ABA tóuburuni aban würi hilaali túmari ani gudemetu tisaani, ábanrügü tisaani. Mafiñen tumuti katei le asuseredubei! Murusun oura lubaragiñe le túhaburuguñein lúgubu tisaani hilaali. Anhein guentó wínwanyaali irahü ligía ani hayañu liña tuagun. Wéiriti tugundan. Aba lariñagun wügüri le abisidahabaliña: “Anihán biráü, wínwanti”.

Sügühali kéiburi ǘrüwa-milu irumu lúmagiñe lasuseredun katei le ani bürüwañu liña tidan Bíbülia lidan 1 Urúeigu kapítulu 17. Le abisidahabei, Elíasi, lani Bungiu profeta, ánhounti úguchuru, aban würi hilaali túmari lídangiñetu uburugu Sarepüta ani miridúnwati tiri. Ma funa lanarime lederebugudun tafiñen dan le tarihini láguyugun tiráü! Ariha waméi ka gayarabei wafurendeirun lídangiñe abahüdaguni tuáguti würi to.

Ariñagaali meha Heowá luagu ñeinbei lan aban lanarime lumabeigan lidan lidaani larúeihan Aabü, aban urúei wuribati Ísüraeli. Dan le lasuseredunbei lumabeigan ligía, aba laramuduni Bungiu Elíasi luéi Aabü ani aba ladügün milaguru lun léigagüdüni, adügati lun hanügün fiú dunuru fein lun luma úi. Aba lariñagun lun: “Saraba, beiba uburugun Sarepüta, lóubawagu Sidón, ábame berederun aganawa ñein. Rúhadina dimurei tun aban würi hilaali túmari lun téigagüdünibu” (1 Uru. 17:1-9).

Dan le lachülürünbei Elíasi Sarepüta, aba ladarirun aban würi hilaali túmari ani gudemetu abudaha watu. Tuguyaba meha funa san íchiga éigini lun? Wéiriti funa san tugudemen darí lun siñá lan tíchugun éigini lun? Íbini machourun lani Elíasi, aba desidírü lan ladimurehan tuma. Aba lariñagun tun: “Adügabá fulesei nun, barüba murusun duna nun lidan aban weru lun natun”. Dan le tídinbei anügei duna, ábaya lariñagun profeta: “Adügabá fulesei nun, barüba giñe murusun fein nun” (1 Uru. 17:10, 11). Ménrengunti tun würi tuguya tíchugun  murusun duna lun, gama lumoun tíchugun éigini lun ámuyaali katei lira.

Aba tóunabuni: “Fiñutina bun luagu Aburemei le Bubungiute, luagu ua tan fein héfeeru numa. Murusunrügüñoun fulúaru numa luma murusun garaba, nabudahaña yebe watu guenlé lun nidin ásürahoun lun wéiginu nuguya luma niráü lárigiñeme ábame wóunwegun walama” (1 Uru. 17:12). Ka gayarabei wafurendeirun lídangiñe yanu le?

Lau tariñagun lun “fiñutina bun luagu Aburemei le Bubungiute”, arufudatu subudigubei tani würi tuguya Elíasi keisi aban ísüraelina le inebeti Bungiu lun. Genegeti subuditu lan meha somu katei luagu Habungiute ísüraelina, gama lumoun úati buídurügü lan subudi ligía lun tariñagun “Nubungiute” dan le tadimurehan luagu Heowá. Sarepüta meha tawinwanda, aban uburugu lóubawagu Sidón. Másiñanti lun lan meha Baali háhuduragua gürigia ha Sarepütabaña. Gama lumoun arihati meha Heowá somu katei espechaliti tuagu würi hilaali túmari ani gudemetu tuguya.

Íbini haganaguañoun lan meha gürigia ha áhuduragutiña houn búngiugu mama inarünitiña, aba meha tafiñerun luagu Habungiute ísüraelina. Óunaha lumuti Heowá Elíasi túbiñoun luagu lubuidun guánarügü luma giñe luagu tubuidun guánarügü. Arufudati katei le aban lubuidun leksióun woun.

Mama meha sun gürigia ha awinwandubaña Sarepüta, le ñein lubéi láhudurawagua lun Baali, lun gádeihaña lan sunsuinagubei. Lau lóunahani Heowá Elíasi túbiñoun würi hilaali túmari tuguya, arufudati luagu mabulieidun lániña gürigia ha meseriwidungiñabaña lun. Ítara liña: “[resibi] lumutiña sun ha inebehabubaña lun ani adüga haméi le buídubei, lídangiñe hamá yebe furumiñeguarügü néchani” (Adü. 10:35).

Átiriñanu funa san gürigia keisi würi hilaali túmari tuguya lidan fulasu le ñein lubéi wapurichiha? Íbini geyegu haña lan hau gürigia ha afalarubalin relihión mama inarüniti, háfuga háluahaña lan fiú hádangiñe somu katei le buídutimati. Háfuga masubudirun hamá ni kata luagu Heowá o murusunrügüñein lan katei hasubudirun luagu, ligía megei habéi somu gürigia lun líderaguniña lun hóundarun lidan áhuduraguni inarüniti. Hóuchatiwa san wadariruniña ani íderagua wamaña gürigia ha?

Guentó, akutiha waméi katei le lamuriahabei Elíasi. Sun liña meha tariñaguni würi hilaaru úmari tuguya lun luagu murusunrügaaru lan fulúaru tuma lúnrügü aban éigini, ani lárigiñe lanme héigini éigini ligía ábame hóunwegun. Gama lumoun, aba lariñagun Elíasi tun: “Manufudedabá, beiba adügei le bariñagubei. Gama lumoun adügabá aban tiraüraü durudia nun tau fulúaru to búmaboun, ábame banügünu nun, lárigiñe ábame badügün aban beigan tuma aban leigan biráü. Lugundun ariñagaali Aburemei le Lubungiute Ísüraeli luagu magumuboun lan fulúaru tídangiñe diná, ni garaba lídangiñe fudu darime weyu láhuyagüdüni Bungiu huya” (1 Uru. 17:11-14).

Gayarati hasaminarun amu, “Ida luba san wíchuguni lagumuhóun weigin lun? Mosu ladügüña lan aban siñagei woun!”. Gama lumoun, ida liña san tóunabun würi tuguya? Íbini mibe lan katei tasubudirun luagu Heowá, afiñetu lun Elíasi ani adüga tumuti le lamuriahabei tuma. Ma lanarime óuchawaguni lun tafiñen... ani ma lubuidun le desidírü tubéi!

Mígirun lumutu Bungiu. Kei füramase lani Elíasi tun, adügati Heowá lun magumuchun lan teigin lidan sun dan le anihein lubéi lumabeigan, lun ñein  lan éigini lun Elíasi, lun tisaani luma tun. Ítara liña, “Magumuchuntu fulúaru tídangiñe diná, ni garaba lídangiñe fudu, ítara kei lariñaguni Aburemei liyumulugugiñe Elíasi” (1 Uru. 17:16; 18:1). Lun hamuga madügün tani würi hilaaru úmari tuguya le lamuriahabei Elíasi túmagiñe, háfuga tagumuchuña hamuga murusun fulúaru luma murusun agülei le túmabei ani úaali hamuga ni kata lun heigin. Gama lumoun, arufudatu afiñeni: afiñetu luagu Heowá ani aba tíchugun éigini lun Elíasi furumiñe.

Lídangiñe katei le furendeitiwa luagu biní lániña Heowá ha afiñerutiña luagu. Dan le wagagibudagun luma somu turóbuli le óuchagubalin wafiñen, ani aba wararamun lun lau afiñeni, íderagua lumutiwa Heowá. Aba liabin lun Wóuniri lan, Wamada ani le íchugubalin sun le wemegeirubei woun lun gayara lan wawandun (Afu. 3:13-15).

Lidan irumu 1898, arufudahatu garüdia Zion’s Watch Tower (La Torre del Vigía de Sión) aban katei súdiniti luagu abahüdaguni tuáguti würi hilaaru úmari: “Anhoun meha arufuda würi tuguya afiñeni ani gaganbadi tuguya, larihiboun meha Bungiu kei aban gürigia to luntu tibihin ídemuei lúmagiñe lau lídehan profeta; gama lumoun, anhoun mafiñen, gayarati meha láluahan amu würi hilaali túmari to afiñetu. Ítarameme liña lasuseredun woun. [...] Ánhawa afiñera luagu Bungiu, resibitiwa abinirúni; ánhawa mafiñen, aba weferidiruni”.

Dan le wagagibudagun luma óuchawaguni, mosu wáluahani ladundehan Bungiu tidan Lererun luma tidan wani agumeiraguagüdüni. Lárigiñe, mosu wadügüni le lariñagubei Heowá, íbini hénrengu lan woun wánharun lun. Gayarati wachoururuni labinirubadiwa lan Heowá anhein wasigira lubuidun adundehani le: “Afiñebá luagu Bungiu tau sun banigi, mamalá luagu lualin bichügü. Haritaguabá luagu Bungiu lidan sun le badügübei, ábame lanügünibu luéigiñe üma le surubei” (Ari. 3:5, 6).

Rúati tafiñen würi to lidan óuchawaguni ábanya wéiyaasu. Sigiti abahüdaguni ariñaga: “Átiri dan lárigiñe, aba lasandirun tiráü würi tuguya, wéiriti lisandi darí lun lachatirun lawaragun”. Lidan anuhán lan úguchuru to áfaagua lun gunfuranda tani le asuseredubei, aba tariñagun lun Elíasi: “Ka nadügübei bun lubúein Bungiu? Biábiña san aritaguagüdana luagu nifigoun, luma lun lounwen niráü?” (1 Uru. 17:17, 18). Ka san uagu tariñagei dimurei burí le?

Aba funa san taritagun würi tuguya luagun somu figóu le asufuriragüdübalun? Saminatu san labeichuñoun lan Bungiu lau lounwen tisaani ani uganu lan lánina óunweni lanügübei Elíasi? Mayanuhantu Bíbülia luagu le furangu, gama lumoun, furanguti luagu mama lan tariñaguña würi to luagu maricha lan Bungiu.

Chóuruti magurabun lani yebe Elíasi lounwen tisaani würi tuguya ani magurabun lumuti yebe giñe tasaminaruba lan luagu ladüga lan lachülürün ñeinhin lóunwenbei. Lárigiñe lanügüni lúgubu iráü sóunburugun, aba lafurieidun: “Nabureme Nubungiute, bíchiga giñe igarigu tun würi to, to úbiñeboun naganawa lau lounwen tiráü?”. Mawandun lumuti meha Elíasi lawiyedún liri Bungiu ladüga lígirun lun tasufurirun würi buiti tigaburi ani areidatu tuguya. Ligía layumuragunbei: “Nabureme Nubungiute, ayumuraguatina bun lun báguyuguagüdüni irahü le” (1 Uru. 17:20, 21).

Aganbagu liña meha Heowá lun sun katei. Hóugüda taali meha würi tuguya profeta, ani arufuda taali meha tafiñen. Genegeti ígirarügü lan Heowá lun lawanserun lisandi irahü ligía, lugundun subudi lumuti láguyuguagüdübei lan. Águyuguni ligía –furumiñeti águyuguni le uágubei tayanuha Bíbülia- leseriwiduba meha lun líchugun emenigini houn gürigia ha lúnbaña hayabin lárigiñe dan ligía. Lárigiñe layumuragun Elíasi, aba láguyuguagüdüni Heowá irahü. Samina wamá san luagun ugundani le tasandirubei lúguchu irahü dan le lariñagunbei Elíasi: “Anihán biráü, wínwanti”. Aba tóunabuni: “Guenlé, chóurutima naali luagu lubúein ban Bungiu, ani linarün lan Aburemei le bariñagubei” (1 Uru. 17:22-24).

Mariñagunti abahüdaguni amu katei tuagu würi hilaali túmari. Kei aba lubéi meha layanuhan Hesusu luagu lubuidun tigaburi würi to, gayarati wariñagun seriwi tan lun Bungiu darí tounwen (Luk. 4:25, 26). Arufuda lumuti abahüdaguni le luagu biní lumutiña lan Bungiu ha óuserubaliña lubúeingu buidu (Mat. 25:34-40). Arufuda lumuti giñe ru lani le hemegeirubei ha úaraguabaña lun, íbini lidan lénrengunga (Mat. 6:25-34). Ani arufuda lumuti woun busén lan Heowá láguyuguagüdüniña hilaaña ani gayara lan ladügüni (Adü. 24:15). Chóuruti anihein lan saragu resun wama lun waritagun tuagun würi hilaaru úmari to sarepütana.