1, 2. Ka uagu súdini lubéi Sálumu 45 woun?

 ABAN urúei le wéiriguti agalufehati lun lageindagun luagu inarüni luma irichaü. Lárigiñe lagañeiruniña láganiñu sunsuinagubei, aba lamarieidun tuma tubuidun ladari, ani haritawagúati luagun ani alawahóua ligía lun súnwandan. Ítara liña gayara lan lariñawagún lila Sálumu 45 lidan fiú dimurei.

² Gama lumoun, gíbeti katei gayarati wasagaruni lídangiñe Sálumu 45, mama mosu wasaminarun luágurügü lan aban abahüdaguni le agumuchubei lidan ugundani sálumu le. Sun burí katei le uágubei layanuha súdiniti woun, lugundun ayanuhati luagu burí katei le asuseredubei lidan wabagari uguñe weyu luma luagu le lunbei lasuseredun ámuñegü. Ligíati, akutiha waméi sálumu le buidu.

3, 4. a) Ka “dimurei buídumeraüti” súdinitimabei woun, ani ka efekütu lánibei tidan wanigi? b) Ka uganu wapurichihabei luagu aban “urúei”? c) Ida liña ítara tan wañeñe kei “labürügüle aban abürühati”?

³ (Aliiha huméi Sálumu 45:1.) Anihein aban katei “buídumeraüti” le adügübei lun lagundaarun abürühati Sálumu luma lun ‘tabuinchun lanigi lau dimurei’. Wayanuhaña luagu aban urúei. Lidan ebüréu, gayarati líchuguni Sálumu le saminaü luagu  táhabuhaña lan lanigi abürühati Sálumu luagu aban katei buiti. Katei le ligía adügübei lun tabuinchun lanigi lau ubebeni luma lun ítara tan liñeñe kei “labürügüle aban abürühati”.

⁴ Ka gayarabei lariñawagún wawagu? Uganu buiti luáguti Larúeihan Mesíasi ligía aban katei “buídumeraüti” le achülürübei tidoun wanigi. Aba buídutimahali lan uganu buiti lidan irumu 1914, lugundun lúmagiñe dan ligía mámaali luagu aban arúeihani le lunti liabin ámuñegü layanuhóua, ábanhali meha arúeihani inarüniti le gumeseelibei agumadiha sielu. Ani ligía “uganu buiti le luáguti larúeihan Bungiu” le wapurichihabei “lidan sun ubóu lun lasubudirúniwa lidan sun fulasu” (Mat. 24:14). Buínguatu san wanigi lau uganu le? Apurichiha wamuti san uganu buiti luáguti Larúeihan Bungiu lau ubebeni? Ítara kei meha lasuseredun lun abürühati Sálumu, adimurehatiwa luagu aban “urúei”. Apurichihatiwa luagu urúeihali lan Hesukrístu le Mesíasi lidan Larúeihan Bungiu. Ani amisuraha wamutiña sun gürigia, dandu gumadimatiña kei agumadirúabaña, lun herederun lábugiñe larúeihan (Sal. 2:1, 2, 4-12). Ítara tiña wañeñe kei “labürügüle aban abürühati” dan le wayusurunun Bíbülia, to Lererun Bungiu, lidan wapurichihan.

5. a) Ida liña meha ‘magadiñegu’ lan Hesusu? b) Ida liña buidu burí lan dimurei le layusurubei Urúei, ani ida luba wáyeihani lani hénpulu?

⁵ (Aliiha huméi Sálumu 45:2.) Mariñaguntu Bíbülia saragu katei luagu ida liña lan meha larihín Hesusu. Kei le meha mafigoun lubéi, chóuruti aban lan meha wügüri ‘magadiñeguti’. Gama lumoun, magadiñegutimati ladüga úaragua lan lun Heowá sunsuinagubei. Ani apurichihati meha luagu Larúeihan Bungiu lau ‘dimurei buíduburiti’ (Luk. 4:22; Huan 7:46). Áfaaguatiwa san lun wasigiruni lani hénpulu lidan wapurichihan ani yusu wagía dimurei le gayarati lachülürün tidoun hanigi gürigia ha aganbubaliwa? (Kol. 4:6.)

6. Ida liña meha labiniruni Bungiu Hesusu ‘lun sun dan’?

⁶ Ladüga lederegeragun Hesusu lungua lun Heowá tau sun lanigi, biní lumuti Heowá lidan lani ministeriu ani ru ligía lafayeiruaha lárigiñebei líchuguni libagari lidan sákürifisiu. Abürühati apostolu Pábulu: “Danti le ítarahali kei wügüri, aba lǘnabudaguagüdüntima lungua, ani ladüga laganbadi, aba lounwen luagu [wagabu lánina asufuriruni] lau sun nibusigarídüna lan óunweni luagu [wagabu lánina asufuriruni]. Ligía líchugunbalin Bungiu liñun-agei uéiriguni lun luma iri le wéirigutimabei lídangiñe súngubei, lun danme lan haganbuni sun ha siélubaña, ha múarugubaña, hama ha lábugiñebaña múa liri Hesusu, lun háhuduragun lun; gúfese tuguyame sun iñeñein luagu Hesukrístu lan Waburemebei, lun luéirigun Bungiu Úguchili” (Fili. 2:8-11). Aba labiniruni Heowá Hesusu lun ‘sun dan’ lau láguyuguagüdüni luma lun móunwendügüyaali lan (Rom. 6:9).

7. Ida liña lanúadiruni Bungiu Hesusu ‘sügǘ hau lupanaagu’?

⁷ (Aliiha huméi Sálumu 45:6, 7.) Ladüga lueirin línsiñe irichaü lun Hesusu luma lanarime iyereehabúni le lasandirubei luagu katei le awiyedubalin liri Lúguchi, aba lanúadiruni Heowá keisi Urúei lidan Larúeihan Mesíasi. Lau lanúadiruni Heowá Hesusu ‘aba labuinchagüdüni lau ugundani sügǘ  hau lupanaagu’, lidan amu dimurei, lurúeitegu Hudá ha ladügawagun Dawidi. Ida liña labuinchagüdüni lau ugundani? Furumiñe, ladüga Heowá lan anúadirubalin; ani mámarügü kei urúei lanúadirei, anúadira lumuti giñe kei Fádiri le Íñutimabei (Sal. 2:2; Ebü. 5:5, 6). Luagu amu oubaü, mama lau agülei lanuadirúa Hesusu, lau sífiri sandu lanuadirúa, ani mama ubouaguna larúeihan, siéluna.

8. a) Ka uagu chouru wabalin luagu richabei lan larúeihan Hesusu? b) Ka uagu gayara lubéi wariñagun inarüniti lan lagumadihan Hesusu?

⁸ Lidan irumu 1914, aba ladügüni Heowá Mesíasi le Liráü Urúeime. “Aban arúeihani le lánina richaguaü” larúeihan. Ligíati, chóuruti úabei lan himei lan aban gürigia luéi aban ani luagu ñeinbei lan irichaü. Inarüniti lagumadihan lugundun lúmagiñe Heowá libihei arúeihani. Ani ‘magumuchadibei’ larúeihan. Gúndaatün san lau heseriwidun lun Heowá lábugiñe lagumadihan Urúei gabafuti le írida láalibei?

9, 10. a) Ídabuga ladahiroun Kristu lefeinte, ani ka un layusuroun? b) Ida luba layusurunu Kristu lefeinte ámuñegü?

⁹ (Aliiha huméi Sálumu 45:3.) Ruti Heowá gumadi lun Urúei lun ladahirunu lefeinte liranaagua. Ítara liña líchugun üma lun lun lageindagun kóntüra sun ha máhabaña lun liricha Heowá lun larúeihan luma lun lábürügüdüni lasiadihan Bungiu hawagun (Sal. 110:2). Kei le aban lubéi Urúei Gawuribuhati ani magañeirúaditi Kristu, ariñawagúati luagu aban lan “gürigia ganigiti” ligía. Dahí lumutu lefeinte liranaagua lidan irumu 1914 lun lagañeiruni Satanási hama lumafianu ani lun láguruniña siélugiñe ubouagun (Aruf. 12:7-9).

¹⁰ Katei ligía lagumeseharügüñein meha lagalufehan Urúei lidoun agañeiruni, lugundun mégeigili lagumuchuni “lagañeirun” (Aruf. 6:2). Mégeigili lagunfuliruni lasiadihan Heowá kóntüra lílana ubóu wuribati le lani Satanási, luma lun ladügün lun mabafu lan Satanási hama lumafianu luagu Ubóu. Furumiñe lagumeseruba túmagiñe Babilónia to Wéiriboun, lóundarun sun relihión mama inarüniti ubouagu. Layusurubaña Heowá gumadimatiña ha lílana ubóu lun hagumuchun tau “horu” (Aruf. 17:16, 17). Lárigiñe, ábame lábürühan Urúei Gawuribuhati le kóntüra óundaruni lánina polítika le lábugiñebei lubafu Satanási ábame lagumuchaguagüdüni. Kristu, le giñe unbei laguarúa “ánheli le lani fusu le mébehabei”, lagumuchubei lagañeirun lau láguruni Satanási hama lumafianu lidoun fusu mébehati (Aruf. 9:1, 11; 20:1-3). Ariha waméi le lariñagubei profesía le lídanbei Sálumu 45 luagu sügǘ burí le.

11. Ida liña lagalufehan Kristu “luagu lóubadina inarüni”?

¹¹ (Aliiha huméi Sálumu 45:4.) Mama lawuribuhaña Urúei Gawuribuhati le lun gabafu lan o lun lagumadirun ageiraü. Lageindaguña aban wuribu richati lun katei buiti. Lagalufehaña “luagu lóubadina inarüni, íchigeina haricha ha ǘnabugubaña”. Ida liña lagalufehaña lan “luagu lóubadina inarüni”? Ladüga lageindaguña lan luagu inarüni le súdinitimabei: liricha Heowá lun larúeihan ubouagu. Dan le lebedaagunbei Satanási lun Heowá, adügati lun mafiñerúniwa lan luagu Heowá lan garichabei lun larúeihan. Lúmagiñe dan ligía, dandu máfianu kei gürigia, álügüdaguatiña houngua anhein garicha lubéi Heowá lun larúeihan. Chülüha lóurate lun lagalufehan Urúei le lanúadirubei Bungiu lun lafuranguagüdüni inarüni luáguti liricha Heowá lun larúeihan.

12. Ida liña lagalufehan Urúei luagu “haricha ha ǘnabugubaña”?

¹² Agalufehati giñe Urúei luagu “haricha ha ǘnabugubaña”. Keisi Liráü Bungiu  le ábanrügüti, rúhali aban buiti hénpulu lánina gaganbadi luma úaraguni lun liricha Lúguchi lun larúeihan (Isa. 50:4, 5; Huan 5:19). Sun lubúeingu Urúei ha erederubaña lábugiñe larúeihan lunti hasigiruni lani hénpulu lun herederun lábugiñe lererehan Heowá lau ǘnabuguni. Hárügübaña adügübalin katei le gayara hawinwandun lidan iseri ubóu le lani Bungiu (Sak. 14:16, 17).

13. Ida liña lagalufehan Kristu luagu ‘irichaü’?

¹³ Agalufehati giñe Kristu luagu ‘irichaü’. Irichaü le uéigiñebei lageindagua Urúei ‘liricha Bungiu’, lilurudun luagu le buídubei luma le wuribabei (Rom. 3:21; 2 Lur. 32:4). Lidan aban profesía, ariñagati Isaíasi luagu Urúei Hesukrístu: “Anihein aban urúei le lunbei larúeihan lau ísuruni” (Isa. 32:1). Lanügübei larúeihan Hesusu “iseri sielu luma iseri ubóu” le füramasewabei, ani “úaraguabei sun katei ñein” (2 Fe. 3:13). Mini lan le sun lan ha lúnbaña hawinwandun lidan iseri ubóu ligía mósume gaganbadi hamá lun lilurudun Heowá (Isa. 11:1-5).

14. Kaba “katei wéinamuburiti” ladüga Kristu lau lúhabu le lóunwenren? (Ariha huméi dibuhu le lídanbei lagumeseha arütíkulu.)

¹⁴ Lidan lagalufehan Urúei, barüina liña aban eféin lóubuagu (Sal. 45:3). Gama lumoun chülüti oura lun lasagarunu luma lun lárügüdünu lau lúhabu le lóunwenren. Ariñagati abürühati Sálumu luagu ladügüba lan meha Hesusu “katei wéinamuburiti” lau lúhabu le lóunwenren (Sal. 45:4). Danme le lagalufehan Hesukrístu lun lagunfuliruni lasiadihan Bungiu lidan Arümahedón, ladügüba “katei wéinamuburiti” kóntüra láganiñu. Ibidiñeti woun kaba lan layusura lun lagünrinchaguni ubóu le lani Satanási, gama lumoun, sun katei le lunbei ladügüni ladügüba lun hanufudedun ha madügünbaña gasu lau leweridihan Bungiu ani merede hagía lábugiñe lagumadihan Urúei (aliiha huméi Sálumu 2:11, 12). Ariñagati Hesusu lidan lani profesía luáguti lagumuhóun dan: “Ladagaruba falalaü hawagu gürigia luma anufudei, lau hasaminarun luagu katei le lunbei lasuseredun, ladüga hánhingichuaba sun waruguma ha siélubaña”. Ariñagati giñe: “Ábameti larihín niabin, au le Wügüri Garaüwarügüti, lidan dúeri lau sun nubafu luma óunwenbu nuéirigun” (Luk. 21:26, 27).

15, 16. Kátaña san “súdaragu ha siélubaña” ha lúnbaña hidin luma Kristu lidan wuribu?

¹⁵ Tidan líburu Arufudúni awisahóuati luagu liábinba lan Urúei ‘lau sun lubafu luma óunwenbu luéirigun’ lun lasiadihan. Ariñagati apostolu Huan: “Ábati narihini sielu hunreñu, aba lasaliragun aban gabayu haruti; leti awarihabalin, Gúnfuliti luma Inarüni, ligía líribei, ladüga lau irichaü lagumadiha, lau giñe irichaü lageindagua. Hafalareiti súdaragu ha siélubaña tau hadaüragun linu to fínutu, harutu, haruma, wariñu hagía hawagu gabayu harutiña. Ñeinñoun aban eféin hamanatu áfurihatu liyumulugugiñe lun láchuoguniña néchanigu tau, ábame lagumadiruni lau badun lánina agumadihani le lauti gürabu, aribichagualounme beibei lidan lagei lanarime ligañi Bungiu” (Aruf. 19:11, 14, 15).

¹⁶ Kátaña san “súdaragu ha siélubaña” ha lúnbaña hidin luma Kristu lidan wuribu? Dan le ladahirubarun lefeinte lun labuguni Satanási hama lumafianu siélugiñe, añahein meha “lani ánheligu” luma (Aruf. 12:7-9). Garichati lubeiti saminaü luagu ñéinbaña lan ánheligu hadan lisudaranigu Kristu lidan wuribu lánina Arümahedón. Añaheinbaña san amu gürigia hadan lisudaranigu? Adüga lumuti Hesusu füramasei le houn líbirigu anuadirúaaña: “Ha agañeirutiña, adügameme hameime le nabusenrubei ladügǘn darí lumoun lébeha, níchuguba ubafu houn luagu burí néchani, ítara kei líchugun Núguchi Bungiu ubafu nun. Ábame hagumadiruni néchani burí lau badun lánina agumadihani le lauti gürabu, ábame hamurugudaguni  keisi sóudieru le lauti múa” (Aruf. 2:26, 27). Líbirigu Kristu ha anuadirúaañabaña, resibi hamaalime hafayeiruaha sielu ani añaheinbaña hadan lisudaranigu. Ñéinbaña luma danme le ladügün “katei wéinamuburiti” lau badun lánina agumadihani le lauti gürabu.

17. a) Ka mini lubéi wariñu lan Kristu luagu aban gabayu haruti? b) Ka mini tubéi eféin tuma gimara?

¹⁷ (Aliiha huméi Sálumu 45:5.) Wariñu liña Urúei luagu aban gabayu haruti, mini lan le luagu lageindaguña lan aban wuribu harumati ani le richati ligibugiñe Heowá (Aruf. 6:2; 19:11). Barüina liña aban eféin tuma aban gimara. Ariñagatu Bíbülia: “Aba narihin aban gabayu haruti; ñeinñoun aban tebu gimara lúhaburugu le wariñubei luagu. Rúati aban ridi lun, aba láfuridun agañeireina luma lun lagañeirun“. Dandu eféin kei gimara ábanñoun sínbolu lani le lunbei layusuruni Kristu lun lagumuchun hau láganiñu.

18. Lidan Arümahedón, ida luba ‘gágiri tan ligimaran’ Urúei?

¹⁸ Kamá hamuga aban poema, ariñagati abürühati sálumu lidan aban profesía luagu gágiri tan gimara to lúmaboun Urúei, luagu táfuduraguboun lan hanigi láganiñu ani tadügüba lan lun lábürühan uburugu burí ligibugiñe. Wéiribei óunweguni ligía, lugundun ariñagati lani Heremíasi profesía: “Hame láfaragun Aburemei lidan weyu ligía, herederuba riwagu múarugu lúmagiñe lagumeseha ubóu lumoun lébeha” (Her. 25:33). Lidan aban profesía lenege le, ariñagati Huan: “Aba narihin aban ánheli rara lidan weyu, le agúaragubei lau erei houn sun dunuru ha áhamahabaña sielu, lariñaga: ‘Higougu, óundaragua humá lun óunwenbu ladineragüdün Bungiu, hou humaamuga hágürügü urúeigu, gumadimatiña, hama wügüriña ganigitiña, hágürügü gabayu hau sun ha awarihabaliña, hágürügü sun hawuyeri gürigia dandu ha idamuni kei ha mama idamuni, dandu ñǘbürigiña kei wéinamuhaña’” (Aruf. 19:17, 18).

19. Ida luba lasigirun Urúei Kristu ‘awansera lidan lagañeirun’?

¹⁹ Lárigiñeme lagumuchun lau ubóu wuribati le lani Satanási, lasigiruba Urúei Hesukrístu ‘awansera lidan lagañeirun’ (Sal. 45:4). Lagumuchubei lagañeirun lau láguruni Satanási hau sun lumafianu lidoun fusu mébehati, ani herederuba ñein luagu milu irumu lánina Larúeihan Kristu (Aruf. 20:2, 3). Ítara haba ñein kamá hamuga hilaaña lugundun siñabei hadügün ni kata. Mabafubaña hawagu gürigia, gayarahalime gaganbadi hamá gürigia lun Harúeite sunsuinagubei. Gama lumoun, lubaragiñeme harihini ladügǘn Ubóu ábanme paraísu murusun murusun, ñeinbei aban dan lun hagundaarun luma Urúei luma hama íbirigu anuadirúaaña. Lidan le aban arütíkulu warihiba katei lan ókaasion lánina ugundani ligía.