Anihán aban lídangiñe bérusu le subudiwatimabei ani le wéiritimabei layusurún tidan Bíbülia. Ariñawagúati ua lan amu bérusu le “ayanuhati furangu ani lidan murusun dimurei luagu lumadagua Bungiu hama gürigia, ítara kei luagu lémeri asalbaruni”. Ligía maweiridun tubéi wanigi dan le warihini añahein lan gürigia lidan somu burí ageiraü ru hamuti bérusu le tuagu hagune.

Ha adügübalin katei le chouru hamuti luagu hínsiñe hamá lun Bungiu darí lun líchugubei lan ibagari magumuchaditi houn. Agia hugía? Sandí humaali san lidan hibagari luagu hínsiñe humá lun Bungiu?

Saragu gürigia afiñetiña luagu Bungiu lan adügübaliña gürigia, ubóu luma sun le geyegubei wau. Le linarün aban katei, sun le wínwanbei hanarimeti lubuidun, ligía gayara lubéi wariñagun aban lan Bungiu chu tau adügübalin. Ani saragu gürigia rútiña seremei lun Heowá sagü weyu luagu ibagari le líchugubei houn. Ani gunfuranda hamuti luagu megei hamá lúmagiñe lun hasigirun awinwanda, lugundun ligía íchugubalin garabali woun, duna, éigini luma sun le mégeiwabei.

Buídubei lun wíchugun seremei lun Bungiu luagu sun katei le; ligía adügübadiwa ani kipu lumutiwa lau ibagari (Sálumu 104:10-28; 145:15, 16; Adügaü 4:24). Ligía aban igaburi le ídanbei larufudei línsiñehabu. Ariñagati apostolu Pábulu:  “[Bungiu] guánarügü íchugubei ibagari luma garabali, luma sun katei woun, sun wagía. Ladüga lídangiñeti Bungiu awanhein lubéi, gabagari wagía, éibuga wagía ligibuagu ubóu le” (Adügaü 17:25, 28).

Hanarimeti línsiñehabu Bungiu ani mámarügüñein wágubu lóunigira. Adüga lumutiwa lun megei wamá wáhuduragun lun, ani íderagua lumutiwa lun wadügüni (Matéu 5:3). Ítarati, ruti chansi woun lun hádangiñe wamá lufamilian. Ligíati, anhein gaganbadi wagía lun, gayarabei lisaanigu wamá (Rómana 8:19-21).

Ítara kei lariñaguni Huan 3:16, arufuda lumuti Bungiu hínsiñe wamá lun lau lóunahani Hesukrístu, le Liráü, ubouagun. Nǘbuinti Hesusu lun larufudahan woun luagu Lúguchi, le Lubungiute, luma lun lounwen wawagu. Gama lumoun, úati gunfuranda hamani saragu gürigia buidu buidu ka lan uagu mosu lubéi meha lounwen Hesusu wawagu ani ida liña lan aban lan ínsiñeni lúmagiñeti Bungiu óunweni ligía. Ariha waméi le tariñagubei Bíbülia.

Íbini sun lan wagía sánditiwa, weiya wagía ani hilagua wagía, mama yebe le labuserunbei Bungiu woun. Adüga lumutiña furumiñetiña gürigia lun hawinwandun lun súnwandan lidan aban paraísu ubouagu. Gama lumoun, ruti aban gumadi houn: mosu meha gaganbadi hamá lun; ánhaña maganbadi, hóunweguba meha (Agumesehani 2:17). Adán, le furumiñeti wügüri, aba meha lebedaagun lun lugumadin Bungiu, ligía anügübalin lidoun óunweni hau sun ladügawagun. Afuranguagüda lumuti apostolu Pábulu: “Ítara kei lídangiñe lan meha aban wügüri lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (Rómana 5:12).

Gama lumoun, hínsiñeti irichaü lun Bungiu (Sálumu 37:28). Ligíati, íbini siñá lan meha lásügüragüdüni maganbadi ligía, masíadirun lumutiña sun gürigia lun hasufurirun lun súnwandan luma lun hóunwegun ladügarügü lifigoun aban wügüri. Lubaragiñe lira, úaraguagüda lumuti balansu lánina irichaü lun gayara lan lagiribudagüdüni emenigini lánina ibagari magumuchaditi houn gürigia gaganbaditiña. Ida? Lau layusuruni lúrudu le lánina “ibagari luagu ibagari” (Áfuriduni 21:23). Féridi lumuti Adán libagari sin figóu, ligía lunti lubéi meha lederegeruni somu wügüri mafigounti libagari hawagu amu.

Furanguti luagu siñati lan meha lederegeruni ni aban hádangiñe ladügawagun Adán libagari, ánheinti Hesusu gayarati meha ladügüni (Sálumu 49:6-9). Águrahouati Hesusu sin figóu, mafigounti meha kei Adán. Ligíati, lau líchuguni libagari gayarati meha lesefuruniña gürigia luéi figóu ru ligía chansi houn hasaanigu furumiñetiña gürigia lun habagaridun sin figóu, ibagari le meha heferidirubei Adán tuma Ewa (Rómana 3:23, 24; 6:23). Anihein funa san somu katei lunti wadügüni lun wasagarun buiti lídangiñe lanarime ínsiñehabuni le?

Sigiti Huan 3:16 ariñaga: “Lun sun lan ha afiñerutiña luagu [Hesusu], meferidirun hamaamuga, gabagarirügü hamaamuga aban ibagari le magumuchaditi”. Mini lan le, anhein lan busén wabéi ibagari magumuchaditi, mosu wadügün aban katei: wafiñerun luagu Hesusu ani gaganbadi wagíame lun.

Gayarati lariñagun somu gürigia: “Mayanuhanti bérusu le luagu gaganbadi. Ariñagati Hesusu ‘sun lan ha afiñebaña luagu’ hibihiba lan ibagari magumuchaditi”. Anha, súdiniti afiñeni, gama lumoun úati buídurügü lan, lugundun ariñagatu Bíbülia anhein lan busén wabéi wagundaaragüdüni Bungiu, mosu lan wáfaagun lun wadügüni le larufudahabei Hesusu, mámarügü lun wafiñerun luagu, nírügü lun wasubudiruni kei wasalbaragüle. Anhein mawinwandun wamá le wafurendeirubei, meseriwinti wariñagun luagu afiñe wamá. Ariñagatu Bíbülia furangu: “Hilañu liña giñe hafiñen anhein marufudun humá lau katei buiti le hadügübei” (Santiagu 2:26). Mosu línchahaniwa wafiñen luagu Hesusu lun wawinwanduni le wafurendeirubei.

Afuranguagüda lumuti Pábulu katei le ítara: “Gumadi lumutiwa línsiñehabu Kristu, ladüga chouru wamuti hilá lan aban wawagu súngubei, hilaguatiwa lubeiti súngubei. Hilati Kristu wawagu sun wagía, lun sun lan ha gabagaribaña, mámaali láamuga houn guánarügü habagarida, lun habagaridun lun le óunwebei hawagu, sará ligía lídangiñe óunweni” (2 Korintuna 5:14, 15). Anhein inarüni lubéi seremei wamani Hesusu luagu lani sákürifisiu, wadügüba asansiruni lidan wabagari; madügün wamaalime le wayumahabei, ani wawinwanduba lun wadügüni lugundan Hesusu, le óunwenbei wawagu. Lidan amu dimurei, wagunfuliruni lugumadin Hesusu mosu ligía lan furumiñeti katei lidan wabagari. Ani mosu larihíniwa asansiruni burí le lidan wagaburi, lidan le desidírü wabéi luma lidan le wadügübei. Kaba wibiha lau warufudun afiñeni luagu Hesusu?

Lidan lagumuchagüle Huan 3:16 dariwati lani Bungiu füramasei: ha afiñebaña luagu lani Hesusu sákürifisiu ani sigí haméi lilurudun móunwegunbaña, habagariduba lun súnwandan. Gama lumoun mámaba lidan ligiaméme fulasu habagarida sun gürigia ha hínsiñebaña lun Bungiu.

Hawinwanduba fiú hádangiñe sielu lun súnwandan. Ida liña wasubudiruni? Lugundun ariñagati meha Hesusu houn lani disipulugu léibuga lan aranseha aban ubaraü habá sielu lun harúeihan úara luma (Huan 14:2, 3; Filipuna 3:20, 21). Ha lúnbaña háguyugun sielu “lufadirinigubaña Bungiu luma Kristu; ábame harúeihan úara luma luagu milu irumu” (Arufudúni 20:6).

Fiúrügübaña kristiánugu ibihei afayeiruahaü le. Ariñagati Hesusu: “Manufudeda humá, nirahüñü; lau sun mibe humá, gúndaati Bungiu lun líchuguni larúeihan hun” (Lúkasi 12:32). Átiriñanu san gürigia lidan ‘liraüraü” sétanu le? Ariñagati Arufudúni 14:1, 4: “Lárigiñe lira, aba narihini Mudún, rara lábulugu wübü le Sión. Ñéinñanu san-bián-wein-gádürü-milu gürigia luma, ha bürüwañubei liri Mudún luma liri Lúguchi hereberugu [...]. Hagía ha mádaragunbaña houngua hamoun wuriña, rédeitiña harumañu, falá haméi Mudún le ñeinhin lumuti lidin, díreiwatiña ani sálbawa hagía hádangiñe gürigia kei furumiñeti idewesei lun Bungiu luma lun Mudún”. Ánhaña konparárü wamá 144.000 gürigia ha hama saragu milu míñunu gürigia ha wínwanhañabaña ubouagu gayarati wariñagun ‘mibe hamá’. Arufuda lumuti bérusu le luagu harúeihaba lan. Kaba uagu harúeiha?

Ariñagati Hesusu luagu libiaman sétanu le giñe lunbei lagundaarun lábugiñe Larúeihan le siélubei: “Añahein giñe amu mudún numa ha mámabaña lídangiñe fárüga le; lunti giñe nanügüniña lun nánigubaña lan. Haganbubadina, ábame herederun súngubei lidan aban fárüga luma aban óunigiruti” (Huan 10:16). Hemenigitiña “mudún” ha hawinwandun lun súnwandan ubouagu, kei hamuga meha Adán tuma Ewa. Ida liña wasubudiruni?

 Ariñagatu Bíbülia saragu wéiyaasu luagu paraísubei lan Ubóu. Anhein busén hubéi hachoururuni, dará humóun hibibülian ani aliiha huméi bérusu burí le: Sálumu 37:9-11; 46:8, 9; 72:7, 8, 16; Isaíasi 35:5, 6; 65:21-23; Matéu 5:5; Huan 5:28, 29 luma Arufudúni 21:4. Adimurehati bérusu burí le luagu lagumuchun wuribu, ilamaü, sandi luma óunweni. Adimurehati luagu hábunaguba lan gürigia haban, halubahabei lan le hábunagubei ani luagu hagüriahabaña lan hasaanigu lidan aban ubóu darangilati. * Hínsiñeti hamuga san hun hawinwandun ítara? Gayarati wachoururuni luagu lagunfuliruba lan füramasei le yarafa madise.

Lárigiñe wakutihani arütíkulu le, ma furanguti luagu adügali lan Bungiu saragu katei luagu kada aban wádangiñe? Rúhali ibagari woun, lichú au, átuadi luma sun le wemegeirubei lun wawinwandun. Gama lumoun, le súdinitimabei, lóunahani Lisaani ounwe wawagu lun gayara lan wibihin saragu abinirúni, ítara kei wafurendeiruni lidan Huan 3:16.

Wagundaaruba lau ibagari magumuchaditi lidan aban ubóu darangilati ani buiti, le ñein lubéi úabei lan sandi, wuribu, ilamaü ni óunweni. Kada aban wádangiñe lunti desidírü lan anhein busén lubalin abinirúni burí le. Anihán álügüdahani le lunbei lounabúniwa guentó: Ka wadügübei luagu Bungiu?