Añahein gürigia aba hígiragun lau emenigini luagu gúndaatimabaña lan. Añahein amu busentiña hamuga hesefuruni hamarieidun gama lumoun, siñati hafosuruni hani weiriei lun lerederun hama. * Ka lan yebe asuseredubei, hibe-agei gürigia ha ígiragubaña aba híchugun fe hénrengutima lan ibagari lárigiñe ígiraguni sügǘ lau le hasaminarubei. Anhein málügili lubéi hígiragun, háfuga úarati hisaminan wama luagu ligía lan aban lídangiñe katei le hénrengutimabei lidan ibagari. Akutiha wamá fiú adundehani buiti tídangiñe Bíbülia le gayarabei líderagunün lun hiñuragun lídangiñe turóbuli burí le lanügübei ígiraguni.

Lénrengunga le lanügübei lilouguan seinsu, hagüriahóun isaanigu luma hasandiragun gürigia houngua hábuguarügüñanu lan gayarati lanügün lénrengunga le ídangiñebei hénrengu lan háfuridun gürigia. Aban surusia to hilaaruboun lumoun dan le, rutu fe añahein lan fiú gürigia sandiguatiña houngua heyeedúña lan o mabusenrunwa hamá íbini saragu irumu lárigiñe hígiragun, ani ariñagatiña “buin liña lan ibagari lau marichaü, magundani luma íruni”.

KA GAYARABEI HADÜGÜNI:

• Sagá huméi sun le hasandirubei. Háfuga álugatün luagu gürigia le hínsiñegilibei hun. Ani íbini gibe lan  meha turóbuli lidan hamarieidun, háfuga gáriti hun madari humani ugundani le yebe hagurabubei lidan maríei (Ariñawagúni 5:18). Maribanti hasagaruni gürigia sun igarigu hawariua, íbini Bíbülia ariñagatu chülüti lan “lidaani ayahuni” (Apurichihati 3:1, 4).

• Madiseda humá hawéi gürigia. Íbini megei humá dan lun hasagaruni higarigu, mabuidunti herederun saragu dan hábuguarügü (Ariñawagúni 18:1). Ayanuha humá luagu katei buiti, lugundun ánhadün ekehera súnwandan, íbini anhein gani hubéi resun lun hadügüni, gayarabei hadisedun humadagu huéi. Anhein lunti lubéi desidírü humá somu katei súdiniti fiú dan lárigiñe hígiragun, amuriaha humá ídemuei luma aban gürigia le uáguti hafiñera.

• Góunigi huméi hátuadi. Turóbuli burí le lanügübei ígiraguni gayarati lanügün sandi, kéiburi liñun hitaü luma ligari ichügü. Hou humá buidu, adüga humá ehersísiu ani arumuga humá buidu (Éfesuna 5:29).

• Sagá huméi katei burí le memegeirun humuti o le adügüti lun haritagun luagun hani weiriei lau igañi, gama lumoun, kipu humóun dugumedu burí to súdinitu. Buídubei lun hareidun fiú katei habá hisaanigu, kéiburi iyawaü to lánina hamarieidun.

• Mígiraguagüda humá hungua lun luriban saminaü. Olga, to ígiraguboun luma tani weiriei ladüga lagabarahanu, ariñagatu: “Súnwandanha nálügüdagun nungua: ‘Ka san tuágubei le úati nuagu?’”. Lárigiñe aba tíchugun fe weiri lan tírudun dan le tasaminarun luagun katei wuribati (Ariñawagúni 18:14).

  Saragu gürigia aba habürüdüni le hasandirubei ladüga íderagua lumutiña lun hárügüdagun houngua luma lun hasaminarun buidu. Ánhadün desidírü hasigiruni adundehani le, áfaagua humá lun habürüdün iseri burí saminaü le buiti le lunti lagidaruni luriban saminaü lídangiñe hichügü (Éfesuna 4:23). Ariha wamá bián hénpulu:

  Saminaü wuribati: “Nadüga láluahabei amu hiñaru”.

  Saminaü buiti: “Mama luéigiñe chará nan lun lídinba lan áluaha amu”.

  Saminaü wuribati: “Wesi numuti lubuidun burí irumu lidan nibagari luma gürigia le moun lumuti”.

  Saminaü le buiti: “Gúndaatimabadina ánhana asigira nubaruaguóun sin naritagun luagun le sügühalibei”.

• Madüga humá gasu lau dimurei hǘrüti. Añahein fiú hádangiñe humadagu hama hiduheñu gayarabei hariñagun somu katei le gáriti hun o le moun lumuti yebe hariñaguni íbini mama lan lun hadügün dañu hariñagei. Kéiburi: “Mama meha bunti gürigia le” o “Iyereeguti ígiraguni lun Bungiu”. * Ariñagatu Bíbülia: “Madügabá gasu lau sun le ariñawagúbei” (Apurichihati 7:21). Martina, to barüharuboun bián irumu lúmagiñe tígiragun, ariñagatu: “Lubaragiñe netenirun lun dimurei burí gáriti le hariñagubei gürigia, aba nouchun narihini katei kei larihini Bungiu. Lugundun íñutimati lisaminan luéi wasaminan” (Isaíasi 55: 8, 9).

• Furíei humá lun Bungiu. Ariñagati Bungiu houn sun lubúeingu lun hígiruni sun hadiheri lúhaburugu, létima wéiribei ladiheridagüdüniña (1 Féduru 5:7).

Juliana, únsuñein meha irumu tau maríeiñu, ariñagatu: “Ayumuraguatina lun nani weiriei lun midin lan. Gama lumoun, dan le lígirunbadina, aba nagañidun  luma luma tuma hiñaru to úmaboun lidin”. Saragu ígiragutiña gañimémegiña luma binadu hani weiriei luagu saragu irumu. Lau sun lira, anihein dan mosu lan haransehan somu katei úara, lídantima gasaanigu hamá.

KA GAYARABEI HADÜGÜNI:

• Buidulá hanaagun hungua luma binadu hani weiriei. Anhein lunti lubéi hayanuhan luagu somu katei súdiniti, ayanuha humá furangu ani magibedalá hiyanun. Gíbeeña arihiti ídeha lan katei le lun ñein lan darangilaü (Rómana 12:18).

• Mayusura humá dimurei gáriti. Anihein aban adundehani buiti tidan Bíbülia ani huuti dántima le hasandirun gürigia lachuuhouña lan dimurei houn: “Lichú aau lilouguan yanu, lualin ichügü gálumaü” (Ariñawagúni 17:27). Íbini lárigi áfaaguni le hadügübei, ánhadün ariha mabuidun lan lidin hiyanun, gayarati hariñagun: “Ígirabana lun nasaminaruni ábame wayanuhani amu weyu”.

• Áfaagua humá lun hafanreinragun luéi binadu hani weiriei lidan katei burí le lunti haranseruni lau lídehan lúrudu, o lidan luáguti seinsu o le luáguti surusia.

Abahüdahatu María lárigiñebei lan tígiragun luma tani weiriei, sun lan dan tau tisaani to ñüraügiruboun ayahuaha ani ábaya tasisihan tóugua gabanarugu; ani íbini áfaagua tan tisaani to íbugañaü lun taramuduni le tasandirubei, arihatu giñe aban asansiruni tuagu. Anha, anihán lidaani hemegeirunün hisaanigu saragu. Gama lumoun, háfuga saminatün mabuidun lan hasandiragun hungua ani madaani humá lun híderaguniña.

KA GAYARABEI HADÜGÜNI:

• Amisuraha humaña hisaanigu lun hayanuhan huma luagu le hasandirubei, íbini hariñagun katei sin hasaminarun (Hobu 6:2, 3).

• Haritagua huméi mosu lan lagunfulirun kada gürigia tau ligaradan. Háfuga mégeitün lichugún gurasu hun ani háfuga busentiña hisaanigu híderagunün, gama lumoun, mabuidunti ani maricha ligía hagurabun lun laransehani aban irahü haturobulin gürigia wéinamuhaña (1 Korintuna 13:11). Mama lunti habahüdahani hiturobulin houn hisaanigu ni lun hadügün lun heseriwidun hóunagüleme o lun hayusuruniña lun gayara lan hayanuhan luma binadu hani weiriei.

• Madüga humá asansiruni wéinamuti lidan habagari hisaanigu. Buiti hamuga anhein gayara herederun awinwanda lidan ligiaméme fulasu ani sigí huméi hibagari kéiñaha lubéi. Gama lumoun, le súdinitimabei, hasigiruni ligiaméme programa lánina heseriwidun lun Bungiu, kéiburi taliihóun Bíbülia luma áhuduraguni lidan familia (2 Lúrudu 6:6-9).

Ariñagatu Melissa, aban würi wínwantu luma tani weiriei maríeiñu luagu disisi irumu: “Mabusenruntina yebe wígiragun. Gama lumoun lúmagiñebei níchugun fe siñati lan nasansiruni le sügühalibei buídutimahali nasandiragun nungua.” Anha, sigigili ibagari lárigiñe ígiraguni.