Fe. 1:14, 15). Ánhawa áfaagua lun wígiruni sun saminaü luma usa le meha wawagubei lidan dan le sügühalibei ani ígira wagía lun lasansiruniwa Bungiu, weresibiruba saragu abinirúni. Ligíaba katei le wariha lidan le aban arütíkulu.