Ariñagati Hesusu subudi lani Bungiu ka lan wemegeirubei íbini lubaragiñe wamuriahani luma (Matéu 6:8). Abürühati meha giñe Dawidi, le lurúeite binadu Ísüraeli: “Úagi yebe dimurei tuagu niñeñe, ani subudi baali, Nabureme” (Sálumu 139:4). Ligía gayara lubéi lariñagun somu gürigia: “Anhein subudi lubalin Bungiu sun katei, íbini le lídanbei nisaminan luma katei le nemegeirubei, ka uagu mosu lubéi nafurieidun?”. Lun wóunabuni álügüdahani le, ariha waméi ka lan tariñagubei Bíbülia luagu furíei. a

Íbini ariñaga tan Bíbülia luagu subudi lani Heowá b sun katei, ariñagatu giñe úati lan buídurügü lan lun lasubudirun ariñahani le úati súdini lan hawagu lubúeingu (Sálumu 139:6; Rómana 11:33). Mítaranti lisaminan kei aban máhina to lafansehagüle dimurei, to ayusurúboun lúnrügü lareidahóun somu dátosu. Bereseti Bungiu íbini lau lilulin-agei wasaminan, lugundun busenti aban umadaguaü buiti wama (Sálumu 139:23, 24; Santiagu 4:8). Ligía lariñagunbei Hesusu woun lun wafurieidun íbini subudi lani Heowá ka lan wemegeirubei (Matéu 6:6-8). Eibu wéchudun ayanuha luma Wabungiute le adügübaliwa luagu le wasaminarubei, buídutimabei wamadagua luma.

Háfuga aniheinbei dan ibidiñe lan woun kaba lan wamuriaha luma Bungiu. O ibidiñe lan woun ida luba lan wariñaguni lun ka lan wasandirubei. Dan le lasuseredun ítara, gayarabei larihini le wasandirubei ani yúsuleime lanarime lichú lau lun gunfuranda lani ka lan wemegeirubei (Rómana 8:26, 27; Éfesuna 3:20). Danti le wíchugun fe luagu adügaali lan Bungiu somu katei lidan wabagari, ábatima yarafa wamá lun.

Ariñagatu Bíbülia lau ichouruni luagu óunaba lániña Bungiu suntigabafu lubúeingu ha úaraguabaña, ani afuranguagüda tumuti giñe ka lan uagu móunabun lubalin sun afurieiduni. Kei hénpulu, lidan meha aban dan le ídanbei weiri lan anarimeni lidan binadu Ísüraeli, ruti Bungiu gumadi lun profeta Isaíasi lun lariñagun houn ísüraelina: “Íbini hafurieidun saragu, maganbun numutün. Dáseihali húhabu lau hitaü” (Isaíasi 1:15). Kei aubei warihei, ha maganbadibaña lun lilurudun Bungiu o ha afurieidubaña luagu katei le mabuidunti moun lumuti hagurabun laganbubaña lan (Ariñawagúni 28:9; Santiagu 4:3).

Luagu amu oubaü, ariñagatu Bíbülia: “Subudi wamuti luagu ánhawa lan amuriaha furumiñeguarügü katei keisi lugundan, laganbubadiwa lan” (1 Huan 5:14). Mini lan san le ítara lan kei hamuriahan lubúeingu Bungiu furumiñeguarügü katei luma aba lan líchuguni houn? Mama sun dan. Ayanuha wamá luagu apostolu Pábulu, amuriahati apostolu le luma Bungiu ǘrüwa wéiyaasu lun  lagidaruni lisandi le ítarabei kamá ‘hiiyu charuñu luagu’ (2 Korintuna 12:7, 8). Háfuga aban meha lisandi agu le máraninati luágubei. Ma meha funa lirun lasandiragun lungua lugundun ibihati meha ubafu lun lagaranihan, íbini lun lásaaragüdün aban hilaali, ani siñati meha lagaranihan lúniwagua! (Adügaü 19:11, 12; 20:9, 10.) Ani íbini mibihin lani óunabagülei le lagurabubei, resibi lumuti lídehan Bungiu lau geteingiradi (2 Korintuna 12:9, 10).

Inarüni añahein lan meha gürigia lidan tidaani Bíbülia óunaba lumuti Bungiu hafurieidun lau somu milaguru (2 Urúeigu 20:1-7). Ani íbini lidan dan ligía hénrenguti meha lasuseredun katei libe le. Anihein meha dan genegeti maganbun lani Bungiu hafurieidun lubúeingu, ani adügati meha katei ligía lun hiru hamá. Ariñagati meha urúei Dawidi lau íruni: “Nabureme, ídaba san lásura babulieidunina? Babulieidaadina san lun súnwandan?” (Sálumu 13:1). Gama lumoun, dan le líchugunbei Dawidi fe luagu íderagua laali lan Heowá saragu wéiyaasu, aba laganwoundun lafiñen luagu. Darí lun lariñagun lídanmeme furíei ligía: “Hemenigitina luagu bínsiñehabu” (Sálumu 13:5). Ítara kei ligía, uguñe weyu háfuga mosu hafurieidun lubúeingu Bungiu saragu wéiyaasu lubá heresibiruni le hamuriahabei (Rómana 12:12).

Ru lumuti létima wemegeirubei woun.

Mama ladüga hínsiñe hamá lisaanigu aban úguchili lun lun líchugubei lan le hamuriahabei houn dan le hamuriahani luma. Ítarameme, mama súnwandan lun lóunabubei lan Bungiu wafurieidun ítara kei wabusenruni dan le wabusenrun. Ani íbini ítara, gayarati wachoururuni ítara liña lan kei aban úguchili le hínsiñehabuti le íchugubalin hemegeirun lisaanigu houn lidan dan (Lúkasi 11:11-13).

Gayaraati ua lan furangu lan ligaburi lóunabuniwa.

Ánheinti busén wabéi awalidaguni lídangiñe somu turóbuli? Lunti san wasaminarun kei lan machülügili lubéi aban milaguru lun líchuguni awalidaguni ligía woun, móunabun lagidiwa lan Heowá? Uá, lunti warihini anhein óunaba láadiwa lubéi lidan somu manera le úati furangu lan. Háfuga íderagua láadiwa somu wamada (Ariñawagúni 17:17). Gayarati san Heowá lan ínchahabalin lun líderaguniwa? Gayarati giñe liabin lóunabagüle wafurieidun tidan Bíbülia. Háfuga tidan wadarirei lichú aau le wemegeirubei lun wararamun lun turóbuli ligía (2 Timotéu 3:16, 17).

Lubaragiñe laransehani Heowá sun haturóbulin lubúeingu, anihein dan rúrügüti erei houn lun hararamun lun (2 Korintuna 4:7). Luagu aban dan, ayumuraguati Hesusu lun Lúguchi lun lasagaruni lídangiñe aban lénrengunga, lugundun hanufudeti meha lachararun lun. Óunaba lumuti Heowá lau lóunahan aban ánheli lun líchugun erei lun (Lúkasi 22:42, 43). Ítarameme, gayarati layusurun Bungiu somu hádangiñe wamadagu lun híchugun dimurei lánina gurasu woun dan le megei wamani (Ariñawagúni 12:25). Úati furangu lan óunabagülei burí le, ligía lunti lubéi agagudúañu wamá lun gayara lan warihini.

Aniheinbei dan mosu lan wagurabahan lau lidaani Heowá.

Chouru tumuti Bíbülia woun luagu óunaba lani Bungiu suntigabafu hafurieidun gürigia ha ǘnabugubaña lidan dan (1 Féduru 5:6). Ligíati, anhein genege lubéi luagu darasa lan lóunabuni wayumuragun, moun lumuti wasaminarun meberesen lan wau. Lubaragiñe lira, kei le iñu lubéi lubara ani subudi lumuti le buídutimabei woun, gayarati larihini buidu anhein megei wabalin le wamuriahabei.

Samina humá san gasaani humá aban irahü le ñǘraügili ani aba lamuriahan aban beiki huma. Hagañeinhañoun hamuga san lun ouraméme ligía? Anhein ariha hubalin luagu siñaguagili lan lungua lun labugahanu, háfuga magañeinhan humanu lun lidan oura ligía. Háfuga hagurabahaba darí hachoururuni mabuleseirunbei lan tau. Ítarameme, anhein buidu lubéi katei le wamuriahabei luma Bungiu ani mígirun wamuti wafurieidun luagu, gayarabei líchuguni Bungiu woun lidan dan le buídutimabei (Sálumu 37:4).

Ariñagatu Bíbülia houn kristiánugu lun meferidirun hamani hafiñen luagu lubafu furíei. Gayarati lariñagun somu gürigia: “Ménrengunti bariñaguni le, mama badügüni”. Inarüni, gayarati hénrengu lan woun wagurabahan lun lóunabuniwa Bungiu anhein barühadiwa lubéi saragu dan asufurira ladüga somu turóbuli o somu marichaü. Ani íbini ítara, lunti waritaguni le lariñagubei Hesusu lun lan mabuchadun lan wawagu afurieida.

Yusu lumuti Hesusu hénpulu tani aban würi hilaali túmari to ayumuraguboun saragu wéiyaasu lun aban aguseragüdüti marichati lun líderagunu (Lúkasi 18:1-3). Íbini mabusenrun lan aguseragüdüti ligía líderagunu furumiñe, lagumuhóun oura aba lasaminarun: “Kei anuhaméme lan würi to ásüdagüdei nichügü, níchigaali tiricha tun, hebé láamuga tiabin” (Lúkasi 18:4, 5). Anhein íderagua lubalun aban aguseragüdüti aban würi hilaali túmari ani gudemetu lun lakipuruni lubuidun liri, aransetimati Wabungiute le hínsiñehabubei lun líderaguniña ha ayumuragubaña lun “áriebu, wéyuagu”. Kei lariñaguni Hesusu, ‘líchugubei Bungiu haricha houn ani madarasahanbei’ (Lúkasi 18:6-8).

Íbini anihein lan dan labuchadun wawagu amuriaha ídemuei luma Bungiu, moun lumuti wígiruni wafurieidun. Ánhawa asigira afurieida, warufudubei lun luagu busén wamá lun lóunabuniwa. Ani wafurendeiruba giñe arihei ligaburi líchuguni Heowá le wamuriahabei woun, ani ladügüba le lun yarafatima wamá lun. Le linarün katei, ánhawa afurieida kei labusenrun Heowá ani adüga wameime lau afiñeni, gayarati wachoururuni luagu lóunabubadiwa lan (Lúkasi 11:9).