1. Ka óundaruni labiniruboun Heowá leweñegua néchani ísüraelina le agarabaagubei lun? (Ariha huméi dibuhu le lídanbei lagumeseha arütíkulu.)

 HEOWÁ adügübalin damuriguaü kristiánu lidan furumiñeti sígulu ani ligía adügübei lun ñein lan aban áhuduraguni inarüniti uguñe weyu. Lidan arütíkulu le lubaragiñebei le furendeitiwa luagu anuadirúa lan damuriguaü hani furumiñetiña lani Kristu disipulugu leweñeguame néchani ísüraelina le ebedaagubei lun Bungiu. Kei le resibi habalin lídehan Bungiu, móunweguntiña dan le lagünrinchawagunbei Herusalén lidan irumu 70 (Luk. 21:20, 21). Katei burí le asuseredubei lidan furumiñeti sígulu larufuduñein meha le lunbei hawinwanduni lubúeingu Heowá lidan wadaani. Málühali agumuchagua ubóu le lani Satanási, ánhounti lóundarun Bungiu magumuchagunboun lidan “lagumuhóun dan” (2 Tim. 3:1). Ka uagu gayara lubéi wachoururuni?

2. a) Ka lariñagubei Hesusu luagu “saragu asufuriruni”? b) Ida luba lagumeserun “saragu asufuriruni”?

² Ariñagati meha Hesusu luagu liabin keisi urúei marihúaditi luma luagu lagumuchagüle ubóu: “Ladüga ñeinbei saragu asufuriruni le úagili libe lúmagiñe lagumeserun ubóu, úabei giñe lárigiñe” (Mat. 24:3, 21). Lanarime asufuriruni le lagumeseruba danme le layusuruniña Heowá urúeigu ubouaguna lun hagumuchun  tau “Babilónia to wéiriboun”, lóundarun sun relihión mama inarüniti ubouagu (Aruf. 17:3-5, 16). Kaba asusereda lárigiñe?

3. Lárigiñeme lagünrinchawagun relihión mama inarüniti, kaba hasufurira lumutuniña Heowá?

³ Lárigiñeme lagumuchagun relihión mama inarüniti, ábame lábürühan Satanási lau sun ubóu le lábugiñebei lubafu hawagun lubúeingu Heowá. Ariñagatu Bíbülia luagu ‘Gogu le lídanbei fulasu Magogu’: “Bachülürüba kei aban dúeri lun badouragun lau fulasu ábame bebelurun lau erei kei aban herigini hau sun bisudaranigu hama saragu gürigia”. Kei le ua tan áruma hama gefentiña luagu Heowá ani ligía sétanu le darangilatimabei ligibuagu Ubóu, genegebei ménrengunbei lan lagumuchúniwa hau. Gama lumoun, wéiribei hachara lau hagayuahan hawagu (Ese. 38:1, 2, 9-12).

4, 5. Kaba ladüga Heowá danme louchun Satanási lagumuchun hau lumutuniña?

⁴ Kaba san ladüga Heowá danme le lálugun Satanási lagumuchun hau lumutuniña? Keisi Labureme sun Ubóu, lesefurubaña lumutuniña. Ánhaña ábürüha hawagun lumutuniña, kéigubeirügüme hábürühaña lan luagun (aliiha huméi Sakaríasi 2:8). Ligíati, lesefurubadiwa Heowá hawéi lau lóufudagun. Esefuruni ligía, lagumuchuba danme le lagünrinchawagun ubóu le lani Satanási lidan Arümahedón, “wuribu le lánina óunwenbu luéyuri Bungiu le Suntigabafu” (Aruf. 16:14, 16).

⁵ Ayanuhatu Bíbülia libügürü wuribu le. Ariñagatu: “‘Aganbúati areinchuni darí lumoun lébeha ubóu, lugundun laguseragüdübaña Aburemei néchanigu, laguseragüdübaña sun gürigia, lasiadirubaña ha salufuribaña lun óunweni. [Heowá] ariñagubalin’. Lariñahare Aburemei Suntigabafu: ‘Liábinba lamiselu houn gürigia aban lárigi aban; ladagaruba aban lanarime dan lúmagiñe luéigiñe lígirugu ubóu’. Hame láfaragun Aburemei lidan weyu ligía, herederuba riwagu múarugu lúmagiñe lagumeseha ubóu lumoun lébeha. Úabei ni aban ayahuti hárigi, mabudahóunbaña lun hábunahoun; herederuba múarugu kei hádiga animaalu’” (Her. 25:31-33). Lidan Arümahedón, lagumuchaguba ubóu le lani Satanási. Ánheinti fánreinti tánina lóundarun Heowá le yaabei ubouagu magumuchagunbei, hásügürüba lumutuniña Bungiu lau ibagari.

6, 7. a) Halíagiñe san háfurida “saragu gürigia”? b) Ka aganwounduni ariha wamaalibei lidan lagumuhóun burí irumu?

⁶ Taweiridaguña lóundarun Heowá ya ubouagu lugundun buin tiña hau gürigia ha áubaña lagundaara. Chóurugüda tumuti Bíbülia woun “góunigi lumutiña [lan] Wabureme Bungiu ha richaguabaña, aganbaléi hafurieidun lun” (1 Fe. 3:12). Ani arufudatu luagu ñéinbaña lan “saragu gürigia” hadan richaguatiña hagía, gürigia ha lúnbaña háfuridun lídangiñe “óunwenbu asufuriruni” (Aruf. 7:9, 14). Aríaguatün san hungua haganagua saragu gürigia ha lúnbaña hásügürün lau ibagari lárigiñe “óunwenbu asufuriruni”?

⁷ Halíagiñe san háfurida saragu gürigia ha? Hóundarawaguña lídangiñe sun néchani, lagunfuliruña profesía le lariñagubei Hesusu keisi aban fánreinti lídangiñe liseinin lagiribudun: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Mat. 24:14). Lidan lagumuhóun dan le, anihán wadagimanu le méinitimabei tun lóundarun Bungiu; seremei wadagimanu le, furendeihaña saragu gürigia áhuduragua lun  Heowá “lau sífiri luma inarüni” (Huan 4:23, 24). Aban hénpulu, labadinagua irumu le lánina eseriwiduni 2003 luma 2012, derege hamuti hóugiñe 2,707,000 gürigia habagari lun Bungiu lidan badisei. Guentó lidan sun ubóu añahein hóugiñe 7,900,000 Gefentiña, ani añahein saragu míñunu abasiihatiña hama lidoun adamuridaguni, lídountima Aritaguagülei lánina lounwen Hesusu. Subudi wamuti mama lan wagía lunbei wibihini uéiriguni luagu lanarime awanseruni le; ‘Bungiu aweiridaguagüdübalin’ katei (1 Ko. 3:5-7). Óunwenbu wagundan luagu aganwoundeina haña lan lumutuniña Bungiu sagü irumu!

8. Ka san uagu lanarimebei haganwoundun tílana lóundarun Heowá lidan wadaani?

⁸ Wéiriti laganwoundun hanumerun lubúeingu Bungiu ladüga líderaguñanu lan lani Gefentiña (aliiha huméi Isaíasi 43:10-12). Ariñawagúaali meha: “Ha míbebañaha, hóustaruba milu; bianraü gürigia ha, ábanbaña óunwenbu néchani. Au Aburemei, nadügüba lun lasuseredun furese, danme lachülürün dan ligía” (Isa. 60:22). Furumiñe, ‘míbetiña’ meha kristiánugu ha anuadirúaañabaña, gama lumoun, aba labiniruni Heowá hapurichihan ani eibu dan aba aganwoundeina hamá (Gal. 6:16). Lau lásügürün dan, gíbetiña giñe gürigia ha lúnbaña hawinwandun ubouagu ánharutiña lun inarüni.

9. Ka lunbei wadügüni lun wibihini lubuidun ibagari le füramase tubéi Bíbülia woun?

⁹ Anihein aban lubuidun füramasei woun tidan Bíbülia, hádangiñe wamá yebe kristiánugu anuadirúaaña o hádangiñe saragu gürigia. Gama lumoun, lun wibihini lagunfulirun füramasei ligía mosu wadügüni le lamuriahabei Bungiu wámagiñe (Isa. 48:17, 18). Samina wamá hawagun ísüraelina. Góunigi lumutiña meha haganbadi lun lilurudun Moisesi, lugundun lidan lúrudu ligía anihein meha gumadi le huuti houn lidan sun habagari, kéiburi luáguti agamariduni, luagu daradu lánina bísinisi, luagu hagüriahóun isaanigu luma ligaburi hóuserun hama amu gürigia (Afu. 20:14; Fad. 19:18, 35-37; 2 Lur. 6:6-9). Ligiaméme asuseredubei uguñe weyu, dan le gaganbadi wamá lun sun lilurudun Bungiu buiti lidin woun. Ani mama aban ihürügu lagunfulirúniwa (aliiha huméi 1 Huan 5:3). Ánhawa gaganbadi lun Bungiu lóunigirubadiwa ani líderagubadiwa lun woudin “lau arufudahani le richabei” (Titu 1:13).

10. Ka uagu lunti lubéi wadireirun dan lun waturiahanu Bíbülia ani adüga wameime Guñoun lánina Áhuduraguni lidan Familia?

¹⁰ Ámuñegueinarügüti ligaburi lawanserun fánreinti tani lóundarun Heowá le yaabei ubouagu. Kei hénpulu, sagü weyu aba buídutima lan gunfuranda wamani inarüni. Ani súdiniti lun ítara lan, lugundun “ítara liña hémeri ha harumabaña kei lagumeserun larugadun, arugoungadeinatima murusun murusun darí lun larugoungadun sunsuinagubei” (Ari. 4:18). Gama lumoun, lunti wálügüdagun woungua: “Gunfuranda numuti san inarüni le tídanbei Bíbülia según iseri gunfurandaü? Aliiha numutu san Bíbülia sagü weyu? Memeniha san nanigi lun naliihanu kada iseri agumeiraguagüdüni to áfuridutu? Díreihadina san aban weyu kada dimaasu lun áhuduraguni lidan familia?”. Le linarün katei, ménrengunti ladügǘn katei burí le; mégeirügütiwa waransehani wadaani buidu. Gama lumoun, mosu wasigirun aturiahoun Lererun Bungiu, wawinwanduni le wafurendeirubei ani awanse wagíame úara tuma lóundarun Bungiu, guentotima lau yarafatimahali lan lidaani óunwenbu asufuriruni.

11. Lúmagiñe lidan binadu dan darí guentó, ida liña hasagarun lumutuniña Bungiu buiti lídangiñe hóundaragun lun háhuduragun lun?

¹¹ Busentu lóundarun Heowá lun buidu  lan lidin woun ani ligía taritaguagüdünbalin woun súnwandan lun gaganbadi wamá lun ladundehan Pábulu le: “Lunti giñe wáfaagun wíderaguniña wíbirigu lun hínsiñehabu hamá, luma lun hadügüni le buídubei. Wagía afiñetiña, moun lumuti wafalaruni hénpulu hani ha héchubaña lun midin hamá lidan wadamuridagun, lubaragiñe lira, ru wamá gurasu houn wíbirigu, guentotima lau ariha wamani luagu yarafaali lan luéyuri [Heowá]” (Ebü. 10:24, 25). Dan le meha hóundaragun ísüraelina lun háhuduragun lun Heowá, aba meha laganwoundun hasubudin luagu Bungiu. Ani barüti meha ókaasion burí ligía saragu ugundani. Kei hénpulu, samina humá luagun ugundani le lanügübei lefeduhóun tufedun Dibasein le meha adügǘbei lidan lidaani Neemíasi (Afu. 23:15, 16; Neem. 8:9-18). Uguñe weyu resibitiwa giñe libe adundehani ligía dan le woudin lidan wadamuridagun luma lidan wani adamurini. Sagá wamá buiti lídangiñe ókaasion burí le lugundun ligía íderagubaliwa akipurei wamadagua luma Bungiu luma lun gunda wamá (Titu 2:2).

12. Ida liña san lunti lan warihini chansi le wibihibei lun wapurichihani uganu buiti luáguti Larúeihan Bungiu?

¹² Lau tidan wamá lóundarun Bungiu, gúndaatiwa lau wanügüni “uganu lúmagiñeti Bungiu” houn amu gürigia (Rom. 15:16). Dan le wawadigimaridun lidan lapurichihóun “uganu lúmagiñeti Bungiu” ‘wawadigimariduña’ luma Heowá, ‘le Sándubei’ (1 Ko. 3:9; 1 Fe. 1:15). Ani dan le wapurichihan, ídehatiwa lun larihín liri Bungiu kei aban katei sánduti. Ma lubuidun chansi wanügüni “uganu buiti luáguti asalbaruni” houn amu! (1 Tim. 1:11.)

13. Ka lunbei wadügüni lun wakipuruni wamadagua luma Heowá ani kipu wameime wabagari?

¹³ Busenti Bungiu lun wabadülerun luagu luma lun wídehan lidan ámuñegueinarügü wadagimanu le tídanbei lóundarun lugundun ítara luba héreñu lan wafiñen. Ariñagati meha Moisesi houn ísüraelina: “Ru numuti sielu luma múa keisi gefentiña kóntüra huguya uguñe weyu, luagu ru naadün lan lun hanúadahan aban lídangiñe bián katei le, ibagari luma óunweni, luma lidan abinirúni luma íñarawaguni. Anúadira huméi lubeiti ibagari, lun habagaridun hau sun hadügawagun; hínsiñela Wabureme le Wabungiute hun, aganba huméi, gúnfuli humá luma, luéigiñe burí katei le dipeni lan hibagari, ítara luba habagaridun saragu lidan ageiraü le uágubei láfiñura Bungiu luagu líchugubei lan lun Abüraámü, Isaakü luma lun Hakobu ha hagüchagu” (2 Lur. 30:19, 20). Ítara liña, mosu línsiñedun Heowá woun, gaganbadi wamá lun Lererun ani badüle wagíame luagu lau úaraguni lun wibihini ibagari.

14. Ka meha lasandirubei aban íbiri luagu fánreinti tani lóundarun Heowá le yaabei ubouagu?

¹⁴ Aban íbiri gíriti Pryce Hughes, le akipurubei úaraguni lun Bungiu luma tun lóundarun, ariñagati: “Wéiriti nugundan lau nawinwandun según subudi le nibihibei luagu lisuuni Heowá lúmagiñe lubaragiñe irumu 1914 [...]. Nerederun tidan lóundarun Heowá ya ubouagu ligía katei le súdinitimabei nun. Lúmagiñe furumiñeti dan furendeitina mabuidun lan lafiñerúniwa luagu hasaminan gürigia. Dan le gunfuranda nubalin katei le, aba desidírü nan nerederun tidan lóundarun Heowá to úaraguaboun. Anihein funagia amu igaburi lun wibihini lufulesein Heowá luma labinihan?”.

15. Ka hénpulu arufudubalin ida luba lan warihini asansiruni lidan ligaburi gunfuranda wamani inarüni le tídanbei Bíbülia?

¹⁵ Anhein busén wabéi lun labiniruniwa Heowá, mosu luéigiñe wamá tóubadina lóundarun ani anha wagíame lun iseri  ligaburi gunfurandawa tan Bíbülia. Ariha wamá aban hénpulu. Lárigiñe lounwen Hesusu, güreweiti meha houn saragu kristiánugu huríu hígiruni Lilurudun Moisesi (Adü. 21:17-20). Gama lumoun, tidan ligaradan Pábulu houn Ebüréu, íderagua lumutiña lun hafiñerun luagu mama lan lau sákürifisiu le meha hadügübei según ‘lilurudun Moisesi’ harumadahóua, “lau lounwen Hesukrístu aban wéiyaasu lun sun dan luagu wafigoun” harumadahóua (Ebü. 10:5-10). Chóuruti sansi hamani hibe-agei kristiánugu huríu ligaburi hasaminan ani aba hawanserun lidan hafiñen. Ka wafurendeirubei? Mosu lan waturiahanu Bíbülia lau duari ani resibi wameime furumiñeguarügü asansiruni lidan ligaburi gunfuranda wamanu Lererun Bungiu luma lidan ligaburi wapurichihan.

16. a) Ka uagu buídubei lubéi ibagari lidan iseri ubóu? b) Kátima habusenrubei lídangiñe iseri ubóu?

¹⁶ Sun ha úaraguatiña lun Heowá luma tun lóundarun hibihiba abinirúni. Hibihiba kristiánugu anuadirúaaña óunwenbu burí abinirúni danme le harúeihan luma Kristu sielu (Rom. 8:16, 17). Ani ha hemenigibaña hawinwandun ya ubouagu hagundaaruba lidan aban lubuidun paraísu. Ma lubuidun chansi le wibihibei lun wayanuhan houn amu luagu iseri ubóu le füramasewabei! (2 Fe. 3:13.) Lidan iseri ubóu ligía, “ha ǘnabubei hanaagun houngua, hagíaba laburiña múa, habagariduba lidan darangilaü le dayarüti” (Sal. 37:11). “Hábunaguba gürigia haban ábame haganóun tidan” ani harihibei lumutuniña Bungiu “le hawadigimaribei lau háhabu” (Isa. 65:21, 22). Úaalime amudihani ni gudemei ni ilamaü (Sal. 72:13-16). Meyeedun táañame Babilónia to Wéiriboun gürigia lugundun úaarume (Aruf. 18:8, 21). Háguyuguba hilaaña ani gachansinbaña lun hawinwandun lun súnwandan (Isa. 25:8; Adü. 24:15). Ma buiti dan le lunbei liabin? Hóugiñeñadiwa míñunu gürigia ha deregeguañabaña houngua lun Heowá. Gama lumoun, lun warihini lagunfulirun füramasei burí le, lunti lasigirun kada aban wádangiñe awansera lidan lafiñen úara tuma lóundarun Bungiu.

17. Ka san lunbei wasandiruni tuagu lóundarun Heowá luma luagu áhuduraguni lun?

¹⁷ Yarafatimahali lagumuchun ubóu le. Ligíati, kipu wamá aban afiñeni le héreti ani seremei waméi Bungiu luagu sun le líchugubei woun lun wáhuduragun lun. Áyeiha waméi Dawidi, abürühati sálumu le eremuhabei: “Ábanrügüñein katei namuriahan luma Nabureme, ábanrügüñein katei nabusenrun: lun tidan nan luban Nabureme lidan sun nibagari lun náhuduragun lun lúbiñe, aríaguaneime lanarime lubuidure” (Sal. 27:4). Yarafa wamá lun Heowá luma houn lumutuniña, ani sigí wamá awansera úara tuma lóundarun.