1, 2. Ida liña amu lubéi lagu Heowá tuéi kámara burí to adirarubalin hamufurun gürigia?

 LIDAN saragu ageiraü rúatu kámara ǘmadarugu lun lechekürǘn téibaagun karü ǘmadarugu luma lun harihini furumiñeguarügü danaguaü le asusereduti. Dan le lanurahan aban abugahati lárigiñe labuguchun luagu aban gürigia tau karü, ídehatu iyawaü burí tuguya lun hadariruni súdara gürigia le gadurunbei lun ladaürǘn. Tau aban kámara lidan kada legeyedun üma, güreweibei hanurahan gürigia luéi hadurun.

² Genegeguatu san kámara burí tuguya luma lagu Heowá, Wáguchi le hínsiñehabubei? Ariñagatu Bíbülia “aríagu liña [lan] houn sun gürigia” (Ari. 15:3). Mini lan san le leteniruña lan lun sun le wadügübei sun oura? Aríagua lumutiwa san lúnrügü ladügün lun wagunfuliruni sun lilurudun luma lun labeichuniwa dan le wachararun? (Her. 16:17; Ebü. 4:13.) Uá! Téniti Heowá woun ladüga hínsiñe wamá lun ani busenti lun buidu lan lidin woun (1 Fe. 3:12).

3. Ka seingü igaburi ídanbei larufudei Heowá hínsiñe wamá lun?

³ Ida liña wasubudiruni teni lan Heowá woun ladüga wínsiñe lun? Ariha wamá seingü igaburi le ídanbei letenira woun: 1) wisá lumutiwa lubaragiñe wadügün somu katei wuribati, 2) arufudahati woun dan le wachararun, 3) adundeha lumutiwa lau lúrudu  le tídanbei Bíbülia, 4) íderagua lumutiwa dan le wagagibudagun luma óuchawaguni ani 5) ruti wafayeiruaha dan le wadügüni le buídubei.

4. Ka lébunabei leweridiruni Heowá Kaín lubaragiñe lafigouhan?

⁴ Furumiñe, ariha waméi ida liña lan lawisaruniwa Bungiu dan le larihin wéiguada lan lidoun figóu (1 Kro. 28:9). Lun gunfuranda wamani ligaburi letenirun Heowá woun, ariha waméi likesin Kaín, ‘le agañidubei saragu’ dan le lamahadunbei Heowá lun (aliiha huméi Agumesehani 4:3-7). Ka ladügübei Heowá? Ínchaha lumuti meha Heowá Kaín lun “[l]adügüni le buídubei”. Wéridi lumuti luagu anhein lan madügün lan, lafigounhaba lan. Ítara liña kamá hamuga anihein figóu aramudagu ‘agurabaha’ lun lárügüdüni Kaín. Ábati lariñagun Heowá lun: “Gayaraati buguya lan agumadirei [figóu]”. Busenti meha Heowá lun gaganbadi lan Kaín lun eweridihani ligía, ani lunya libihini línsiñehabu Bungiu. Ítara luba meha gayara lan lasigirun agundaara lau aban umadaguaü luma Lubungiute.

5. Ida liña lawisaruniwa Heowá dan le larihin wéiguada lan lidoun somu figóu?

⁵ Agia wagía uguñe weyu? Ariha lumuti Heowá íbini katei le tídanbei wanigi; siñati waramudun ni kata luéi. Subudi lumuti kátañadiwa lan, ka lan lébunabei wadügüni katei luma ka lan wamenebei. Hínsiñetiwa lun ani busenti lun wadügüni le buídubei, gama lumoun mafosurun lumutiwa. Ligíati, anhein ariha wadiseduña lan, aba lawisaruniwa tau Lererun. Ida? Gayarati waganbuni leweridihan dan le waliihanu Bíbülia, dan le waliihanu wani agumeiraguagüdüni kristiánu luma giñe dan le wadamuridagun. Aganbañahaadün san o aliihañahaadün somu katei dántima le hemegeiruni? Íderagua lumutün san ariñahani ligía lun háfuridun lídangiñe somu turóbuli le Heowárügüñein asubudirei?

6, 7. a) Ka uagu gayara lubéi wariñagun luagu nidiheri lan Heowá luagun kada aban wádangiñe íbini hounti lan saragu míñunu gürigia leweridihan? b) Ka lunbei wadügüni lun wasagarun buiti lídangiñe letenirun Heowá woun?

⁶ Sun burí eweridihani le arufudati furangu luagu téniti lan Heowá lun kada aban hádangiñe lubúeingu buidu buidu lau ínsiñeni. Ínarüni lúmagiñe lan saragu dan anuheinharu lan Bíbülia, ani adügǘwatu wani agumeiraguagüdüni houn saragu míñunu gürigia ani adundehani le ichugúbei lidan wadamuridagun hounti sun íbirigu lidan damuriguaü. Gama lumoun, lidan kada kesi, súnwandan lamuriahan Heowá luma kada aban wádangiñe lun gaganbadi wamá lun eweridihani le tídanbei Lererun lun gayara lan buídutima lan wóuserun. Arufudati le luagu samina lan luagun kada aban wádangiñe.

⁷ Lun wasagarun buiti lídangiñe leweridihan Heowá, furumiñe mosu gunfuranda wamani luagu hínsiñe wamá lun. Lárigiñe ábame wadügün gasu lau le lamuriahabei wámagiñe tidan Lererun ani áfaagua wagíame lun wasagaruni sun saminaü le mínsiñebei lun lídangiñe wasaminan (aliiha huméi Isaíasi 55:6, 7). Ánhawa gaganbadi, wesefuruba luéi saragu idiheri. Gama lumoun samina wamá charadiwa lan. Ida liña líderaguniwa Wáguchi le hínsiñehabubei?

8, 9. Ida liña larufuduni adundehani le weresibirubei hámagiñe amu kristiánugu luagu berese lan Heowá wau? Ru humá aban hénpulu.

⁸ Dan le leweridiruniwa Heowá, rútiwa fe luagu berese lan wau saragu (aliiha huméi Ebüréu 12:5, 6). Inarüni mínsiñe lan houn gürigia heweridirúniwa (Ebü. 12:11). Gama lumoun, samina wamá san luagu gürigia le eweridihabaliwa o le adundehabaliwa. Ka ínchahabalin lun ladügüni? Nidiherirügü liña wawagu, ani kei le ariha lani luagu lídanñein lan peliguru wamadagua luma Heowá, yusu lumuti lidaani lun larufuduni woun tau Bíbülia ida luba lan wagiribudun lidoun üma  le buídubei. Eweridihani ligía, aban seini luagu hínsiñe wamá lun Heowá. Lugundun ligía Lébunabei eweridihani ligía.

⁹ Ariha wamá aban hénpulu luagu gayarati lan larufuduni eweridihani le weresibirubei hámagiñe amu berese lan Heowá wau. Héchuti meha aban íbiri aríagua iyawaü luma bidéu lánina agamariduni lubaragiñe lasubudiruni inarüni. Íbini aba lan lígiruni luriban échuni ligía, sigiti ayumahani ligía tidan lanigi, ítara kei eñeguraü lárigiñe lagumuchagun watu. Aban weyu, aba lagañeihan aban gágamuru iseri ani ábaya ladurangun watu ligía (Sant. 1:14, 15). Lau ligagamurun ábaha laríagun katei wíyeti lidan Internet. Aban weyu, dan le lídanñein lan apurichihani luagu gágamuru, aba lafuredeiruni ligagamurun lun aban wéiyaali lidan afiñeni lun láluahani halía lan heredera fiú gürigia. Sódini, aba táfuachun iyawaü lánina agamariduni lidan gágamuru. Buiti meha lun lasuseredun katei le, lugundun aba laweridiruni wéiyaali lidan afiñeni íbiri ligía. Ani seremei eweridihani ligía, aba lígiruni íbiri luriban échuni ligía sunsuinagubei. Seremei wamuti Bungiu luagu leberesedun wau, lau larihini wafigoun le aramudaguati luma luagu leweridiruniwa lubaragiñe laweiridaguntima katei!

10, 11. a) Ida liña wígirun lun ladundehaniwa Heowá? b) Ida liña hachoururuni aban familia buídutima lan lasigirúniwa adundehani le tídanbei Bíbülia?

¹⁰ Eremuhati abürühati sálumu: “Alidiha báadina lau barufudahan nun” (Sal. 73:24). Sagü wabusenrun lun wadundehóuniwa, gayarati ‘waritagun luagu le lasaminarubei Heowá’ lau waturiahanu Lererun. Wasigiruni adundehani le tídanbei Bíbülia héregüda lumuti wafiñen, ani íderagua lumutiwa giñe lun wibihini le wemegeirubei, kéiburi éigini tuma daüguaü (Ari. 3:6).

¹¹ Arihúati ida liña lan lóunigiruniwa Heowá lidan le asuseredubei lun aban íbiri le nadagimeinbalin múa, Masbate (Filipinas) meha lawinwanda tuma lani weiriou hama sun liduheñu. Biángubei hagía seriwitiña meha kei prekursorugu ha adügübaña 70 oura lidan apurichihani luagu hati. Aban weyu, aba lariñagun labureme fulasu le hakilahabei lun hábunagun houn mosu lan houdin ñéingiñe. Ka uagu? Aban lariñagun somu gürigia luagu híweru hamá. Íbini nidiheri lan íbiri ladüga ibidiñe lan lun haliñounba lan lidin hau liduheñu, aba lariñagun: “Leteniruba Heowá woun. Meberesenga kaba lan asusereda, lóunigirubadiwa súnwandan”. Ani ligía asuseredubei. Fiú weyu lárigiñe, aba  lariñagun labureme fulasu houn gayara lan herederun. Ka meha adügübei lun lasansirun lisaminan? Ariha lumuti darangilu haña lan íbirigu ha íbini lichugúña lan hadurun ani óuseratiña lau inebesei. Wéiritu lanigi darí lun aba lan líchugun lanwoun múa houn lun hábunagun (aliiha huméi 1 Féduru 2:12). Furanguti luagu adundeha lániwa Heowá tau Lererun lun gayara lan wararamun lun lénrengunga le lánina ibagari.

12, 13. Ka burí katei gayarabei ladügün lun wálügüdagun woungua anhein leteniruña lubéi Heowá lun le asuseredubei woun?

¹² Anihein dan durá lan lénrengunga saragu. Háfuga lǘhadiwa áfaagua kóntüra somu sandi, o awandei hebedaagun waduheñu lun inarüni o lǘhadiwa lan asufurira éibaahouni. Ánheinti gaturóbulin wabéi luma somu íbiri lidan damuriguaü ladüga amu lan ligaburi wawéi?

¹³ Samina humá lun hamuga lariñagun aban íbiri somu katei le hǘrüti laganbún. Háfuga hasaminarun: “Moun lumuti yebetia lasuseredun le tidan lóundarun Bungiu!”. Ani ligibuagun lira, arihatün luagu libihiña lan íbiri le amu burí buligasion lidan damuriguaü, ani arihatün giñe buidu lan hayanuhan amu luagu. Lau tueirin anigi, aba hálügüdagun hungua: “Ida liña san le? Marihin lumuti san Heowá le asuseredubei? Madügünbei funa san ni kata?” (Sal. 13:1, 2; Abak. 1:2, 3).

14. Ka resun gayarabei gani lani Heowá lun madüragun lani lasuseredun somu katei woun?

¹⁴ Díseti larihin Heowá wawéi, ani gayarati weiri lan lani resun lun madügün lan ni kata lidan somu kesi. Kéiburi dan le weweridirúniwa, háfuga wagañidun o míchugun wamá fe luagu wéiritima lan wachara. Gama lumoun, ariha lumuti Heowá luagu megei wamá weweridirúniwa. Karl Klein, aban íbiri lídangiñeti sétanu le arihibei lau hawadigimari gefentiña luagu Heowá lidan sun ubóu, dan le labahüdagunbei luagu libagari ariñagati mosu lan meha ladeinhan íbiri Rutherford lun. Murusun dan lárigiñe, aba ladunragun íbiri Rutherford luma aba lariñagun lun “Ida biña, Karl!”, ítagaraü yebe móunabun lani. Dan le larihin luagu anihein lan igarigu tidan lanigi Karl, aba lariñagun lun lun lóunigiragun lungua lun méiguadun lan lúhaburugun Mafia. Dan lárigiñe, abürühati íbiri Klein: “Dan le wagañidun luma aban íbiri ladüga lariñagun somu katei woun lun lagunfulirun lau luadigimari, wíchuguña chansi lun wéiguadun tidoun lisadaran Mafia”. a

15. Ka uagu moun lumuti lubéi weferidiruni waguraasun dan le wásügürün lídangiñe lénrengunga?

¹⁵ Kamaniti aba lan burí weferidiruni waguraasun dan le warihin aban sügǘ hénrengunti le genegeti magumuchadibei lan. Ka gayarabei líderagunün awanda? Samina humá habugahaña lan lidan aban üma, aba lásiñarun hawanserun ladüga anuhein lan saragu karü hürügü. Ibidiñeti hun átiribei lan dan hagurabahan lubá gayara lan hawanserun. Anhein heferidira higuraasun ani aba háluahan amu üma, gayarabei heferidirun, ani ábame tárütima lan hachülürün ñeinhein lubéi habusenra. Libe-agei dan, buítimati gaguraasun humá ani megeyedun huguyame lidoun amu üma. Ítarameme, ánhadün eredera lidan üma le tarufudahabei Lererun Bungiu hun, líderagubadün lun hawandun darí lagumuhóun.

16. Ka amu resun uágubei gayara lan lígirun Heowá lun lasuseredun somu katei?

¹⁶ Gayarati lígirun Heowá lun lasuseredun katei lun larufudahan woun (aliiha huméi 1 Féduru 5:6-10). Gama lumoun haritagua waméi maweiyasun lan Heowá íchiga óuchawaguni lidan wémeri (Sant. 1:13). Mafia, ‘le wágani’ ligía gadurunbei luagu libe-agei waturóbulin. Gama lumoun, gayarati layusuruni Heowá turóbuli ligía lun  líderaguniwa lun wawanserun lidan wafiñen. Ariha lumuti wasufurirun, ani kei le hínsiñe wabéi lun, lígiruba lun lasuseredun “luagu murusun dan”. Seremei humuti san Heowá ladüga letenirun hun lau ínsiñeni lidan lidaani lénrengunga? Afiñetün san líderagubadün lan lun háfuridun lídangiñe turóbuli? (2 Ko. 4:7-9.)

17. Kátaña san láluahabaña Heowá, ani ka uagu?

¹⁷ Lagumuhóun, aríagu liña Heowá houn gürigia luagu aban resun le íchuguti dǘgüdaguaü: busenti líchuguni hafayeiruaha ha hínsiñehabubaña lun. Aba lariñagun profeta Ananí lun urúei Asá: “Aríagu liña Wabungiute lun sun le asuseredubei lidan sun ubóu, lun líchugun erei houn ha hemenigibaña luagu le tímatimaati” (2 Kro. 16:9). Makipurunti Asá úaraguni lun Heowá. Ánheinti wagía, ánhawa áfaagua lun wadügüni le buídubei, ‘líchuguba Heowá erei woun’, lidan amu dimurei, líderagubadiwa ani líchuguba wafayeiruaha.

18. Dan le genege lan woun luagu ua lan arihiti katei buiti le wadügübei, ka lunbei waritaguni luagu Heowá? (Ariha huméi dibuhu le lídanbei lagumeseha arütíkulu.)

¹⁸ Lun labiniruniña, busenti Heowá lun ‘háluahani lúbúeingu le buídubei, mama le wuribabei’, busenti giñe lun ‘hadügüni le buídubei’ (Amos. 5:14, 15; 1 Fe. 3:11, 12). Téniti houn ha richaguabaña ani biní lumutiña (Sal. 34:15). Kei hénpulu, samina wamá luagun ligaburi lóuserunun Sifürá tuma Puá, bián ágüdahatiña ebüréuna. Dan le meha idamuni habéi ísüraelina Ehiptu, ruti faraón gumadi lun háfarawagun sun wügüriña irahüñü ebüréuna ha águrahoutiña, gama lumoun, wéiritimati meha lineben Bungiu houn würiña hagía sügǘ lau hanufude luéi faraón, aba lubéi hesefuruni habagari irahüñü hagía. Téniti meha Heowá lun le hadügübei ani aba labiniruniña hau isaanigu. Ariñagati abahüdaguni luagu aban lan “líderaguniña lau lagibedaguagüdüniña harahüñü” (Afu. 1:15-17, 20, 21). Íbini samina wamá meteni hamá amu lun katei buiti le wadügübei, haritagua waméi aríagu liña lan Heowá lun sun le asuseredubei ani luagu labinirubadiwa lan giñe luagu katei buiti le wadügübei (Mat. 6:4, 6; 1 Tim. 5:25; Ebü. 6:10).

19. Ida liña tachoururuni aban íbiri húngara luagu aríagu liña lan Heowá lun katei buiti le wadügübei?

¹⁹ Ariha tumuti aban íbiri to awinwanduboun Austria inarüni lan luagu aríagu liña lan Heowá lun sun katei buiti le wadügübei. Kei le húngaro lubéi tererunbei, aba lariñawagun tun halía lan taganawa aban gürigia to adimurehaboun húngaro lun tidin apurichiha tun. Ñǘdüntu lau lóufudagun, gama lumoun, madaritu gürigia múnada. Giributu saragu wéiyaasu, ani ígiratu agumeiraguagüdüni, gárada burí, luma linumerun tigagamurun. Anihein meha dan genege lan tun añahein lan gürigia múnada, íbini móunabun hamanun ni aban. Aban irumu dimí lárigiñe, aba tadarirun somu gürigia ñein. Aban würi buiti tigaburi aba tebelaagüdünu, ani aba tariñagun tun: “Aliiha naaru sun to bígiruboun nun, ani nagurabahañadibu”. Sándiñahañoun meha würi tuguya, tibihiña meha árani lun kánserü ani mabuidunti meha tasandiragun tungua lun teresibirun bisida. Ani guentó, ánhatu lun aban aturiahani tídangiñeti Bíbülia. Kei le aubei warihei, biní lumutu Heowá íbiri to ladüga mabuchadun lan tuagu.

20. Ida liña wasandiragun woungua lau wasubudiruni aríagu liña lan Heowá woun?

²⁰ Ariha lumuti Heowá sun le wadügübei. Gama lumoun, moun lumuti wasaminarun luagu ítara liña lan lagu Heowá kei aban kámara to adiraahabalin sun wachara ani areidatéi. Lubaragiñe lira, aríaaha lumutiwa ladüga berese lan lau kada aban wádangiñe ani busenti líchugun wafayeiruaha luagu katei buiti le wadügübei. Ma adügati wasubudiruni katei le lun yarafatima wamá lun Wáguchi le hínsiñehabubei?