1. Ka gayarabei wadügüni ladüga lenege lan Bungiu ladügawa?

 “MARAÜTU wéiyama badía.” Ítara liña lariñaguni aban ariñawagúni. Súnwandan genegegua hamá irahüñü hama hagübürigu. Le linarün katei, sagatiña isaanigu somu katei dandu tuéigiñe háguchu kei luéigiñe háguchi. Heowá ligía Wáguchibei le siélubei, ligía Lébunabei ibagari (Sal. 36:9). Ani wagía, keisi lisaanigu ya ubouagu, adüga lumutiwa lun lenege wamá, ligía gayara lubéi wasaminarun, ani gayara ligía wadügün umadagu buítiña ani kipu wamañame (Agu. 1:26).

2. Ka adügübei lun gayara lan lumadagu wamá Bungiu?

² Gayarati wadügün lun Heowá lan wamada le buídutimabei. Ínsiñeni le lasandirubei wawagu luma wafiñen luagu luma luagu Liráü ligía lébunabei umadaguaü ligía. Ariñagati meha Hesusu: “Wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16). Saragu haña gürigia ha agundaarubaña lau aban lubuidun umadaguaü luma Heowá. Adimureha wamá hawagu bián hádangiñe.

3, 4. Ida liña amu lan lumadagua Abüraámü luma Heowá luma hamadagua ladügawagun?

³ Dan le meha layanuhanbei Heowá luagu hagüchagu ísüraelina,  ariñagati: “Numada Abüraámü” (Isa. 41:8). Lidan 2 Krónikasi 20:7 ariñawagúati giñe lumada lan Heowá Abüraámü. Ka uagu gayara lubéi meha lagundaarun wügüri úaraguati le lau aban umadaguaü durati luma Bungiu le adügübalin? Ladüga lafiñen (Agu. 15:6; aliiha huméi Santiagu 2:21-23).

⁴ Ladügawagún Abüraámü ha meha lílana binadu Ísüraeli furumiñe gamadaguatiña meha luma Heowá ani ariha hamuti kei Háguchi. Gama lumoun, híruti aba lan heferidiruni hamadagua luma. Ka uagu? Ladüga aba lan mafiñenhaña lan luagu lani füramasei.

5, 6. a) Ida liña san humadaali lan Heowá? b) Ka burí álügüdahani lunbei wadügüni wóuniwagua?

⁵ Éibume laganwoundun hisubudin luagu Heowá, héretimabei hafiñen luagu ani wéiritimabei línsiñe hun. Haritagua humá san luagun dan le hasubudirunbalin luagu aban lan gürigia inarüniti Bungiu ani gayara lan gamadagua humá luma. Furendeitün giñe lidan lan figóu wagurahóua ladüga maganbadi lan Adán lun Bungiu. Aba gunfuranda humani díseñu haña lan gürigia luéi Bungiu (Kol. 1:21). Aba hafurendeirun luagu mama lan aban Bungiu meberesenhabuti Wáguchi le siélubei, ani bereseti lan hau lirahüñü. Dan le hasubudirunbalin luagu derege lani Bungiu Hesusu luagu wafigoun ani aba hafiñerun luagu sákürifisiu ligía, aba hagumeserun adüga umadaguaü luma.

⁶ Dan le wasaminarun luagun dan le sügühalibei, buiti lun wálügüdagun woungua: “Héretimati san numadagua luma Bungiu eibu dan? Afiñetina san luagu lau sun nere? Aganwoundeina liña san ínsiñeni le nasandirubei luagu?”. Hedeón ligía ábanya binadu gürigia le adügübei aban umadaguaü buiti luma Heowá. Subudi waméi buidu lun wáyeihani lani hénpulu.

7-9. a) Ka lásügürübei Hedeón, ani ka lánibei le resultóu? (Ariha huméi dibuhu le lídanbei lagumeseha arütíkulu.) b) Ida luba gayara lan wederebudagüdüni wamadagua luma Heowá?

⁷ Seriwiti aguseragüdüti Hedeón lun Heowá lidan aban dan hénrenguti lidan habagari ísüraelina, lárigiñebei lebelurun néchani ligía lidoun Fulasu Füramasewati. Según Alidihatiña kapítulu 6, dan le labisidahanbalin lani Heowá ánheli lidan fulasu le gíribei Ofürá, peligurutiña meha madianna houn ísüraelina. Ligía midin lubéi meha Hedeón éfereha türigu lidan aban fulasu le ñein lubéi gayara lan harihini áganiñu, aba lidin adügei lidan aban fulasu le ñein lubéi tachuinhóua beibei lun ménrengun lan laramudunu türigu. Lau tueirin anigi ladüga lachülaagun ánheli ani wa ligía lun “wügüri héreti, ani ganigiti”, aba lálügüdüni Hedeón ánheli ligía anhein líderagubaña lubéi Heowá, ítara kei meha ladügüni dan le lesefurunbaliña ísüraelina Ehiptugiñe. Lidan liri Bungiu, chóurugüda lumuti ánheli ligía lun luagu líderagubaña lan Heowá.

⁸ Álügüdaguati Hedeón lungua ida luba lan lidin “esefuraña Ísüraelina lábugiñegiñe habafu Madianna”. Aba lariñagun Heowá lun: “Gayaraabei badügüni, lugundun búmabadina. Bagañeirubaña Madianna kéigubeirügü bagañeirun ábanrügü wügüri” (Ali. 6:11-16). Chóuruti anihagua lan Hedeón álügüdagua lungua ida luba lan ladügüni katei ligía, aba lamuriahan aban seini. Ariha huméi luagu arufuda lani yanu le luagu inarüniti lan Heowá lun Hedeón.

⁹ Le asuseredubei lidan dan ligía adügati lun léredun lafiñen Hedeón luma lun layarafaduntima lun Bungiu. Aba laranserun aban éigini aba leseriwiduni lun ánheli. Dan le ladügünbei ánheli ligía aban milaguru lun lágudun éigini dan le laguurunbalin lau lubadun, aba líchugun Hedeón fe luagu lúmagiñe lan Heowá liabin ánheli ligía. Aba lariñagun: “Nabureme, Nabureme! Ariha naali lani Wabureme ánheli igibu luma igibu” (Ali. 6:17-22). Gama lumoun, adügati funa san katei ligía lun ladisedun Hedeón luéi Heowá? Uá! Lubaragiñe lira, ábatima layarafadun lun. Aba lasubudiruni Hedeón Bungiu buidu darí lun lasandirun aban lanarime darangilaü. Ítara liña larufuduni iri  le líchugubei luagu latarü le ladügübei lidan fulasu ligía: “Wabureme darangilaübei” (aliiha huméi Alidihatiña 6:23, 24). Wagía, dan le wasaminarun luagun katei le adüga láalibei Heowá wawagu sagü weyu, aba wíchugun fe luagu aban lan Umadaü le buiti. Ani dan le wafurieidun lun sun dan, aba laganwoundun darangilaü le wasandirubei ani ábatima léredun wamadagua luma.

10. Según Sálumu 15:3, 5, ka lamuriahabei Heowá wámagiñe lun gayara lan lumadagu wamá?

¹⁰ Gama lumoun, lun wamada lan Heowá mosu wadügün fiú katei. Lidan Sálumu 15, ayanuhati Dawidi luagu le mégeiwabei lun “laganóun [l]iñúarü” Heowá, lidan amu dimurei, lun lumadagu wamá Bungiu (Sal. 15:1). Akutiha wamá biama lídangiñe katei ligía: mayanuhan wamá iyeeni ani haruma ligíame wóuserun lidan sun katei. Anihán le lariñagubei Dawidi hawagu lumadagu Bungiu: “Ha mayanuhanbaña wuriba ni ka uagu, [...] ha máhabaña lun hariñagun luagu gadurun lan le madurunbei lúnrügü heresibirun seinsu” (Sal. 15:3, 5).

11. Ka uagu lunti lubéi mayanuhan wamá iyeeni hawagu amu?

¹¹ Lidan amu sálumu, eweridihati Dawidi: “Rédeiboun biñeñe luéi ladimurehóun wuribati” (Sal. 34:13). Ánhawa maganbadi lun adundehani le ani aba wagumeserun eyeeha, ábame lagadeirun wamadagua luma Wáguchi le siélubei. Le linarün katei, Mafia, le lágani Heowá, ligía asubudirúabei kei yeeti. Dimurei mafia lídangiñe aban dimurei güriegu liabin ani mini lan “marasualuguti”. Ligíati, wóunigiruni le wariñagubei hawagu amu líderagubadiwa lun wakipuruni wamadagua luma Heowá. Ani le súdinitimabei, mosu wóunigiruni wagaburi lun mayanuhan wamá wuriba hawagu wügüriña ha íriduaañabaña lidan damuriguaü (aliiha huméi Ebüréu 13:17 luma Húdasi 8).

12, 13. a) Ka uagu lunti lubéi haruma lan wóuserun lidan sun katei? b) Ka lánibei haruma lan wagaburi efekütu hawagu amu?

¹² Subudiwatiña giñe lubúeingu Heowá luagu laruman hagaburi. Abürühati apostolu Pábulu: “Afurieida humá lun Bungiu wawagu; chouru wamuti luagu darangilañu liña lan waritagun kei busén wabéi buidu lan wóuserun lidan sun katei” (Ebü. 13:18). “Kei busén wabéi buidu lan wóuserun lidan sun katei”, mabusenruntiwa wóuseruniña wíbirigu kristiánugu wuriba. Dan le hawadigimaridun woun, áfaaguatiwa lun wóuseruniña buidu ani lun wafayeiruniña según le füramase wabéi houn; úaraguatiwa wagía kristiánugu hama ha nadagimeinbaña wama luma hama sun gürigia. Ani anhein wawadigimariduña lubéi lun somu íbiri lidan afiñeni, máluahantiwa lun lóuseruniwa lidan aban igaburi espechaliti.

¹³ Gíbeti dan waganbuniña gürigia ha meseriwiduntiña lun Heowá ayanuha luagu lubuidun hasandiragun houngua dan le hadügün somu daradu wama. Kei hénpulu, ariñagati aban wügüri le alidihabalin aban óunwenbu kónpeni to lánina bunaguaü ariha laali lan luagu gúnfuli hamani Gefentiña hererun. Ariñagati: “Huguya súnwandan hagunfuliruni hufaran lidan daradu” (Sal. 15:4). Igaburi le seriwiti mámarügü lun wakipuruni wamadagua luma Heowá, Wáguchi le hínsiñehabubei, íderagua lumutiwa giñe lun wíchugun uéiriguni lun.

14, 15. Ida luba gayara lan wíderaguniña gürigia ha wadarirubaña lidan wapurichihan lun hadügün umadaguaü luma Heowá?

¹⁴ Íbini subudi hamani gürigia anihein lan Bungiu, lidan wapurichihan daritiwa saragu gürigia ha marihinbalin kei aban Umadaü. Ida luba wíderaguniña? Akutiha waméi adundehani burí le líchugubei Hesusu houn 70 hádangiñe lani disipulugu dan le lóunahanbaliña apurichiha bián bián: “Danme  le hebelurun tidoun aban muna, busú humá furumiñe, hariñagame: ‘Darangilaü houn tílana muna to’. Anhein añahein lubéi gürigia hínsiñehabutiña lun darangilaü tidan muna tuguya, heresibirubadün lau ugundani. Anhein ua habéi, giribugüda huméi abusuruni” (Luk. 10:5, 6). Ánhawa arufuda lubuidun igaburi houn gürigia, háfuga hánharun lun inarüni. Ani gayarati ladügün lun haganbuniwa ha mabusenrunbaña heresibiruniwa ani dará wameime üma lun heresibiruniwa buidu amu weyu.

¹⁵ Dan le wadarirun gürigia ha héreti habadülerun luagu relihión mama inarüniti o luagun somu échuni le kóntürati luagu tarufudahan Bíbülia, óusera wamutiña giñe buidu. Lidan wadamuridagun buiti wóuseruniña gürigia ha busenbaña hafurendeirun luagu Bungiu le unbei weseriwida ladüga magundan hamá lau katei le asuseredubei ubouagu. Daritiwa saragu hénpulu buiti luagu burí katei le lidan burí arütíkulu “La Biblia les cambió la vida” (Sansi tumuti Bíbülia habagari).

16. Ida luba gayara lan lumadagu wamá Heowá ani seriwi wagíame lun?

¹⁶ Saragu wéiyaasu, gürigia ha nadagimeinbaña úara adügatiña aban umadaguaü buiti. Sun wagía ha deregeguaañabaña houngua lun Heowá gúndaatiwa lau lumadagu wamá ani gúndaatiwa giñe lau ‘weseriwidun’ lun (aliiha huméi 1 Korintuna 3:9). Dan le wáfuridun apurichiha ani adüga wagía disipulugu, aba buídutima lan gunfuranda wamani lubuidun burí ligaburi Wáguchi le siélubei. Ariha wamuti giñe ida liña lan líderaguniwa lani sífiri sandu lun wagunfuliruni wadagimanu le.

17. Ida liña larufuduni sun ariñahani lúmagiñeti Bungiu le weresibirubei lidan adamurini luagu wamada lan Heowá?

¹⁷ Eibu wawadigimaridun lidan apurichihani, yarafatimati wasandiragun woungua lun Heowá, lugundun ariha wamuti ida liña lan líderaguniwa lidan wadagimanu le, ani adügati lun mararamun hamaniwa wáganiñu. Ámuya katei le ayarafadagüdübaliwa lun Heowá warihini ligaburi ladundehaniwa. Samina wamá luagu saragu ariñahani le líchugubei woun súnwandan, le ítarabei kei éigini. Programa burí lánina adamurini arufudati luagu hínsiñe wamá lun Heowá ani aríagu liña lan lun turóbuli le gádanbaliwa luma lun sun le wemegeirubei. Lau heteingiradi luagu aban adamurini, abürühatiña lílana aban familia: “Chülüti programa le tidoun wanigi. Sandí wamuti weiri lan línsiñe kada aban wádangiñe lun Heowá ani busenti lan lun buidu lan lidin woun”. Lárigiñe houdin aban feru maríeitiña yámani lidan aban adamurini espechaliti Irlanda, ariñagatiña weiri lan heteingiradi luagu ínsiñeni le aubei heresibiraña híbirigu luma luagu hóunigiruniña, ani ariñagatiña: “Rútiwa seremei lun Heowá luma lun Hesukrístu le Lurúeite. Amisuraha hamaadiwa lun hádangiñe wamá lumutuniña ha inarünitiña ani úaratiña,  mama ayanuharügütiña luagu úarani, winwan hamuti giñe sagü weyu. Sun le wásügürübei lidan adamurini espechaliti Dublín ladügüba lun waritaguni súnwandan weiri lan chansi le wibihibei lun weseriwidun lun Wabungiute úara huma”.

18. Ka san álügüdahani lunbei wadügüni wóuniwagua lidan luáguti wayanuhan luma Heowá?

¹⁸ Dan le hayanuhan umadagu hámagua, ábatima labuidurun hamadagua. Wéiritimahali hóunahan gürigia uganu houn amu guentó lidan lidaani Internet luma amu luwuyeri awanseruni. Gama lumoun, ka san lilugaarunbei wayanuhan luma Heowá, Wamada le buídutimabei? Subudi wamuti ligía lan ‘aganbubalin furíei’ (Sal. 65:2). Gabügürüguati san wadimurehan luma?

19. Ka gayarabei wadügün anhein hénrengu lubéi woun wariñaguni le wasandirubei lun Heowá?

¹⁹ Añahein fiú lubúeingu Bungiu güreweiti houn hadaarunu hanigi lun hariñaguni sun le hasandirubei. Gama lumoun, ligía labusenrubei Bungiu lun wadügüni dan le wafurieidun lun (Sal. 119:145; Aya. 3:41). Ani anhein madari wamá dimurei lun wafuranguagüdüni le wasandirubei, íderagua tumutiwa Bíbülia. Abürühati Pábulu houn kristiánugu ha Rómabaña: “Ítarameme giñe, íderagua lumutiwa [s]ífiri [s]andu lidan wadebilin. Lugundun mayumuraguaditiwa kei lubudubu, gama lumoun ayumuraguati [s]ífiri [s]andu wawagu lun Bungiu lau amumehani le siñati lariñawagúniwa lau dimurei. Ani Bungiu, le arihubarun wanigi, subudi lumuti ka lan labusenrubei [s]ífiri [s]andu lariñagun wádangiñe, lugundun ayumuraguati [s]ífiri keisi lugundan Bungiu” (Rom. 8:26, 27). Wasaminarun luagu burí dimurei le tídanbei liliburun Hobu, Sálumu luma Ariñawagúni líderagubadiwa lun wasubudiragüdüni lun Heowá sun le wasandirubei.

20, 21. Ida liña líchugun lererun Pábulu le lídanbei Filipuna 4:6, 7 dǘgüdaguaü woun?

²⁰ Danme le wagagibudagun luma sügǘ hénrenguti, sigí waméi adundehani le labürüdübei Pábulu houn filipuna lau lídehan Bungiu: “Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun”. Wayanuhan luma Heowá furangu líchuguba erei luma gurasu woun. Ábaya lariñagun Pábulu: “Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan, ladüga lídanñadün aban luma Kristu Hesusu” (Fili. 4:6, 7). Kipu waméi ‘lidarangilan Bungiu’ le óunigirubarun wanigi luma wasaminan.

²¹ Íderagua lumutiwa furíei lun wabuiduragüdüni wamadagua luma Heowá. Ligíati, “afurieida [wamá] lun Bungiu sun dan” (1 Tesa. 5:17). Agurabatiwa lun léredagüdüni arütíkulu le wamadagua luma Bungiu luma lun desidírütima wamá lun wagunfuliruni sun le lamuriahabei wámagiñe. Ani samina wamá giñe luagu sun buiti le wibihibei ladüga Wáguchi lan Heowá, Wabungiute ani Wamada.