1-3. a) Ka burí turóbuli luáguti seinsu hasufurirubei saragu familia uguñe weyu, ani ida liña houchun fiú haransehani? (Ariha huméi dibuhu le lídanbei lagumeseha arütíkulu.) b) Dan le lasaminarun aban úguchili o aban úguchuru háguyun lidoun amu ageiraü, ka gayarabei ladiheridagüdüniña luagu hagüriarún hasaanigu?

 ARIÑAGATU Liliana a: “Súnwandan meha lachülürün Karlos, le nani weiriei, lídangiñe luadigimari lau lanarime lubucha uagu, ani seinsu le lagañeirubei lúnrügüñein wagañeinhani le wemegeirubei kada weyu lóustara. Busentina yebe nawadigimaridun lun nídehan lau murusun seinsu lun wagañeinhan katei burí lun Huan, le wasaani, libe burí le hámabei lánigu paaná leskuelarugu”. Busentu yebe giñe Liliana tíderagun fiú hádangiñe tiduheñu ani areidaha tuguyame lubá ámuñegü. Ñǘdünhaña meha saragu hádangiñe tumadagu lidoun amu fulasu lun hagañeirun seinsu. Gama lumoun, dan le tasaminarunbei tadügüni ligiaméme, wéiriti tasaminaruni. Ka uagu?

² Súfuritu meha Liliana láurügü tasaminarun tígiruniña tufamilian tárigiñegua ani lun múaradunharu lanme hama lidan katei burí le hadügübei lidan heseriwidun lun Bungiu. Luagu amu oubaü, arihatu ñǘdünhaña lan amu diseun ani genegeti añahagua lan haduheñu eseriwida lun Heowá. Gama lumoun, ida luba tagüriaruni Huan dísegiñe? Gayarati san tarufudahan lun ‘kei aubei labusenra Bungiu’ lidan Internet? (Efe. 6:4.)

 ³ Aba desidírü tan tamuriahan ídemuei. Mabusenrunti yebe tani weiriei lun tidin, gama lumoun, ariñagati tun merederun lubóun lan anhein ligía lubéi tabusenrubei tadügün. Ariñagatiña wéiyaaña lidan afiñeni tun lun terederun, ánheinti amu burí würiña íbirigu ariñagatiña tun lun tidin. Aba burí hariñagun tun: “Anhein inarüni lubéi hínsiñe hamá biduheñu bun, bídiba. Lau sun luwuyeri, gayarabei beseriwidun lun Heowá ñeingu bumuti”. Íbini machourun tani anhein buidu lubéi le lunbei tadügüni, aba tíchugun Liliana aban chuti lánina ayouraguni lun Karlos luma lun Huan, aba tidin nadagimein lidoun amu ageiraü. Aba füramase tan houn málüdigiaboun lan.

4. a) Ka uagu houdin saragu gürigia lidoun amu ageiraü? b) Ka burí uma hígiraña hasaanigu?

⁴ Mabusenrunti Heowá lun hawinwandun lubúeingu lidan lanarime gudemei, ani inarüni luagu houdin lan gürigia lidoun amu ageiraü láraninabei gudemei lúmagiñe lidan binadu dan (Sal. 37:25; Ari. 30:8). Lun meha móunwegun hamá liduheñu Hakobu halama, aba lóunahaniña lisaanigu Ehiptu lun hagañeinhan éigini (Agu. 42:1, 2). b Uguñe weyu, hibe-agei gürigia ha desidírübaña houdin lidoun amu fulasu madügün hamuti ladüga hóunweguña lan halama. Gama lumoun, háfuga gibe lan hadúeihan, o busén hamá lun buídutima lan hawinwandun haduheñu. Lun hibihini le hasaminarubei, aba houdin lidoun amu burí fulasu le ñein lubéi gayara lan hagañeirun seinsu le gíbetimati ani aba hadisedun hawéi haduheñu, dandu lidan guánarügü hageira kei lidoun amu ageiraü. Anihein dan aba herederun isaanigu luma aba hádangiñe agübürigu, hama hárugutinu, luma somu haduhe o hama hamadagu. Íbini gari lan houn hígiruniña haduheñu, genegeti houn saragu úati lan amu katei gayarati hadügüni.

5, 6. a) Ka larufudahabei Hesusu luagu ugundani luma ichouruni? b) Según furíei le larufudahabei Hesusu, ka gayarabei wamuriahani luma Heowá? c) Ida liña labiniruniwa Heowá?

⁵ Lidan lidaani Hesusu añahein meha gürigia gudemetiña, ani gayaraati samina hamá saragu lun lan hamuga gibe lan haseinsun gúndaatimabaña lan hamuga ani chouru ligía hamuga hasandiragun houngua (Mar. 14:7). Gama lumoun, mabusenrunti meha Hesusu lun hafiñerun luagu irisini le gásügürati, busenti meha lun hafiñerun luagu Heowá, le úmagiñebei liabin irisini le magumuchaditi. Lidan Serumu luagu Wübü afuranguagüda lumuti lídangiñe lan wamadagua luma Heowá wibihei ugundani luma ichouruni le inarüniti, mama lídangiñe libe wámati o lanarime wawadigimaridun.

⁶ Lidan furíei le larufudahabei, ariñagati san Hesusu lun wamuriahan irisini luma Bungiu? Uá. Arufudahati woun lun wamuriahanu “weigan fein to lánina sagü weyu”, lidan amu dimurei, sun le wemegeirubei lubá kada weyu. Ábati lariñagun furangu: “Móundaragua humá irisini ya ubouagu [...]. Óundaragua humá irisini sielu” (Mat. 6:9, 11, 19, 20). Gayarati wafiñerun labinirubadiwa lan Heowá kei aubei füramase lani woun. Ani dan le labiniruniwa Heowá, mama gúndaarügüti wau, adügati lun wibihini sun le wemegeirubei. Dan le wíchuguni wafiñen luagu Wáguchi le hínsiñehabubei, ligía wadarirun ugundani inarüniti, mama dan le wafiñerun luagu seinsu (aliiha huméi Matéu 6:24, 25, 31-34).

7. a) Ka un líchigei Heowá buligasion lun harufudahan houn hasaanigu? b) Ka uagu buidu lubéi lun ñein hamá agübürigu lidan hagüriarún isaanigu?

⁷ Dan le wáluahani “liricha” Heowá furumiñe, mosu giñe warihini wani buligasion hama waduheñu kei larihini Heowá. Ariñagati meha lilurudun Moisesi houn agübürigu mosu lan harufudahan houn hasaanigu, ani huuti giñe adundehani ligía houn agübürigu kristiánu (aliiha huméi 2 Lúrudu 6:6, 7). Ru laali Heowá buligasion le houn, mama houn árugutinu ni houn amu gürigia. Ariñagati meha urúei Salomón: “Niráü, aganbabéi lererun búguchi, teni buguyame lun tarufudahan  búguchu” (Ari. 1:8). Busenti Heowá lun ñein hamá biángubei agübürigu lun harufudahan houn hasaanigu ani adundeha hamaña (Ari. 31:10, 27, 28). Libe-agei katei le hafurendeirubei isaanigu hámagiñe hagübürigu luagu Heowá furendei hamuti dan le haganbuniña ayanuha luagu ani ariha haméi ida liña lan heseriwidun lun.

8, 9. a) Ka burí asansiruni hasufurirubei iduheñu ha afanreinragutiña? b) Ka burí dañu gayarabei ladügüni afanreinraguni lidan habagari gürigia?

⁸ Lubaragiñe houdin lidoun amu ageiraü, hóuchatiña gürigia hasubudiruni ka burí lan sákürifisiu lunbei hadügüni luma kaba lan resultóu hibiha dan le hadisedun hawéi haduheñu, gama lumoun, fiúrügüñanu asaminarutiña luagun luriban resultóu le gayarabei hibihini (Ari. 22:3). c Lárigiñebei tidin Liliana, dandu tuguya, tani weiriei luma tisaani aba hagumeserun asandirei igarigu le lanügübei hadisedun gürigia hawéi haduheñu. Sun dan lau tisaani álügüdoun: “Ka san uagu bígirana?”. Fiúrügüñein yebe hati tasaminarun tadisedun, ani eibu dan aba lasaliragun hati burí ligía irumume, ani aba tagumeserun ariha lanarime burí asansiruni lidan tufamilian ani nidiherigüda lumutu. Aba adisedeina lan tisaani tuéi. Aba tariñagun lau íruni: “Aba leferidirun ínsiñeni le lasandirubei nuagu”.

⁹ Dan le dise hamá agübürigu hawéi hasaanigu, adügatiña dañu houn dandu lidan ligaburi hasandiragun houngua kei lidan hóuserun. d Eibu hañüraü irahüñü luma lilü hígiruniña hagübürigu, wéiritimati dañu. Aba tafuranguagüdüni Liliana lun tisaani luagu lan tadügei sákürifisiu ligía. Gama lumoun, sanditi tisaani luagu fuírügü tani aba tidin. Furumiñe álugati tuagu, lau lásügürün dan, danha le tidin bisidaña, bereseeru lun. Kei lasuseredun libe-agei dan hama isaanigu ha hígirubaña hagübürigu hárigiñegua, sanditi Huan mama lan mosu gaganbadi lan tun ni lun larufudun ínsiñeni tuagu (aliiha huméi Ariñawagúni 29:15).

10. a) Ka gayarabei lasuseredun ánhaña oucha agübürigu hafayeiruniña hasaanigu lau idewesei? b) Ka heferidirubei iduheñu dan le lawinwandun aban hádangiñe agübürigu dise?

¹⁰ Íbini áluga tan yebe Liliana tadügün lun masandirúniwa lan tidise lau tóunahan idewesei luma seinsu, arihatu luagu dísetimarügü lan tisaani tuéi. Ani arihatu tarufudahaña lan lun luagu súdinitima lan seinsu luma umegeguni sügǘ lau eseriwidúni lun Bungiu hama iduheñu (Ari. 22:6). Ábaha lariñagun Huan tun: “Redeibá ñein, sigí báamuga óunaha ílagu nun”. Aba gunfuranda tani mama lan dǘgüdarügüboun aban budún lúmagiñe le ñein tubéi lun tagüriahani tiráü lidan amu ageiraü o tabürühan lan gárada, o tagúarun lun. Aba tariñagun: “Siñati bóuburuni biráü  ni bíchugun aban chuti lun le lánina buiti guñoun luagu Internet”.

11. a) Ka lánibei adisedaguni efekütu lidan maríei? b) Ida liña gunfuranda tani aban íbiri mosu lan tagiribudun hamoun tiduheñu?

¹¹ Aba giñe manarimeli lan lubuidun tumadagua Liliana luma Heowá. Ábanrügaaliha weyu lidan dimaasu tásügürün hama íbirigu lidan adamuridaguni luma apurichiha ani anihein dan, ni aban weyu. Lídanñein meha giñe peliguru tamarieidun. Mosu meha tanurahan luéi ladarihanu tábuti. Kei le dísegua habéi hawariuagua, aba háluahan umadaguaü hama amu gürigia ani ítagaraü yebe héiguadun lidoun agabarahani. Íbini méiguadun hamá ni aban hádangiñe lidoun agabarahani, gunfuranda tumuti Liliana anhein lan dise habéi hawariuagua siñati hagunfuliruni gumadi le tídanbei Bíbülia lun híchuguni le hemegeirubei hóuniwagua keisi úmarigu. Siñati hayanuhan luagu katei le ñǘbuinbei sódini lidoun hasaminan, háhayachun hámagua o harihin hawouguoun, hárügüdaguni háhabu, aban óuburuni, harufudun ínsiñeni hámagua, ni lun ‘hagunfulirun hámagua keisi gürigia maríeitiña’ (Ure. 1:2; 1 Ko. 7:3, 5). Ani siñati giñe heseriwidun biángubei hagía lun Heowá úara luma hasaani. Ariñagatu Liliana: “Dan le lariñawagunbei lidan aban adamurini mégeiwa lan áhuduraguni lidan familia lun wásügürün lau ibagari lídangiñe luéyuri Heowá, aba gunfuranda nani mosu lan nagiribudun hamoun niduheñu. Mosu meha nagumeserunya aransehei numadagua luma Heowá luma nibagari hama niduheñu”.

12. Ka adundehani tídangiñeti Bíbülia gayarabei lichugún houn ha dísebaña hawéi haduheñu?

¹² Dan le tariñagunbei Liliana tagiribuda lan houn tufamilian, ámuñegueinarügü hariñagun gürigia tun. Ariñagatiña wéiyaaña lidan afiñeni tun buidu lan le desidírü tubéi, lugundun tarufuduña afiñeni luma ganigi. Gama lumoun, añahein amu ha giñe awinwandubaña dise hawéi haduheñu, lubaragiñe hamuga hasigiruni tani hénpulu, ábarüga héredun tuagu lun terederun. Hariñaga tun: “Málübadibu agiribuda ñahoun. Kábagia bibagari yágüta?”. Lubaragiñe hariñagun kristiánugu dimurei libe burí le, lunti yebe “harufudahan houn würiña nibureingiña lun hínsiñe hamá hámarigu houn, hínsiñe harahüñü houn [...] aranseha hagía hábiñe”, óunigiraña hafamilian, lun “ua hamá ni aban adimurehatiña wuriba luagu luganute Bungiu” (aliiha huméi Titu 2:3-5).

13, 14. Ka uagu mégeiwa lubéi afiñeni lun wadügüni lugundan Heowá lubaragiñe wadügüni le habusenrubei waduheñu? Ru humá aban hénpulu.

¹³ Saragu hádangiñe gürigia ha ñǘdünbaña nadagimein lidoun amu ageiraü güríawatiña lau saminaü luagu mosu lan híchuguni échuni luma buligasion hama hagübürigu furumiñe, lubaragiñe furumiñeguarügü katei. Houn kristiánugu ha busenbaña hagundaaragüdüni Heowá, mafalarun hamani échuni kamaniti le ani magunfulirun haméi le hagurabubei haduheñu hámagiñe, harufuduña aban óunwenbu afiñeni.

 ¹⁴ Ariñagatu aban íbiri gíritu Karin: “Dan le nasirua lubéi Don, le wasaani, dandu nuguya kei nani weiriei wawadigimariduña meha bóugudi luéi wageira. Sun liña meha nagumeserun aturiahoun Bíbülia. Sun niduheñu agurabatiña meha nóunahabei lan Don houn nagübürigu lun hagüriaruni lun gayara lan wagañeirun lanwoun waseinsun”. Kei le aba lubéi tariñagun Karin tuguyaba lan agüriarei tisaani, sun tiduheñu, íbini tani weiriei, adügatiña bula tau ani aba hariñagun luagu magúali tan. Aba tariñagun: “Dan ligía, úati gunfuranda nani buidu ka lan uagu wuriba lubéi nóunahani nisaani hamoun nagübürigu luagu fiú irumu, gama lumoun, subudi numuti meha woun lan, wagía agübürigu, líchigei Bungiu buligasion lun wagüriaruni wasaani”. Dan le tadageinadunyabei Karin, aba lafosurunu tani weiriei, le mama gefenti luagu Heowá, lun táguruni irahü ligía. Gama lumoun kei le héregüda taali lubéi tafiñen lau le desidírü tubéi furumiñe, madüraagun tumuti lilurudun Bungiu. Guentó gúndaatiña súngubei ladüga mafanreinragun hamá. Lun hamuga óunaha tani Karin aban hádangiñe tisaanigu lun amu lan gürigia agüriarei, háfuga ámuti hamuga gádantiña.

15, 16. a) Ka lánibei efekütu tuagu aban íbiri taweiridun dise hawéi tagübürigu? b) Ka uagu desidírü tubéi Vicky móunahan tanu tisaani awinwanda tuma túguchu?

¹⁵ Ariñagatu amu íbiri gíritu Vicky: “Nagütü agüriarubadina luagu fiú irumu, ánhounti namulelua hámañoun nagübürigu. Dan le nagiribudunbei hamoun, masandihadina lanarime ínsiñeni hawagu. Líbüretiha tasandiragun namulelua tungua lun tariñaguni le tasandirubei houn luma lun tóuburuniña. Buiti hanaagun houngua. Ánheinti nuguya, díseti nasandiragun nungua hawéi. Íbini lau wéiyaadina lan hénrenguti nun narufuduni le nasandirubei hawagu. Nuguya tau sun namulelua füramase háadiwa houn wóunigirubaña lan danme le haweiyadun. Nuguya nadügübei ladüga ligía lan nánibei buligasion; namulelua tadügübei ladüga ínsiñeni le tasandirubei hawagu.

¹⁶ ”Guenlé busentu núguchu lun nóunahanu nisaani awinwanda tuma, kei meha tadügün nun. Ariñaganaali tun, lau inebesei, madügün nubéi lan. Himei wamuti wagía lan agüriaroun ani arufudaha wagía tun lun línsiñedun Heowá tun. Mabuseruntina nagadeiruni numadagua tuma nisaani luagu ni kata.” Subudi tumuti Vicky lun lan buidu lan lidin tun mosu lan tíchuguni Heowá luma lilurudun furumiñe lubaragiñe táluahan umegeguni o tálugun tagunfuliruni le habusenrubei tiduheñu. Ariñagati Hesusu furangu: “Úati ni aban gayaraati leseriwidun houn bián iyubudirigu [...]. Siñati leseriwidúniwa lun Bungiu luma lun seinsu” (Mat. 6:24; Afu. 23:2).

17, 18. a) Ka gayarabei hadügüni kristiánugu súnwandan? b) Kaba álügüdahani óunabua lidan le aban arütíkulu?

¹⁷ Füramase haali Wáguchi, Heowá, líderagubadiwa lan ibihei katei létima wemegeirubei anhein wíchiga Larúeihan luma liricha lidan furumiñeti lúgaaru lidan wabagari (Mat. 6:33). Ligíati, wagía kristiánugu inarünitiña súnwandan anihein lan amu katei lun wadügüni. Ka lan yebe waturobulinbei súnwandan gayara lan wararamun lun dan le wasigiruni adundehani le tídanbei Bíbülia. Chouru lumuti Heowá woun líderagubadiwa lan lun ‘wáfuridun’ lídangiñe turóbuli (aliiha huméi 1 Korintuna 10:13). Anhein warufuda afiñe wamá luagu lau wamuriahan lichú aau luma ani sigí wameime lugumadin, ‘líderagubadiwa’ (Sal. 37:5, 7). Labinirubei áfaaguni le wadügübei lun weseriwidun lun keisi Wabureme le ábanrügüti. Dan le wíchuguni lidan furumiñeti lúgaaru lidan wabagari, adügati lun buidu lan lidin woun (konpararü huméi luma Agumesehani 39:3).

¹⁸ Ka gayarabei wadügüni lun waransehani damichi anhein díseguañahaadiwa lubéi? Ka gayarabei wadügüni lun wíchuguni hemegeirun waduheñu houn sin wafanreinragun lidoun amu ageiraü? Ida luba wíderagun amu lun mígirun hamaniña haduheñu? Ariha waméi óunabagülei lidan le aban arütíkulu.