Ariñagati lidan lani Huan Ewanhéliu dan le lan ladibirúnbei Hesusu luagu wagabu úara hama bián wuribatiña, aba lan hamuriahan huríu luma Pilatu lun láhalachaguni hayada, ani danme lan hilaaña, ábame larariragüdüni hágubu (Huan 19:31).

Ariñagati meha Lilurudun Moisesi anhein lan adibirúa lúgubu aban gürigia wuribati luagu aban wagabu, “moun lumuti ligirún lúgubu dibiñu ñein sun áriebu” (2 Lúrudu 21:22, 23). Genegeti sigí hamani huríu ligiaméme lúrudu dan le háfarun rómana aban gürigia wuribati. Anhein meha háhalacha liyada Hesusu hau sun bián wügüriña hagía, furesetimabei meha hounwen ani gayarabei meha habunún lubaragiñe lálüdün Weyu, dan le amakürübalin lagumeseha weyu samudi.

Libe-agei dan, gürigia le lunbei lafarún dáwaguati lugudi luma lúhabu luagu aban wagabu múarugu, ani dan le hiñuraguni wagabu ligía lau, aba lasandirun aban lanarime gáriti ladüga sun lihürü lúgubu ñeinhin lidin. Ladüga dibiñu liña lan siñati lawaragun, güraburügüñein le luágubei lugudi ágüdahei lúgubu. Danti le lahalachawagún labu liyada, aba úaali lan ni kata ágüdahati lúgubu, murusun dan lárigiñe aba lounwen.

Tau meha aban chilinchádi láfara Dawidi aban hígandei gíriti Goliadi. Genegeti furendei lani tayusurún chilinchádi dan le luadigimaridunbei óunigira mudún (1 Samueli 17:40-50).

Fuatu chilinchádi lidan burí dibuhu ehiptuna luma asiriana. Adügǘwatu lau aban murusun gueru o gamisa luma biama gúrudu gürañu, aban luéigiñe kada oubaü. Ábatiha líchugun tabureme aban dübü guyeti le liseisin aban liraüraü aransu tuagu. Lárigiñe, aba lárügüdüni bián gúrudu ligía luéigiñe lígirugu, aba lagararahani lóugiñe lichügü ani aba lígiragüdün aban lídangiñe gúrudu ligía; aba láfuridun dübü ligía lau lanarime erei sügülügü luagun ágani.

Lidan fulasu burí le luéigiñebei oubaü le ñéingiñe lubéi laboucha Weyu libiti barana Mediteraniu dariwaali saragu dübü tani chilinchádi le burí meha ayusurúbei lidan binadu wuribu. Aban gürigia le gawuribuhati gayarati meha lachamuragun dübü le fureseti kéiburi 160 luma 240 kilómeturu luagu oura (100 luma 150 maili luagu oura). Ibidiñewati anhein aban lubéi tere chilinchádi tuma gimara, gama lumoun, gáfarahatu biángubei (Alidihatiña 20:16).