Antonio: Ida biña, Luis, gúndaatina narihinibu!

Luis: Gúndaatina giñe narihinibu.

Antonio: Barǘ numutu tagumuhóun garüdia to áfuriduboun bun, Garüdia Atalaya tuma ¡Despertad! Chouru numuti hínsiñebei lan tema burí le tídanbei bun.

Luis: Seremei. Gúndaatina lau biabin uguñe lugundun busentina nálügüdünibu luagu aban katei.

Antonio: Maribanti.

Luis: Tugurabuga nayanuhaña luma aban nani paaná lidan wadagimanu ani aba nariñagun lun luagu buidu burí tan hani garüdia. Gama lumoun, aba lóunabunina moun lumuti lan naliihanu ladüga mafiñen hamá gefentiña luagu Heowá luagu Hesusu. Aba nariñagun lun luagu nálügüdübadibu lan danme le narihinibu. Inarüni san mafiñen humá luagu Hesusu?

Antonio: Seremei luagu bálügüdünina. Lugundun lun wasubudiruni ka lan lafiñenbei aban gürigia, buítimati lun ligía lan wálügüda, adián?

Luis: Aayé, binarün.

Antonio: Wagía gefentiña luagu Heowá afiñetiwa luagu Hesusu. Afiñetiwa giñe siñati lan wasalbarun anhein mafiñen wabéi luagu.

Luis: Subudigubei numuti, gama lumoun, kei le aba lubéi lariñagun nani paaná nun luagu mafiñen humá, ligía nálügüdünbadibu. Keiti le mayanuhangidiwa lubéi luagu katei le...

Antonio: Gunfuranda numutibu. Hínsiñeti hamuga nun narufudun fiú bérusu tídangiñeti Bíbülia bun le afuranguagüdübalin ka lan uagu súdini lubéi wafiñerun luagu Hesusu. Yusu wamuti bérusu burí le saragu dan le wapurichihan houn gürigia.

Luis: Buiti.

Antonio: Gumese wamá lau dimurei burí le lariñagubei Hesusu houn lani disipulugu. Darí wamuti lidan Huan 14:6: “Au ǘmabei, au inarüni, au ibagari. Ani úati achülürüti lumoun Bungiu Úguchili anhein mama lubéi nuéigiñe”. Según bérusu le, ida luba gayara lan wayarafadun lun Úguchili?

Luis: Mosu wafiñerun luagu Hesusu.

Antonio: Ítara liña. Ani ligía wafiñenbei wagía gefentiña luagu Heowá. Busentina nadügün aban álügüdahani bun. Según le furendei báalibei tídangiñe Bíbülia, kaba idan iri wafurieida.

Luis: Ma lidan liri Hesusu?

Antonio: Ítara liña. Sun furíei le nadügübei, lidan liri Hesusu nadügei. Ani ítara liña giñe hadügüni sun gefentiña luagu Heowá.

Luis: Súdiniti katei le.

Antonio: Ariha waméi guentó le lariñagubei Huan 3:16. Gayarati wariñagun ladimurehaña lan bérusu le luagu libagari luma luagu lani Hesusu  ministeriu ya ubouagu. Darí lun wawa lan lun bérusu le liraüraü Ewahéliu. Súdiniti lubeiti bérusu le! Hínsiñeti hamuga bun baliihani?

Luis: Anha. “Aba lasigirun Hesusu ariñaga: ‘Ladüga wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi”.

Antonio: Seremei. Aliihañaha baali san bérusu le?

Luis: Anha, aganbañaha naali tidan niligilisin.

Antonio: Subudiwati bérusu le saragu. Akutiha waméi buidu. Ariñagati Hesusu seremei lan línsiñehabu Bungiu gayarabei lubéi wibihin ibagari magumuchaditi, gama lumoun, ka wemegeirubei?

Luis: Afiñeni.

Antonio: Binarün, ani mosu wafiñerun luagu Hesukrístu, Liráü Bungiu le ábanrügüti. Ani saminaü le, luagu megei wamá wafiñerun luagu Hesusu lun wibihin ibagari magumuchaditi, dariwati lidan páhina 2 tidan Garüdia Atalaya to níchuguboun bun. Ariñawagúati ñein luagu adügǘwatu lan garüdia to lun hafiñerun gürigia luagu Lurúeite Larúeihan Bungiu, Hesukrístu, “le óunwebei lun gayara lan wibihin ibagari magumuchaditi”.

Luis: Ann, binarün. Íbini hani garüdia ariñagatu luagu afiñe humá luagu Hesusu!

Antonio: Anha.

Luis: Kati uagu hariñaga gürigia amu katei?

Antonio: Afiñetina ladüga lan fiú resun. Háfuga ladüga hafiñerun luagu le ariñawagúbei houn. O háfuga ligía lan ariñawagúbei houn tidan haligilisin.

Luis: Mama san ladüga laguarúniwa hun gefentiña luagu Heowá lubaragiñe hamuga laguarún hun gefentiña luagu Hesusu?

Antonio: Anha, háfuga.

Luis: Kati uagu hayanuha saragu luagu Heowá?

Antonio: Ladüga Heowá lan líribei Bungiu, ani afiñetiwa mosu lan wayusuruni. Íbini Hesusu yusu lumuti. Arihabei le lariñagubei lun Lúguchi dan le lafurieidunbei lun. Gayarati baliihani Huan 12:28?

Luis: Anha. “Núguchi, rualá uéiriguni lun biri nídangiñe. Ábati laganbúniwa lariñagun aban umalali siélugiñe: ‘Rúaali uéiriguni lun niri bídangiñe, ani lichugúayaba.’”

Antonio: Seremei. Ariha bumuti san luagu súdini lan meha liri Bungiu lun Hesusu? Kati uagu súdini lubéi giñe lun hasubudiruni gürigia liri Bungiu?

Luis: E... Ibidiñeti nun.

Antonio: Máhüchürabá, aliiha wamá aban bérusu le afuranguagüdübalin, Adügaü 2:21. Ariñagati: “Ani sunme ha agúaruti liri Bungiu, hasalbaruba”. Kei le aubei warihei, lun wibihini asalbaruni mosu wagúaruni, o wayusuruni, liri Bungiu. Chóuruti subudi lani meha Hesusu katei le.

Luis: Anha.

Antonio: Ligía súdini lubéi meha lun Hesusu lun hasubudiruni lani disipulugu liri Lúguchi ani yusu hameime: lugundun súdiniti lun libihíniwa asalbaruni. Ligía giñe wayanuhanbei luagu liri Heowá saragu keisi lánigu Gefentiña. Busentiwa hasubudiruni gürigia iri le ani yusu hameime.

Luis: Gama lumoun, subudi hamuti gürigia ka lan Búngiubei íbini ibidiñe lan liri houn o mayusurun hamani.

Antonio: Háfuga, gama lumoun, subudigüda lumuti Bungiu liri woun lun ménrengun lan woun wayarafadun lun.

Luis: Ida? Úati gunfuranda nani.

 Antonio: Saminabá san: hibe-agei gürigia subuditi woun anihein lan meha aban wügüri le afanreinragubalin barana Funati ani resibiléi Diisi Gumadi, adián? Subudi wamuti giñe anihein lan meha aban wügüri le adügübarun árüka lun lasalbaruniña liduheñu hama animaalugu. Kaba hamuga asusereda lun hamuga ibidiñe lan hiri woun? Masuseredunbei hamuga ni kata, adián? Masuseredunbei hamuga giñe ni kata lun hamuga masubudirun wamani liri wügüri le ñǘbuinbei siélugiñe lun lounwen luagu wafigoun, adián?

Luis: Binarün.

Antonio: Gama lumoun, adügati Bungiu lun wasubudiruni ka lan híribei: Moisesi, Noé luma Hesusu. Wasubudiruni hiri adügati lun warihiniña keisi gürigia inarünitiña, íbini masubudirun wamaniña.

Luis: Masaminarungidina yebe luagun katei le. Gama lumoun, ítara liña.

Antonio: Ligía wayusurubalin wagía gefentiña luagu Heowá liri saragu: ladüga busentiwa lun hafiñerun gürigia luagu, lun harihini kei aban Bungiu inarüniti, keisi aban umadaü. Gama lumoun, gunfuranda wamuti giñe luagu megei wamani Hesusu lun wasalbarun. Gayarati san narufudun ábanya bérusu bun le achoururagüdübalin saminaü le?

Luis: Anha.

Antonio: Aliiha wamaali buga Huan 14: 6, le ñein lubéi lariñaga Hesusu ligía lan ‘ǘmabei, inarüni luma ibagari’. Guentó ariha waméi Huan 14:1. Hínsiñeti hamuga san bun baliihani lagumuhóun fánreinti?

Luis: Anha. Lariñaga: “Afiñe humá luagu Bungiu, afiñe huguyame nuagu”.

Antonio: Seremei. Según bérusu le, lunti san wanúadahan kaba lan wadüga? Lidan amu dimurei, gayarati san wanúadahan wafiñerun luagu Heowá o wafiñerun luagu Hesusu?

Luis: Uá. Ariñagati Hesusu mosu lan wafiñerun hawagu biángubei.

Antonio: Ítara liña. Chóuruti úara ban numa luagu ua lan buídurügü lan wariñagun luagu afiñe wamá. Mosu warufuduni.

Luis: Anha.

Antonio: Ida lubati warufuduni? Gayarati wayanuhan luagu katei le amu weyu, ida liña barihin lun? a

Luis: Maribanti.