1, 2. Ida liña ámuñegueinarügü lan gádantiwa luma ligaburi wasubudiruni inarüni?

 ANIHEIN lubéi familia ladüga Heowá lan adügübalin (Efe. 3:14, 15). Íbini lidan aban familia, ámuñegueinarügüti housan ani ámuñegueinarügüti gádantiña lílana. Háfuga wínwantiña fiú gürigia hama hagübürigu darí haweiridun. Añahein amu háfuga féridi hamutiña hagübürigu ladüga somu sandi, somu danaguaü o somu lamiselu. Añahein amu íbidiñegubeitiña hagübürigu houn.

² Ítara liña lasuseredun houn lubúeingu Heowá. Lílana ábanmeme familia wagía, gama lumoun ámuñegueinarügüti gádantiwa luma ida liña lan wasubudiruni inarüni. Háfuga lidan lan aban familia kristiánu haweirida ani arufudaha hamuti hagübürigu inarüni hun lúmagiñe hiñüraü (2 Lur. 6:6, 7). O háfuga furendeirügü humani inarüni ladüga lachülürün somu íbiri apurichiha hun, ítara kei saragu amu íbirigu (Rom. 10:13-15; 1 Tim. 2:3, 4).

3. Ka katei wasufurirubei sun wagía?

³ Íbini ámuñegueinarügü lan gádantiwa wawariuagua, anihein fiú katei súfuri wamuti sun wagía. Súfuri wamuti resultóu le lanügübei lifigoun Adán: galagante wamuti figóu lau sun lani efekütu luma óunweni (Rom. 5:12). Íbini ítara, kei le seriwi wamá lun Heowá lau úaraguni, gayarati wayanuhan luma kei Wáguchi. Lidan meha binadu dan, gayarati meha hariñaguni lubúeingu ha anúadira láañabaña dimurei le lídanbei Isaíasi 64:8: “Aburemei, buguya  Wáguchibei”. Ani gumese lumuti meha giñe Hesusu furíei le subudiwabei kei Wáguchi Bungiu lau dimurei burí le: “Wáguchi Bungiu le siélubei, inebewalá biri” (Mat. 6:9).

4, 5. Kaba wakutiha lun waganwoundagüdüni wínsiñehabu luagu Wáguchi, Heowá?

⁴ Góunigi lumutiña Wáguchi le siélubei, Heowá, sun ha agúarubalin liri lau afiñeni. Chóurugüda lumuti woun: “Níchugubei iñun le ñein lumuti siñá lan lachülürǘniwa lumoun, ladüga hínsiñetina lun ani subudilána” (Sal. 91:14). Sefu lumutiña Heowá lumutuniña hawéi háganiñu ani góunigi lumutiña lau ínsiñeni lun magünrinchawagún hamá.

⁵ Lúntima laganwoundun ínsiñeni le wasandirubei luagu Heowá, akutiha wamá ǘrüwa lídangiñe ligaburi: 1) kei le íchugubalin sun wemegeirun woun, 2) kei le óunigirubaliwa luma 3) kei besi Wamada. Danme le akutiheina wamani kada aban lídangiñe, samina wamá luagun wamadagua luma Wáguchi le siélubei luma luagu katei le gayarabei wadügüni lun wíchugun inebesei lun. Ani samina wamá giñe luagu burí abinirúni le líchugubei houn ha ayarafadubaña lun (Sant. 4:8).

6. Ka hénpulu arufudubalin lúmagiñe lan Heowá liabin “sun buiti le ichugúbei woun”?

⁶ Abürühati disipulu Santiagu: “Sun buiti le ichugúbei woun, le úabei mégeiti luagu siélugiñe liabin, lúmagiñe Bungiu le adügübalin burí lilanpuna sielu” (Sant. 1:17). Aban lubuidun idewesei lúmagiñeti Heowá ibagari (Sal. 36:9). Dan le wayusuruni lun wadügüni lugundan, resibitiwa saragu abinirúni uguñe weyu luma emenigini lun wawinwandun lun súnwandan lidan iseri ubóu (Ari. 10:22; 2 Fe. 3:13). Gama lumoun, ida luba lasuseredun le, lau sun katei le gádanbaliwa ladüga lifigoun Adán?

7. Ka ladügübei Heowá lun gayara lan gamadagua wamá luma?

⁷ Ru lumuti Heowá sun le wemegeirubei woun lidan saragu manera. Kei hénpulu, arufuda laali lanarime línsiñehabu woun lau lesefuruniwa. Sun wagía galagante wamuti figóu lúmagiñe Adán (Rom. 3:23). Íbini ítara, ladüga wínsiñe lun Heowá, adügati lun gayara lan gamadagua wamá luma. Ariñaga lumuti apostolu Huan woun ka lan ladügübei: “Arufuda lumuti Bungiu wínsiñe lun lau lóunahani Liráü le ábanrügüti ubouagun gabagari wamaamuga lídangiñe. Anihán ínsiñenibei: Mama luagu wagía lan hínsiñehabubei lun Bungiu, luagu ligía lan hínsiñehabubei woun, aba lóunahani Liráü le ábanrügüti lun lounwen, lun lébuname ferudunawa lan wafigoun” (1 Huan 4:9, 10).

8, 9. Ida liña larufuduni Heowá ru lani sun hemegeirun gürigia houn lidan lidaani Abüraámü luma Isaakü? (Ariha huméi dibuhu le lídanbei lagumeseha arütíkulu.)

⁸ Lidan sígulu XIX lubaragiñe wadaani, susereti aban katei lidan libagari Abüraámü le arufudubalin le lunbei ladügüni Heowá lun gayara lan hibihin gürigia ha úaraguabaña ibagari magumuchaditi. Afuranguagüdati Ebüréu 11:17-19: “Dan meha le lóuchagunbalin Bungiu Abüraámü lau lariñagun lun lun láfaruni liráü le Isaakü hilagubei lun ladagaragüdüni lun, afiñemémeti luagu Bungiu; rúguati yebe lungua lun lederegeruni liráü le ábanrügüti, lau sun ariñagaali lan buga Bungiu lun luagu saragubaña lan ladügawagun lídangiñe Isaakü. Subudirügü liñalin Abüraámü luagu gabafu lan Bungiu lun lásaaragüdüniña hilaaña lídangiñe óunweni, ani ítagaraü yebe ladügüni Bungiu lau líchuguni Isaakü lárigoun lun Abüraámü lubaragiñe yebe láfaruni”. Ariha wamuti san lenegegua katei le? Derege lumuti Heowá Hesukrístu, le Liráü, luagu hafulesein sun gürigia (aliiha huméi Huan 3:16, 36).

⁹ Ma meha funa lanarime awalidaguni le lasandirubei Isaakü ladüga móunwenhali lan! Chóuruti ru lan seremei lun Bungiu luagu líchugun aban animaalu lun ladagarawagüdün leweñeguame: aban gábara dahigu lidan búbugati yarafa ñein (Agu. 22:10-13). Lunti maweiridun tan wanigi luagu laguarún  lun fulasu ligía “Heowá-yiré”, mini lan dimurei le lidan ebüréu “Ru lumuti [Heowá] le emegeirubei” (Agu. 22:14).

10, 11. Kátaña san anügübalin ubaraü lidan ‘wadagimanu lánina arandaruni’, ani ida liña hadügüni?

¹⁰ Dan le wasaminarun luagun sun le ru láalibei Heowá woun, aba wíchugun fe luagu siñabei lan hamuga warandarun luma Bungiu lun hamuga míchugun lani Hesusu libagari lidan sákürifisiu. Gunfuranda lumuti giñe meha Pábulu katei le dan le labürühanbei: “Gumadi lumutiwa línsiñehabu Kristu, ladüga chouru wamuti hilá lan aban wawagu súngubei, hilaguatiwa lubeiti súngubei. Hilati Kristu wawagu sun wagía, lun sun lan ha gabagaribaña, mámaali láamuga houn guánarügü habagarida, lun habagaridun lun le óunwebei hawagu, sará ligía lídangiñe óunweni” (2 Ko. 5:14, 15).

¹¹ Hínsiñeti meha Bungiu houn furumiñetiña kristiánugu ani wéiriti meha heteingiruni luagu lígiruniña lun heseriwidun lun. Ligía aba lubéi hánharun hadügüni ‘wadagimanu lánina arandaruni’. Seremei hawadigimari lánina apurichihani luma hadügün disipulugu, gíbetiña gürigia haruma tanigi ibihitiña darangilaü luma Bungiu, hadügün umadaguaü luma ani lun lisaanigu hamá. Uguñe weyu, hadügüñein kristiánugu anuadirúaaña ligiaméme wadagimanu. Keisi nadagimeintiña lidan liri Bungiu luma Kristu, rútiña chansi houn gürigia ha harumabaña anigi lun hayarafadun lun Heowá luma lun heseriwidun lun (aliiha huméi 2 Korintuna 5:18-20; Huan 6:44; Adü. 13:48).

12, 13. Ida luba gayara lan warufuduni weteingiradi luagu sun buiti le líchugubei Heowá woun?

¹² Lau heteingiradi lun Bungiu le íchugubalin sun hemegeirun houn, sun kristiánugu ha hemenigibaña lun hawinwandun ubouagu íderagua hamutiña kristiánugu anuadirúaaña lidan lapurichihóun Larúeihan Bungiu. Lidan wadagimanu le yusu wamutu Bíbülia, ábanya lubuidun idewesei lúmagiñe Heowá (2 Tim. 3:16, 17). Lau wayusurunu Lererun Bungiu buidu, rútiwa chansi houn híbiri gürigia lun hawinwandun lun súnwandan. Gama lumoun, mámarügüñein ligía ídemuei wibiha. Ru laali Heowá lani sífiri sandu woun lun wadügüni wadagimanu le (Sak. 4:6; Luk. 11:13). Buídurügüti waliihanu Anuarios de los testigos de Jehová lun warihini lubuidun resultóu le ibihúalibei. Ma lueirin wachansin lun wídehan lidan wadagimanu le lun wíchugun inebesei lun Wáguchi le íchugubalin sun wemegeirun woun!

¹³ Kei le rúhali lubéi Heowá saragu katei woun, buiti lun wálügüdagun woungua: “Nadügüñein san sun niyaraati lidan nani ministeriu lun narufuduni lun Heowá seremei nani luagu sun buiti le líchugubei nun? Ka asansiruni lunbei nadügüni lun buídutima lan napurichihani uganu buiti?”. Arufuda wamuti weteingiradi anhein wíchiga Larúeihan Bungiu lidan furumiñeti lúgaaru lidan wabagari. Ábameti líchuguni Heowá sun le wemegeirubei woun (Mat. 6:25-33). Warihini ínsiñeni le aubei lóunigirawa ínchaha lumutiwa lun wadügüni sun wayaraati lun wagundaaragüdünu lanigi (Ari. 27:11).

14. Ka adüga láalibei Heowá hawagu lubúeingu lidan dan hénrenguti?

¹⁴ Eremuhati Dawidi: “Fugiabu [au] le gudemebei ani nidiheri nuguya, mabulieidabana, Nabureme. Buguya íderagubalina buguya esefurana” (Sal. 40:17). Sefu lumutiña Heowá lubúeingu saragu wéiyaasu, dántima le éibaaha hamaaña háganiñu lau furundei. Wéiriti weteingiruni Heowá luagu líderaguniwa lun úaragua wamá lidan burí dan hénrenguti ligía luma luagu sun idewesei le líchugubei woun!

15. Ru humá aban hénpulu luagu ida liña lan láfaagun aban úguchili hínsiñehabuti súnwandan lun lóunigiruniña lisaanigu.

¹⁵ Aban úguchili le hínsiñehabuti mama  rúrügü lumuti le hemegeirubei lisaanigu houn, áluahati giñe lóunigiruniña. Ánhaña éiguada lidoun peliguru, sin lasaminaruni, láluguña hamuga lun lesefuruniña. Abahüdahati aban íbiri dan lan meha le ñǘraügili, lagiribuduña lan múnadoun luma lúguchi lárigiñe hapurichihan, sódini, aba harihin ma lan lanarime léibaagun duna darí lun siñá lan hásügürün. Furiha duna lídangiñe lémeri ladüga lanarime láhuyun huya binaafin, ani mosu meha hánhiñuraguni achubaheina luagu dübü le wéinamuti. Ligía lubá lubá lúguchi, sódini aba lachararuni dübü, aba léiguadun dúnarugun, ani aba labuluchun bián wéiyaasu. Lau lóufudagun, aba lárügüdüni lúguchi luéigiñe lege ani aba lesefuruni luéi lañaradagun. Óunwenbu seremei lani isaani lúguchi! Ítarameme, sefu lumutiwa Wáguchi le siélubei luéi lanarime luriban ubóu le luma luéi Satanási le agumadirubalin. Chóuruti Heowá lan óunigiruti le buídutimabei (Mat. 6:13; 1 Huan 5:19).

16, 17. Ida liña meha lóunigiruniña Heowá ísüraelina dan le hageindagunbei kóntüra amaléküna?

¹⁶ Arihúati lubuidun lóunigiruniwa Heowá lidan le asuseredubei lárigiñe lesefuruniña ísüraelina lídangiñe amudirawagúni Ehiptu, lidan irumu 1513 lubaragiñe wadaani. Adügaali meha Heowá aban milaguru lun hánhiñuraguni barana Funati. Lidan dan ligía, hóudiña meha lun luagun wübü Sinaí aba lubéi hachülürün lidoun aban fulasu gíriti Refidímü.

¹⁷ Subudi lumuti meha Satanási mosu lan lagunfulirun profesía le lídanbei Agumesehani 3:15, ani chóuruti hanarime lan labusenrun lagaliruhaniña ísüraelina ha genegebei luagu móuniri hamá. Ani adüga lumuti dan le ladarirunbei chansi. Lun ladügüni, yusu lumutiña amaléküna, ha meha háganiñu lumutuniña Bungiu (1 Lur. 24:20). Ariha waméi ida liña lóunigiruniña Heowá lubúeingu lau hídehan gádürü wügüriña ha úaraguatiña: Hosué, Moisesi, Aarón luma Uru. Ageindaguati  meha Hosué hama amaléküna, ánheinti Moisesi, Aarón lau sun Uru aba hararamun iñu luagu aban wübü yarafa ñein. Dan le meha liñuruni Moisesi lúhabu, aba hagañeiruniña ísüraelina háganiñu. Dan le labuchadunbei luagu lúhabu, aba hágüdahani Aarón luma Uru. Seremei lídehan luma lóunigiruniña Heowá, “aba láfaraguniña Hosué Amaléküna tau eféin” (Afu. 17:8-13). Aba ladügün Moisesi aban latarü ñein, aba laguarún lun “Heowá-nisí”, mini lan dimurei le lidan ebüréu “[Heowá] nufanidiranbei” (aliiha huméi Áfuriduni 17:14, 15).

18, 19. Ida liña lóunigiruniwa Heowá uguñe weyu?

¹⁸ Góunigi lumutiña Heowá ha hínsiñehabubaña lun ani gaganbadi hagía lun. Ítara kei hadügün ísüraelina Refidímü, áluahatiwa giñe aramudaguagülei luma dan le héibaahaniwa áganiñu. Le linarün katei, góunigi láadiwa saragu wéiyaasu keisi óundaruni ani sefu láadiwa luéi Satanási. Samina humá luagun átirihali lan wéiyaasu líderaguniña Heowá ha máhabaña hadüraaguni úaraguni lidan heseriwidun lun. Kéiburi íbirigu ha awinwandubaña Yámani luma lidan amu burí ageiraü lidan burí irumu 1930 luma 1940 lábugiñe hagumadihan nazis. Dan le waliihani hásügürün tidan burí Anuario luma ida liña lan lóunigiruniña Heowá lumutuniña lidan lidaani éibaahouni ani ráramagua wagía asaminara luagun, aba léredun wemenigin luagun ligía lan Waramudaguagülebei (Sal. 91:2).

¹⁹ Resibitiwa adundehani tídangiñe lóundarun Heowá luma burí tídangiñe agumeiraguagüdüni le íderagubaliwa. Huuti eweridihani burí le saragu uguñe weyu. Eibu abulucheina lan ubóu lidoun taríawagun iyawaü lánina agamariduni luma sun lan gürigia agumadiragua houngua, rúhali Heowá adundehani woun le huuti lun méiguadun wamá tidoun sádara burí to. Kei hénpulu, wéridi láadiwa kei aban Úguchili lun móundarun wamá hama hagübüri umadagu ha gayarabei wadariruniña lidan Internet (1 Ko. 15:33). *

20. Ka adundehani luma ichouruni wadarirubei lidan damuriguaü kristiánu?

²⁰ Ida luba warufuduni gürigia wamá ha únbaña ‘larufudaha’ Heowá? Lau gaganbadi wamá lun lugumadin (Isa. 54:13). Aban fulasu chóuruti damuriguaü, ani ñein daritiwa adundehani le wemegeirubei, lugundun ñein híchiga wéiyaaña lidan afiñeni ídemuei woun luma adundehani tídangiñeti Lererun Bungiu (Gal. 6:1). Libe-agei dan resibi wamuti lídehan Heowá hámagiñe “wügüriña keisi idewesei” (Efe. 4:7, 8, TNM). Ka lunbei wadügüni? Mosu gaganbadi wamá, ítara luba labiniruniwa Bungiu (Ebü. 13:17).

21. a) Ka desidírü wabéi wadügün? b) Kaba wariha lidan le aban arütíkulu?

²¹ Desidírü wamá wígirun lun ladundehaniwa sífiri sandu luma adundehani le líchugubei Wáguchi le siélubei. Ráramagua wamá asaminara luagun lubuidun hénpulu le líchugubei Liráü, Hesukrístu, ani áfaagua wamá lun wáyeihani. Gaganbaditi meha lun Heowá darí lounwen ani ruti meha Heowá saragu afayeiruahaü lun (Fili. 2:5-11). Wibihiba giñe wafayeiruaha ánhawa afiñera luagu Heowá tau sun wanigi (Ari. 3:5, 6). Ligíati, haritagua wamá súnwandan luagu Heowá lan íchugubalin sun wemegeirun woun ani góunigilawa. Wéiriti wagundan lau gayara lan weseriwidun lun! Guentó, ka uagu gayara lubéi wariñagun ligía lan wamada le úmabei buídutima lan wanaagun woungua? Laganwoundatimaba ínsiñeni le wasandirubei luagu danme le warihini óunabagülei lun álügüdahani le lidan leweñegua arütíkulu.