YARAFA HUMÁ LUN BUNGIU
“Arihabá, adüga numuti sun katei iserime”
Hínsiñeti hamuga san hun hawinwandun hama hufamilian lun súnwandan lidan aban ubóu le ídanbei ua lan sandi? Hínsiñeti hamuga san hun lun lachülürün dan lun ua lan asufuriruni, igarigu luma óunweni? Mama aban uénedü le; füramase laali Bungiu ani lagunfuliruba. Ariha waméi le ariñawagúbei luagu lagunfulirun füramasei le lidan Arufudúni 21:3-5 (aliiha huméi).
“Laragahabei [Bungiu] sun háguira.” (Arufudúni 21:4.) Kaba luwuyeri águiraü laragaha Bungiu? Mama le lánina ugundani ni le arumadahabalin wagu; águiraüba le lánina íruni lagidara. Ani mama aragaharügü lubéi águiraü ligía, lagidarubei igarigu luma asufuriruni le adügübei lun wayahun.
“Úaalime óunweni.” (Arufudúni 21:4.) Úati amu katei le adügübei lun hayahun gürigia saragu kei óunweni. Gama lumoun, gürigia ha gaganbadibaña lesefurubaña Heowá lídangiñe óunweni. Ida? Lau lagidaruni lébuna óunweni: figóu le galagante wabéi lúmagiñe Adán (Rómana 5:12). Layusurubei Heowá lani Hesusu sákürifisiu lun hibihin gürigia ha gaganbaditiña aban ibagari sin figóu. * Ábameti ‘lagünrinchawagun óunweni, le lagumuhóun lágani’ wügüri (1 Korintuna 15:26). Sun gürigia hawinwanduba kei meha labusenruni Bungiu: sin sandi ani lun súnwandan.
“Úaalime [...] igarigu.” (Arufudúni 21:4.) Kaba luwuyeri gáriti lagidara Bungiu? Lagidarubei sun luwuyeri igarigu dandu le lídanbei hasaminan gürigia kei le luágubei hágubu lememe resultóu lánina figóu ani adügati lun siñá lan hawinwandun saragu míñunu gürigia buidu.
Málühali gayara wawinwandun sin wayahuahan, sin óunweni ni igarigu. Gama lumoun gayarati hálügüdagun hungua, halíabei san ibagari ligía? Sielu funa san?” Uá. Furumiñe, gumeseti lani Bungiu füramasei lau dimurei le: “Aganawati Bungiu hadan gürigia guentó”, ani ubouagu hawinwanda gürigia (Arufudúni 21:3). Libiaman, ayanuhati füramasei luagu aban ubóu le ídanbei ‘úaali lanme óunweni’, lidan amu dimurei, aban ubóu le meha ídanbei anihein lan óunweni, ani gidawaalime. Sielu úagubeiñein óunweni, ánheinti ubouagu anihein, ani lúmagiñe murusun dan lárigiñe lagumeserun ubóu. Furanguti lubeiti luagu yaaba lan ubouagu lagunfulira lani Bungiu füramasei luáguti aban iseri Ubóu.
Ladügüba Bungiu lun mayahuahanhaña lanme gürigia ladüga asufuriruni luma íruni
Busenti Heowá lun wafiñerun luagu le füramase láalibei. Lárigiñebei líriduni abinirúni burí le lunbei wibihini ámuñegü, aba lariñagun: “Arihabá, adüga numuti sun katei iserime”. Lárigiñe aba lariñagun: “Inarüniti dimurei burí le, ani gayaraati lafiñerúniwa luagu” (Arufudúni 21:5). Amisuraha wamutün hau sun tílana huban lun harihini ida luba lan hádangiñe humá gürigia gúndaatiña ha lúnbaña harihini lubuidun lagunfulirun lani Bungiu füramasei.
Le gayarabei haliihan tídangiñe Bíbülia lidan hati le:
1 Féduru 1-5; 2 Féduru 1-3; 1 Huan 1-5; 2 Huan 1-13; 3 Huan 1-14; Júdasi 1-25 darí Arufudúni 22
^ par. 3 Lun haganwoundagüdüni hisubudin luagu lani Hesusu sákürifisiu, akutiha huméi kapítulu 5 tidan líburu Kátima san tarufudahabei Bíbülia?, hadügün gefentiña luagu Heowá.
