“Hawani gürigia ha óunwegubaña lidan lanarime figóu aba tidin máfiougatin óurameme ligía, ani ñein hasufurira lun súnwandan lidan watu gemeti.” (Catecismo de la Iglesia Católica.) Ariñagatiña fiú lábutigu relihión dan le lan hóunwengun gürigia aba lan hadisedun luéi Bungiu sunsuinagubei ani ligía lan máfiougatibei.

Ariñagati Sálumu 146:4: “Ladüga dan le hounwen [gürigia], aba hasaliragun kalikime, ani lídanmeme weyu ligía lagumucha le hasaminarubei hadügün”. Anhein dan lubéi le hóunwengun gürigia aba hagiribudun lidoun múa, ani úati ni kata erederuti wínwanñu hádangiñe, ida luba hasufurirun lun súnwandan?

Tidan Bíbülia, dimurei ebüréu luma güriegu le ásügürawagüdübei “máfiougati” mini lan “umúahaü” le ídanbei habunúa sun gürigia. Kei hénpulu, dan le lasufurirunbei Hobu aban lanarime sandi, furíeiti lun Bungiu: “Gúndaatina hamuga lun baramudunina lidan umúahaü” (Hobu 14:13). O kei tásügüragüdüni La Sagrada Biblia, lani Guillermo Jünemann, “lidan máfiougati”. Mabusenrunti meha Hobu lidin lidoun aban fulasu le ñeinba lubéi lasufurira lun súnwandan díseñu luéi Bungiu, busenrügüti meha lemeraagun lidan umúahaü.

Wasaminarun luagu furunde lan Bungiu adügati lun wadisedun luéi. Abahüdaguatu aban méhikuna gíritu Rocío: “Lúmagiñe ñǘraügidina larufudahóun nun anihein lan máfiougati. Wéiriti meha nanufude luéi Bungiu darí lun mafiñen nan anihein lan igaburi buiti luagu. Saminatina meha gáñiñu liña lan súnwandan ani furunde lan”.

Le tariñagubei Bíbülia luagu Bungiu luma luagu le asuseredubei houn hilaaña sansi lumuti tisaminan Rocío. Ariñagatu: “Aba líbüre lan nasandiragun nungua, kamá le hamuga gidawarügüti aban anügüni hǘrüti nuéi. Aba níchugun fe busén lan Bungiu katei buiti woun, hínsiñe wamá lun ani gayarati lan línsiñedun nun. Guenlé, ariha numuti kei aban úguchili le etenirubei houn lisaanigu lau ínsiñeni, ani busenti lun buidu lan lidin woun” (Isaíasi 41:13).

Gíbetiña gürigia ebelurutiña lidoun somu relihión ladüga hanufude luéi houdin máfiougatin, gama lumoun, mabusenruti Bungiu weseriwidun lun ladüga anufudei. Ariñagati Hesusu: “Hínsiñela lubeiti Babureme le Bubungiute bun” (Márükosu 12:29, 30). Gama lumoun, dan le gunfuranda wamani luagu madügün lan Bungiu marichaü, ménrenguntimati woun wafiñerun richabei lan laguseragüdǘn ámuñegü. Ítara kei Eliú, le lumada Hobu, gayarati wariñagun lau saragu ichouruni: “Maritagua humá luagu adüga lan Bungiu Suntigabafu wuribani odi marichaü!” (Hobu 34:10).