1. Ka burí san sákürifisiu hadügübei saragu gürigia, ani ka uagu?

ARANSEÑU haña gürigia lun hadügün sákürifisiu luagu katei le súdinibei houn. Agübürigu yusu hamuti hadaani, haseinsun luma here lun haweinamudagüdüniña hasaanigu. Nibureintiña ha ederegeragubaña houngua lun éibaaguni ígira hamuti hagundaarun hama hamadagu lun hayusuruni dan ligía sagü weyu lun haranserun lubá houdin éibaagua lidan liri hageira lidan huraraü le gíribei lidan chumagü Juegos Olímpicos. Hesusu guánarügü adügati meha sákürifisiu luagu katei le súdinibei lun. Gayarati hamuga meha lawadigimaridun lun larisidun o lun ladügün aban familia, gama lumoun himei lumuti meha letenirun lun lawanseragüdüni Larúeihan Bungiu (Mat. 4:17; Luk. 9:58). Gíbeti meha giñe katei hígirun lani disipulugu luagu Larúeihan Bungiu. Kei le súdini lubéi meha houn, desidírütiña hadügün saragu sákürifisiu lun hadügüni le hayaraati luagu Larúeihan Bungiu (Mat. 4:18-22; 19:27). Agia wagía? Buiti lun wálügüdagun woungua: “Ka san katei súdinibei nun?”.

2. a) Ka burí sákürifisiu súdiniti lunbei hadügüni kristiánugu inarünitiña? b) Ka burí amu sákürifisiu gayarabei hadügüni fiú?

² Anihein sákürifisiu le mósubei hadügüni sun kristiánugu inarünitiña anhein busén habéi hadügün umadaguaü buiti luma Heowá ani kipu hameime. Kei hénpulu, mosu hígirun dan lun hafurieidun, haliihanu Bíbülia, lun háhuduragun lun Bungiu lidan familia, lun houdin adamuridagua luma apurichiha (Hos. 1:8; Mat. 28:19, 20; Ebü. 10:24, 25). * Seremei áfaaguni le wadügübei luma labinihan Bungiu, laganwounduña lubéi wadagimanu lánina apurichihani ani gíbetimahaña gürigia awarirutiña luagun “wübü le ñein tubéi litenpulun [Heowá]” (Isa. 2:2). Luagu amu oubaü, añahein adügütiña sákürifisiu wéinamutimati lau heseriwidun Betelirugu, lidan tábunawagun Luban Wadamuridagun tuma Muna lun Adamurini Wéinamuti, lidan ladügǘn aransehani  lubá burí adamurini o ha nadagimeinbaña lidan híderawagun íbirigu ha burí asufurirubaña ladüga somu chagaguaü lánina liñawan dan. Mama mosu wadügüni katei burí le lun wibihini ibagari magumuchaditi, gama lumoun, súdiniti lun lawanserun Larúeihan Bungiu.

3. a) Ka buiti wibihibei dan le wadügün sákürifisiu luagu Larúeihan Bungiu? b) Ka burí álügüdahani lunbei wadügüni wóuniwagua?

³ Guentó súdinitimati wídehan lidan lawanserun Larúeihan Bungiu sügǘ lau lidan amu dan. Ma buiti warihin saragu íbirigu adüga sákürifisiu tídangiñe sun hanigi lun heseriwidun lun Heowá? Ariñagati abürühati sálumu: “Nadagaragüdüba bun lau nugundan, neremuhaba giñe lun biri, ladüga bubuidun” (Sálumu 54:5, 6). Ánhawa arufuda aban igaburi buiti kei lira, gúndaatimabei wabagari lidan awanha lan agurabahei liabin Larúeihan Bungiu (2 Lur. 16:15; Adü. 20:35). Ligíati, kada aban wádangiñe lunti wálügüdagun woungua: “Gayarati san nadügün amu burí sákürifisiu luagu Larúeihan Bungiu? Ida liña san nayusuruni nidaani, niseinsun, nere luma nisubudin? Ka burí san buligasion lunbei mabulieidagun nan luéi?”. Ariha waméi ka lan gayarabei wafurendeiruni lídangiñe sákürifisiu burí le meha adügǘbei lidan tidaani Bíbülia. Líderagubadiwa akutihani le lun weseriwidun lun Heowá lau ugundani.

4. Ka meha hibihibei ísüraelina ladüga hadügün sákürifisiu?

⁴ Lidan binadu Ísüraeli, mosu meha hadügün sákürifisiu lun ferudunawa lan hafigoun ani resibi hameime lufulesein Heowá. Fiú lídangiñe sákürifisiu ligía mosu meha ladügǘn, ani anihein meha amu le hadügübei ánhaña busén (Fad. 23:37, 38). Adagaragüdüni gudawarügüti, le meha ídanbei ladagaragüdǘwa animaalu dayarügü, gayarati meha hadügüni ánhaña busén, o keisi idewesei adügǘti lun Heowá. Dan le tederegerúnbei ténpulu lidan lidaani Salomón ligía meha aban ókaasion súdiniti le ídanbei hadüga ísüraelina sákürifisiu lun Heowá (2 Kro. 7:4-6).

5. Ka meha katei ladügübei Heowá luagu hafulesein ha gudemebaña?

⁵ Subudi lumuti meha Heowá mama lan súngubei lun gayara lan híchuguni ligiaméme, ligíati agurabati meha lun híchuguni kada gürigia le hayaraati. Ariñagati meha Lúrudu mosu lan hadagaragüdün animaalugu keisi sákürifisiu ani lun háwiyuruni hata animaalu hagía, lugundun sákürifisiu burí ligía “liyawadirügüñein meha burí katei buiti le meha lunbei lanügüni Kristu” (Ebü. 10:1-4). Gama lumoun, gunfuranda lumuti meha Heowá gádantiña gürigia. Kei hénpulu, anhein siñá lubéi meha ladagaragüdün aban ísüraelina aban mudún  o aban bágasu, gayarati meha ladagaragüdün fiú wagugua. Ítarati, íbini meha ha gudemebaña gachansintiña meha lun hadügün sákürifisiu (Fad. 1:3, 10, 14; 5:7). Gama lumoun, íbini gayara lan meha hadagaragüdün amu burí animaalu, anihein meha bián katei lamuriahan Heowá lúmagiñe sun le adügüti idewesei lun.

6. Ka bián katei lamuriahabei Heowá hámagiñe sun ha adügübaña sákürifisiu lun lau hagundan, ani ka meha uagu súdini lubéi le?

⁶ Furumiñe, mosu meha híchuguni gürigia lubuidun-agei hámati. Hárügüñanu meha animaalugu ha úati mégeiti hawagu hagía leresibirubaña Heowá keisi sákürifisiu (Fad. 22:18-20). Ligíati, anhein meha anihein lubéi somu mégeiti luagu animaalu, meresibirun lumuti meha Heowá. Lidan libiaman lúgaaru, le meha lunbei líchuguni sákürifisiu mosu meha haruma lan según Lúrudu. Anhein meha adügaali lubéi gürigia ligía somu katei mabuidunti, mosu meha láluahan libihini lufulesein Bungiu furumiñe lau lanügün aban idewesei luagu lifigoun o aban idewesei luagu lidurun (Fad. 5:5, 6, 15). Sériuti meha katei le, lugundun según Lúrudu sun meha gürigia le éigiti lídangiñe animaalu le adagarawagüdübei keisi sákürifisiu lánina arandaruni dan le wíyeñein lan mosu meha lounwen (Fad. 7:20, 21). Gama lumoun, anhein meha haruma lubéi ligibugiñe Bungiu ani úati mégeiti luagu lani sákürifisiu, gayarati meha lagundaarun lau aban lubuidun saminaü (aliiha huméi 1 Krónikasi 29:9).

7, 8. a) Ida liña san hasandiragun saragu íbirigu houngua dan le hadügün sákürifisiu luagu Larúeihan Bungiu? b) Ka gayarabei híchuguni sun kristiánugu lun Heowá?

⁷ Uguñe weyu, gíbetiña íbirigu ederegeragutiña houngua tídangiñe sun hanigi lun heseriwidun lun Heowá. Gúndaagüda hamuti Heowá ani gúndaatiña giñe lau híderagun amu. Aban íbiri le nadagimeinbei lidan tábunawagun Luban Hadamuridagun gefentiña luagu Heowá luma lidan híderawagun gürigia ha asufurirubaña ladüga somu chagaguaü lánina liñawan dan ariñagati weiri lan ugundani le lasandirubei darí lun siñagua lan lungua lun lafuranguagüdüni. Aba lariñagun: “Dan le narihini ugundani le hawagubei íbirigu luma óunwenbu eteingiruni luagu hibihin aban iseri Muna lun hadamuridagun o luagu ídemuei le hibihibei lárigiñe aban chagaguaü lánina liñawan dan, aba narihini luagu buidu lan áfaaguni le nadügübei”.

⁸ Uguñe weyu súnwandan táluahan lóundarun Heowá ida luba lan tídehan lun lawanserun wadagimanu lánina Larúeihan Bungiu. Lidan irumu 1904, abürühati íbiri Charles T. Russell: “[Sun kristiánu] lunti lasaminarun írida laali lan  Wabureme lun lóunigiruni lidaani, lere luma liseinsun, ani mosu lan láfaagun kada aban lun layusuruni katei burí le buidu, lun líchugun uéiriguni lun Aburemei”. Le linarün katei, gíbeti buiti lanügün ladügǘn sákürifisiu lun Heowá, gama lumoun, furanguti luagu hénrengu lan (2 Sam. 24:21-24). Ligía lunti lubéi lálügüdagun kada aban wádangiñe lungua: “Gayarati san buídutima lan nayusuruni nidaani, niseinsun luma nere?”.

9. Ka gayarabei wafurendeiruni lídangiñe dimurei burí le lariñagubei Hesusu lidan Lúkasi 10:2-4?

⁹ Wadaani. Mégeiwati saragu dan luma áfaaguni lun tásügürawagüdün agumeiraguagüdüni lídangiñe aban iñeñein lidoun amu, lun tábunawagun muna burí lun wáhuduragun lun Heowá ñein, ladügǘn aransehani lubá adamurini, lun híderawagun íbirigu ha asufurirubaña lárigi aban liñawan dan luma amu burí wadagimanu mégeiwati. Gama lumoun, wein-gádürürügüñein oura luagu weyu. Ka gayarabei wadügüni lun wayusuruni dan buidu? Ariha waméi le lariñagubei Hesusu houn lani disipulugu dan le lóunahanbaliña apurichiha: “Merederagun huguyame ayanuha ni ka uma ǘmadarugu” (Luk. 10:2-4). Ka meha labusenrubei lariñagun lau dimurei le? Lidan lidaani Hesusu dan le meha ladunragun aban gürigia luma amu umada mosu meha lóuburuni saragu wéiyaasu ani bulugua hagía dagá múarugu. Sun le barüti saragu dan. Mama meha línchahañanu Hesusu lani disipulugu lun mabusuradi hamá o lun menebenehabu hamá; busenrügüti meha líderaguniña lun híchugun fe luagu murusunrügüñein lan hadaani ani mosu lan hayusuruni lun katei le súdinitimabei (Efe. 5:16). Gayarati san wawinwandun según adundehani le ani yusu wameime libe-agei wadaani lun wídehan lidan wadagimanu lánina Larúeihan Bungiu?

10, 11. a) Ida liña san layusurún budagia le wíchugubei lun lawanserun wadagimanu lánina Larúeihan Bungiu? b) Ida liña gayara lan líderaguniwa adundehani le lídanbei 1 Korintuna 16:1, 2?

¹⁰ Waseinsun. Mégeiwati saragu seinsu lun letenirún lun wadagimanu lánina Larúeihan Bungiu. Kada irumu yúsuati saragu míñunu dólarü lun letenirún lun hemegeirun óunigirutiña sirkuitu luma distritu, prekursorugu espechalitiña hama misionerugu. Luéigiñe le aban oubaü, lúmagiñe irumu 1999 adügǘwaaru tóugiñe 24,500 Muna lun Wadamuridagun lidan burí ageiraü le gudemeti, ani mégeiwagiru 6,400 tanwoun. Ani kada hati imprimíruatu kéiburi 100 míñunu Garüdia Atalaya tuma ¡Despertad! Sun wadagimanu le amainirúati lau budagia le wíchugubei lau gundaü.

¹¹ Ruti meha apostolu Pábulu aban adundehani le gayarabei líderaguniwa lidan lóurate wíchugun budagia (aliiha huméi 1 Korintuna 16:1, 2). Lábugiñe ladundehan Bungiu ínchaha lumutiña apostolu Pábulu íbirigu korintuna lun hadireirun murusun seinsu según le hayaraati lidan furumiñeti weyu lidan kada dimaasu, mama lun hagurabahan darí lagumuhóun weyu lun híchuguni le ígiragubei hama. Ítarameme, uguñe weyu sun wagía desidírü wamaali átiribei lan wíchugun keisi budagia, según wadeiragun woungua (Luk. 21:1-4; Adü. 4:32-35). Chóuruti gebegi lan lun Heowá gíchigadi wamá.

12, 13. a) Ka gayarabei ladarasahaniwa luéi wayusuruni sun were luma iyaraani le wawagubei lun lawanserun Larúeihan Bungiu? b) Ida liña gayara lan líderaguniwa Heowá?

¹² Were luma subudi le wawagubei. Íderagua lumutiwa Heowá dan le wayusuruni were luma subudi le wawagubei luagu lufulesein Larúeihan. Füramasehaali líchuguba lan erei woun danme le wasandirun mérediwa lan (Isa. 40:29-31). Ánheinti samina wabéi mabafu wamá lun wagunfulirun somu wadagimanu, ani añahein lan amu aransetimatiña sügǘ wau? Haritagua wamá gayara lan laganwoundagüdüni Heowá iyaraani le wawagubei, ítara kei meha ladüga lun Besaléli luma Oliabü (Afu. 31:1-6; ariha huméi dibuhu le lídanbei lagumeseha arütíkulu).

¹³ Amisuraha lumutiwa Wabungiute lun wíchuguni sun le buídutimabei waweigiñegua, sin waramudun ni kata (Ari. 3:27). Dan le meha tábunawagunyabei ténpulu, ariñagati meha Heowá houn huríu ha Herusalénbaña lun lan “hasaminarun buidu luagu ligaburi hóuserun”, o luagun  le hadügübei lun hídehan lidan wadagimanu ligía (Ahe. 1:2-5). Ígiraaña meha lun hadireirun ani bulieiguaña meha luéi le súdinitimabei. Súdiniti giñe lun wálügüdagun woungua: “Yusu numuti san nibagari lun nadügüni lugundan Heowá? Gayarati san nasaminarun buidu luagun nibagari lun gayara lan nadügüni sun niyaraati lidan wadagimanu lánina Larúeihan Bungiu lidan lagumuhóun dan le?”.

14, 15. a) Ida liña líderaguniwa hénpulu hani saragu íbirigu ha gudemetiña? b) Ka lunbei desidírü wamá wadügüni?

¹⁴ Gíbetiña íbirigu awinwandutiña lidan fulasu le ñein lubéi anihein lan saragu turóbuli luma lanarime gudemei, ani áfaaguatu óundaruni lun tíderaguniña (2 Ko. 8:14). Ani íbini íbirigu ha, ariha hamuti lichugún budagia keisi aban óunwenbu chansi. Wéiriti lugundan Heowá luagu tínchahaniña hanigi lun híchugun lídangiñe murusun le hámabei! (2 Ko. 9:7.)

¹⁵ Lidan aban ageiraü wéiriti lugudemen Áfürika, díreitiña fiú íbirigu aban fánreinti lidan hachari ani seinsu le hasagarubei ñéingiñe dan le halubahan aba híchuguni budagiame lun lawanserun wadagimanu lánina Larúeihan Bungiu. Ani lidan fulasu ligía mégeitiña meha aban iseri Muna lun Adamuridaguni. Busentiña meha íbirigu hídehan lidan ábunaguni ligía, gama lumoun aba lagumeserun wadagimanu lidan lidaani hábunaguni hachari. Aba san midin hamá ídeha? Ñǘdüntiña. Aba meha houdin nadagimein tuagu Luban Adamuridaguni wéyuagu, ani áriebu aba houdin ábunaguei hachari. Ma lanarime sákürifisiu! Haritaguagüda hamutiwa hawagun íbirigu ha lánina furumiñeti sígulu ha meha awinwandubaña Masedónia. Íbini meha “gudeme hamá”, ayumuraguatiña lun higirún lun híderaguniña híbirigu ha mégeibaña (2 Ko. 8:1-4). Ítarameme, lunti líchugun kada aban wádangiñe según “le leresibirubei lúmagiñe Bungiu”, lidan amu dimurei, lídangiñe le lúmabei gibe lan yebe o murusunrügüñein lan (aliiha huméi 2 Lúrudu 16:17).

16. Ida luba wachoururuni anhein gunda lubéi Heowá lau wani sákürifisiu?

¹⁶ Anihein aban katei lunti mabulieidun wamani. Ítara kei meha ísüraelina, lunti wachoururuni anhein gunda lubéi Heowá lau sákürifisiu le wíchugubei lun tau sun wanigi. Mosu wasaminarun buidu lun mabulieidagun wamá luéi wani buligasion le súdinitimabei, kéiburi wetenirun houn waduheñu luma wáhuduragun lun Bungiu. Moun lumuti wayusuruni sun wadaani luma wámati lun wíderagun amu darí lun míchugun wamani hemegeirun tílana waban houn ani íderagua wamañame akipurei hamadagua luma Bungiu. Le linarün katei, wíchuguña hamuga lídangiñe le úati wama (aliiha huméi 2 Korintuna 8:12). Moun lumuti giñe wabulieidagun luéi wakipuruni wamadagua luma Heowá (1 Ko. 9:26, 27). Luagu amu oubaü, ánhawa awinwanda según adundehani le tídanbei Bíbülia, gúndaabadiwa lau sákürifisiu le wadügübei ani ‘leresibirubei’ giñe Heowá lau sun lugundan.

17, 18. a) Ka wasandirubei hawagu íbirigu ha adügübaña sákürifisiu luagu Larúeihan Bungiu? b) Ka lunbei wasaminaruni sun wagía?

¹⁷ Lidan sun ubóu añahein íbirigu nadagimeintiña lau ederegeraguni unguaü lun lawanserun Larúeihan Bungiu; gayarati lariñawagún luagu deregegua hamá houngua keisi “idewesei buiti” (Fili. 2:17). Wéiriti hebegi woun luagu le hadügübei! Ani ka gayarabei wariñaguni hawagu hánigu weiriou hama hasaanigu íbirigu ha etenirubaña lun wadagimanu lánina Larúeihan Bungiu? Chóuruti teinki wamaniña luagu hareidun luma luagu sákürifisiu burí le hadügübei.

¹⁸ Gíbeti wadagimanu lunti ladügǘn lidan luáguti Larúeihan Bungiu. Furíei wamá lun Heowá ani samina wamá ida luba lan waganwoundagüdüni weseriwidun. Gayarati wachoururuni luagu wibihiba lan saragu abinirúni guentó ani resibi wagíame abinirúni wéinamutimati “lidan iseri ubóu le lunbei liabin” (Mar. 10:28-30, TNM).