1, 2. a) Ka san maríei le lunbei ladügün lun ñein lan aban ugundani espechaliti sielu? b) Ka burí álügüdahani lunbei wakutihani?

 SÚNWANDAN barǘ lan dan laransehóun lubá aban maríei. Gama lumoun, wetenira lun aban maríei espechalitimati, aban maríei wéiriguti. Samina humá san: duraali aransehani le kéiburi bián-milu irumu! Murusunrügaali dan lun tóundarun adari lumoun tadari. Málühali dan lun tabuinchun lani Urúei palasiu lau ugundani luma uremu, ani sun ha siélubaña heremuhaba: “Alelúya! Gumeseeli Wabureme Bungiu le Suntigabafu arúeiha. Gúndaagua wamá, buin wamá lau ugundani, ru wagíame uéiriguni lun, ladüga chülüha lidaani lamarieidun Mudún, aranseru ladari” (Aruf. 19:6, 7).

² Hesukrístu ligía “Mudún” le lunbei ladügün lun ñein lan saragu ugundani sielu lau lamarieidun (Huan 1:29). Ida luba san lasansiragun lubá maríei ligía? Ka adariboun? Ida liña san taranserun lubá dan ligía? Ídaba lefeduhóua maríei? Subudi wamuti ladügüba lan maríei le lun ñein lan ugundani sielu, gama lumoun, hagundaaruba giñe san ha hemenigibaña lun hawinwandun ligibuagu Ubóu? Busenhadiwa wasubudiruni óunabagülei, ligíati, sigí wamá akutihei Sálumu 45.

3, 4. a) Ka ariñawagúbei tuagu ladaüragun Adari to lánina lamarieidun? b) Ka adügübei lun lagundaarun Adari? c) Katoun san “urúei” hama “harahüñü urúeigu” ha agundaarubaña luma Adari?

³ (Aliiha huméi Sálumu 45:8, 9.) Hesukrístu, le Adari, sánsiguati tau tuéirigun ladaüragun lánina maríei. Buiti lun heme tan ladaüragun lau “lubuidun ibiñein”, kéiburi le lauti mira luma le lauti kasia, laganagu garaba lánina anúadiruni le meha ayusurúbei Ísüraeli (Afu. 30:23-25).

⁴ Lubuidun músika le abuinchubarun palasiu adügati lun laganwoundun lugundan Adari dan le layarafadun luéyuri maríei. Gúndaatu giñe ‘urúei to luéigiñeboun lóunwenren’, lidan amu dimurei, fánreinti le siélubei tani lóundarun Heowá, ani hadan añahein giñe “harahüñü urúeigu” o ánheligu ha sándubaña. Buiti laganbúniwa hamalali ha siélubaña ariñaga: “Gúndaagua wamá, buin wamá lau ugundani, [...] ladüga chülüha lidaani lamarieidun Mudún”.

5. Katoun san ‘lániboun Mudún weiriou’?

⁵ (Aliiha huméi Sálumu 45:10, 11.) Subudi wamaali ka lan Adaribei, ágiati adari, katoun san? Aban óundaruni adari tugía, ani lidan óundaruni ligía añahein lílana damuriguaü le ladundehabei Hesukrístu keisi Ichügüdinaü (aliiha huméi Éfesuna 5:23, 24). Harúeihaba úara luma Kristu le Mesíasi lidan Larúeihan (Luk. 12:32). San-bián-wein-gádürü-milu kristiánugu anuadirúaaña lau sífiri sandu ha “falá [hamuti] Mudún le ñeinhin lumuti lidin” (Aruf. 14:1-4). Keisi “lani Mudún weiriou”, aba hasigiruni darí sielun (Aruf. 21:9; Huan 14:2, 3).

6. a) Ka uagu laguarúa houn kristiánugu ha anuadirúaaña “ladari urúei” o “lisaani urúei”? b) Ka uagu lariñawagúa houn kristiánugu anuadirúaaña lun habulieiduniña hamutuniña?

⁶ Wáwati giñe tun “ladari urúei” liráü urúei (Sal. 45:13). Katei san amu “urúei” ligía le uágubei layanuhóua lidan Sálumu 45:13? Heowá urúei ligía, lugundun barǘ laaña kristiánugu anuadirúaaña kei ‘lisaanigu’ (Rom. 8:15-17). Kei le ábanbaña lan adari yágüta sielu, ariñawagúati houn: “Bulieibáña biduheñu hama bumutuniña”. Lunti híchuguni hasaminan “luagu katei le lánina sielu, mama luagu burí le lánina ubóu” (Kol. 3:1-4).

7. a) Ida liña laransehanu Kristu to lunboun lániboun lan weiriou? b) Ida liña tarihini adari le lunbei tánibei lan weiriei?

⁷ Barühali Hesusu saragu sígulu aransehoun to lunboun lániboun lan weiriou lubá maríei sielu. Abürühati apostolu Pábulu wéiriti lan “wínsiñe lun Kristu, wagía le liligilisin, aba líchuguni libagari wawagu. Ladügünbalin lira lun lanúadirunu lun Bungiu, lun larumadagüdünu lídangiñe le binadubei lau duna luma giñe lau lererun, lun larufudunu ligibugiñe keisi aban ligilisi sándutu, aranseñu, úouga ni kata dáseiti tuagu, ua ni kata mégeiti tuagu, lun sandu tan ani úaragua tuguyame” (Efe. 5:25-27). Ariñagati giñe Pábulu houn kristiánugu anuadirúaaña ha lílana binadu Korintu: “Lugundun emeiditina hau lau aban emeidini le lúmagiñeti Kristu, luéi hamuga hígiruni Bungiu, ladüga íchaaha naadün lun ábanrügü úmari, lun narufudunün kei aban würi gañüngiru ani haruma tuguya lun Kristu” (2 Ko. 11:2). Ladüga seriwi tan lani Urúei Hesukrístu weiriou lun Bungiu lau arumani, magadiñetu larihinu. Ani ariha tumuti le lunbei tánibei lan weiriei kei “tabureme” ani aba tabuluchagun ligibugiñe.

8. Ka uagu buidu lubéi lariñawagúniwa luagu anungura lan adari “lau sun tubuidunmeraü”?

⁸ (Aliiha huméi Sálumu 45:13, 14a.) Aba tanügǘn adari “lau sun tubuidunmeraü” lubá maríei. Lidan Arufudúni 21:2  konparáruatu luma aban uburugu, Iseri Herusalén, ani ariñawagúati luagu aranseñu tiña lan “kei aban adari dáüguañu lubá tadari”. Anihein “larugounga Bungiu” lidan uburugu le, ani ámirihati kei “aban dübü buídumeraüti, kei dübü le hásüpe, harugoungati kei bídüriu” (Aruf. 21:10, 11). Lidan Arufudúni ayanuhóuati furangu luagu lubuidun lámirihan Iseri Herusalén (Aruf. 21:18-21). Susereti katei le ladüga sielu ladügǘwa lanarime maríei ligía.

9. a) Katei san “urúei” le igibugiñounbei tanügǘwa adari? b) Ida liña tasansiragun?

⁹ Barüwatu adari ligibugiñoun Tadari, Mesíasi le Urúei. Aranseha laaru, “lun larumadagüdünu lídangiñe le binadubei lau duna luma giñe lau lererun”, lun gayara lan “sandu tan ani úaragua tuguyame” (Efe. 5:26, 27). Gama lumoun, lunti giñe tasansiragun buidu lubá maríei ligía. Ani ítara liña tadügüni! “Lau filu lauti golu tadügǘwa tadaüragun” ani “wéndeñutiña hanügünu ligibugiñoun urúei”. Lubá lamarieidun Mudún lunti tasansiragun “tau tadaüragun linu to fínutu, haruma ani mirí tuguya. Mini tan linu fínutu, ibagari le suruti, le habagari lánigu Bungiu”. (Aruf. 19:8).

10. Ídaba san lefeduhóua lamarieidun Mudún?

¹⁰ (Aliiha huméi Arufudúni: 19:7.) Ídaba san lefeduhóua lamarieidun Mudún? Íbini “aranseru [lan] ladari” lubá maríei, lidan le asigirubei, mama layanuhóuña luagu maríei. Layanuhóuña furangu luagu lagumuchagüle óunwenbu asufuriruni (Aruf. 19:11-21). Mini lan san le lamarieiduba lan Adari, Urúei Hesukrístu, lubaragiñe lagumuchuni lagañeirun? Uá. Arufudúni burí le tídanbei líburu Arufudúni mabürüdǘnti aban lárigi aban según lidaani lasuseredun. Según Sálumu 45, ladügǘba maríei le lárigiñe láchourunu Urúei lefeinte liranaagua ani ‘aba lawanserun lidan lagañeirun’, lun lagañeiruniña láganiñu (Sal. 45:3, 4).

11. Ida luba laransehani Kristu katei lubaragiñe maríei lun lagunfuliruni lagañeirun?

¹¹ Ligíati, gayarati wasaminarun luagu lasusereduba lan sun katei lidan aransehani le: furumiñe, ábame tagünrinchawagun “óunwenbu horu”, Babilónia to Wéiriboun, lóundarun sun relihión mama inarüniti lidan sun ubóu (Aruf. 17:1, 5, 16, 17; 19:1, 2). Lárigiñe, ábame lagunfuliruni Kristu lasiadihan Bungiu kóntüra ubóu wuribati le lani Satanási lau lagünrinchaguni lidan Arümahedón, “wuribu le lánina óunwenbu luéyuri Bungiu le suntigabafu” (Aruf. 16:14-16; 19:19-21). Lagumuhóun, ábame lagumuchuni Urúei lagañeirun lau láguruni Satanási hama lumafianu lidoun fusu mébehati, ábame herederun ñein kamá hilaaña, siñabei hadügün ni kata (Aruf. 20:1-3).

12, 13. a) Ídaba san lamarieida Mudún? b) Kaba burí san agundaara sielu lau lamarieidun Mudún?

¹² Lidan burí lagumuhóun dan, kristiánugu anuadirúaaña ha úaraguatiña lun Bungiu darí lun hounwen háguyuguba lun hawinwandun sielu. Fiú dan lárigiñe tagünrinchawagun Babilónia to Wéiriboun, ábame lóundaraguniña Hesusu sun ha óundarubalun adari (1 Tesa. 4:16, 17). Ligíati, sun tílana “adari” añaheinhañame sielu lubaragiñe latatirun wuribu lánina Arümahedón. Lárigiñe wuribu ligía, gayarahalime lefeduhóun lamarieidun Mudún. Hanarimebei ugundani! “Fuleseiwatiña ha amisurahóubaña lidoun fedu le lánina lamarieidun Mudún”, liña Arufudúni 19:9. Le linarün katei, gúndaaboun adari. Ani le Adaribei wéiribei giñe lugundan ladüga añaheinhañame sun ha lúnbaña harúeihan luma ñein lóubagiñe (Luk. 22:18, 28-30). Gama lumoun, mámarügübei Adari tuma ladari agundaara luagu lamarieidun Mudún.

 ¹³ Kei buga warihini furumiñe, ñéinbaña saragu ánheligu sielu ha lúnbaña heremuhan úara: “Gúndaagua wamá, buin wamá lau ugundani, ru wagíame uéiriguni lun, ladüga chülüha lidaani lamarieidun Mudún, aranseru ladari” (Aruf. 19:6, 7). Ágiati lubúeingu Heowá ha lúnbaña ya hamá ubouagu? Hagundaaruba san?

14. Kátaña san “tánigu [adari] würiña” ha uágubaña layanuhóua lidan Sálumu 45?

¹⁴ (Aliiha huméi Sálumu 45:12, 14b, 15.) Abürühati meha profeta Sakaríasi aban profesía luagu lidan lanme lagumuchagüle ubóu añaheinbaña lan gürigia lídangiñetiña sun néchaani ha lúnbaña hóundarun luma Ísüraeli le lani Bungiu lau saragu eteingiruni. Ariñagati: “Lídanme dan ligía, hárügüdübei diisi terencha ha lílana líbiri burí fulasu aban huríu tuéigiñe ladaüragun, hariñagame lun: ‘Busentiwa woudin huma, ladüga aganbatiwa luagu anihein lan Bungiu huma!’” (Sak. 8:23). Lidan Sálumu 45:12 wáwati houn “diisi terencha”, “lílana uburugu Tiru”. Ñǘdüntiña hamoun kristiánugu anuadirúaaña lun híderaguniña, ani lun habihini hafulesein luma lun hibihin ídemuei lun heseriwidun lun Heowá. Lúmagiñe irumu 1935, míñunu burí gürigia ígiraña lun hadundehaniña kristiánugu anuadirúaaña “lidoun üma le surubei” (Dan. 12:3). Harumagüda hamaali hapanaagu kristiánugu anuadirúaaña ha habagari, ligíati gayara lubéi wariñagun haruma lan heseriwidun lun Bungiu. ‘Tánigu adari würiña’ ha, deregeguaaña houngua lun Heowá ani úaraguatiña lun Urúei Hesukrístu, le Adari.

15. Ida liña híderaguniña “tánigu [adari] würiña” kristiánugu anuadirúaaña ha añaheinguabaña ubouagu?

 ¹⁵ Ha híbiri lílana adari wéiriti heteingiruniña “würiña” ha luagu hídehan lidan lapurichihóun “uganu buiti le luáguti larúeihan Bungiu” lidan sun Ubóu (Mat. 24:14). Mámarügüñein “[s]ífiri [s]andu tuma Adari” ariñaga “Higabu”, íbini giñe ha aganbubaliña ariñagatiña giñe: “Higabu” (Aruf. 22:17). Le linarün katei, aganba hamaaña “amu mudún” kristiánugu anuadirúaaña ariñaga “Higabu”, ani óundaraguaaña hamoun lun hachülüragüdüni amisurahani ligía houn sun lílana Ubóu (Huan 10:16).

16. Ka óunwenbu chansi líchugubei Heowá houn amu mudún?

¹⁶ Hínsiñetiña “amu mudún” houn kristiánugu anuadirúaaña ani gúndaatiña lau hasubudiruni ru laali lan Heowá, le Lúguchi Adari, chansi houn lun giñe hagundaarun luagu lamarieidun Mudún. Ariñawagúati meha hanügǘba lan “tánigu [adari] würiña” “lau óunwenbu ugundani”. Anha, amu mudún, ha hemenigibaña lun hawinwandun ya ubouagu lun súnwandan, hagundaaruba giñe danme le lefeduhóun lamarieidun Mudún sielu. Ariñawagúati tidan líburu Arufudúni hawagun “saragu gürigia”, ha eseriwidubaña lun Heowá ubouagu, luagu “rara haña [lan] ligibugiñe lálana arúeihani luma ligibugiñe Mudún”. Seriwitiña lun Bungiu lidan fánreinti le tani lóundarun Heowá le yaabei ubouagu (Aruf. 7:9, 15, TNM).

17, 18. a) Ka buiti lunbei lanügüni lamarieidun Mudún? b) Kaba lisaanigu Kristu lídanme lidaani Larúeihan le lánina Milu Irumu?

¹⁷ (Aliiha huméi Sálumu 45:16.) Hagundaaratimaba “tánigu [adari] würiña” danme le harihini resultóu le lunbei lanügüni maríei ligía lidan iseri ubóu. Ábame letenirun Adari, Urúei Hesukrístu, lun Ubóu ani ábame láguyuguagüdüniña ‘lagüchagu’, ha lúnbaña ‘lirahüñü hamá’ ya ubouagu (Huan 5:25-29; Ebü. 11:35). Líriduba Kristu hádangiñe lun “gumadimatiña” hamá lidan sun ubóu. Gayarati wagurabun lanúadirun fiú wéiyaaña úaraguatiña ha guentobaña lun hadundehani katei lidan iseri ubóu (Isa. 32:1).

¹⁸ Lídanme Arúeihani le lánina Milu Irumu, háguchibei giñe amu gürigia Kristu. Ka uagu? Lugundun sun lílana Ubóu ha lúnbaña hibihin ibagari magumuchaditi hibihibei ladüga hafiñerun luagu lani Hesusu sákürifisiu (Huan 3:16). Ítara luba ‘Úguchili lan Magumuchaditi’ houn gürigia ubouagu (Isa. 9:6, 7).

19, 20. Ka lánibei sun sügǘ le uágubei layanuhóua lidan Sálumu 45 efekütu hawagu sun kristiánugu uguñe weyu?

¹⁹ (Aliiha huméi Sálumu 45:1, 17.) Kei warihini, sun sügǘ burí le uágubei layanuhóua lidan Sálumu 45 súdiniti houn sun kristiánugu. Kristiánugu anuadirúaaña ha añaheinguabaña ubouagu wéiriti hagundan ladüga anite lan lidaani hóundarun hama híbirigu ani luma Adari sielu. Ani amu mudún gúndaatiña giñe eibu dan lun herederun lábugiñe lugumadin Harúeite, lau eteingiradi luagu chansi le hibihibei lun híderaguniña tílana adari ha wínwangiñabaña ubouagu. Lárigiñeme lamarieidun Kristu, ligía hau sun lánigu paaná urúeigu habinirubaña gürigia ubouagu saragu (Aruf. 7:17; 21:1-4).

²⁰ Dan le wasaminarun luagu lagunfulirun profesía luáguti Larúeihan Mesíasi, ma adügati lun wayanuhan luagu liri Hesusu? Ligíati, alawaha waméi Urúei lun “súnwandan”!