1, 2. Háfuga ka hasaminarubei apostolugu lubaragiñe houdin luma Hesusu Herusalén?

“HARUMATI larihín sielu ani arihúati Hati abuincheinaliña lan. Wurinouga guñoun, chóuruti ariha hamani óunigirutiña libüraüraü tagumeserun lóugiñe Herusalén. Dan le líchugunbei Liñun-Agei Lúrudu huríu fe, aba híriduni lagumeserun aban iseri hati, le gíribei nisán. Lárigiñe, aba hounahóun ariñahatiña ani fúwagua ligía watu lun laburuchaguagüdüniwa uganu darí lun lachülürün ya. Mosu lidin Hesusu óurameme le Herusaléun anhein busén lubéi lachülürün lubaragiñe Luéyuri Esefuruni”.

² Háfuga anihán saminaü le ñǘbuinbei lidoun hasaminan apostolugu dan le Pereañanu lubéi (luéigiñe le aban louba Hordán), luma Hesusu lidan lagumuhóun wéiyaasu le ladügübei Herusaléun (Mat. 19:1; 20:17, 29; Mar. 10:1, 32, 46). Lárigiñebei lasubudirúniwa ka lan furumiñetibei weyu lidan hati le gíribei nisán, aba hagurabahan huríu tareisi weyu lubá hefeduhani Luéyuri Esefuruni weyu 14 lidan nisán, lárigiñe lálüdün Weyu.

3. Ka uagu lunti lubéi waberesedun, wagía kristiánugu, lau luéyuri lefeduhóun Luéyuri Esefuruni?

³ Ladinerun Aburemei le meha efeduhóubei lidan Luéyuri Esefuruni, lidan irumu 2014 le, ladügǘba weyu 14 lidan gádürü-hati lárigiñe lálüdün Weyu. Espechalibei weyu ligía houn sun kristiánugu inarünitiña luma houn ha busenbaña hagundaaragüdüni Bungiu. Ka uagu? Ladüga gumadi le líchugubei Hesusu. Lidan 1 Korintuna 11:23-25 aliihatiwa: “Áriebu le lalugurúnbei Wabureme [Hesusu], aba lanügünu fein lúhaburugu; lásurun líchugun eteingiruni lun Bungiu tuagu, aba lagubachagunu lun lafanreinragunu hadan lánigu, aba lariñagun; ‘Hou humá; núgubu le, le nederegerubei luagu hufulesein. Adügameme huméi katei le, haritaguagüleme nuagun’. Ítara giñe, lárigiñe héiginu fein, aba lanügüni kopu tau diwéin lúhaburugu”.

4. a) Ka burí álügüdahani gayarabei wadügüni wóuniwagua luagu Aritaguagülei? b) Ida liña san lanuadirún luéyuri ladügǘn Aritaguagülei sagü irumu? (Ariha huméi rekuáduru  “Aritaguagülei lánina irumu 2014”.)

 ⁴ Chóuruti busén humá lun ñéinbadün lan lubá laritawagún ábanrügü fedu le uágubei líchiga Hesusu gumadi lun lefeduhóun sagü irumu. Ligíati, álügüdagua humá hungua: “Ida luba san naranserun lubá guñoun ligía? Kaba san sínbolu ayusurúa lidan adamuridaguni ligía? Ida luba san ladügǘn? Kaba san mini lan ókaasion ligía nun luma sínbolu burí le lunbei layusurún ñein?”.

5. Ka aransehani lóunahabei Hesusu adüga lubá lefeduhani lagumuhóun Luéyuri Esefuruni hama lani apostolugu?

⁵ Dan le lóunahanbaliña Hesusu lani apostolugu lun houdin aransera aban lasali lun lefeduhani Luéyuri Esefuruni, mariñagunti houn lun habuinchagüdüni lau lanarime burí wendei; le chóurubei busenrügüti lan meha aban fulasu harumati ani le buiti le garageiruguti habá ha lúnbaña hamisurahóun (aliiha huméi Márükosu 14:12-16). Mosu meha hibihin fiú katei lun éigini, kéiburi fein maganatu lébini tuma diwéin. Dan le lásurunbei héigini éigini le lánina Luéyuri Esefuruni, aba letenirun Hesusu lun bián katei le, lugundun layusurubei meha sínbolume.

6. a) Ka lariñagubei Hesusu tuagu fein lárigiñebei lefeduhóun Luéyuri Esefuruni? b) Ka tuwuyeri fein ayusurúboun lidan Aritaguagülei?

⁶ Kei le ñeinñein lubéi apostolu Matéu, fiú dan lárigiñe abürühati: “Aba lanügünu Hesusu fein lúhaburugu, aba leteingiruni Bungiu tuagu; lárigiñe lagubachagunu, aba líchugunu houn lani disipulugu, ariñageina: ‘Hou humá’” (Mat. 26:26). “Fein” tugía maganatu meha lébini, ítara kei tayusurúniwa lidan Luéyuri Esefuruni (Afu. 12:8; 2 Lur. 16:3). Táurügüñein fulúaru to tautu türigu luma duna tadügǘwa, maganatu lébini ni amu burí katei, kéiburi salu. Keiti le magana tubéi lébini, ábanboun meha fein fadatu, mábeitu, to ménrengunti táhalachawagun. Uguñe weyu, háfuga hamuriahan wéiyaaña lidan afiñeni luma somu gürigia lun ladügünu fein tuguya tau fulúaru to tautu türigu luma duna, ani lun hásürünu lidan aban ágeidinaü le hurugua waali lau murusun agülei. (Anhein siñá hadarirun fulúaru tautu türigu, gayarati tadügǘn tau fulúaru lautu ri, sebada, awasi o amu ilaü.) O gayarati giñe tayusurún matzá, aban fein maganatu lébini to hadügün huríu, maganarügaaru ligía amu burí katei kéiburi sebuya o gañé.

7. Ka meha tuwuyeri diwéin layusuruboun Hesusu, ani ka tuwuyeri gayarabei layusurún uguñe weyu lidan Aritaguagülei?

 ⁷ Sigiti Matéu ariñaga: “Lárigiñe, aba lárügüdün [Hesusu] aban weru buin tau diwéin lúhaburugu, aba leteingiruni Bungiu tuagu, aba lásügüragüdüni houn, ariñageina: ‘Gurá humá lídangiñe le, sun huguya’” (Mat. 26:27, 28). Aban meha weru tau diwéin funatu lanügübei Hesusu lúhaburugu (siñati meha tira lan beibei le maheredungili, lugundun sügühali meha saragu hati lúmagiñe tidaani beibei). Íbini úatu lan meha diwéin lidan furumiñeti éigini le lánina Luéyuri Esefuruni Ehiptu, mariñagunti Hesusu wuriba lan laatún lidan Luéyuri Esefuruni. Le linarün katei, yúsuti meha Hesusu diwéin lidan Ladinerun Aburemei. Ligía giñe lébunabei hayusuruni kristiánugu lidan Aritaguagülei. Gama lumoun, ka san tuwuyeri diwéin buíduboun lun ókaasion ligía? Kei le memegeirun lan meha lita Hesusu amu katei lun gebegitima lan, diwéin to ayusurúboun keisi sínbolu lani lita moun lumuti gaganagu tan. Gayarati tayusurún furumiñeguarügü diwéin funatu, to adügǘtu múnada o to agañeinhóutu. Anuhán burí tuwuyeri diwéin to gayaraboun hagañeihanu beaujolais, borgoña o quianti.

8. Ka uagu súdini lubéi le mini tubéi fein tuma diwéin woun, wagía kristiánugu?

⁸ Ariñagati meha Pábulu lunti lan hefeduhani sun kristiánugu Ladinerun Aburemei, mámarügüñanu apostolugu. Abürühati houn afiñetiña ha Korintubaña: “Lúmagiñe guánarügü Wabureme Hesukrístu neresibirei igaburi le arufudaha naalibei hun. Luagu le lan áriebu le lalugurúnbei Wabureme, aba lanügünu fein lúhaburugu; lásurun líchugun eteingiruni lun Bungiu tuagu, aba lagubachagunu lun lafanreinragunu hadan lánigu, aba lariñagun: ‘Hou humá; núgubu le, le nederegerubei luagu hufulesein. Adügameme huméi katei le, haritaguagüleme nuagun’” (1 Ko. 11:23, 24). Ligíati, chülǘ lumoun weyu le uguñebei, wagía kristiánugu, efeduha wamagili Aritaguagülei luagu Ladinerun Aburemei aban wéiyaasu luagu irumu ani súdiniti woun le mini tubéi fein tuma diwéin.

9. Ka afiñeni charati hafiñerubei saragu gürigia tuagu fein to meha layusuruboun Hesusu?

⁹ Ariñagati Hesusu: “Núgubu le”. Ligía hafiñerunbei tílana saragu ligilisi saliguarügütu lan fein lǘgürügüme Hesusu lidan aban milaguru. Gama lumoun, kóntürati afiñeni le luagu le  asuseredubei. * Anihán meha lúgubu Hesusu ñein hagibugiñe apostolugu úaraguatiña hagía, ani anuhán meha giñe fein maganatu lébini to lunboun héiginu. Furanguti lubeiti layanuhaña lan meha Hesusu lau sínbolu kei ladügüni lidan amu burí ókaasion (Huan 2:19-21; 4:13, 14; 10:7; 15:1).

10. Ka mini tubéi fein to ayusurúboun lidan Ladinerun Aburemei?

¹⁰ Lúgubu meha Hesusu mini tubéi fein to harihiboun apostolugu ani to meha lunboun héiginu. Ka luwuyeri úgubu? Luagu aban dan afiñetiña meha kristiánugu inarünitiña kei lan le halagualanu Hesusu fein ani máhalachawagunti ni aban lídangiñe labu, luagu damuriguaü lan hani kristiánugu anuadirúaaña mini tubéi fein tugía, le unbei lagúarua tidan Bíbülia “lúgubu Kristu” (Efe. 4:12; Rom. 12:4, 5; 1 Ko. 10:16, 17; 12:27). Gama lumoun, dan lárigiñe aba gunfuranda hamani luagu dandu lan aban lubuidun saminaü luma gunfurandawa lan le tariñagubei Lererun Bungiu, arufudati luagu fein lan tuguya aban tan meha sínbolu lani lúgubu Hesusu keisi gürigia garaüwarügüti, úgubu le meha aranserúbei lubá. Súfuriti Kristu “lidan úgubu”, darí lun ládarawagun luagu wagabu. Ligíati, lidan Ladinerun Aburemei yúsuatu fein keisi sínbolu lani úgubu ligía le ídanbei ‘lanügei Kristu wafigoun’ (1 Fe. 2:21-24; 4:1; Huan 19:33-36; Ebü. 10:5-7).

11, 12. a) Ka meha lariñagubei Hesusu tuagu diwéin? b) Ka mini tubéi diwéin to wayusuruboun lidan Ladinerun Aburemei?

¹¹ Wasubudiruni le mini tubéi fein íderagua lumutiwa lun gunfuranda wamani le lariñagubei Hesusu tuagu diwéin. Aliihatiwa: “Lárigiñe héiginu fein, aba lanügüni kopu tau diwéin lúhaburugu, aba lariñagun: ‘Kopu le tau diwéin to, liseinin iseri lidaradun Bungiu huma, le achoururúabei lau nita ’” (1 Ko. 11:25). Tidan saragu Bíbülia sügügüdawati ítara kei lásügürawagüdün tidan Reina-Valera: ‘Kopu le ligía iseri daradu lidan nita’. Lau dimurei kopu, ladimurehaña meha Hesusu luagu lila kopu ligía: tuagu diwéin. Lita meha funa san Hesusu diwéin tuguya? Uá, diwéin tuguya aban meha sínbolu lani hitaü le lunbei láwiyurun lídangiñe lúgubu Hesusu.

¹² Lidan Ewanhéliu según Márükosu darí wamuti dimurei le lariñagubei Hesusu: “Nita le, le lánina iseri daradu, le giñe áwiyuruabei hawagu saragu” (Mar. 14:24). Lawiyurúba meha lita Hesusu “hawagu saragu gürigia lun ferudunawa lan hafigoun” (Mat. 26:28). Aba lubeiti sínbolu lani lita Hesusu diwéin. Lau lubafu hitaü ligía wesefurúa, lugundun resibitiwa ‘ferudun luagu wafigoun’ (aliiha huméi Éfesuna 1:7).

13. Ida liña ladügǘn Aritaguagülei irumu-auti lánina lounwen Kristu?

¹³ Ánhadün ñüdün hama gefentiña luagu Heowá lidan Aritaguagülei luagu furumiñeti wéiyaasu, kaba hariha ñein? Chóuruti ladügǘba lan adamuridaguni ligía lidan aban fulasu buiti ani harumati le lunti hasandiragun gürigia houngua buidu ñein. Háfuga ñeinbei lan fiú fuluri, gama lumoun, úabei lanarime wendei ñein kamá hamuga ñeinbei aban fedu. Layanuhaba aban wéiyaali lidan afiñeni lidan aban igaburi sensiyuti luagu le tariñagubei Bíbülia luagu Aritaguagülei ligía. Líderagubaña sun gürigia lun gunfuranda hamani ani ariha hameime le ladügübei Kristu kei aban katei gebegiti: hilati wawagu lun gayara lan wawinwandun (aliiha huméi Rómana 5:8-10). Lafuranguagüdübei giñe biámañein lan luwuyeri emenigini tíchugun Bíbülia houn kristiánugu.

14. Ka bián emenigini afuranguagüdüwabei lidan yanu le lánina Aritaguagülei?

¹⁴ Arúeihani sielu luma Kristu ligía aban lídangiñe emenigini ligía, míbebaña kristiánugu ibihiti emenigini ligía, fiúrügübaña kéiburi apostolugu ha úaraguabaña (Luk. 12:32; 22:19, 20; Aruf. 14:1). Le libiaman ligía hemeniginbei hibe-agei kristiánugu ha eseriwidúbaña lun Bungiu lau úaraguni lidan wadaani: hawinwandun lun súnwandan lidan aban paraísu ubouagu. Ábameti ladügǘn lugundan Bungiu ubouagu kei ladügǘniwa sielu, aban katei le hamuriahabei kristiánugu lúmagiñe  lüha (Mat. 6:10). Ani ayanuhatu Bíbülia luagu lubuidun ibagari le lunbei hawinwanduni gürigia lun súnwandan (Isa. 11:6-9; 35:5, 6; 65:21-23).

15, 16. Ka adügǘbei tau fein lidan Ladinerun Aburemei?

¹⁵ Danme yarafaali lun lagumuchun yanu, lariñaguba íbiri le íchugubalin yanu chülüha lan oura lun ladügǘn le meha lariñagubei Hesusu houn apostolugu lun hadügüni. Kei buga wariñaguni, layusurúba bián sínbolu: fein maganatu lébini tuma diwéin funatu. Le chóurutimabei ladagaragüdǘwaba lan sínbolu burí le luagu aban dábula yarafa lun íchuguti yanu. Laliihaba aban abahüdaguni dayarüti tidan Bíbülia luagu le meha lariñagubei luma le ladügübei Hesusu dan le lagumeserunbalin aritaguagülei. Kei hénpulu, abahüdaguati Matéu: “Aba lanügünu Hesusu fein lúhaburugu, aba leteingiruni Bungiu tuagu; lárigiñe lagubachagunu, aba líchugunu houn lani disipulugu, ariñageina: ‘Hou humá; núgubu le’” (Mat. 26:26). Aba láhalachagunu Hesusu fein maganatu lébini tuguya lun lásügüragüdünu houn lani apostolugu ha lóubagiñebaña, luéigiñe lóunwenren luma luéigiñe lubaünan. Ítarameme, lidan adamuridaguni le lunbei ladügǘn weyu 14 lidan gádürü-hati, harihiba asiedu tau fein maganatu lébini to halawaguaru.

¹⁶ Layusurúba asiedu le buídurügüti lun gayara lan lásügürün háhaburugugiñe sun gürigia lidan dan le igirúbei lun pasu le. Ladügǘba lidan aban igaburi sensiyuti, sin lanarime burí katei. Furumiñe ladügǘba aban liraüraü furíei, lárigiñe ábame lásügürawagüdün asiedu según aransehani le adügǘwaalibei. Fiúrügübaña éigitiña tídangiñe fein o úabei lan ni aban éigiti, kei lasuseredun lidan libe-agei damuriguaü lidan Aritaguagülei lidan irumu 2013.

17. Ida luba lasigirún hénpulu le lígirubei Hesusu lidan tuáguti diwéin?

¹⁷ Lárigiñe, layanuhóuba luagu le lariñagubei Matéu: “Lárigiñe, aba lárügüdün aban weru buin tau diwéin lúhaburugu, aba leteingiruni Bungiu tuagu, aba lásügüragüdüni houn, ariñageina: ‘Gurá humá lídangiñe le, sun huguya. Nita le, le añuuragüdübalin iseri daradu, le giñe áwiyurubei hawagu saragu gürigia lun ferudunawa lan hafigoun’” (Mat. 26:27, 28). Ítara kei meha ladügüni Hesusu, ítara luba ladügǘn, ladügǘba aban furíei ani lárigiñe ábame tásügürawagüdün diwéin houn sun gürigia.

18. Ka uagu súdini lubéi lidan wamá Aritaguagülei íbini murusunrügü hamá o ua hamá éigitiña tídangiñe fein ani gurá hagía tídangiñe diwéin?

¹⁸ Ítara kei lariñaguni Hesusu, hárügübaña lúnbaña houdin arúeiha luma sielu hagíarügübaña eiga lídangiñe sínbolu le lunbei lásügürawagüdün (aliiha huméi Lúkasi 22:28-30; 2 Tim. 4:18). Mini lan le hibe-agei lan gürigia ha ñéinbaña ariharügü habéi le lunbei lasuseredun ñein lau inebesei. Ani íbini ítara, súdiniti lun ñein hamá lidan laritawagún Ladinerun Aburemei, lugundun ítara liña harufuduni luagu weiri lan lebegi lani Hesusu sákürifisiu houn. Lidan Aritaguagülei gayarati hasaminarun luagun abinirúni burí le gayarabei hibihini seremei sákürifisiu ligía. Hemenigitiña habahüdǘba lan hadan “saragu gürigia” ha lúnbaña hásügürün lau ibagari lídangiñe “óunwenbu asufuriruni”. Lubúeingubaña Heowá “ha chibá hamaaruboun hadaüragun, harumagüda hamóun lau lita Mudún” (Aruf. 7:9, 14-17).

19. Ida luba waranserun lubá Ladinerun Aburemei ani sagá wagíame buiti lídangiñe?

¹⁹ Ida luba haranserun sun gefentiña luagu Heowá ha lídanbaña sun Ubóu lubá adamuridaguni espechaliti ligía? Saragu dimaasu lubaragiñe weyu ligía wagumeseruba amisurahaña sun gürigia ha wayaraatiña. Ani fiú weyu lubaragiñe, waliihaba tidan Bíbülia abahüdaguni luáguti le ladügübei Hesusu luma luagu le asuseredubei lidan weyu burí ligía lidan irumu 33. Wadügüba aransehani lun meferidirun wamani ókaasion ligía. Ani wóuchuba wachülürün lau saragu dan lubaragiñe uremu luma furíei le lánina lagumeseha, lugundun ítara luba gayara lan wíchuguni lubuidun achülürüni houn wedewenegu ani meferidirunbadiwa ni kata lídangiñe programa. Sun lílana adamuridaguni, dandu ha lílana damuriguaü kei ha abisidahabadiwa, wasagaruba buiti lídangiñe wasigiruni laliihóun bérusu burí tidan wabibülian. Ani le súdinitimabei, lau ñein wamá warufudubei weteingiradi tídangiñe sun wanigi luagu lani Hesusu sákürifisiu ani luagu gaganbadi wamá lun gumadi le: “Adügameme huméi katei le, haritaguagüleme nuagun” (1 Ko. 11:24).