Héchutün san afurieida? Gíbetiña gürigia héchutiña afurieida, íbini fiú hádangiñe ha mafiñenbaña anihein lan Bungiu. Ka san uagu hadügei? Según fiú dátosu abudúti Francia, hóugiñe hamidan faransu anihein dan furíeitiña o ráramaguatiña asaminara “lúnrügü hasandiragun houngua buidu”. Ítara kei saragu amu yuropana, madügün hamuti lun hayanuhan luma Bungiu, adüga hamuti lúnrügü hasandiruni “darangilaü le líchugubei” furíei. Luagu amu oubaü, añahein gürigia ha afiñetiña luagu Bungiu, gama lumoun, dánrügüñein le gaturobulin hamá ligíarügüñein hafurieidun lun, ani agurabatiña lun líchuguni le hamuriahabei houn lau lóufudagun (Isaíasi 26:16).

Agia huguya? Ariha humuti san furíei kéirügü aban katei le ídehabei lun híchuguni hisaminan lidan lilugaarun? Anhein afiñe hubéi luagu Bungiu, ariha humuti san ounabúa lan hafurieidun, o genegeti hun luagu mounabúniwa humá? Tíderagubadün Bíbülia lun harihini furíei, mama kei aban árani le íderagubadün lun hasandiragun hungua buidu, tíderagubadün lun harihini keisi aban lubuidun igaburi lun hayarafadun lun Bungiu.