Sun wagía saminatiwa luagu ida luba lan funa wabagari ámuñegü luma ida luba lan habagari waduheñu. Álügüdaguatiwa woungua: “Hawinwanduba san nisaanigu lidan aban ubóu le buítimati? Lagünrinchawaguba san Ubóu? Anihein san somu katei gayarati nadügüni lun buidu lan nibagari ámuñegü?”. Maribanti wabusenrun wasubudiruni óunabagülei lugundun busentiwa darangilaü luma ichouruni. Lun hamuga subudi wamani kaba lan asusereda ámuñegü, gayarati hamuga waranserun lubá le lunbei liabin.

Kábati wibiha ámuñegü? Anihein san somu gürigia gayarati lasubudiruni? Gürigia ha nadagimeinbaña áluaha hasubudiruni le lunbei lasuseredun, susereeli fiú lídangiñe katei le hariñagubei, gama lumoun, libe-agei masuseredunti. Luagu amu oubaü, ariñawagúati gayara lan lariñaguni Bungiu lau ichouruni kaba lan asusereda. Ariñagatu Lererun luagu ariñaga lani ‘le lunbei lasuseredun lúmagiñe furumiñeti dan; ani ariñagaléi le anitebei’ (Isaíasi 46:10). Susereti san le lariñagubei?

Ka uagu lunti lubéi súdini lan woun wasubudiruni átirihali lan lídangiñe lani Bungiu profesía agunfuliruti lidan binadu dan? Samina humá luagun aban hádangiñe gürigia ha awisahabaña anite lan somu liñawan dan, anhein súnwandan lubéi lasuseredun le lariñagubei, hafiñeruña hamuga san luagu? Haganbuñen hamuga san le lunbei lariñaguni luagu ligaburi dan lubá haruga? Másiñati haganbubei lan hamuga. Ítarameme, lun hamuga wíchugun fe luagu gúnfulihali lan sun lani Bungiu profesía, chóuruti busenbadiwa lan wasubudiruni lani profesía lubá ámuñegü.

LÁBÜRÜHAN ABAN ÓUNWENBU UBURUGU:

Lun hamuga lariñagun somu gürigia lagünrinchawaguba lan  aban uburugu le wéiriti lubafu luagu saragu sígulu ani aba hamuga lagunfulirun profesía ligía, ma taweiriduña hamuga hanigi gürigia? Yúsuti Bungiu aban lubúein lun lasubudiragüdün luagu lagünrinchawagun Níniwe (Sofoníasi 2:13-15). Gúnfuliti san profesía ligía? Ka hariñagubei ha abürühabaña luagu binadu sügǘ? Lidan sígulu VII lubaragiñe wadaani, kéiburi keinsi irumu lárigiñe lafuranguagüdüniwa profesía, aba hábürühan babilóniana hama médiana kóntüra Níniwe. Ariñagaali meha Bungiu luagu “lígirubei [lan] uburugu Níniwe málouga”. Íbini meha weiri lan uburugu ligía lau sun fulasu burí le geyegubei lau kéiburi 518 kilómeturu geyegua (200 maili), mígirun hamuti áganiñu hagía lun hayusuruni, ítara kei meha lagurabún. Lubaragiñe lira, aba meha hagünrinchaguni. Gayarabei hamuga meha san lariñaguni aban akutihati luáguti polítika sun le asuseredubei lun uburugu ligía lubaragiñe lasuseredun?

“ÁBAME HÁGUDAHAN HABU GÜRIGIA BUAGU”:

Kaba hamuga gayara lariñaguni liri gürigia le lunbei lágudahan habu gürigia luagu latarü, liri familia le lunbei ídangiñe lan liabin luma liri uburugu le lunbei ñeinbei lan latarü ligía, ǘrüwa-san irumu lubaragiñe lasuseredun? Lun hamuga lagunfulirun aban profesía wéiriti kei le, chóuruti layanuhóuña lan hamuga luagu le ariñagubalin lidan sun ubóu. Profeta le ayanuhabei lidan liri Bungiu ariñagati luagu ábanba lan ladügawagun Dawidi, gíriti Hosíasi, águdaha habu gürigia ligibuagu latarü lidan uburugu Beteli (1 Urúeigu 13:1, 2). Ǘrüwa sígulu lárigiñe, aba lachülürün aban ladügawagun Dawidi luagun lálana arúeihani, Hosíasi meha liri, aba iri úati kamani lan lidan dan ligía. Kei lariñaguni profesía ‘aba lóunahan Hosíasi asagarei abun burí le lídanbei umúahaü, aba láguduni ligibuagu latarü’ (2 Urúeigu 23:14-16). Gayarabei hamuga meha san lariñaguni aban gürigia profesía le ani íridalei ida luba lan lasuseredun sin lídehan aban Bungiu gabafuti?

LAGUMUCHAGUN ABAN ARÚEIHANI HÉRETI:

Lun hamuga liabin aban gürigia ayanuha hun luagu aban gürigia le úagili nasirua lan ani ligíaba lan agumucha lau aban lídangiñe uburugu le gabafutimabei, luma ida luba lan ladügüni, ma taweiriduña hamuga hanigi? Ligía meha ladügübei Bungiu: ariñaga lumuti ábanba lan wügüri gíriti Siru agumucha lau  ageiraü. Ariñagati giñe lesefurubaña lan huríu lídangiñe amudirawaguni ani ídeha ligíame lidan tábunawagun lani ténpulu to sagüráuboun. Ariñagati giñe lun lan gayara lan lárügüdüni uburugu, lamabeidagüdübei lan Siru aban lídangiñe duna le ñeinbei ani darañu luba lan lubenari uburugu (Isaíasi 44:27–45:2). Gúnfuliti san sun le ariñawagúbei lidan profesía le? Úaratiña ha abürühabaña luáguti binadu sügǘ luagu gañei lani Siru uburugu le súdinitimabei Babilónia, ani ligía lan lábürühanbei Babilónia. Adügatiña lisudaranigu Siru aban lubuidun wadagimanu lun hegeyeduni lémeri aban lídangiñe duna le éibaagubei geyegu lau uburugu Babilónia, lidan amu dimurei, aba hamabeidagüdüni duna. Ligibuagun lira, rédeiti lubenari uburugu hunren, ani ñéingiñe hebelura súdaragu. Lárigiñe, aba lesefuruniña Siru huríu ani aba líchugun gumadi lun lábunawagunya lubarieirun Herusalén. Hanarimeti meha lubuidun katei le, lugundun meseriwidunti meha Siru lun Habungiute huríu (Ésüdürasi 1:1-3). Úati gayarati líchugun aban profesía ítarati ani gúnfuli ligía kei lariñaguni luéidigia Bungiu.

Anihán ǘrüwarügü lídangiñe lani Bungiu profesía le gúnfulihalibei. Ani madiseguati lasuseredun le. Hosué, le alidihabaliña ísüraelina, ariñagati somu katei le subudi hamaali, luagu ‘gúnfulihali lan sun katei buiti le buga füramase lubéi Heowá houn. Meredeti ni ábanrügü lídangiñe le füramase lubéi magunfulirunga’ (Hosué 23:1, 2, 14). Ítara liña, subudi hamuti meha ísüraelina gúnfuliti lan sun lani Bungiu füramasei lau sun lani profesía. Ka san uagu súnwandan lubéi lagunfulirun sun le lariñagubei? Ladüga amu lan lóuserun Bungiu hawéi gürigia. Súdiniti lasubudirúniwa katei le, lugundun fiú lídangiñe lani Bungiu profesía le magunfulirungilibei, ligíaba asansirei wabagari lun súnwandan.

Dan le háluahan gürigia hasubudiruni le lunbei lasuseredun aba hayusurunu siensiasi, hakutihani ligaburi léibugun katei o hayusuruniña gürigia burí ha ariñagubaña luagu ibiha hamá subudi lúmagiñe somu erei gabafuti. Ani lárigiñe lira, libe-agei dan aba hañuurun agurabaha kaba lan asusereda (Ariñawagúni 27:1).

Ánheinti Bungiu, subudi lumuti sun katei. Subudi lumuti buidu ka lan hagaburibei gürigia luma le tídanbei hanigi. Dan le busén lan, gayarati lasubudiruni ida luba lan hóuserun gürigia o néchani. Gama lumoun, gayarati ladügün Bungiu ábanya katei: gayarati ladügün somu asansiruni lun libihini le labusenrubei. Ariñagati: “Ítara liña giñe dimurei le áfuridubei niyumulugugiñe, magiribudúnti nun madügüngalei le nabusenrubei [...;] gúnfuli lumuti le nariñagubei” (Isaíasi 55:11). Gayarati lariñawagún luagu dan le lan lariñagun Bungiu lasusereduba lan somu katei, lawisaharügüña luagu le lunbei ladügüni ámuñegü. Ani adügati lun lagunfulirun.

Anihein san somu ariñahani chóuruti luagu le lunbei lasuseredun lidan wabagari luma lidan habagari waduheñu? Lun hamuga wíchugun fe anite lan aban durumandei, chóuruti waranseruña lan hamuga. Ítara liña giñe lunti lan waranserun lubá lagunfulirun profesía burí le tídanbei Bíbülia. Awisahaali Bungiu luagu saragu asansiruni le lunbei ladügüni ámuñegü, ani menegeguati ni murusun luma le hariñagubei gürigia luagu lasusereduba lan. (Ariha huméi fánreinti le gíribei “ Le lariñagubei Bungiu luagu ámuñegü”.)

Anihein saragu profesía tidan Bíbülia le ariñagubalin kaba lan asusereda houn gürigia ubouagu, ani gayarati wasubudiruni profesía burí ligía. Bungiu guánarügü ariñagubei: “Ariñaga numuti le lunbei lasuseredun lúmagiñe furumiñeti dan [...]. Ariñagatina: ‘Lasusereduba sun le naransehabei; nadügübei sun le naritagubei nadügün’” (Isaíasi 46:10). Sun wagía gayarati wagundaarun lau aban ibagari buiti ámuñegü. Hínsiñeti hamuga san hun hasubudiruni ida luba lan? Álügüda humaña gefentiña luagu Heowá. Mama sásaamu hagía ni ayanuhatiña hama sífirigu ani úati ubafu hawagu le ñǘbuinti hámagiñe máfianu. Aturiaha hamutu Bíbülia ani gayarati hafuranguagüdüni hun le lunbei ladügüni Bungiu ámuñegü.