1, 2. Ka san uagu buin liña lubéi ubóu lau iyeeni uguñe weyu, ani ida liña laburuchagun saragu lídangiñe? (Ariha huméi dibuhu le lídanbei lagumeseha arütíkulu.)

LIDAN ubóu le, anihein iyeeni lidan sun fulasu. Ani moun lumuti taweiridun wanigi luagu katei le, lugundun ariñagatu Bíbülia luagu aban lan sásaamu lidan iyeeni Satanási, le lurúeite ubóu le (1 Tim. 2:14; 1 Huan 5:19). Eibu layarafadun lagumuchun ubóu le, hanarimetimati ligañi Satanási: “Subudi lumuti luagu murusunrügaali lan lidaani” (Aruf. 12:12). Ligía sun lubéi ha ígiraguagüdübaña houngua lun, yéetimarügütiña sagü weyu ani áluga hagía heyeeduniña lumutuniña Bungiu le inarüniti.

² Anihein dan láfuridun lanarime burí iyeeni hawagu gefentiña luagu Heowá luma luagu hafiñen tidan bigibigitu, lidan Internet luma tidan periódiku. Kei resultóu, aba taweiridun hanigi fiú gürigia o anihein dan íbini aba hagañidun ladüga hafiñeruni iyeeni burí ligía.

3. Kaba íderaguawa lun mígirun wamá lun weyeedún?

³ Dan le wagagibudagun luma burí lanarime iyeeni lúmagiñeti Mafia le, rútiwa seremei luagu anuhein lan Lererun Bungiu wama, to adügüboun “lun hígiruni gürigia katei le mabuidunbei” (2 Tim. 3:16). Dimurei burí le meha lariñagubei apostolu Pábulu houn kristiánugu ha meha Tesalónikabaña arufudati ígiraguagüdaaña lan meha houngua lun saminaü iyeeniti. Ligía leweridirunbaliña: “Amuriahatiwa huma lun masansirun humani ligaburi haritagun ítara umenrengun”, o kei tariñaguni Traducción en lenguaje actual: “Mígiraguagüda humá hungua lun hayuridaguagüdüniwa lau lumenrengun” (2 Tesa. 2:1, 2). Ka wafurendeirubei lídangiñe lubuidun eweridihani le, ani ida liña gayara lan lahuudun woun uguñe weyu?

4. Ida liña meha heweridirúniwa kristiánugu ha Tesalónikabaña luagu “luéyuri [Heowá]”, ani ida liña weresibirun eweridihani uguñe weyu?

⁴ Tidan furumiñetu ligaradan Pábulu houn kristiánugu tesalónikana, wéridi lumutiña luagu anitebei lan “luéyuri [Heowá]”.  Mabusenrunti meha lun lidan hamá “luburiga” ni lun lárügüdüniña magaradahanga. Ligía laritaguagüdünbaliña luagu lánina hamá “larugounga” ani lunti lan agaradahañu hamá. Ariñagati houn: “Agagudúañu wamá, súruañu wagíame” (aliiha huméi 1 Tesalónikana 5:1-6). Uguñe weyu, wagurabahañein tagünrinchawagún Babilónia to Wéiriboun, óundaruni lánina relihión mama inarüniti ubouagu. Ítara luba lagumeserun lanarime luéyuri Heowá. Guentó gunfurandatima wamaali ida luba lan lagunfuliruni Bungiu lugundan. Ani lidan damuriguaü súnwandan wibihin eweridihani buiti le íderagubaliwa lun agaradahañu wamá. Gaganbadi wamá lun eweridihani burí ligía líderagubadiwa lúntima desidírü wamá lun ‘masansirun wamani ligaburi waritagun’ ani lun wasigirun eseriwida lun Bungiu sin wararamagun (2 Tesa. 2:2).

5, 6. a) Ka san uagu layanuha Pábulu tidan tibiaman ligaradan houn kristiánugu tesalónikana? b) Kaba san ladüga Bungiu yarafa madise lau lídehan Hesusu? c) Ka burí álügüdahani lunbei wadügüni wóuniwagua?

⁵ Murusun dan lárigiñe lóunahanu Pábulu furumiñetu gárada houn tesalónikana, aba labürühanu tibiaman. Tidan ayanuhati luagu asufuriruni le lunbei liabin danme le lagunfuliruni Hesusu lasíadihan Bungiu lun “labeichuniña ha masubudirunbalin Bungiu, madügün hagía gasu lau uganu luáguti asalbaruni” (2 Tesa. 1:6-8). Arufudati kapítulu 2 tidan gárada tuguya ígiraguagüda hamá meha fiú lílana damuriguaü houngua lun iyeeni ani aba hasaminarun yarafaali lan meha luéyuri Heowá (aliiha huméi 2 Tesalónikana 2:1, 2). Úati meha gunfuranda hamani furumiñetiña kristiánugu buidu ida luba lan meha lagunfulirun lugundan Bungiu. Le linarün katei, dan le layanuhanbei Pábulu luagu profesía, ariñagati: “Ladüga masubudintiwa sunsuinagubei ani mama giñe sunsuinagubei lubuidun ladimurehan Bungiu wayumulugugiñe, gama lumoun danme le liabin le dayarübei, ligíame lagumuchagun le mégeigilibei lun dayarübei lan” (1 Ko. 13:9, 10). Íbini ítara, kíputiña aban afiñeni héreti seremei eweridihani lúmagiñeti Bungiu le habürühabei Pábulu, Féduru hama amu burí kristiánugu anuadirúaaña lidan dan ligía.

⁶ Lun laransehani sun katei, ani íderagua láñame lun gunfuranda hamani katei buidu, abürühati meha Pábulu lubaragiñe lanme liabin luéyuri Heowá ñéinbaña lan agarabaagutiña lun Bungiu ani lachülaaguba lan giñe “lágani Kristu, le siádiwaalibei lun féridiguaü”. * Lárigiñe, danme  le buga lachülürün oura, “lagünrinchagu[baña] Wabureme Hesusu” sun ha eyeedaguagüdübaña houngua. Afuranguagüda lumuti meha Pábulu kaba lan lébuna hasiadirún dan le lariñagun: “[Ladüga maha hamá] heresibiruni inarüni luáguti Kristu lun hasalbarun” (2 Tesa. 2:3, 8-10). Ligía súdini lubéi lun wálügüdagun woungua: “Wéiriti san línsiñen inarüni nun? Rútina san fe luagu iseri lafuranguagüdüniwa subudi le tídanbei garüdia to luma le áfuachubei tidan amu burí agumeiraguagüdüni to hibihiboun lubúeingu Bungiu lidan sun ubóu?”.

7, 8. a) Ka burí san peliguru úmabei hagagibudagua furumiñetiña kristiánugu? b) Ka san aban peliguru le úmabei wagagibudagua, wagía kristiánugu inarünitiña, uguñe weyu?

⁷ Mámarügübei meha hawéi ha agarabaagubaña lun Bungiu luma luéi lagübüri harufudahan hóunigiragua kristiánugu houngua, mosu meha giñe hóunigiragun houngua luéi amu burí óuchawaguni. Abürühati Pábulu lun Timotéu: “Línsiñegu seinsu ligía lílagülebei sun luwuyeri wuribani”, ani lárigiñe ábaya lariñagun: “Ani añahein saragu gürigia ladüga houchun habihin seinsu, aba hígiruni hafiñen luagu Kristu, buíngüda hamaaliti habagari guánarügü lau asufuriruni” (1 Tim. 6:10). “Layumahan ǘgürügü” ligía ábanya peliguru le lunbei hanurahan kristiánugu luéi (Gal. 5:19-21).

⁸ Gama lumoun, gayarati gunfuranda wamani ka lan uagu seriu lubéi leweridiruniña Pábulu tesalónikana hawéi wügüriña ha únbaña lagúara “yéetiña”. Lidan guánarügü damuriguaü añahein meha ayanuhatiña “iyeeni lun hafalaruniña afiñetiña” (2 Ko. 11:4, 13; Adü. 20:30). Dan lárigiñe, ariñagati meha Hesusu houn lílana damuriguaü le Éfesubei buidu lan hadüga ladüga meha maha hamá “háfaguniña ha wuribabaña”. Aba hóuchaguniña kristiánugu éfesuna gürigia hagía, ha arufudubaña luagu apostolugu hamá ‘yéetiña’ (Aruf. 2:2). Súdiniti abürüha lan Pábulu tidan tibiaman ligaradan houn Tesalónikana: “Niduheñu, ariñagatina hun lidan liri Wabureme Hesukrístu lun hadisedun luéi furumiñeguarügü hídangiñe [...] le mabagaridunti úaragua luma arufudahani le hibihubei wámagiñe”. Lárigiñe, aba layanuhan luagu kristiánu “le máhabei luadigimaridun” (2 Tesa. 3:6, 10). Anhein lunti lubéi meha hadisedun luéi aban gürigia le magúaliti, lúntitima meha hadisedun hawéi ha agumeserubaña óusera kei láganiñu Bungiu! Peliguruti meha hásügürün dan luma aban gürigia ítarati ani lunti meha hadügüni sun hayaraati lun hadisedun luéi. Ani ligiaméme asuseredubei uguñe weyu (Ari. 13:20).

9. Ka uagu lunti lubéi duari wamá anhein ñübuin somu gürigia ayanuha luagu katei le mafuranguagüdün tumuti Bíbülia o labusenrun layanuhan wuriba tuagu lóundarun Heowá?

⁹ Yarafatimaahali óunwenbu asufuriruni luma lagumuchagüle ubóu wuribati le, ligía súdinitimaahali lubéi eweridihani le meha ichugúbei houn furumiñetiña kristiánugu guentó sügǘ lau lidan amu dan. Mabusenruntiwa weresibiruni ‘lareini Bungiu ítaraguarügü’, lidan amu dimurei, mabusenruntiwa wóuserun kamá úati gunfuranda wamani lisuuni lareini Bungiu lugundun gayarabei weferidiruni chansi lun wawinwandun lun súnwandan, sielu yebe o ubouagu (2 Ko. 6:1). Anhein ñübuin somu gürigia le abasiihati adamuridagua wama abusenra layanuhan woun luagu katei le mafuranguagüdün tumuti Bíbülia o anhein abusenra layanuhan wuriba tuagu lóundarun Heowá, lunti duari wamá (2 Tesa. 3:13-15).

10. Ka meha arufudahani lunbei hafalaruni kristiánugu tesalónikana?

¹⁰ Ínchaha lumutiña meha Pábulu líbirigu lidan afiñeni lun derebugu hamá ani mabulieidun hameime le furendei hamaalibei (aliiha huméi 2 Tesalónikana 2:15). Katei san “arufudahani” le meha furendei hamaalibei? Furanguti mama lan meha arufudahani wuribati le lídanbei relihión  mama inarüniti ani le hínsiñebei houn kamá hamuga tídangiñe Bíbülia hasagarei. Layanuhaña meha luagu larufudahan Hesusu luma luagu uganu lúmagiñeti Bungiu le lanügübei Pábulu hama amu burí kristiánugu úaraguatiña, saragu lídangiñe uganu burí ligía dariwati tidan Bíbülia. Ruti meha Pábulu dǘgüdaguaü houn kristiánugu ha lídanbaña damuriguaü Korintu lau dimurei burí le: “Gúndaatina hau luagu súnwandan lan haritagun nuagun, luma luagu falá humani arufudahani le níchugubei hun” (1 Ko. 11:2). Chóuruti meha lébuna arufudahani le ani yuuti meha lun hafiñerun luagu sunsuinagubei.

11. Ha ígiraguagüdübaña houngua lun heyeedún, ida liña gayara lan hadisedun luéi Heowá?

¹¹ Tidan ligaradan houn Ebüréu, íridati Pábulu bián igaburi le ídanbei gayara lan leferidiruni aban kristiánu lafiñen ani heigua ligía (aliiha huméi Ebüréu 2:1; 3:12). Ayanuhati luagu ‘adireiruni luéi üma’ luma luagu ‘adiseduni luéi Heowá’. Dan le tídanñein lan aban guríara aban gürigia ani aba tagumeserun guríara adiseda lau, furumiñe háfuga míchugun lan fe, lugundun murusun murusun ladiseda luéi laru duna. Luagu amu oubaü, anhoun ládaha lugune lun ladisedun luéi laru duna, ligía guánarügü adügübei lun ladisedun. Biángubei kesi le arufuda lumuti le asuseredubei houn ha ígiraguagüdübaña houngua lun heyeedún luma lun ledebilidun hafiñen luagu inarüni.

12. Ka burí katei gayarabei ladügün lun ledebilidun wafiñen?

¹² Háfuga ígiraguagüda hamá meha fiú kristiánugu tesalónikana houngua lun heyeedún. Agia wagía? Geyegu waña lau saragu katei le gayarati lagidaruni wadaani. Samina wamá luagu sun dan le hásügürübei gürigia lidan somu isebáhari, o lidan somu páhina lánina hadügǘn umadagu lidan Internet, abürüha uganu lidan gágamuru o áluaha hasubudiruni sun le asuseredubei lidan luáguti huraraü ubouagu. Furumiñeguarügü lídangiñe katei burí le gayarati ladügün lun wadireirun ani lun weferidiruni ubebeni le wasandirubei luagu inarüni. Kei resultóu, gayarati wagumeserun ariñagei ligiaméme lidan wafurieidun, gayarati wígiruni waturiahanu Bíbülia, woudin adamuridagua luma apurichiha. Ka lunbei wadügüni lun meyeedúniwa wamá?

13. a) Kei aubei labürüdǘwa tidan Bíbülia, ka hagaburibei saragu gürigia uguñe weyu? b) Kaba íderaguawa lun wóunigiruni wafiñen?

¹³ Aban katei le lunbei líderaguniwa óunigirei wafiñen waritaguni dan le ídanbei wawinwanda luma dañu le gayarabei wadügüni wóuniwagua ánhawa áluaha umadagu ha mafiñentiña luagu wawinwanduña lan lidan “lagumuhóun dan”. Abürühati apostolu Féduru luagu dan le ídanbei wawinwanda: “Añaheinbaña gürigia adaagutiña bula hau; habagariduba keisi lariñaguni luriban haritagun houn, ábame hariñagun: ‘Ka san mégeibei lau füramasei luagu lagiribuduba lan Kristu? Hilagua wagübürigu ani ítaramemegili sun katei kei meha lúmagiñe dan le ladügǘnbei ubóu’” (2 Fe. 3:3, 4). Lun mabulieidagun wamá luagu wawinwanduña lan lidan “lagumuhóun dan”, súdiniti lun waliihanu Bíbülia sagü weyu ani aturiaha wamounme súnwandan. Agarabaaguni lun Bungiu le uágubei tayanuha Bíbülia susereti lúmagiñe lidan binadu dan ani anihamémegua uguñe weyu. “Lágani Kristu, le siádiwaalibei lun féridiguaü” anihagua óuchaguaña lumutuniña Bungiu. Ligíati, mabulieida waméi luagu yarafaali lan luéyuri Heowá (Sof. 1:7).

14. Ida liña líderaguniwa wakipuragun woungua beresegu lidan apurichihani?

¹⁴ Sun le sügühalibei arufuda lumuti luagu apurichihani lan aban lídangiñe katei le súdinibei lun wakipuragun woungua agaradahañu ani lun meyeedúniwa wamá. Dan le líchugunbei Hesukrístu, le Lichügüdina damuriguaü, gumadi houn sun ha afalarubalin lun hadügün disipulugu hádangiñe gürigia ha lídanbaña sun fulasu, ani arufudaha hameime le furendei hamaalibei lúmagiñe houn, líchuguña meha aban wadagimanu houn le lunti líderaguniña lun hóunigiragun houngua (Mat. 28:19, 20). Lun wagunfulirun  lau wadagimanu ligía, mosu wapurichihan lau ubebeni. Odi saminatiwa hawagun íbirigu tesalónikana apurichiha lau magundani lúnrügü hagunfulirun? Haritagua waméi dimurei le lariñagubei Pábulu houn: “Meredera huméi luadigimari [s]ífiri [s]andu. Míchiga humá mebereseni lun dimurei le lariñagubei Bungiu” (1 Tesa. 5:19, 20). Ma adügati profesía burí le warufudahabei lun agagudúañu wamá?

15. Ka katei gayarabei wadügüni lidan áhuduraguni kei familia?

¹⁵ Chóuruti sun lan wagía busentiwa wíderaguniña waduheñu lun buídutima hamá keisi apurichihatiña. Ligía añahein lubéi íbirigu asagarutiña dan dan le haturiahan lidan familia lun haranserun lubá hani ministeriu. Háfuga gayara lan wakutihan úara ida luba lan warufudun berese wamá hau gürigia ha óunabubaña buidu lun uganu: Kaba san uagu wayanuha houn danme le wagiribudun abisidahaña? Ka burí tema gayarabei súdini lan houn? Ka funa san oura buídutimabei lun woudin bisidaña? Gíbetiña íbirigu yúsutiña aban fánreinti lídangiñe áhuduraguni lidan familia lun haturiahani ariñahani le lunbei lakutihóun lidan adamuridaguni luma lun haranserun lun híchugun óunabagülei. Gayaraati san wadügüni ligiaméme? Dan le wíchugun óunabagülei o dan le gani wamá somu fánreinti lidan adamuridaguni, aba léredun wafiñen ani mígiruntiwa lun weyeedúniwa lau lumenrengun (Sal. 35:18). Ítara liña, íderagua lumutiwa áhuduraguni lidan familia lun masagahan wamá wasaminan guánarügü luagu katei le mafuranguagüdün tumuti Bíbülia ani ídehati giñe lun ua lan machouruni lidan wasaminan.

16. Ka ínchahabaliña kristiánugu anuadirúaaña lun hakipurun lubuidun ichügü ani mígirun hagía lun heyeedún?

¹⁶ Lidan sun dan le sügühalibei, biní laaña Heowá lumutuniña lau lafuranguagüdüni houn le mini lubéi profesía burí le tídanbei Bíbülia. Wasaminarun luagun profesía burí ligía héregüda lumuti wafiñen luagu wibihibei lan lubuidun wafayeiruaha. Kristiánugu ha anuadirúaañabaña hemenigitiña lun hawinwandun luma Kristu sielu. Lubuidun emenigini le ínchaha lumutiña lun hakipuruni lubuidun hachügü luma lun mígirun hamá lun heyeedún. Chóuruti úara hamá luma dimurei le lariñagubei Pábulu houn tesalónikana: “Súnwandan lunti lan seremei wamani Bungiu huagu, lugundun anúadaha lumutün [...] lau [s]ífiri le arumadagüdübalün, luma lau inarüni le uágubei hafiñera” (2 Tesa. 2:13).

17. Ida liña líchugun dimurei burí le lídanbei 2 Tesalónikana 3:1-5 erei woun?

¹⁷ Ha agurabubaña hibihin ibagari magumuchaditi ya ubouagu moun lumuti giñe hígirun lun heyeedún. Anhein ligía lubéi hemeniginbei, chóuruti hibihiba lan erei lídangiñe dimurei le lariñagubei Pábulu houn kristiánugu anuadirúaaña ha Tesalónikabaña (aliiha huméi 2 Tesalónikana 3:1-5). Wéiriti weteingiradi luagu dimurei lánina gurasu le! Wéridi tumutiwa gárada houn Tesalónikana luéi wíchugun arigei lun burí lagübüri saminaü machoururunwati o le mabuidunti. Súdiniti eweridihani burí le guentotima lau yarafaali lan lagumuchagüle ubóu!