Afuranguagüda lumuti Agumesehani, furumiñetu líburu to tídanboun Bíbülia, lau fiú dimurei ida liña lan lagumeserun sun katei: “Dan le lagumeserunbei sun katei, aba ladügüni Bungiu sielu luma ubóu” (Agumesehani 1:1). Lárigiñebei ladügüni sun tídibu wewe, sagadi hama animaalugu, aba ladügüni Bungiu Adán tuma Ewa, bián furumiñetiña gürigia ha ladügübaña ubouagu. Mítarantiña meha kei animaalugu, lugundun adüga lumutiña Bungiu lun harufudun igaburi libe le luágubei, aban lídangiñe, líbürei lun desidírü hamá. Gayarati meha hóunabun luagu le desidírü habéi. Lun hamuga meha gaganbadi hamá lun ladundehan Bungiu le adügübaliña, gayarabei hamuga meha hagübürigu hamá gürigia ha lúntiña hagundaarun lun súnwandan lau ibagari sin figóu ani buin lau darangilaü ubouagu, ítara kei meha labusenruni Bungiu.

Gama lumoun, aba leyeeduniña aban ánheli gürigia ani aba ladügagun lungua Satanásime, mini lan iri le “Kóntürati”. Yúsuti aban hewe lun leyeedunu Ewa. Aba lariñagun tun buídutimabei lan lidin tun sin ladundehan Bungiu. Ábati hafalaruni Adán tuma Ewa le lariñagubei Satanási houn, ani aba madügün hamá gasu lau Habungiute. Ladüga luriban desidírü hamá, aba heferidiruni furumiñetiña wagübürigu chansi lun hawinwandun lun súnwandan ani aba hásügüragüdüni figóu luma óunweni woun.

Lau lóufudagun, aba lafuranguagüdüni Bungiu lisaminan lun laransehani turóbuli ligía ani ru ligíame chansi houn lirahüñü Adán lun hawinwandun lun súnwandan. Ariñagati ñeinbei lan aban ‘adügawaguni’ —aban gürigia— le lunbei lagumuchun lau Satanási ani gumuguagüdaleime asufuriruni le gádanbaliwa ladüga Satanási hama Adán tuma Ewa (Agumesehani 3:15). Káteiti ‘adügawaguni’ le? Lau lásügürün dan lasubudirúaba meha.

Sun dan ligía, anihagua meha Satanási áfaagua lun ladügün lun magunfulirun lan lisuuni Bungiu, ani aba laganwoundagún figóu luma wuribani lau lóufudagun. Ligía aba lubéi desidírü lan Bungiu lanügün aban Gunran lun lagumuchun hau sun gürigia wuribatiña. Ariñagati meha lun Noé lun lan ladügün aban árüka —aban óunwenbu gafu to gayarati táfayarun— lun lesefurun hama lufamilian, ítara kei animaalugu ha meha lúnbaña lebelaagüdüniña tidoun.

Aban irumu lárigiñe lagumeserun Gunran, aba láfuridun Noé hau lufamilian tídangiñe árüka. Harumaali meha Ubóu. Gama lumoun, machülaagungili meha ‘adügawaguni’.

(Sagawati lídangiñe Agumesehani 1 darí 11, Húdasi 6, 14 luma 15 luma Arufudúni 12:9.)