Surusiagu ha etenirubaña lun saminaü ariñagatiña anhein lan busén lubéi aban gürigia ladarirun ugundani le inarüniti, mosu lan lasubudiruni luagu megei lan ladügün amu katei lanwoun le adüga láalibei. Ani ariha wamuti le hawagu gürigia burí ha busenbaña hadügün somu katei le súdiniti o híderagun lan somu gürigia o somu óundaruni. Añahein amu yusu hamuti hadaani óunigirei ubóu, o hafurendeirun músika lun gayara lan hasandirun gasuuni lan habagari. Gama lumoun, hibe-agei mibihin hamuti le háluahabei.

Gürigia ha aturiahabalun Bíbülia maweiriduntu hanigi luagu megei hamani gürigia lídehan Bungiu. Arufuda lumuti furumiñeti burí kapítulu lidan Agumesehani luagu Bungiu lan adügübaliña furumiñetiña gürigia ubouagu, luagu ayanuha lan meha hama sun dan ani ígirati lan meha lun hadügün aban umadaguaü buiti luma (Agumesehani 3:8-10). Madügǘnwatiña gürigia lun hawinwandun díseñu luéi Bungiu, le adügübaliña; megei hamuti lídehan. Ani ayanuhatu Bíbülia luagu katei le saragu wéiyaasu.

Kei hénpulu, ariñagati meha Hesusu: “Fuleseiwatiña ha asubudirubalin luagu megei hamani lídehan Bungiu” (Matéu 5:3). Arufuda lumuti dimurei burí le luagu mégeiwati lan aban umadaguaü luma Bungiu lun gunda lan habagari gürigia. Ida lubati wadügün umadaguaü luma Bungiu? Hesusu guánarügü íchugubalin óunabagülei: “Mámarügübei tau fein habagarida gürigia; habagariduba giñe lau sun dimurei le lariñagubei Bungiu” (Matéu 4:4). Ítara liña, lererun Heowá —lidan amu dimurei, lisaminan luma lugumadin, le tídanbei Bíbülia— gayarati líderaguniwa lun gunda lan wabagari. Ariha wamá ǘrüwa igaburi.

Uguñe weyu gíbetiña subudihabutiña aransetiña lun híchugun adundehani luagu tema kéiburi ida luba lan hanaagun gürigia houngua buidu hama amu, luagu ínsiñeni, luagu ibagari kei familia, luagu laransehóun turóbuli, luagu ugundani íbini luagu lisuuni ibagari. Gama lumoun, ka gayarabei líchugun adundehani buiti woun luagu burí katei súdiniti le luéidigia Heowá le adügübaliña gürigia?

Ru wamá aban hénpulu: samina wamá aba lan hagañeihan aban kámara o aban konputadora. Agurabatün líchuguba lan le adügübalun aban gárada tidoun, to lunboun tarufuduni hun ida luba lan hayusurunu buidu lun tadurarun, adián? Ítara  tiña Bíbülia kei gárada tuguya, lugundun tuguya gárada to lígiruboun Bungiu, le “adügübadiwa”, woun lun larufuduni woun ida luba lan wawinwandun. Arufuda tumuti “gárada” to ka lan un wadügǘwa luma ida luba lan wawinwandun lun buidu lan lidin woun.

Ítara kei aban gárada to arufudubalin furangu ida luba lan layusurún somu umegeni, rutu Bíbülia adundehani woun luagu igaburi le gayarabei lagadeiruni wabagari. Háfuga genegeti ménrenguntima lan lasigirún hadundehan amu gürigia. Gama lumoun, ma úaratimati saminaü luagu buídutima lan lasigirún ladundehan le “adügübalin” somu katei lun mebelurun wamá lidoun turóbuli ani ibiha wagíame resultóu buiti?

Íbini ru lan Bungiu adundehani woun ani arufudaha ligía woun, mafosurun lumutiwa lun wasigiruni ladundehan. Lubaragiñe lira, ladüga wínsiñe lun ani busenti líderaguniwa, ligía lariñagubei woun lau ínsiñeni: “Au Aburemeibei [Heowá] le Bubungiute; arufudaha numuti le buídubei bun, adundeha numutibu luéigiñe üma le lunbei bafalaruni. Adügaadibu hamuga gasu lau nererun! Aganwoundeina liña hamuga lubuidun dan bun kei duna éibaaguati, ítara liña hamuga bawanserun kei lugudi barana” (Isaíasi 48:17, 18). Lidan murusun dimurei, anhein wasigira ladundehan Bungiu, gúndaabei wabagari. Ligía megei wabalin.

Añahein saragu ariñagutiña memegeirun hamani Bungiu ani mafiñengubeitiña luagu. Saminatiña lun hamuga lan anihein lan aban Bungiu le unbei wínsiñeda, úabei hamuga saragu wuribani. Kei hénpulu, álügüdaguatiña houngua: “Ka uagu hasufurira gürigia ha buítiña? Ka uagu nasirua habéi saragu irahüñü maduruntiña lau óunwenbu burí mégeiti hawagu? Ka san uagu weiri lubéi marichaü lidan ibagari?”. Maribanti hadügüni gürigia álügüdahani burí le, ani ladarirún aban óunabagülei buiti lun gayarati gani lan aban óunwenbu efekütu wawagu. Gama lumoun, lubaragiñe wíchuguni duru luagun Bungiu luagu wuribani le asuseredubei, ariha waméi ida liña lan tafuranguagüdüni Bíbülia, to Lererun, katei le.

Lidan Agumesehani kapítulu 3 aliihatiwa yusu lan Satanási aban hewe lun lóuchaguniña furumiñetiña wagübürigu lun maganbadi hamá lun gumadi le líchugubei Bungiu houn. Ariñagaali meha Bungiu houn ánhaña lan eiga tídangiñe furuda to lánina lasubudirúniwa le buídubei luma le wuribabei hóunweguba lan. Gama lumoun, aba lariñagun Satanási tun Ewa: “Iyeeni lira, móunwegunbadün. Subudi lumuti Bungiu luagu danme lan heigin tídangiñe tin tídibu wewe tuguya, léfegechuba lan hagu lun hasubudiruni le buídubei luma le wuribabei, ábameti ítara humá kei Bungiu” (Agumesehani 2:16, 17; 3:4, 5).

Lau dimurei le, ariñagati Satanási luagu yee lan Bungiu ani marichati lan ligaburi larúeihan. Ariñagati buídutimabei lan lidin houn gürigia ánhaña gaganbadi lun sügǘ lau haganbuni Bungiu. Ida luba méhati lafuranguagüdüniwa anhein inarüni lubéi le lariñagubei o iyeeni lan? Aba lígirun Heowá lun lasigirun katei kei lubéi. Lidan amu dimurei, aba líchugun chansi dandu lun Satanási kei houn sun ha ñǘdünbaña luéigiñe lóubadina lun harufuduni anhein inarüni lubéi gayara lan hawinwandun gürigia buidu sin Bungiu.

Agia hugía, ka hisaminanbei? Gayarati san hawinwandun gürigia sin lídehan Bungiu, ani arúeiha hagíame houngua? Samina humá luagu burí  asufuriruni, marichaü, sandi luma óunweni; wuribani luma heferidiruni gürigia habusigari luma lubuidun igaburi; wuribu luma háfaragun lílana aban rasa houngua hama lílana amu rasa ladüga iyereehabuni... Turóbuli burí le luma amu burí wuribani le adiheridagüdübaliña gürigia lidan sígulu burí le sügühalibei arufuda lumuti furangu mabuidun lan lidin houn gürigia lidan houchun hawinwandun sin Bungiu. Lubaragiñe tíchuguni Bíbülia duru luagun Bungiu luagu hasufurirun gürigia, arufuda tumuti aban lídangiñe resun le uágubei anihein lan asufuriruni dan le tariñagun gabafu lan “gürigia lun ladügün damichi lun gürigia líledi” (Apurichihati 8:9).

Según le ariha wamaalibei, ma furanguti megei wamá wáluahani Bungiu mámarügü lun wadarirun óunabagülei lun burí álügüdahani le adiheridagüdübaliwa, íbini giñe lun wadarirun láranina turóbuli burí ligía?

Lúmagiñe binadu dan busengubeiñanu gürigia hawinwandun sin sandi, sin aweiyaduni ni óunweni. Yúsuali saragu dan, erei luma seinsu lidan laluahóun láranina katei le, ani meseriwinti sun áfaaguni ligía lun ni kata. Añahein áluahatiña árani ani adüga hagía ehersísiu lun hesefurun luéi turóbuli burí le, o aba lan híchuguni hafiñen tuagu siensiasi, gama lumoun súnwandan masali lan le hagurabubei.

Busenti Bungiu lun gunda hamá gürigia. Ligía meha lisuunibei dan le ladügünbaliña, ani masansirungili lisaminan (Agumesehani 1:27, 28; Isaíasi 45:18). Chouru wamuti luagu lagunfulirunbei lan Heowá sun katei le lasaminarubei ladügün (Isaíasi 55:10, 11). Ayanuhatu Bíbülia luagu füramasei le ladügübei Bungiu luagu ladügübei lan Ubóu paraísume, aban paraísu libe le meha heferidirubei Adán tuma Ewa. Ariñagati Arufudúni 21:4: “Laragahabei [Heowá] sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei”. Kaba ladüga Bungiu lun ladügüni lanarime asansiruni le? Ani ida luba gayara lan wasagarun buiti lídangiñe lagunfulirun füramasei le?

Hesukrístu, le Liráü Bungiu, arufudahati meha houn lani disipulugu lun hafurieidun lun ladügǘniwa lugundan Lúguchi. Gíbetiña gürigia subudi hamuti furíei le ani águyuguagüda hamuti dan le hafurieidun, subudiwati furíei le kei Wáguchi Bungiu. Ariñagati ítara: “Wáguchi Bungiu le siélubei, inebewalá biri. Ñǘbuinla barúeihan; adügüwalá bugundan ya ubouagu kei ladügǘniwa sielu” (Matéu 6:9, 10). Layusurubei Heowá Larúeihan lun lagumuchun lau sun wuribani le adüga hamaalibei urúeigu ubouaguna luma lun lanügüni iseri ubóu lánina irichaü le füramase láalibei (Danieli 2:44; 2 Féduru 3:13). * Ka lunbei wadügüni lun wasagarun buiti lídangiñe lani Bungiu füramasei?

 Arufuda lumuti meha Hesusu katei sensiyuti le lunbei wadügüni: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei” (Huan 17:3). Ítara liña, seremei lun Heowá, gayarati wawinwandun lun súnwandan lidan aban iseri ubóu. Ligíati, megei wamuti san Bungiu? Le linarün katei, megei wamuti.

Bián-milu irumu guentó, lidan fulasu le gíribei Areupagu, Atenasi, aba lariñaguni Pábulu dimurei burí le luagu Bungiu houn güriegu ha íñuti haturiahan: “Ligía guánarügü íchugubei ibagari luma garabali, luma sun katei woun”. Lárigiñe aba lariñagun: “Ladüga lídangiñeti Bungiu awanhein lubéi, gabagari wagía ligibuagu ubóu le; kei hariñaguni poetagu: ‘Ladügawagun Bungiu wagía’” (Adügaü 17:25, 28).

Uguñe weyu, inarünimémegili dimurei burí le meha lariñagubei Pábulu houn atenasina. Ru lumuti Bungiu woun garabali le wawaragubei, éigini le wéigibei, luma duna le wátubei. Sin katei buíduburiti le siñabei hamuga wawinwandun. Kati uagu lasigira íderaguaña gürigia ani hibe-agei masaminaruntiña luagun? Óunabati Pábulu: “Lun gayaraabei lan háluahani gürigia, gayara láamuga hadariruni lau háluahani; lau sun inarüni lan madise lan Bungiu luéi kada aban wádangiñe” (Adügaü 17:27).

Hínsiñeti hamuga san hun hasubudiruni Bungiu buidu? Hínsiñeti hamuga san hun laganwoundun hisubudin luagu lisuuni luma luagu ladundehan lun gayara lan hawinwandun lau ugundani guentó luma lun súnwandan? Anhein ítara liña lubéi, amisuraha wamutün lun hadimurehan luma gürigia le ederegerubarun garüdia to hun o habürühan houn ha adügübarun garüdia to. Híderagubadün lau sun hagundan.