Lidan duusu-hati lidan sun ubóu arihíwati burí dibuhu tuma burí tirahüñü gafu tibe to ídanboun lichugúa heigin animaalugu lau aban liraüraü muñegü tidan, ani muñegu ligía Hesusu nege dan le figigili. Lunti san wasaminarun ábanmemegili lan irahü figigili Hesusu?... * Súdiniti lun waritaguni lidan amu manera. Ida? Haritagua waméi le asuseredubei houn fiú hóuniri mudún aban áriebu dan le áraabuñanu lubéi yarafa lun Belén.

Sódini aba láfuachun aban ánheli houn hóuniri mudún ani aba lariñagun houn: “Águrahouali [...] aban asalbaragülei hun uguñe, lageira Dawidi, Kristu le Habureme”. Ábati lariñagun houn luagu hadarirubei lan Hesusu “hóuburagu tidan lagei, roun lidan héigagüle ibiñanigu”. Ouraméme ligía aba hachülaagun saragu amu ánheligu aba hagumeserun íchiga uéiriguni lun Bungiu.

Ida luba hamuga basandiragun bungua lun hamuga baganbuniña ánheligu íchiga uéiriguni lun Bungiu?... Wéiriti meha hagundan hóuniri mudún hagía. Aba hariñagun: “Keimoun Belén arihei katei le asuseredubei”. Ñein “aba hadarirunu María luma Hosé, luma irahü roun lidan héigagüle ibiñanigu”.

Murusun dan lárigiñe, aba hagumeserun amu burí gürigia achülüra Beléun. Dan le hariñagunbalin hóuniri mudún houn ka lan asuseredubei, aba taweiridun hanigi saragu. Hínsiñeti san bun bafurendeirun katei súdiniti kei le luagu Hesusu?... Sun wagía le hínsiñehabubei lun Bungiu sandiguatiwa woungua ítara. Guentó ariha waméi ka lan uagu hagundaarunbei saragu lau híchugun fe luagu nasiruaali lan Hesusu. Gama lumoun lun wasubudiruni lunti wagumeserun lúmagiñe dan le meha máfuridungiru María.

Aban weyu, aba lachülürün aban ánheli gíriti Gabüriéli bisidoun María lun lariñagun tun gasaaniboun lan aban wügüri irahü. Aba lariñagun tun wéirigubei lan meha irahü ligía ani lagúaruba lan lun “Liráü Bungiu”. Lárigiñe aba lariñagun tun urúeibei lan ani magumuchadibei lan larúeihan.

 Busentu meha María tasubudiruni ida luba tadageinadun lugundun lidan sun tibagari marounrungiru meha luma ni aban wügüri. Aba lariñagun Gabüriéli tun: “Liábinba [s]ífiri [s]andu buagun, ábame lóuburagunibu lubafu Bungiu le Íñugutimabei. Ligía sándubei lubéi irahü le lunbei bagaraüdüni, Liráü Bungiu luba laguarún”. Ladügüba meha Heowá aban óunwenbu milaguru: lanügübei meha libagari Liráü le siélubei lun lásügüragüdüni turageirugun María lun laweiridun ñein kei haweiridun sun irahüñü.

Arihaadibu san lidan burí dibuhu o lidan aransehani (nacimiento) le adügǘbei fédurugu añahein lan ǘrüwa wügüriña ñein ha asubudirúabaña lidan chumagü kei “reyes magos” abisidahei Hesusu?... Gama lumoun mama ítara liña lasuseredun katei. Wügüriña hagía aturiahatiña meha waruguma, ani mínsiñeti katei le hadügübei aturiahatiña waruguma lun Heowá. Ariha waméi ka lan asuseredubei dan le hachülürünbei arihei Hesusu. Abahüdaguatu Bíbülia: “Danti le hebelurunbei múnadoun, aba harihini irahü le tuma lúguchu to María”. Mámaali meha aban irahü figigili Hesusu ani mámañein meha lidan héigagüle animaalu; ábanhali meha irahü le awinwandubei tidan aban muna luma Hosé tuma María.

Subuditi bun ida liña lan hadariruni aturiahatiña waruguma Hesusu?... Hasigiruña meha aban katoun tenege waruguma. Gama lumoun, lubaragiñe tanügüniña “waruguma” tuguya Beléun, aba tanügüniña Herusaléun, ñein lubéi meha urúei Eródesi. Ani ariñagatu Bíbülia busenti lan meha urúei Eródesi ladariruni Hesusu lun láfaruni hilagubei. Ka funa meha san íchugubarun “waruguma” tuguya ñein?... Mama meha Bungiu; Satanási meha le lágani Bungiu íchugubalun ñein.

Busenti Satanási lun hafiñerun gürigia aban lan irahü le siñaguagili lungua Hesusu. Gama lumoun, haritaguabá luagu ariñaga lan ánheli Gabüriéli tun María urúeibei lan Hesusu “ani magumuchadibei [lan] larúeihan”. Urúeihali Hesusu sielu, ani málühali agumucha hau sun láganiñu Bungiu. Ítara liña lunti lan warihini Hesusu, ani ligía lunbei warufudahani houn gürigia.