1, 2. Ka ladügübei Hesusu lárigiñebei lefeduhani Luéyuri Esefuruni hama lani apostolugu ha úaraguabaña lidan irumu 33?

GÚÑEELI, ani gumeseeli weyu 14 lidan nisán irumu 33. Sun liña lefeduhani Hesusu hama lani disipulugu Luéyuri Esefuruni, luéyuri laritawagún hesefurun binadu hagübürigu lídangiñe amudirawaguni Ehiptu. Gama lumoun, chülümémeeli lóurate hibihin lani Hesusu disipulugu aban esefuruni le wéiritimati, “asalbaruni magumuchaditi”. Larugan, (ligiamémegili weyu 14 lidan nisán), lóunweba meha Hamaisturun háhaburugu láganiñu. Gama lumoun katei wuribati le ábanbei abinirúni lárigiñe: hitaü sin figóu le meha lunbei láwiyuruni Hesusu ladügüba lun hesefurun gürigia ubouagu lídangiñe figóu luma óunweni (Ebü. 9:12-14).

² Lun lachoururuni lun mabulieidun hamani lani disipulugu ligaburi larufudún ínsiñeni le, aba ladügün Hesusu aban fedu irumu-auti leweñeguame Luéyuri Esefuruni. Aba lagubachagunu aban fein to maganatu lébini, aba lásügüragüdünu houn unsu lani apostolu ha úaraguabaña ani aba lariñagun houn: “Núgubu le, le lunbei lederegerún huagu. Lúmagiñe guentó, adüga huméi le, haritaguagüleme nuagun. Ítarameme giñe, lárigiñe heigin, aba lanügüni weru tau diwéin, aba lariñagun: ‘Anihán nita le lunbei láwiyurun lídangiñe núgubu huagu, lun lagunfulirun iseri daradu’” (Luk. 22:19, 20).

3. a) Ka óunwenbu asansiruni asuseredubei lárigiñe lounwen Hesusu? b) Ka álügüdahani lunbei wadügüni wóuniwagua luagu furíei le lídanbei Huan kapítulu 17?

³ Yarafaali meha lóurate lagumuchun daradu lánina Lúrudu le ladügübei Bungiu hama ísüraelina. Yarafaali meha lidaani lasansirúniwa luagu aban iseri daradu luma Heowá hama lani Hesusu disipulugu ha anúadiruañabaña. Mabusenrunti meha Máisturu lun lasuseredun lun iseri néchani le kei meha lasuseredun houn binadu ísüraelina. Máraninaali meha fánreinguaü le hádanbei ísüraelina lidan katei le lánina habagari, relihión,  katei burí le adügübei lun marihín lan liri Bungiu kei aban katei sánduti (Huan 7:45-49; Adü. 23:6-9). Busenti Hesusu lun lidan hamá úarani lánigu lun gayara lan híchugun uéiriguni lun liri Bungiu. Ligía aba lubéi ladügüni furíei buídutimati le gayarabei laliihani aban gürigia (Huan 17:1-26; ariha huméi dibuhu le lídanbei lagumeseha arütíkulu). Lídanme awanha lan akutihei, álügüdagua wamá woungua: “Óunaba lumuti san Bungiu lafurieidun Liráü? Nawinwanduña san según le naliihabei lidan furíei ligía?”.

4, 5. a) Ka wafurendeirubei lídangiñe lagumeseha lafurieidun Hesusu? b) Ida liña lóunabun Heowá lun le lamuriahabei Hesusu?

⁴ Áriebuduati lau Hesusu ayanuha hama lani disipulugu, ruti ariñahani súdiniti houn luagu Bungiu. Ábati larihin sielun aba lafurieidun ítara: “Núguchi, chülüha nidaani; ruba uéiriguni lun Biráü, ru láamuga giñe Biráü uéiriguni bun. Rúhadibu ubafu lun Biráü hawagu sun gürigia lun líchugun ibagari magumuchaditi houn ha bíchugubaña lun. [...] Rúhadina uéiriguni bun ya ubouagu, gumú nan giñe le uágubei bóunahana. Guentoti Núguchi, rubei uéiriguni lememe meha nánibei buma lubaragiñe meha ñein lan ubóu” (Huan 17:1-5).

⁵ Ariha humuti san lidan furumiñeti burí dimurei le lariñagubei Hesusu lidan lafurieidun ka lan súdinitimabei lun? Furumiñe busenti meha lun leresibiruni Lúguchi le siélubei uéiriguni le yuubei lun. Le lamuriahabei lidan furíei le genegeguati saragu luma le lamuriahabei lidan furíei le gíribei Waguchi Bungiu: “Wáguchi le siélubei, inebewalá biri” (Luk. 11:2). Lidan libiaman lúgaaru, saminati Hesusu hawagun lani disipulugu; busenti meha líchugun “ibagari magumuchaditi” houn. Agumuhóuni aba lamuriahani le labusenrubei. Aba lamuriahan luma Lúguchi: “Rubei uéiriguni lememe meha nánibei buma lubaragiñe meha ñein lan ubóu”. Ida liña meha san lóunabun Heowá? Ruti lun Liráü le úaraguabei lóugiñe le lamuriahabei luma: “aban iri íñugutimati hawéi [ánheligu]” (Ebü. 1:4).

6. Ka meha lunbei hadügüni apostolugu lun hibihin ibagari magumuchaditi, ani ida liña wasubudiruni resibi hamani?

⁶ Lidan lafurieidun Hesusu, ayanuhati giñe luagu le lunbei wadügüni sun gürigia ha gafigounbaña lun wibihini idewesei lánina ibagari magumuchaditi le líchugubei Bungiu woun íbini madüna wamani (aliiha huméi Huan 17:3). Ariñagati mosu lan wasigirun ‘asubudiraña’ dandu Bungiu kei Kristu. Mini lan le úati lan buídurügü lan wasagaruni sun ariñahani le wayaraati hawagu; mini lan mosu lan giñe wawinwanduni le wafurendeirubei. Gumeseeña meha lani Hesusu disipulugu adügei katei le, ligía lariñagunbei lun Lúguchi: “Ru naali uganu le bíchugubei nun houn ani resibi hamuti” (Huan 17:8). Ani anhein meha busén habéi wügüriña úaraguatiña ha hibihini ibagari magumuchaditi, mosu meha hasigirun asaminara luagun lererun luma ladundehan Bungiu ani winwan hameime sagü weyu darí lagumuchun habagari lidan Ubóu le. Adüga hamuti san? Anha. Ani subudi wamuti ladüga redei lan hiri bürüwañu lun súnwandan luagu 12 dübü le lebu Iseri Herusalén le siélubei (Aruf. 21:14).

7. Ka mini lubéi lasubudirúniwa Bungiu, ani ka uagu súdini lubéi?

⁷ Según fiú hádangiñe ha aturiahabalin iñeñein güriegu dimurei le ásügürawagüdübei “lun hasubudirunibu”, gayarati giñe lásügürawagüdün kei “sigí humá asubudira”. Ligíati, dimurei “lun hasubudirunibu” mini lan mosu lan wasigirun afurendeira luagu Heowá sagü weyu. Gama lumoun lun lasubudirúniwa Bungiu le wéirigutimabei lidan sun ubóu úati buídurügü lan gunfurandawa lan ligaburi luma ka lan lugundanbei. Mosu  ladügǘn aban umadaguaü buiti luma luma hama wíbirigu lidan afiñeni, lun ínsiñeni lan lébuna umadaguaü ligía. Ligía tariñagunbei Bíbülia: “Le mínsiñehabuti, ibidiñegili Bungiu lun” (1 Huan 4:8). Lasubudirúniwa Bungiu mini lan giñe gaganbadi lun (aliiha huméi 1 Huan 2:3-5). Aban óunwenbu chansi lúmagiñe Heowá hadan wamá ha asubudirubalin! Gama lumoun, gayarati leferidirúniwa aban umadaguaü buiti, ítara liña larufuduni le ladügübei Húdasi Isükariote. Áfaagua wamá lun wakipuruni. Ítara, danme le lachülürün oura, gayarabei weresibiruni idewesei le lánina ibagari magumuchaditi (Mat. 24:13).

8, 9. Ka meha súdinitimabei lun Hesusu lidan lani ministeriu, ani ka arufudahani gayarabei rárama lani?

⁸ Lárigiñe waliihani furíei le lídanbei Huan kapítulu 17, ka gayarabei lasaminarun mínsiñe hamá meha lani Hesusu apostolugu lun hau sun disipulugu ha lúnbaña hayabin lárigiñe? (Huan 17:20.) Gama lumoun, lunti gunfuranda wamani mama lan meha wasalbarun lébunabei liabin Hesusu, le meha súdinitimabei lun lúmagiñe lagumeseha darí lagumuchun lani ministeriu ubouagu, larumadahani liri Bungiu luma líchugun uéiriguni lun. Kei hénpulu, dan le lafuranguagüdünbalin tidan luban adamuridaguni Nasarétü ka lan lébunabei liabin ubouagun, aba laliihan tídangiñe liliburun Isaíasi: “Anihein lani Bungiu [s]ífiri [s]andu nuagu, ladüga anúadira láadina lun níchuguni uganu buiti houn gudemetiña”. Chóuruti írida lani Hesusu liri Lúguchi furangu dan le laliihanbalin dimurei burí ligía (Luk. 4:16-21).

⁹ Lidan harufudahan huríu, saragu dan lubaragiñe liabin Hesusu ubouagun, adügatiña meha máisturugu ha lídanbaña relihión lun mayusurun hamani gürigia liri Bungiu. Gayarati wachoururuni rárama lani Hesusu arufudahani ligía lugundun kóntürati luagu le tarufudahabei Bíbülia. Aba lariñagun houn láganiñu: “Au, lau liri Núguchi niabin, ani meresibirun humutina; anhein ñübuin amu lau liri lungua, ligíaba heresibira” (Huan 5:43). Ani fiú dan lubaragiñe lounwen, ariñaga lumuti kátima lan súdinibei lidan libagari dan le lamuriahan luma Lúguchi: “Rualá uéiriguni lun biri” (Huan 12:28). Moun lumuti taweiridun wanigi  luagu layanuhóun luagu katei le saragu wéiyaasu lidan furíei le wakutihabei.

10, 11. a) Ka ladügübei Hesusu lun lasubudiragüdüni liri Lúguchi houn lani disipulugu? b) Ka uagu mosu lubéi wawadigimaridun lau saragu ubebeni lidan wani ministeriu uguñe weyu?

¹⁰ Ariñagati Hesusu lidan lafurieidun: “Subudigüda naali houn ha basagarubaña lídangiñe ubóu lun bíchuguniña nun, kátabu lan [o ka lan biri]. Bánigu meha, aba bíchuguniña nun; ani ñǘdüntiña lau le bubeibei”. Ani lárigiñe, aba lasigirun ariñaga: “Au, meredeedina ubouagu; anhein hagía, herederuba. Au, néibuga bumoun. Núguchi Sánduti, góunigibaña ha bíchugubaña nun lau bubafu, lun lidan hamá aban le tímatimaati kei au buma” (Huan 17:6, 11).

¹¹ Dan le lasubudiragüdünbalin Hesusu liri Lúguchi houn lani disipulugu, mama ariñagarügü lumuti liri houn. Íderagua lumutiña giñe lun gunfuranda hamani ka lan mini lubéi iri ligía: sun lubuidun burí ligaburi Bungiu luma ligaburi lóuseruniña gürigia ubouagu (Afu. 34:5-7). Ani guentó, lúmagiñe liñun lubara sielu, íderagua lumutiwa Hesusu lun wasubudiragüdüni liri Heowá lidan sun Ubóu. Kame san? Lun wóundaraguniña sun gürigia ha wayaraatiña lubaragiñe lagumuchagun ubóu wuribati le. Dánmeti le lachülürün dan ligía, lesefurubaña Heowá lánigu Gefentiña ha úaraguatiña lun ani ábame lichugún uéiriguni lun óunwenbu liri (Ese. 36:23).

12. Ka ǘrüwa katei wemegeirubei lun buidu lan lidin woun lidan wadagimanu lánina asalbaruni?

¹² Adüga lumuti Hesusu sun liyaraati lun larufudahan houn lani disipulugu lun hiñuragun lídangiñe hadebilin, aban katei súdiniti lun gayara lan hagumuchuni wadagimanu le meha líchugubei houn. Aba lafurieidun Hesusu: “Kei bóunahanina hadoun lánigu ubóu lau uganu lánina asalbaruni, ítara giñe nóunahaniña hadoun lánigu ubóu”. Lidan lafurieidun afuranguagüdati ǘrüwa katei súdiniti le lunbei líderaguniña lun hagunfuliruni wadagimanu súdiniti ligía. Furumiñe, amuriahati lun mama hamá lánigu ubóu wíyeti le lábugiñebei lubafu Satanási lani disipulugu. Libiaman, lun gaganbadi hamá lun Lererun Bungiu ani kípugua hagíame houngua harumañu. Lárigiñe, amuriahati luma Lúguchi saragu wéiyaasu lun lidan hamá úarani lani disipulugu kei ligía luma Lúguchi. Ligíati, kada aban wádangiñe lunti wálügüdagun woungua: “Úarati san nóuserun luma ǘrüwa katei le lamuriahabei Hesusu?”. Afiñeti meha Hesusu ánhaña lan áfaagua lani disipulugu lun hagunfuliruni ǘrüwa katei le, hafiñeruba lan sun gürigia ubouagu luagu Bungiu lan óunahabalin (aliiha huméi Huan 17:15-21).

13. Ida liña meha lounabún lafurieidun Hesusu lidan furumiñeti sígulu?

¹³ Ounabúati san lafurieidun Hesusu? Anha, ítara liña tarufuduni líburu to asigiruboun lárigiñe gádürügübei Ewanhéliu: Adügaü. Anhein wasaminara katei buidu, ménrengunbei meha lafanreinragun damuriguaü kristiánu le lánina furumiñeti sígulu, lugundun añahein meha huríu hadan, añaha mama huríu, añaha rísitiña hama gudemetiña, añaha idamuni hama iyubudirigu. Gama lumoun, wéiriti meha úarani hadan darí lun konpararua hamá luma lumegegun aban úgubu lau Hesusu keisi ichügü (Efe. 4:15, 16). Aban óunwenbu milaguru lira lidan ubóu lani Satanási le fánreinguñu liñabei. Lunti Heowá sun uéiriguni luagu katei le, lugundun ligía adügübei lun lasuseredun lau lubafu lani sífiri sandu (1 Ko. 3:5-7).

14. Ida liña lóunabuni Bungiu lafurieidun Hesusu uguñe weyu?

¹⁴ Híruti aba lan lagumuchagun lubuidun úarani ligía lárigiñebei hóunwegun apostolugu. Leweñegua úarani aba liabin ebedaaguni lun arufudahani inarüniti, ligía adügübei lun lagibedun sun luwuyeri afiñeni mama inarüniti ubouagu (Adü. 20:29, 30). Gama lumoun, lidan irumu 1919 aba lesefuruniña  Hesusu lani disipulugu ha anuadirúañabaña lídangiñe relihión mama inarüniti ani aba lóundaraguniña lun hagundaarun lidan ínsiñeni “le íchugubalin sun katei lidan aban” (Kol. 3:14). Lau hawadigimari lánina apurichihani, adügaali liraüraü sétanu le lun hóundarun hóugiñe sedü míñunu “amu mudún” ha “lídangiñetiña sun fulasu, sun rasa, sun iñeñein luma néchani” úara hama keisi ábanrügü sétanu (Huan 10:16; Aruf. 7:9). Chóuruti óunaba laali lan Bungiu lererun Hesusu le lidan aban manera espechaliti: “Subudi láamugei ubóu luagu bóunahan lan au, ani hínsiñe hamá bun saragu kei nínsiñe bun” (Huan 17:23).

15. Ka lamuriahabei Hesusu luagu hafulesein lánigu disipulu ha anúadiruañabaña?

¹⁵ Lidan guñoun lánina 14 lidan nisán ligía, aban guñoun le lunbei laritawagún súnwandan, fiú oura lubaragiñe lafurieidun Hesusu, ruti uéiriguni houn lani apostolugu, lidan amu dimurei, ruti inebesei houn. Ida? Lau ladügün aban daradu hama lun gayara lan harúeihan luma lidan Larúeihan (Luk. 22:28-30; Huan 17:22). Lárigiñe, aba lamuriahan hawagu sun ha lúnbaña lánigu hamá disipulu ha anúadiruaaña: “Núguchi, buguya íchugubaliña nun, busentina lun númabaña lan le ñein numuti, lun harihini uéiriguni le bíchugubei nun; ladüga hínsiñegubeiñadina bun lubaragiñe ladügǘniwa ubóu” (Huan 17:24). Lubaragiñe hasandirun gimugaü, gúndaarügütiña amu mudún hawagu hánigu paaná ha anúadiruañabaña. Anihán ábanya katei le arufudubalin úarani le aniheinbei hadan kristiánugu inarünitiña uguñe weyu.

16, 17. a) Lidan lagumuchuni Hesusu lafurieidun, ka lariñagubei lasigiruba lan adügei? b) Ka katei lunbei wáfaagun lun wadügüni?

¹⁶ Ladüga relihión burí le ubouagubei, hibe-agei gürigia desidírühaña lun masubudirun hamani luagu anihein lan aban sétanu gürigia ha eseriwidubaña lun Heowá ani inarüni lan luagu subudi lan houn. Ligiaméme meha asuseredubei lidan furumiñeti sígulu, ligía lagumuchunbalin Hesusu lafurieidun lau dimurei burí le: “Núguchi richaguati, ibidiñetibu houn lílana ubóu; gama lumoun subuditibu nun, subudi hamaali giñe wügüriña ha luagu bóunahan lan au. Subudigüda naali houn kátabu lan, ani nasubudiragüdamemebadibu, lun ñein lan ínsiñeni le buágubei nun hadan, lun giñe ñein nan hadan” (Huan 17:25, 26).

¹⁷ Ka gayarabei lariñagun luagu múaran lan libagari Hesusu luma le lariñagubei lidan furíei? Ligía lichügüdinabei damuriguaü ani anihagua íderaguawa lun wasubudiragüdüni liri luma lugundan Lúguchi. Sigí waméi ladundehan súnwandan; gaganbadi wamá lun lugumadin lun wapurichihan adüga wagíame disipulugu lau ubebeni (Mat. 28:19, 20; Adü. 10:42). Góunigi waméi giñe lubuidun úarani le wádanbei. Ítara luba wawinwandun úara luma lafurieidun Hesusu, wíchuguba uéiriguni lun liri Bungiu ani gúndaabadiwa lun súnwandan.