1. Ka lubuidun hénpulu lígirubei Hesusu luagu le mini lubéi ladügǘniwa sákürifisiu hawagu amu?

 DAN le ya lubéi Hesusu ubouagu, ígirati aban lubuidun hénpulu luagu le mini lubéi ladügǘniwa sákürifisiu hawagu amu. Ígira lumuti lubuidun libagari luma le layumahabei lun ladügüni lugundan Bungiu (Huan 5:30). Lau lasigirun úaragu darí lounwen luagu wagabu, arufuda lumuti aranseñu liña lan lun ladügün sákürifisiu hawagu amu (Fili. 2:8, TNM).

2. a) Ka mini lubéi warufudun aban sífiri lánina sákürifisiu? b) Ka uagu lunti lubéi wadügün sákürifisiu hawagu amu?

² Keisi lani Hesusu disipulugu, lunti wáyeihani lani hénpulu lau warufudun aban sífiri lánina sákürifisiu. Ka mini lubéi sífiri lánina sákürifisiu? Le mini lubéi, lígiruni gürigia layumahan lun líderaguniña amu. Gayarati wariñagun amu lan luéi ángini (aliiha huméi Matéu 16:24). Warufudun sífiri lánina sákürifisiu íderagua lumutiwa lun wígiruni wasaminan luma le himein wabéi lidan libiaman lúgaaru (Fili. 2:3, 4). Arufudahati meha Hesusu aban lan fánreinti súdiniti lidan wáhuduragun lun Bungiu warufudun aban sífiri lánina sákürisifiu. Ka uagu? Lugundun ínsiñeni le inarüniti ligía ínchahabaliwa lun wadügün sákürifisiu hawagu amu. Ani ínsiñeni ligía ligía asubudiragüdübaliña lani Hesusu disipulugu (Huan 13:34, 35). Aranseñu haña wíbirigu lidan sun ubóu  lun hadügün sákürifisiu. Ani ma inarüni ibiha wamá saragu abinirúni luagu hádangiñe wamá?

3. Ka gayarabei ledebilidagüdüni sífiri lánina sákürifisiu le wawagubei?

³ Gama lumoun, gagibuguatiwa luma aban ágani le gayarabei ledebilidagüdüni sífiri lánina sákürifisiu le wawagubei: wasaminarun wawounguounrügü. Haritagua waméi íbini lan Adán tuma Ewa arufuda hamuti luriban igaburi le. Ínchaha lumutu igaburi le Ewa lun busén tan ítara tan kei Bungiu, ani aba maganbadi lan Adán lun Heowá ladüga busén lan lagundaaragüdünu lani weiriou (Agu. 3:5, 6). Adügati meha Satanási lun hadisedun luéi áhuduraguni le inarüniti, ani lúmagiñe dan ligía áfaaguati lun hawounguounrügü lan gürigia hasaminara. Hóuchati ladügüni ligiaméme lun Hesusu (Mat. 4:1-9). Ani uguñe weyu, ibihaali Satanási lun héiguadun hibe-agei gürigia tidoun lisadaran, lun hawounguounrügü lan hasaminara. Duari wamá, lugundu gayarati labadülerun luriban hagaburi gürigia ubouaguna wawagu (Efe. 2:2).

4. a) Gayarati san wígiruni igaburi lánina wasaminarun wawounguounrügü? b) Kaba burí álügüdahani ounabúa?

⁴ Gayarati konparárua lan hasaminarun gürigia hawounguounrügü luma igahüni. Anhein igirúa somu katei lauti gürabu lubá duna luma garabali, gayarati lagumeserun agahüda. Anhein metenirúniwa lun ani redei ligía lun lasigirun agahüda, gayarati lagadeirun. Ítarameme, íbini siñá lan walibürerun luéi figóu luma luéi wasaminarun wawounguounrügü sunsuinagubei, mosu wóunigiragun woungua lun mígiraguagüdün wamá woungua lun igaburi le (1 Ko. 9:26, 27). Ida luba wasubudiruni anhein samina wabéi wawounguounrügü? Ida luba wakipurun aban sífiri lánina sákürifisiu?

5. a) Ka uagu ítara tubéi Bíbülia kei aban isubusei? (Ariha huméi dibuhu le lídanbei lagumeseha arütíkulu.) b) Dan le waríagun woungua según le tariñagubei Bíbülia, ka lunbei madügün wamani?

⁵ Ítara kei waríagun woungua tidan isubusei, íderagua tumutiwa Bíbülia lun waríagun woungua múnadagiñe wabiti luma lun waransehani somu charati le wadarirubei (aliiha huméi Santiagu 1:22-25). Gama lumoun, lun gayara lan tadügüni isubusei tuadigimari, lunti wayusurunu buidu. Anhein lau lubéi lóufudagun waríagua woungua tidan, gayarati marihin wabéi lan somu mégeiti le wawagubei. Ani según wesetiragun woungua lidan waríagun woungua tidan isubusei, gayarati warihin amu gürigia. Ítarameme, lun tíderaguniwa Bíbülia ariha somu charati wawougua, kéiburi wasaminarun wawounguounrügü, moun lumuti waliihanu lau lóufudagun o wayusurunu lun warihini hachara amu gürigia.

6. Ida luba wéchudun aturiahoun Lererun Bungiu?

⁶ Le linarün aban katei, gayarati waliihañoun lan Lererun Bungiu gabügürügua, íbini sagü weyu, ani lau sun lira, gayarati míchugun wamá fe luagu wagumeseruña lan asaminara wawounguounrügü. Ida liña gayara lan lasuseredun le? Lidan lani Santiagu hénpulu le tuáguti isubusei, laríagun gürigia lungua buidu tidan isubusei mama ligía turóbulibei. Ariñagati abahüdaguni le luagu ‘aríagua lan lungua’. Dimurei güriegu le layusurubei Santiagu adügati lun wasaminarun luagu aban akutihani huliliti, mini lan “laríagun lungua buidu”. Kati wuribati ladügübei wügüri le? Afuranguagüda lumuti bérusu le: “Gama lumoun, kei lidin , ítara labulieiduni ida liña lan”. Ítara liña, aba lidin ani maransehan lumuti le larihibei luougua. Ánheinti gürigia le buídubei lidin lun, ‘héchuti aturiahoun Lererun Bungiu’. Lubaragiñe ladisedun luéi lúrudu le tídanbei Lererun Bungiu, áfaaguati lun lawinwanduni le lafurendeirubei. Ariñagati Hesusu aban katei ítarati dan le lariñagun: “Anhaün agunfulira lau nererun, hiábinba lun nani humá disipulugu le timatimaati” (Huan 8:31).

7. Ida liña gayara lan wayusurunu Bíbülia lun wageindagun luma igaburi lánina lasaminarun gürigia luouguounrügü?

⁷ Lun gayara lan wageindagun luma furumiñeguarügü igaburi le mabuidunti, furumiñe, lunti waliihanu Lererun Bungiu lau duari. Ítarati, gayarabei warihini halíaba lan wabuiduragüdei wagaburi. Gama lumoun, mosu wadügün aban akutihani  huliliti. Danme le gunfuranda wamaali somu abahüdaguni tídangiñeti Bíbülia, samina wamá lídanñadiwa lan ani álügüdagua wamá woungua. “Kaba hamuga san nadüga lidan kesi le? Nadügüñein hamuga san le buídubei?”. Ani le súdinitimabei, lárigiñe wasaminarun luagu le aliiha wamaalibei, áfaagua wamá lun wawinwanduni lidan wabagari (Mat. 7:24, 25). Ariha waméi ida luba lan líderaguniwa abahüdaguni luagu urúei Saulu luma apostolu Féduru lun wakipurun aban sífiri lánina sákürifisiu.

8. Ka igaburi larufudubei Saulu dan le lagumeserunbei arúeiha, ani ida liña larufuduni?

⁸ Le meha asuseredubei lun urúei Saulu seriwiti woun kei eweridihani. Ligía aban hénpulu furanguti luagu gayara lan lagünrinchaguni wasaminarun wawounguounrügü sífiri lánina sákürifisiu le wawagubei. Gumese lumuti meha Saulu larúeihan lau ǘnabuguni (1 Sam. 9:21). Mabuserunti meha labeichuniña ísüraelina ha adimurehabaña wuriba luagu liridúnua kei urúei, íbini gayara lan meha layusuruni lubafu lugundun Bungiu lan meha adügübalin urúeime (1 Sam. 10:27). Ánhati urúei Saulu lun ladundehan lani Bungiu sífiri lau ladundehaniña lumutuniña Heowá lidan hageindagun hama amonna, ani lárigiñe ariñagati lau ǘnabuguni Heowá lan agañeiragüdübaliña (1 Sam. 11:6, 11-13).

9. Ida liña lagumeserun Saulu asaminara luouguounrügü?

⁹ Lau lásügürün dan, aba lígirun Saulu lun gabafu lan pantaü luma barüguaü unguaü luagu, ítara kei lagahüdün gürabu murusun murusun. Dan le meha lagañeirunbaliña amaléküna, himein lumuti ladügüni le labusenrubei sügǘ lau gaganbadi lan lun Heowá. Aba lerederun lau hamegen áganiñu lubaragiñe hamuga lagünrichaguni kei lariñaguni Bungiu lun. Hanarimeti lupantan darí lun ladügagüdün aban aritaguagülei luagu (1 Sam. 15:3, 9, 12). Dan le lariñagun profeta Samueli lun magundan lan Heowá lau ligaburi, álugati Saulu laricharaguagüdüni le ladügübei. Aba lariñagun luagu gúnfuli lani le lariñagubei Heowá lun ani aba líchuguni duru hawagun amu luagu luriban lóuserun (1 Sam. 15:16-21). Ani adügati anaaguni unguaü lun ladiheridun saragu luagu le gayarabei hasaminaruni gürigia luagu sügǘ lau ladiheridun luagu lumadagua luma Bungiu (1 Sam. 15:30). Ida liña gayara lan wayusuruni abahüdaguni le kei aban isubusei to lunboun tíderaguniwa akipura aban sífiri lánina sákürifisiu?

10, 11. a) Ka larufudahabei luriban lani Saulu hénpulu woun? b) Ka gayarabei wadügüni lun méiguadun wamá lidoun ligiaméme charati?

¹⁰ Furumiñe, arufudahati luriban lani Saulu hénpulu woun moun lumuti lan wafiñerun wawounguounrügü saragu. Anhein arufudadiwa lubéi aban sífiri lánina sákürifisiu lidan amu dan, úati mini lan lira wasigira mémeba lan arufuda ítaraguarügü, mosu wáfaagun súnwandan lun wakipurun aban lubuidun igaburi. (1 Tim. 4:10). Haritagua waméi buidu lan meha lagumeserun Saulu ani buiti meha lumadagua luma Bungiu. Gama lumoun masaga lumuti luriban ayumahani le agumeserubei lidan lisaminan. Lagumuhóun, aba lamahadun Heowá lun ladüga lumaganbadin.

¹¹ Libiaman, furendeitiwa moun lumuti lan wetenirun lúnrügü le wadügübei buidu metenirunga wagía lun le lunbei wabuiduragüdüni lidan wabagari. Ítara liña hamuga kamá wayusurun aban isubusei lun warihinu iseri daüguaü to wawaguboun sin warihin anihein lan somu wíyeti luagu wagibu. Íbini ua lan panta wamá kei meha Saulu, mosu wóunigiragun woungua luéi furumiñeguarügü igaburi le gayarabei ladügün lun wéiguadun lidan ligiaméme charati le ídanbei léiguada. Danme le lichugún somu eweridihani woun, máluga wamá waricharaguagüdüni katei o wanügüni le ariñawagúbei woun kei ni kata, o wíchuguni duru hawagu amu. Anha wamá lun ererehóuni lau lubuidun igaburi, mítaran wamá kei Saulu (aliiha huméi Sálumu 141:5).

12. Ida liña gayara lan líderaguniwa sífiri lánina sákürifisiu anhein héiguadiwa lubéi lidoun somu figóu wéiriti?

¹² Ka lunbei wadügüni anhein adügaadiwa lubéi somu figóu wéiriti? Wéiriti meha ladiheridun Saulu luagu kaba lan hariñaga gürigia luagu, ani ligía adügübei lun makipurun lani lumadagua  luma Bungiu. Mafalara waméi luriban lani hénpulu. Gayarati línchahaniwa sífiri lánina sákürifisiu lun wáluahani ídemuei le wemegeirubei meberesenga wasufurirun busiganu (Ari. 28:13; Sant. 5:14-16). Gumeseti aban íbiri aríagua iyawaü lánina agamariduni dan le meha duusu lubéi irumu lau ani sigíti aríaguoun aramudaguarügü lóugiñe diisi irumu. Ariñagati: “Hénrenguti meha nun nagufeseruni tun nani weiriou luma houn wéiyaaña lidan afiñeni. Gama lumoun lau ariñaga naali lan houn, sanditina aban óunwenbu awalidaguni. Fiú hádangiñe numadagu aba magundan hamá dan le nígirunbalin neseriwidun kei ídehati lidan damuriguaü; aba hasaminarun luagu charaadina lan houn. Íbini ítara, subuditi nun gúndaatimahali lan Heowá lau neseriwidun sügǘ lau dan le gagaburi nani échuni lánina laríawagun katei wíyeti, ani le lasaminarubei Heowá ligíatima súdinitimabei”.

13, 14. Ida liña wasubudiruni mosu lan meha lageindagun Féduru luma pantaü?

¹³ Arufudati apostolu Féduru aban sífiri lánina sákürifisiu lidan anihan lan Hesusu arufudaha lun (Luk. 5:3-11). Gama lumoun, mosu meha lageindagun luma lasaminarun luouguoun. Kei hénpulu, aba lagañidun dan le hálugunbei apostolu Santiagu luma Huan hachoururun aban ubaraü íñuti lurugabu Hesusu lidan Larúeihan Bungiu. Háfuga aba lasaminarun lun lan latokara aban lídangiñe ubaraü ligía, ladüga ariñaga laali lan meha Hesusu lun lagunfuliruba lan aban gárada súdinitu (Mat. 16:18, 19). Ariñagati meha Hesusu lun Santiagu, Huan luma Féduru, luma houn ha híbiri apostolugu, lun masaminarun hamá hawouguoun, lun giñe miñu lan hóuseragun houngua (Mar. 10:35-45).

¹⁴ Íbini lárigiñe ererehóuni ligía, aba lígirun Féduru lun gabafu lan pantaü luagu. Dan le meha lariñagunbei Hesusu houn lani apostolugu luagu hígirubei lan luagu fiú dan, aba lǘnabudagüdüniña Féduru ha híbiri ani aba ladimurehan lau pantaü achoruragüdei luagu ligíarügübei lan úaragua (Mat. 26:31-33). Moun lumuti yebe lafiñerun luouguoun saragu, lugundun gúñounmeme ligía aba lachararun, marufudun lumuti sífiri lánina sákürifisiu. Lidan láfaagun lun lóunigiragun lungua, aba leyeedagun ǘrüwa wéiyaasu luagu ibidiñe lan Hesusu lun (Mat. 26:69-75).

15. Ka uagu ru lubéi lani Féduru hénpulu gurasu woun?

¹⁵ Íbini ageindagua lan Féduru luma luriban  igaburi, kéiburi pantaü luma lasaminarun luouguoun, ígirati aban lubuidun hénpulu woun. Lau áfaaguni luma lídehan sífiri sandu, ganigiti meha lun lárügüdagun lungua luéi lasaminarun luouguoun luma lun larufudun ragüguaü unguaü luma aban sífiri lánina sákürifisiu (Gal. 5:22, 23). Awanda lumuti óuchawaguni le genegebei deré lan sügǘ lau charati le meha ladügübei. Aban hénpulu, dan le ladeinhanbei apostolu Pábulu lun hagibugiñe gürigia, óunabati Féduru lau ǘnabuguni (Gal. 2: 11-14). Ani mareidunti igarihabu lun Pábulu ladügarügü lagadeiruni liri. Lubaragiñe lira, sigímemegili óuserei kei líbiri (2 Fe. 3:15). Gayarati líderaguniwa lani hénpulu lun wakipurun aban sífiri lánina sákürifisiu.

16. Ida luba gayara lan warufudun aban sífiri lánina sákürifisiu lidan lidaani lénrengunga?

¹⁶ Ida liña wóunabun dan le wásügürün lídangiñe lénrengunga? Dan le meha hadaürǘnbei apostolugu ani beiwa hagía ladüga hapurichihan, aba hagundaarun “lau larihiniña Bungiu keisi gürigia gadünamatiña lun hasufurirun busiganu luagu liri Hesusu” (Adü. 5:41). Gayarati giñe warihini éibaahouni keisi aban chansi lun wáyeihani Féduru luma lun wasigiruni lani Hesusu hénpulu lau warufudun aban sífiri lánina sákürifisiu (aliiha huméi 1 Féduru 2:20, 21). Ani líderagubadiwa igaburi le anhein achülüra aban dan lun heweridiruniwa wéiyaaña lidan afiñeni. Magañida wamá, haritagua waméi lani Féduru hénpulu (Apur. 7:9).

17, 18. a) Ka burí álügüdahani lunbei wadügüni libügürü le wabusenrubei wadügün lidan weseriwidun lun Bungiu? b) Ka lunbei wadügüni anhein wariha anihein lan somu luriban igaburi, kéiburi wasaminarun wawounguounrügü, tidan wanigi?

¹⁷ Íderagua lumutiwa giñe lani Féduru hénpulu lun wasaminarun ida luba lan wabuiduragüdüni weseriwidun lun Bungiu. Lidan wáfaagun lun wibihini katei le, lahuuduba woun saragu gani wamá aban sífiri lánina sákürifisiu. Gama lumoun, duari wamá! Mígiraguagüda wamá woungua lun ayumahani le lánina wabusenrun iñu wamá. Álügüdagua wamá woungua: “Ka uagu busén nubéi naganwoundagüdüni neseriwidun lun Heowá? Ladüga funa san busén nan uéiriguni hámagiñe amu, o lun gabafu nan hawagu, ítara kei Santiagu luma Huan dan le hamuriahanbei aban ubaraü íñuti luma Hesusu?

¹⁸ Anhein wíchiga fe anihein lan somu luriban igaburi, kéiburi wasaminarun wawounguounrügü, tidan wanigi, amuriaha wamá luma Heowá lun laranseruni ligaburi wasaminan luma le wasandirubei, ani áfaagua wamá lun wíchugun uéiriguni lun, mama lun wíchugun uéiriguni wóuniwagua (Sal. 86:11). Gayarati wáfaagun lun wagunfulirun lau somu katei le madügünbei lun wachawahani haritagun gürigia. Kei hénpulu, gayarati wáfaagun lun warufudun aban lídangiñe igaburi le lani sífiri sandu le güreweibei woun lun warufuduni. O anhein aranse wabéi buidu lun wagunfulirun lau somu fánreinti ligibuagu plataforma ani masudininti warihini warumadahanu Luban Wadamuridagun, gayarati wáfaagun lun wafalaruni adundehani le lídanbei Rómana 12:16 (aliiha huméi).

19. Ka gayarabei wadügüni lun mábürühan lan warüna dan le waríagun woungua tidan Lererun Bungiu, to ítaraboun kei isubusei?

¹⁹ Dan le waríagun woungua tidan isubusei to lánina Lererun Bungiu ani aba wadarirun somu charati —kéiburi wasaminarun wawounguounrügü—, háfuga gayarabei wírudun. Anhein asusereda le, samina wamá luagu gürigia le lídanbei lani Santiagu hénpulu le buídubei lidin lun. Míridun lumuti Santiagu átiriñein lan dan lau aransehei turóbuli le larihibei, mariñagun lumuti giñe anhein aranse lubalin súngubei. Le lariñagubei hechu lan gürigia ligía aturiahoun Lererun Heowá (Sant. 1:25). Haritagua lumuti le larihibei tidan isubusei ani áfaaguati lun labuiduragüdüni charati le larihibei. Ka wafurendeirubei? Luagu lunti lan wakipurun aban lubuidun igaburi luma lun waritaguni luagu gafigoun wamá (aliiha huméi Apurichihati 7:20). Sigí wamá aganwoundagüdei wasubudin luagu lilurudun Bungiu ani áfaagua wagíame lun wakipurun aban sífiri lánina sákürifisiu. Busenti Heowá líderaguniwa, ítara kei íderagua laaña lan saragu wíbirigu. Íbini gafigoun hamá, biní lumutiña saragu.