Gíbetiña gürigia saminatiña Bungiu lan agumadihabei ubouagu. Gama lumoun, lun hamuga ítara liña lan, anihein hamuga san saragu asufuriruni? (2 Lúrudu 32:4, 5.) Arufudahatu Bíbülia lúhaburuguñein lan aban urúei wuribati ubóu. (Aliiha huméi 1 Huan 5:19.)

Ida liña san libihin urúei wuribati ligía ubafu luagu ubóu? Lidan lagumeseha sun katei, aba lebedaagun aban ánheli lun Bungiu ani aba lariñagun lun furumiñeti wügüri tuma furumiñetu würi lun lan húaradun luma lidan lebedaagun (Agumesehani 3:1-6). Aba hadügün gasu lau, aba herederun lábugiñe lugumadin. Búngiurügüñein suntigabafu garicha lun larúeihani ubóu, gama lumoun, busenti lun gaganbadi hamá gürigia lun ladüga línsiñe houn (2 Lúrudu 6:6; 30:16, 19). Híruti heigua hamá hibe-agei gürigia lidoun ligiaméme charati kei Adán tuma Ewa. (Aliiha huméi Arufudúni 12:9.)

Lígiruba san Bungiu lun lagumadiruni Satanási ubóu lun súnwandan? Maweiyasunti. Layusurubei Bungiu Hesukrístu lun laransehani sun wuribati le adüga láalibei Mafia. (Aliiha huméi 1 Huan 3:8.)

Rúhali Bungiu lúrudu lun Hesusu lun lagumuchun lau Satanási (Rómana 16:20). Ábameti Bungiu lan agumadiha ubouagu ani ladügüba lun hawinwandun gürigia kei meha labusenruni furumiñe: lidan darangilaü luma ugundani. (Aliiha huméi Arufudúni 21:3-5.)