Ariñagati aban abürühati luagu dan le sügühalibei, gíriti Edward Herbert: “Le siñabei feruduna lan amu gürigia günringua lumutu burichi to lunboun ñéingiñeba lan lásügüra”. Abürühati le wínwanti meha lidan sígulu XVII, ani le lariñagubei arufudati aban lídangiñe resun le uágubei lunti lan feruduna wamaniña amu: lugundun lachülürüba giñe oura lun wamuriahan ferudun (Matéu 7:12). Gama lumoun anihein aban resun súdinitimati, ani ariñaga lumuti apostolu Pábulu woun katei lan resun ligía. (Aliiha huméi Kolosana 3:13.)

Kei le gafigoun wabéi, anihein dan wadügün o wariñagun somu katei le adügüti lun hagañidun amu wama, o anihein dan hagía lan adügei woun (Rómana 3:23). Ka gayarabei wadügüni lun lidan wamá darangilaü hama amu? Lau ladundehan Bungiu, ariñagati Pábulu woun lun magarihabu wamá ani lun feruduna wamaniña ha achararutiña woun. Ani huuti adundehani le guentó kei meha dan le labürüdǘnwabei kéiburi bián-milu irumu guentó. Akutiha waméi le lariñagubei.

“Gaguraasun humá hubaruagua.” Dimurei burí le sagawati lídangiñe aban dimurei güriegu le arufudubei mosu lan wawandagun wóuniwagua. Ariñagati aban abürüdǘni tídangiñeti Bíbülia ha lan kristiánugu ha gaguraasuntiña habá amu “aransetiña lun hawanduniña gürigia ha agañidagüdübaliña lau hachara o lau hagaburi”. Dan le lariñagun ñein “hubaruagua” mini lan mosu lan gaguraasun wamá habá amu ani gaguraasun hagíame wabá. Lidan amu dimurei, dan le wasubudiruni anihein lan somu igaburi wawagu le gayarati lagañidagüdüniña amu, mígirunbadiwa lun ladügün katei le mínsiñebei woun hawagu amu lun lásiñarun wawinwandun lidan darangilaü. Ánheinti adüga somu gürigia aban katei le gáriti woun?

“Ferudunagua hugíame húmawagua.” Dan le layanuhan luagu dimurei güriegu le ásügürawagüdübei kei ‘ferudun’, ariñagati aban abürühati “mama lan aban dimurei furumiñeguarügü, hulilitimati lan le mini lubéi dimurei ligía lun lafuranguagüdüni sun le mini lubéi gudemehabu”. Ámuya líburu afuranguagüdatu gayara lan mini lan dimurei le “lichugún aban katei buiti, aban fulesei”. Gudemehabutiwa dan le aranse wamá lun feruduna wamá aban gürigia íbini gadurun lan woun. Gama lumoun, ka uagu mosu lubéi wadügüni? Aban resun, ladüga háfuga málübadiwa emegeira lun lagiribudagüdüni fulesei le woun lau feruduna lániwa.

“Ítara kei feruduna lanün [Heowá], ítarala giñe hadüga.” Anihán resun súdinitimati le uágubei mosu lan feruduna wamaniña ha achararutiña woun: lugundun feruduna lumutiwa Heowá sin lareidun igarihabu (Mikeasi 7:18). Samina wamá luagu lanarime fulesei le ladügübei Heowá woun sun wagía le gafigounbei ani aba wasakürihan. Ani mafigounhanti Bungiu kei wagía. Gama lumoun, feruduna lumutiwa lau sun lugundan sin lareidun igarihabu lau sun subudi lan lun luagu memegeirunbei lan lun feruduna wamani. Chóuruti Heowá lan hénpulu le buídutimabei lun wasubudiruni le mini lubéi ferudun.

Adügati lugudemehabu Heowá lun wayarafadun lun ani lun wáyeihani (Éfesuna 4:32–5:1). Buiti lun wálügüdagun woungua: “Anhein feruduna lubadina Heowá lau saragu gudemehabu, ida luba úabei lan ferudun nani aban gürigia gachararaditi kei nuguya le asakürihaali luagu le ladügübei nun?” (Lúkasi 17:3, 4).