1. Ka idan amu lan gunfuranda hamani gürigia dimurei idamuni luéi luwuyeri idamuni le uágubei layanuha Rómana 6:22?

MÍTARANTI eseriwiduni keisi lidamun Bungiu kei gunfuranda hamani gürigia dimurei idamuni. Houn saragu gürigia mini lan dimurei idamuni houserúniwa gürigia wuriba ani lau furundei. Ánheinti idamuni ha uágubaña tayanuha Lererun Bungiu, seriwitiña idamunime lau sun hagundan lugundun lun aban Iyubudiri gudemehabuti heseriwida. Le linarün katei, dan le lariñagunbei apostolu Pábulu houn kristiánugu lun heseriwidun keisi ‘lidamun Bungiu’, línchahañanu meha lun hadügüni ladüga línsiñe Bungiu houn (Rom. 6:22). Ka mini lubéi luwuyeri amudirawaguni le? Kaba wadüga lun meseriwidun wamá lidamunme Satanási luma ubóu le lábugiñebei lubafu? Kaba san afayeiruahaü hibiha lidamun Heowá ha úaraguabaña lun?

2. a) Ka meha adügübei lun mabusenrun lan aban musu lalibürerúniwa? b) Ka meha mini lubéi lafudurúniwa larigei aban musu?

² Lúrudu le líchugubei Heowá houn ísüraelina íderagua lumutiwa lun gunfuranda wamani ka lan hawuyeri idamuni labusenrubaña. Mosu meha halibürerúniwa idamuni ha huríu lárigiñe sisi irumu hau eseriwida kei idamuni (Afu. 21:2). Gama lumoun anhein weiri lubéi línsiñe liyubudiri idamuni ligía lun ani busenti lasigirun eseriwida lun, anihein meha aban katei lunti ladügüni según Lúrudu. Mosu meha labadüleragüdüni iyubudiri lidamun luagu aban bena, o luagu lumarükun bena, ani ábame láfuduruni larigei lau aban katei le gágiriti (Afu. 21:5, 6). Ka uagu? Lidan ebüréu, yúsuati aban dimurei lun layanuhóun luagu gaganbadi, ani aganbuni mini lubéi dimurei ligía. Ligíati, dan le ladügǘn huyu luagu larigei aban musu, aba meha sínbolu luagu busén lan lasigirun eseriwida lun liyubudiri lau gaganbadi. Íderagua lumutiwa le lun gunfuranda wamani ka lan mini lubéi wederegeragun woungua lun Heowá. Mosu gaganbadi wamá lun ladüga hínsiñe lan woun.

3. Ka uagu wederegeragua woungua lun Bungiu?

³ Lubaragiñe wabadiseirun desidírütiwa weseriwidun lun  Heowá, lun lumusuniña wamá. Ani dan le wederegeragun woungua lun, ariñagatiwa lun busén wamá gaganbadi wamá lun luma lun wagunfuliruni lugundan. Mama fósuwarügütiwa. Íbini ha nibureintimagiña deregeguatiña houngua lun Bungiu ani badisei hagía lau hagundan, mama lúnrügü hagundaaragüdüniña hagübürigu. Ítara liña, ínsiñeni luagu Heowá, Wabureme le siélubei, adügübei lun wederegeragun woungua lun. Abürühati apostolu Huan: “Ladügǘniwa le lubeibei Bungiu, ligía ínsiñehabunibei lun” (1 Huan 5:3).

4. Ida liña aba lan ‘lidamun wamá Bungiu lun wadügüni le labusenrubei’?

⁴ Wéiriti weteingiruni Heowá luagu lígiruniwa lun weseriwidun lidamunme. Sefu láadiwa wafiñen luagu lani Hesusu sákürifisiu lídangiñe figóu. Ani lau sun gafigoungidiwa lan, ánhaadiwa weseriwidun lun Heowá luma lun Hesusu ani ariha wamutiña keisi wayubudirigu. Afuranguagüda lumuti meha Pábulu katei le tidan burí ligaradan. Aba lariñagun: “Rugua humá hungua keisi hilaguaaña lun figóu, gama lumoun, wínwanñu lun Bungiu, lidan aban luma Kristu Hesusu le Wabureme”. Lárigiñe aba lariñagun: “Ibidiñeti san hun luagu le lan unti híchaagua hungua lun hidin lau le lubeibei lidamuñadün lan? Gayaraati lubeiti hanúadahan kaba lan un híchaagua hungua, lun yebe figóu le íchugubei féridi, o lun lan gaganbadi lun Bungiu, le íchugubei aban ibagari richaguati. Seremei numuti lubeiti Bungiu luagu lau sun lan lidamun lan meha figóu huguya, guentó hídiña lau ligaburi arufudahani buiti le haganbubei, tau sun hanigi. Keiti le mámaadün lan lidamun figóu, lidamunhadün Bungiu lun hadügüni le labusenrubei” (Rom. 6:11, 16-18). Ariha wamuti san ariñaga lan Pábulu: “buiti le haganbubei, tau sun hanigi”? Dan le wederegeragun woungua arufudatiwa busén wamá gaganbadi wamá lun Heowá tau sun wanigi. Ani kei le Lubungiute lubéi irichaü, dan le wederegeragun woungua lun aba ‘lidamun wamá lun wadügüni le labusenrubei’.

5. Ka katei wádanbei le úmabei wageindagua sungua luagu, ani ka uagu?

⁵ Gama lumoun, lun wagunfulirun lau wederegeragun woungua lun Bungiu, gagibuguatiwa luma lénrengunga. Ítara liña, dóbuliti ageindaguni le lunbei wadügüni. Furumiñe, gagibuguatiwa luma turóbuli lememe meha gádanbalin Pábulu, ariñagati: “Lidan nisaminan, hínsiñeti lilurudun Bungiu nun; gama lumoun arihatina luagu anihein lan ábanya lúrudu lidan núgubu, ageindaguti luma nisaminan; katei ligía, igaburi lánina figóu le nídanbei, le gámabalina dáüwañu” (Rom. 7:22, 23). Wagía sagü giñe weyu wageindaguña kóntüra luriban wayumahan, lugundun sun wagía gafigountiwa. Ligía lariñagunbei apostolu Féduru woun: “Abagarida humá keisi gürigia líbüretiña. Gama lumoun móusera huméi líbürei lun hadügüni le wuribabei; lubaragiñe lira, abagarida humá keisi lidamun Bungiu” (1 Fe. 2:16).

6, 7. Ka ladügübei Satanási lun línsiñedun ubóu houn gürigia?

⁶ Lidan libiaman lúgaaru, mosu wageindagun kóntüra ubóu le lábugiñebei habafu máfianu. Ani anihán Satanási, le agumadihabei lidan ubóu le, áluaha ladügün lun wachararun lun Heowá luma lun Hesusu. Busenti lun lidamun wamá, ligía líchugunbei óuchawaguni lidan wémeri (aliiha huméi Éfesuna 6:11, 12). Yusu lumuti ubóu lisadaranme, adügati lun larihín kamá buiti. Ariñagati apostolu Huan: “Anhein hínsiñe ubóu hun, mínsiñeti Bungiu Úguchili hun; lugundun úati ni kata lídangiñe katei le líchugubei ubóu ñǘbuinti lúmagiñe Bungiu; lúmagiñe guánarügü ubóu liabin. Ani anihán burí katei le líchugubei ubóu: Luriban hayumahan gürigia, háfaagun lun habihini katei le harihibei luma pantaü luagu irisini” (1 Huan 2:15, 16).

⁷ Wéiriti habusenrun gürigia umegeguni luma irisini lidan ubóu le. Adügati Satanási lun hasaminarun gürigia seinsu lan íchugubei ugundani. Lidan sun fulasu anuhein burí budigü wéinamutu. Áfaaguatiña laburiña bísinisi lun hasaminarun gürigia mosu lan hawinwandun geyegu lau  saragu umegeguni luma isebáhari. Bísinisi lánina aweiyasuhani, rutu chansi lun haweiyasuhan gürigia lidoun fulasu le hanarimeti lubuidun, libe-agei dan úara hama gürigia ha meseriwiduntiña lun Heowá. Le ñeinhin lumuti wadigiragua, ábanmeme katei waganbubei: “háfaagun gürigia lun buidu lan habagari”. Gama lumoun, lubuidun ibagari según ubóu.

8, 9. Ka katei gayarabei lasuseredun woun, ani ka uagu peliguru lubéi?

⁸ Lidan layanuhan hawagu ha añaheinbaña lidan damuriguaü, gama lumoun áyeiha hamaali lisaminan ubóu, ariñagati Féduru: “Gúndaatiña lau hagunfuliruni lagübüri hayumahan ligibugiñe larihin sun ubóu. Nibusigaridünatiña dan le húaradagun huma lidan hufedun agundaara lidan hayeeni guánarügü”, ábaya lariñagun: “Lugundun ariñagatiña dimurei buíduburiti, le málati, ani lau layumahan ǘgürügü luma luriban aritaguni achawaha hamutiña ha sun liñabei hesefurun lídangiñe binadu luwuyeri habagaridun le lánina bulíeiguaü. Füramasetiña líbürei houn, ani íbini hagía guánarügü idamuniñanu lun luriban haritagun, lugundun sun gürigia lidamuñein katei le agumadirubalin” (2 Fe. 2:13, 18, 19).

⁹ “Háfaagun [gürigia] lun hibihini katei le harihibei” madügünti lun líbüre hamá. Adügarügüti lun lidamun hamá iyubudiri marihínwati le agumadihabei ubouagu, Mafia (1 Huan 5:19). Anihein aban peliguru le inarüniti: gayarati lidamun wamá umegeguni luma irisini, aban katei hénrenguti láfuriduniwa lídangiñe.

10, 11. Kátañatima san lagaliruhabaña Satanási, ani ka uagu gayara lubéi lanügün aturiahani tidan luban furendei íñuti turóbuli houn?

¹⁰ Kei ladügüni lidan fuluri-agei Edén, himei lumuti lágani Bungiu lóuchaguniña ha lóuguagilibei hasubudin, ani hátima nibureingiñabaña láluahabaña lun lóuchaguniña. Magundanti Satanási ni murusun dan le larihin busén lan aban nibureinti —o furumiñeguarügü gürigia— leseriwidun lidamunme Heowá. Busenti lun ladüraaguni úaraguni le harufudubei sun ha deregeguaañabaña houngua lun Bungiu.

¹¹ Ayanuhaya wamá luagu musu le ánharubei lun lafudurúniwa larigei. Chóuruti gari lan furumiñe, gama lumoun, murusun dan lárigiñe aba magarihali lan, lárigirügüñein eredera luagu keisi seini lánina leseriwidun kei idamuni. Ítarameme háfuga hénrenguti o gáriti lun aban nibureinti lanúadahan amu émeri luéi hémeri lánigu paaná. Adügati Satanási lun hasaminarun gürigia mosu lan haturiahan saragu tidan luban furendei íñuti lun hadarirun ugundani, gama lumoun, wagía kristiánugu, mosu gunfuranda wamani mama lan lídangiñe katei le liabin ugundani. Ariñagati Hesusu: “Fuleseiwatiña ha asubudirubalin luagu megei hamani  lídehan Bungiu” (Mat. 5:3). Kristiánugu ha deregeguaañabaña houngua lun Bungiu wínwantiwa lun weseriwidun lun, mama lun Satanási. Hínsiñeti lilurudun Heowá woun ani saminatiwa luagun wéyuagu áriebu (aliiha huméi Sálumu 1:1-3). Gama lumoun, ha desidírübaña haturiahan tidan luban furendei íñuti lóuguati hadaani lun hasaminarun luma lun háluahani le hemegeirubei lun heseriwidun buidu lun Bungiu.

12. Ka katei lunbei desidírü hamani saragu nibureintiña?

¹² Tidan furumiñetu ligaradan Pábulu houn kristiánugu korintuna, ariñagati: “Anhein meha idamuni bubéi dan le lagúarunbei Bungiu bun, madiheribá luagu lira”. Ábati líchuguni adundehani le: “Ánheinrügü liñati gayara lubéi báfuridun lídangiñe idamuni ban, adügabéi” (1 Ko. 7:21). Lidan furumiñeti sígulu añahein meha iyubudirigu ha gayarati hadügün lun hénrengu lan libagari aban kristiánu. Lidan kesi ligía, buítimati meha láluahan lalibürerun. Uguñe weyu, lidan saragu ageiraü anihein lúrudu lun mosu lan houdin nibureintiña leskuela darí hagunfuliruni irumudiri le líridubei lúrudu. Lárigiñe lira, gayarati desidírü lani nibureinti kaba lan ladüga, gayarati desidírü lan leseriwidun lidan dan dayarüti. Gama lumoun, anhein desidírü laturiahan tidan luban furendei íñuti gayarati leferidiruni líbürei ligía (aliiha huméi 1 Korintuna 7:23).

13. Kátima luwuyeri arufudahani íchugubei saragu buiti houn lubúeingu Heowá?

¹³ Wéridi lumutiña Pábulu kristiánugu kolosana: “Góunigi humá; mígiraguagüda humá hungua houn ha busenbaña heyeehan lau burí arufudahani málati. Mama lúmagiñeti Kristu katei le harufudahabei, lídangiñeti binadu échuni luma burí ligaburi haritagun gürigia lánina ubóu le” (Kol. 2:8). Saragu hádangiñe gürigia ha aturiahaañabaña uguñe weyu arufudaha hamuti ‘arufudahani málati le lídangiñeti binadu échuni luma burí ligaburi haritagun gürigia lánina ubóu le’. Furendei íñuti le ídanbei lafurendeirúa katei burí le, libe-agei dan hasagarun gürigia ha lóuguati hasubudin; ha ibidiñeti houn ida luba lan hararamun lun ibagari. Ánhañati lubúeingu Bungiu, anúadahatiña aban furendei le ígiruti dan houn lun hibihini subudi le hemegeirubei lun hawinwandun aban ibagari sensiyuti ani deregüdagu lidan heseriwidun lun Bungiu. Sériuti hanügüni adundehani le líchugubei Pábulu lun Timotéu: “Inarüni luagu aban lan óunwenbu irisini agunfuliruni luma Bungiu lun le gufurumabei lau le lúmabei. Anhein geigin wabéi, gadaüragun, lunti gufuruma wamá lau lira” (1 Tim. 6:6, 8). Lubaragiñe háluahan kristiánugu hibihin saragu gárada tidan luban furendei, yusu hamuti libe-agei hadaani lidan apurichihani lun híderagun amu gürigia lun  lánigu hamá Hesusu disipulu (aliiha huméi 2 Korintuna 3:1-3).

14. Según Filipuna 3:8, ida liña meha larihini Pábulu chansi lun leseriwidun lun Bungiu luma lun Kristu keisi idamuni?

¹⁴ Samina humá luagu apostolu Pábulu. Resibiti arufudahani lúmagiñe Gamalieli, máisturu le meha arufudahabalin halurudun huríu. Arufudahani le meha libihibei ítara liña kei le ichugúbei uguñe weyu tidan luban furendei íñuti. Ida liña meha larihini dan le konpararü lani luma chansi le libihibei lun lidamun lan Bungiu luma Kristu? Ariñagati: “Sun katei le gayaraabei hamuga anihein lan numa, ru numuti kei ni kata ligibugiñe óunwenbu agañeiruni le luágubei nasubudiruni Wabureme Kristu Hesusu. Féridi naali sun burí katei le ladüga nasubudiruni Kristu, ani barǘ numuti súngubei kei ifei lun nagañeiruni Kristu” (Fili. 3:8). Hasaminarun nibureintiña ítara líderagubaña ani íderagua láñame hagübürigu lun desidírü hamá lau lichú aau lidan luáguti aturiahani (ariha huméi dibuhu burí).

15, 16. Ka arufudahani tíchugubei lóundarun Heowá, ani ka lisuunibei adundehani ligía?

¹⁵ Ka burí katei arihíbei tidan tibe-agei luban furendei íñuti? Ma magundantiña gürigia lau le asuseredubei ñein, ani subudiwatu luagu lanarime magíaguni luma burí átaguni? (Efe. 2:2.) Ánhounti lóundarun Heowá, rutu aban arufudahani le íñutimati ani lidan darangilaü lidan damuriguaü kristiánu. Sun wagía gachansintiwa lun wafurendeirun lidan burí külase le wibihibei kada dimaasu tidan Leskuela Kristiánu lánina Apurichihani. Anihein giñe aturiahani espechaliti houn wügüriña mamarieidungiña ha eseriwidubaña kei prekursoru (Leskuela Kristiánu houn Wugüriña Mamarieidungiña) ani houn maríeitiña ha eseriwidubaña kei prekursoru (Leskuela Kristiánu houn Maríeitiña). Furendei le wibihibei tidan lóundarun Heowá íderagua lumutiwa lun gaganbadi wamá lun Wabungiute ani Wayubudiri le siélubei.

¹⁶ Gayarati giñe “wachíahan” áluaha irisini lau wayusurunu Índice de las publicaciones Watch Tower luma CD-ROM lani Watchtower Library. Sun furendei le lunti líderaguniwa lun wáhuduragun lun Heowá. Seremei arufudahani le gayarati wíderaguniña gürigia lun harandarun luma Bungiu (2 Ko. 5:20). Ani ítara luba gayara lan harufudahan houn amu gürigia (2 Tim. 2:2).

17. Ka afayeiruahaü hibihibei ha anúadirubalin furendei íñuti le buídutimabei?

¹⁷ Lidan hénpulu luáguti seinsu le meha lafuranguagüdübei Hesusu, houn biángubei musu úaraguatiña hagía ariñagati buiti lan hadüga ani aba lamisurahaniña lun hagundaarun úara luma dan le líchugunbei saragu katei labun haríaahan (aliiha huméi Matéu 25:21, 23). Uguñe weyu, anhein wanúadaha arufudahani le buítimabei lanügüba giñe saragu ugundani luma afayeiruahaü woun. Ítara liña larufuduni le asuseredubei lun Michael; buiti lásügürünu sun külase tidan luban furendei darí lun hamisurahani máisturugu lidoun aban adamuridaguni lun hayanuhan luma luagu gayara lan lebelurun aturiaha tidan luban furendei íñuti. Gama lumoun, aba desidírü lan Michael lafurendeirun somu fisiu ani manügünti saragu dan. Fiú dan lárigiñe, gayarahali lanuriagun lungua ani prekursoruhali giñe. Ariñagati: “Furendei le neresibirubei keisi prekursoru, ani guentó kei wéiyaali lidan afiñeni, wéiriti lebegi. Buítimati abinirúni luma burí chansi le nibihibei sügǘ lau saragu seinsu le gayarabei nagañeiruni. Gúndaatina lau midin nan aturiaha tidan luban furendei íñuti!”.

18. Ka uagu gayara lubéi wariñagun larufudahan lan Bungiu buídutimabei?

¹⁸ Furendei lúmagiñeti Bungiu ligía furendei le buídutimabei, lugundun íderagua lumutiwa lun weseriwidun lun Heowá keisi idamuni ani íderagua lumutiwa lun wasubudiruni lugundan. Ruti giñe emenigini woun lun lesefuruniwa “lídangiñe asufuriruni luma agadeiruni ” luma lun wibihini “haweirigun lirahüñü Bungiu” (Rom. 8:21). Ani ligibuagun sun lira arufudahati woun buidu lun warufudun weiri lan línsiñe Heowá woun, Wayubudiri le siélubei (Afu. 21:5).