Aban sígulu guentó lúmagiñe hígiruni saragu míñunu nibureintiña ichouruni le hábiñebei lun houdin lidoun wuribu. Amarücharatiña lau ubebeni, ladüga lanarime línsiñe hageira houn. “Gúndaatina luagu weyu buíduburiti le agurabubaliwa”, ítara liña labürühan aban nadagimeinti merigein lidan irumu 1914.

Murusun dan lárigiñe, aba lasaliragun ubebeni ligía írunime luma igarigu. Úati yebe ni aban asaminaruti herederuba lan buga súdaragu hagía saragu irumu lidan aban fulasu buin lau baribarabu Bélgica luma Francia. Lidan dan ligía, aba hagúahan lun turóbuli ligía Óunwenbu Wuribu. Uguñe weyu aguahóuati lun Furumiñeti Wuribu Wéiriti.

Chóuruti weiri lan meha wuribu ligía lugundun súfuritiña saragu gürigia —según fiú akutihani, wein míñunu hádangiñe fériditiña lídangiñe lumegegun hágubu ani hilatiña diisi míñunu— ani wéiriti giñe lanarime burí charati le adügübei lun lagumeserun óunwenbu wuribu ligía. Siñaguatiña meha polítiku yuropana houngua lun hadügün lun madügün lan magundani le meha haganaguabei lurúeitegu saragu ageiraü lun ñein lan aban wuribu le gánibei efekütu lidan sun ubóu. Ani le wuribatimabei, ígira lumuti Óunwenbu Wuribu ligía lárigi lidan sun ubóu, ani darí lumoun weyu le uguñebei sandí wamagili lani efekütu.

Gumeseti Furumiñeti Wuribu Wéiriti ladüga fiú charati. Lidan aban dan darangiluti irumurugu lidan irumu 1914, genegeti meha ua lan gunfuranda hamani gumadimatiña yámani luagu lanügüba lan buga le desidírü habéi lidoun aban lanarime chagaguaü le lunbei ladügün dañu lun sun ubóu, según tariñaguni aban líburu. (The Fall of the Dynasties—The Collapse of the Old Order 1905-1922.)

Lídanrügü fiú dimaasu, adügati lafarún aban urúei áustriana lun hebelurun sun gabafutiña yuropana lidoun aban wuribu le yebe mabusenrun habéi ni aban. Lárigiñebei lagumeserun turóbuli, aba lalügüdǘn aban yámani íñuti lubara lidan lúrudu: “Ka san asuseredubei?”, aba lóunabun lau íruni: “Ligía nabusenrubei nasubudirun!”.

Sun ábutigu ha desidírübalin katei le adügübei lun ñein lan aban wuribu masaminarungubeitiña meha ítara luba lan lagumuchun katei. Ánhañati súdaragu ha lídanbaña wuribu, málütiña ñein aba hasubudiruni inarüni: charatiña polítiku houn, ha lábutigu relihión yeeda hamutiña ani ha hábutigu súdaragu garabaguatiña hawagun. Ida?

Chouru hamuti polítiku houn ladügüba lan wuribu lun liabin aban ubóu buídutimati. Ariñagati aban hádangiñe ha lídanbaña liñun-agei-lúrudu: “Ageindaguatiwa luagu katei le ibiha wamaalibei lidan lidaani darangilaü, luagu walagante hámagiñe wagüchagu luma luagu wabagari ámuñegü”. Sagati urúei merigana Woodrow Wilson aban dimurei lánina emenigini, ani aba famosu lan dimurei ligía. Ariñagati ladügübei lan wuribu ubóu “ábanme fulasu chóuruti lun gayara lan hanúadiruni lílana ageiraü harúeite”. Ani Gran Bretaña, saminatiña meha gürigia ábanbei lan wuribu le lunbei lagumuchun lau sun wuribu. Bulíeiguatiña meha!

Ídehatiña lábutigu relihión lidan wuribu tau sun hanigi. “Túniri lererun Bungiu furumiñetiñabaña eremuhei uremu lánina wuribu. Lanarime ageindaguni ligía adügati lun laganwoundun iyereehabúni ubouagu”, ítara liña tariñaguni The Columbia History of the World. Lubaragiñe habulubuduni iyereehabúni, gánwounguagüdarügü hamuti. “Arufuda hamuti lábutigu relihión siñá hamani ani libe-agei dan mabusenruntiña híchuguni hafiñen lidan furumiñeti lúgaaru lubaragiñe ínsiñeni luagu ageiraü. Hibe-agei aba háluahani üma le ménrenguntimabei ani aba konpararü hamani habagari keisi kristiánu luma lanarime ínsiñeni luagu ageiraü. Kristiánugu ha lídangiñetiña sun relihión resibitiña gumadi lun háfaragun houngua lidan liri Hesefuragüle”, liña tariñaguni líburu La historia del cristianismo.

Füramasetiña hábutigu súdaragu luagu furesebei lan hagañeirun, ani masuseredunti ítara. Sódini, aba hábürühan súdaragu lidoun lanarime turóbuli, ani saragu míñunu súdaragu súfuri hamuti le uágubei lariñaga aban abürühati luagu burí binadu sügǘ, “ligía sügǘ burí le wéiritimati ani hanarime ligía le lunbei meha hasufuriruni gürigia”. Íbini meha anihein lan saragu féridi, sigitiña hábutigu súdaragu óunahaña hawügüriñanigu lidoun burí fulasu le ñéingiñe lubéi hawuribuhan le laubei lánbara tuma tau tanarime aragabusu.

Ka lánibei wuribu le efekütu hawagu gürigia? Tidan aban líburu lánina abahüdaguni luagu dan le sügühalibei fuati dimurei le lariñagubei aban binadu súdara: “Makü lumuti wuribu hasaminan luma habagari gürigia ha lánina dan ligía lau watu gemeti”. Ítara liña, gumuguati óunwenbu burí arúeihani, ani lanarime wuribu ligía lagumeseharügüñein meha sígulu le ídanbei gíbetima hamá gürigia óunwegutiña sügǘ lau lidan amu dan. Lúmagiñe dan ligía, kamanitimaahali chagaguaü luma hamarücharun gürigia ǘmada lun harufuduni magundan hamá lau somu katei.

Ka san uagu lebelura ubóu lidoun turóbuli lúmagiñe lidaani wuribu? Ábanrügüñein meha san lanarime danaguaü? Ka larufudubei óunabagülei luáguti le lunbei lasuseredun ámuñegü?